Ang Ipasabot sa mga Balita
“Dili sa Makita”
Ang dili pa dugayng siyentipikanhong mga pagtuki nagpanghimatuod nga ang Shroud sa Turin sa ika-14ng siglo mini. Apan “ang mga Katoliko gidasig sa pagpadayon sa pagsimba sa limin sa minatay ingong larawan sa hulagway ni Kristo, nga makahimo gihapog mga milagro,” mitaho ang The New York Times. Si Anastasio Ballestrero, ang arsobispo sa Turin, miingon: “Ang tagsaon makapuwang gahom sa hulagway ni Jesu-Kristo kinahanglang ipreserbar.”
Unsay kahulogan niini? Kini nagkahulogan nga bisag ang iglesya miadmiter nga ang namansahang larawan sa lawas sa usa ka tawo diha sa limin sa minatay dili iya ni Jesu-Kristo, bisan pa kinahanglang padayong lantawon sa matinumanong mga Katoliko nga kini ingon nga daw mao kini ang Kristo ug busa usa ka butang balaan. Ngano? Sumala kang Adam Otterbein, Romano Katolikong pari nga tagdumala sa Holy Shroud Guild, ang mga relikyas sama sa limin sa minatay makatabang sa mga magtutuo sa paghatag himaya sa usa nga gihawasan sa larawan.
Dili ikahibulong nga, bisan pa sa kakulang sa pagkatinuod niini, ang limin sa minatay magpabiling usa ka gamhanang simbolo sa pagtuo alang sa Katolikong Iglesya. “Ang mga rebulto, mga dibuho ug mga imahen . . . gihatagag tinahod nga dapit diha sa praktis sa Katoliko,” miingon ang The New York Times.
Ang Bibliya nagsuportar ba sa paggamit sa maong mga larawan diha sa pagsimba? Wala! Ang Pulong sa Diyos klarong nag-ingon: “Palayo gikan sa pagsimbag mga diyosdiyos.” (1 Corinto 10:14; itandi ang Exodo 20:4-6.) Ang mga Kristohanon gitambagan sa pagsimba sa Diyos “uban sa espiritu ug sa kamatuoran,” dili sa tabang sa pila ka larawan o relikyas. (Juan 4:24) Sa tukma, si Pablo misulat nga ang tinuod nga mga Kristohanon “nagkinabuhi sa pagtuo, dili sa makita.”—2 Corinto 5:7.
Sayop nga Panghunahuna
Aron makasunod sa kiling sa pagpaluag sa mga sukdanan sa Bibliya tali sa mga relihiyonista, “nagkadaghang mga teologo sa T.B. naglalisay nga ang Kristohanong mga iglesya nagkinahanglag seksuwal nga kausaban,” mitaho ang Star Tribune. Kining mantalaan sa Minnesota mikutlo sa mga hunahuna nga gipahayag sa iladong mga tawo sama kang John Spong, ang obispo sa Newark sa Episcopal Church of America, ug James Nelson eksperto sa seksuwal nga kalagdaan sa United Theological Seminary sa New Brighton. Ang mantalaan nangangkon nga kini ug ang ubang mga teologo mibating ang mga iglesya angay “mohatag bendisyon sa homoseksuwal nga mga kaparis diha sa mga seremoniya sa simbahan, ilhon ang ilang panaad sa usag usa diha sa mahigugmaon, moral nga mga relasyon; . . . bendisyonan sa simbahan ang hamtong batan-ong sinayoran sa kasal nga sila magpuyo diha sa mahigugmaon, nagapanaad nga mga relasyon, bisag dili-kasal”; ug “pag-uyon kon ang hamtong nga mga edaran aktibo sa sekso sa responsabling mga paagi, bisag wala-makasal sa usag usa.” Nganong nagtuo kining mga teologo nga ang maong mga kausaban gikinahanglan? Si Spong nangangkon nga “among gihatag ang among panugot sa mahilay nga kinabuhi” kon ang maong mga panag-usa wala bendisyoni.
Ang wala maalinggati ni Spong ug sa uban, hinunoa, mao nga ang mismong pagbendisyon sa maong mga panaghiusa ang nagalig-on sa pagpanugot sa mga iglesya sa maong “mahilayng kinabuhi.” Ang Pulong sa Diyos matin-aw. “Walay mga makihilawason, . . . o mga mananapaw, . . . o mga lalaki nga mohigda ipon sa mga lalaki . . . ang makapanunod sa gingharian sa Diyos.” Ang mga sumusunod ni Kristo gisugo dili lamang sa “paghunong sa pagpakig-uban” niining mga matanga sa tawo kondili gisugo usab sa “pagpalagpot sa tawong daotan” gikan sa ilang taliwala.—1 Corinto 5:11, 13; 6:9-11.
Usa ka Dakong Panginahanglan
Karong tuiga, ang taho sa kaihapan sa Britains’ Free Church Federal Council mibutyag dugang pag-us-os sa iyang 15 ka kaubang mga denominasyon. Sa unang higayon, ang mga membro mius-os kapin sa usa ka milyong numero, mitaho ang Church Times, mantalaan sa Church of England. Ang rason? Bisag nag-ingon ang mga iglesya nga sila may panaad sa “mayoridad . . . kansang dakong panginahanglan mao ang paglukat,” miingon ang artikulo nga “ang Free Churches nagpadayon sa paggugol ug daghan kaayong panahon ug kusog sa . . . mga sosyalidad.” Sumala sa Church Times, “kon nagkaus-os ang mga Iglesya, kini dili tungod sa pagkawalay kalamposan sa ilang tinuig nga mga perya o kay wala suportahi ang mga produkisyon sa ilang dramatikong katilingban: kondili tungod kay wala nila hatagig igong kaseryoso ang ilang ministeryo sa paglukat.”
Ang relihiyosong mga lider sa mga adlaw ni Jesus wala usab maghatag seryosong pagtagad sa ilang ministeryo. Tukmang gisaway sila ni Jesus nga naghimo “sa pulong sa Diyos nga walay pulos” tungod sa ilang mga tradisyon. Siya miingon nga sila mga maut, kinsa “naghimaya sa Diyos sa ilang mga ngabil bisan pa ang ilang mga kasingkasing halayo kaayo gikan kaniya.”—Marcos 7:6, 7, 13.
Ang tinuod nga mga ministro ni Jehova nga Diyos, hinunoa, mga debotado “sa ministeryo sa pulong.” Seryoso nilang gihatagag pagtagad ang sugo ni Jesus sa “paghimog mga tinun-an,” ug sila nagsunod sa pananglitan sa mga apostol, kinsa “nagpadayon nga walay hunong sa pagpanudlo ug sa pagwali sa maayong balita bahin kang Kristo.” Alang sa tinuod nga mga Kristohanon, kining buluhatona mao ang labing hinungdanon.—Buhat 5:42; 6:4; Mateo 28:19, 20.