Makatabang Sila Kanimo sa Pagwali
DIHANG gisugo ni Jesus ang iyang mga tinun-an sa pagwali, lagmit sila walay ideya sa bug-os nga kahulogan kon unsay iyang gisugo kanila nga buhaton. (Mateo 10:7) Sa masinugtanon, gisunod nila ang iyang panig-ingnan ug milakaw “gikan sa siyudad ngadto sa siyudad ug gikan sa balangay ngadto sa balangay, nga nagwali ug nagmantala sa maayong balita sa gingharian sa Diyos.” (Lucas 8:1) Kadto ang gamay nga sinugdanan sa kalihokan sa pagwali nga miuswag hangtod nga kadto nagdala sa maayong balita sa Gingharian sa pagtagad sa katawhan sa tibuok yuta.
Sa unang mga adlaw sa Kristohanong kongregasyon, ang pagwali sa pasukaranan maoy binaba. Ang mga tinun-an ni Kristo nakigsulti sa tanan nga namati. “Sa matag adlaw sa templo ug sa balay-balay sila nagpadayong walay hunong sa pagtudlo ug pagmantala sa maayong balita mahitungod kang Kristo, si Jesus.”—Buhat 5:42.
Ang balaang pagpaluyo dayag sa pagkaagi nga sila nakahimog mga milagro. (Buhat 14:3) Daghang tawo nangaayo sa lawasnon ug dayon nagpabilin aron magpatalinghog sa mga pulong sa espirituwal nga pagpang-ayo. Ingong sangpotanan, “ang mga magtutuo sa Ginoo padayon nga nadugangan.”—Buhat 5:14-16.
Pagsabwag sa Maayong Balita Karong Adlawa
Sa pagkamatay sa mga apostoles, ang mga gasa sa pagpang-ayo ug mga dila nahanaw. Apan nakausab ba kadto sa sugo nga gihatag ni Jesus ngadto sa iyang mga tinun-an? Wala! Gisugo niya sila sa “paghimog mga tinun-an sa mga tawo sa tanang nasod,” ug samtang sila magabuhat niana, siya magauban kanila “sa tanang adlaw hangtod sa pagkatapos sa sistema sa mga butang.” (Mateo 28:19, 20) Karong adlawa, ang Kasulatanhong ebidensiya tin-aw nga kita nagapuyo sa kataposan sa sistema sa mga butang. Gituman ba ni Jesus ang iyang saad nga siya magauban sa iyang mga tinun-an sa buluhatong paghimog tinun-an? Ang ebidensiya nagaingon nga oo!
Ang pag-abot sa binilyong molupyo sa yuta sa binabang paagi lamang maoy buluhatong imposible nga mahimo sa tawo. Busa, ang tabang gitagana sa dagway sa mga basahon sa Bibliya nga mabasa sa mga tawo diha sa kaugalingon nilang mga balay. Pananglitan, sa 1879 sa dihang gusto sa usa ka pundok sa sinserong mga estudyante sa Bibliya nga ang mensahe sa Gingharian sa Diyos makaabot sa uban, misugod sila sa paggamag mga basahon, sama sa magasin sa Bibliya nga karon nailhang Ang Bantayanang Torre, ingon man sa tracts nga naghisgot mahitungod sa mga ulohan sa Bibliya. Sa sinugdan gigamit nila ang komersiyal nga mga magpapatik sa paggama sa mga basahon. Sa pagka 1920 sila may kaugalingong imprentahan diha sa usa ka inabangan nga tinukod, ug sa pagka 1927 sila nakatukod sa ilang kaugalingong pabrika sa pag-imprentag mga Bibliya, mga basahon, mga pulyeto, mga magasin, ug tracts aron magamit ni bisan kinsa nga buot motabang sa pagtuman sa sugo nga gihatag ni Jesus ngadto sa iyang mga tinun-an.
Nga wala mahadlok sa mga magsusupak nga miingon nga ang maong proyekto sa pag-imprenta mapakyas, ang Watch Tower Society nakapalihok sa mga planta sa imprenta sa mga kayutaan sa tibuok yuta. Sa miaging tuig lamang, sila nakagamag kapin sa 63,000,000 ka Bibliya, libro, ug mga pulyeto ug kapin sa 582,000,000 ka magasin diha sa kapin sa 200 ka pinulongan.
Ang mga basahon nga ilang gipatik bililhon kaayo aron sa pagtagbaw sa espirituwal nga mga panginahanglan sa mga tawo. Ang mga libro gipatik nga gidesinyo nga abton ang mga tawo nga may linaing mga punto de vista ug mga tinuohan. Minilyong mga batan-on nakaangay sa Akong Basahon sa mga Estorya sa Bibliya ug sa Ang Imong Pagkabatan-on—Pagpahimulos sa Labing Maayo Niini. Ang Paghimo sa Imong Pamilyahanong Kinabuhi nga Malipayon bililhon kaayo sa paglig-on sa pamilyahanong mga bugkos ug pagtudlo sa mga bana ug mga asawa sa pagpakitag labaw nga gugma sa usag usa. Ang usa ka tabang sa mga bag-ohan nga buot himoon ang kamatuoran nga ilang kaugalingon mao ang Nahiusa sa Pagsimba sa Matuod nga Diyos. Ang mga tawo nga nagbasa niining basahona nakadiskobre nga gihimo nga sila maghunahuna ug mangatarongan sa lalom pa bahin sa ilang relasyon uban sa Diyos.
Ang basahong subsob gitumong nga “asul nga bomba,” Ang Kamatuoran nga Motultol sa Kinabuhing Dayon, may talagsaong epekto diha sa mga kinabuhi sa minilyon. Kon pila pa ang matandog sa pag-alagad sa Diyos ingong sangpotanan sa mga kamatuoran sa Bibliya nga ilang matun-an gikan niining basahona tan-awonon pa.
Sa pagkakaron, kadtong nagabuhat sa pagwali sa maayong balita ubos sa pagdumala ni Jesus gitabangan sa librong Ikaw Mabuhing Walay Kataposan sa Paraiso sa Yuta. Ang mga pagtuon sa Bibliya gidumala uban sa minilyon, nga daghan kanila nagapahiuyon sa ilang mga kinabuhi sa mga sukdanan sa Bibliya.
Pananglitan, ang usa ka 68-anyos nga lalaki sa New York State nakontak sa iyang igsoong lalaki sa Colorado, kinsa nagpadalag mga basahon sa Watch Tower aron iyang mabasa. Ang tawo nagbasa dayon sa tanang librong gipadala ug nalipay sa pagsugod sa pagtuon diha sa librong Mabuhing Walay Kataposan sa dihang miduaw ang usa ka Saksi sa iyang balay. Sa tibuok niyang kinabuhi, kining tawhana nakakolektag bililhong mga armas nga makasaysayanhon, apan sa nabasa niya nga kadtong magaalagad kang Jehova dili na makakat-on sa gubat, gibaligya niya dayon ang iyang mga armas nga dakog alkansi. (Isaias 2:4) Dugang pa, tapos sa kusog nga pagtabako sulod sa 53 ka tuig, giundang niya kana sa iyang pagkabasa nga kana dili makapahimuot kang Jehova. (2 Corinto 7:1) Sa nasayran niya pinaagi sa pagtuon nga kinahanglang ipakig-ambit niya ang maayong balita sa uban, siya nangandam nga gikulbaan sa pagduaw sa iyang anak lalaki ug umagad nga babaye aron makigsulti kanila ug sa iyang mga apo. Sa pagsulod sa kuwartong higdaan sa bisita, siya nalipay sa pagkakita sa librong Mabuhing Walay Kataposan sa ibabaw sa lamesa. Ang iyang umagad nga babaye nagtuon niana apan wala makatino kon unsaon sa pagsulti niana kaniya. Maayo kaayo ang pag-uswag sa duruha.
Sa Espanya, ang usa ka tigomanan sa mga Saksi ni Jehova natukod nga tapad sa usa ka simbahang Katoliko. Nasuko ang pari. Miingon siya nga kon nasayran pa niyang magtukod ang mga Saksi ug tigomanan didto, paliton unta niya ang yuta aron mapugngan sila sa paggamit niana. Ang maong Kingdom Hall may displehan nga may gidispley nga librong Mabuhing Walay Kataposan. Sa kada adlaw ang usa ka sakop sa kongregasyon nagpakli sa usa ka panid. Ang mga tawo sa lungsod mohapit ug mobasa sa bag-ong panid. Ingong sangpotanan, daghang tawo nagpakitag interes, ug nasugdan ang mga pagtuon sa Bibliya. Oo, ang libro nahimong mahilomon apan epektibong saksi.
Ang Bahin sa mga Magasin sa Pagsabwag sa Maayong Balita
Sa dihang ang unang isyu sa The Watchtower napatik sa Hulyo 1879, 6,000 lamang ka kopya ang giimprenta. Bisan pa niana, ang gamay nga grupo nga nagbasa niana maikagong nagsulti sa uban bahin sa mga unod niana. Karong adlawa, kapin sa 3,500,000 ka Saksi ni Jehova ang nagagamit sa 13,000,000 ka kopya nga gipatik sa matag isyu sa pagmantala sa Gingharian sa Diyos ingong bugtong paglaom sa katawhan.
Ang magasin dakong tabang sa pagpatin-aw sa lainlaing ulohan sa Kasulatan. Ang nagapadayong serye sa Ang Bantayanang Torre nagaapil sa kinabuhi ug ministeryo ni Jesus. Kini nakatabang sa minilyon sa paghanduraw ug pagsabot nga mas maayo sa importanteng mga asoy sa Ebanghelyo.
Ang espesyal nga serye diha sa Ang Bantayanang Torre ug Pagmata! gilaraw sa pag-abot sa mga kasingkasing sa mga batan-on. Ang seryeng “Buhi ang Pulong sa Diyos” nagtudlog daghang prinsipyo ug nagtin-aw sa daghang isyu diha sa mga hunahuna sa katawhan. Ang seryeng “Mga Batan-on Nangutana . . . ” naghisgot sa tinuod-kinabuhing mga pangutana, dayon naghatag ug praktikal nga mga tubag nga gipaluyohan sa mga kasulatan sa paggiya sa panghunahuna ug mga lihok sa mga batan-on niining masamokong mga adlaw. Sa dihang ang mga Saksi ni Jehova nag-apil niining mga artikuloha sa pagtanyag sa mga magasin, ang sanong labing paborable.
Apan dugang sa mga artikulo mahitungod sa linaing mga ulohan, ang tinuod nga unod sa Ang Bantayanang Torre mao ang pangunang mga artikulo, nga nagalig-on sa pagtuo ug kombiksiyon sa tanang matuod nga Kristohanon. Kining mga artikuloha nga gibase sa Kasulatan nagatagana sa makapakombinsir nga pamatuod sa pagkaduol sa kataposan niining sistema sa mga butang, nagahisgot sa pagkatuman sa mga tagna sa Bibliya ug nagatanyag sa nagausisa-sa-kasingkasing nga tambag kon sa unsang paagi ang mga Kristohanon magakinabuhi tungod sa mga panahon. Kay puno sa maong kahibalo, ang mga Kristohanon determinado nga gamiton diha sa buluhatong pagwali ang mga butang ilang nakat-onan.
Kon hangtod kanus-a pa mopadayon kining buluhatong pagwali una pa moabot ang kataposan niining sistema sa mga butang, kita wala masayod. Apan, kita makaseguro nga ang mga basahon nga gipatik ug gipanagtag sa mga Saksi ni Jehova padayon nga dakong tabang sa mga Kristohanon samtang ginasunod nila ang sugo sa ilang Pangulo, si Jesus.