Usa ka Resolusyon
Ang tumatambong sa “Balaang Hustisya” nga mga Kombensiyon dayag mas daghan kay sa miaging tuig, diin dihay 6,443,597 ang nagtigom diha sa 1,098 ka dapit sa tibuok-kalibotan, ug 93,822 ang gibawtismohan. Ang pakigpulong, “Ang Daotag-Dungog nga ‘Bigaon’” gihatag diha sa tanang “Balaang Hustisya” nga mga Kombensiyon, gisundan sa pagluwat, sa kapin sa 20 ka pinulongan, sa matahom nga pagkailustrar nga 320-panid nga librong Pinadayag—Hingpit nga Sangkoanan Niini Haduol Na! Gisultihan sa mamumulong ang mga tigpatalinghog: “Gamita kining bag-ong libro diha sa inyong personal ug sa organisasyonal nga mga pagtuon. Gamita usab, kini, sa pagpahayag sa kalibotan nga gihukman na ang Dakong Babilonya, nga ang mga nasod karon nagaatubang sa Armageddon, ug nga ang dakong kinatayoktokan moabot sa halangdong pagmando sa Gingharian ni Jehova pinaagi ni Kristo ug sa iyang pangasaw-onon. Ikaw malipay sa pagkadungog ug sa pagkakita niining mga butanga, ‘kay ang tinudlong panahon duol na’!”—Pinadayag 1:3.
Kita, kinsa sukad sa 1914 nagkinabuhi na sa “adlaw sa Ginoo” ug niining panahon sa balaang paghukom, nalipay sa labing dakong pribilehiyo sa tanan, sa pag-alagad sa Soberano Ginoong Jehova ilalom sa iyang Hari sa mga hari, si Jesu-Kristo. (Pinadayag 1:10) Ingong MGA SAKSI NI JEHOVA, among pamatud-an nga:
(1) AMONG GIKASILAGAN ang pasipala nga nahatag sa Dakong Babilonya, ug sa Kakristiyanohan ilabina, diha sa ngalan sa usa nga matuod ug buhing Diyos, si Jehova. Alang kanamo, AMONG IDASON sa bug-os-kasingkasing, ang mga pulong sa Pinadayag 4:11: “Ikaw takos, Jehova, nga among Diyos, sa pagdawat sa himaya ug kadungganan ug kagahom.”
(2) AMONG GIKASILAGAN ang pagpabilin sa Kakristiyanohan sa Babilonyanhong mga doktrina, ilabina sa tulo-ka-persona nga diyos, sa pagkadili-mamatay sa tawhanong kalag, sa walay kataposang pagsakit diha sa impiyerno, sa nagkalayong purgatoryo, ug sa pagsimba sa mga larawan—sama sa Madonna ug sa krus. Kaharmoniya sa Pinadayag 22:18, 19, AMONG LIG-ONG TUMANON ang sinulat nga Pulong sa Diyos ug ang tanan nga nasulod niana.
(3) AMONG GIKASILAGAN ang mga pilosopiya ug mga buhat nga nagabatok sa Diyos, nga komun kaayo diha sa Kakristiyanohan, sama sa ebolusyon, mga pagdugang ug dugo, sa paghulog sa batang gisabak, pagpamakak, kadalo, ug pagkalimbongan. Diha sa atong pagsimba ug sa paagi sa kinabuhi, AMONG PASIDUNGGAN ang among Maglalalang, si Jehova nga Diyos, ang Labing Makagagahom, kansang mga buhat gibatbat diha sa Pinadayag 15:3 ingong “matarong ug matuod.”
(4) AMONG GIKASILAGAN ang kapakyasan sa Kakristiyanohan sa pagpamati sa mga mensahe ni Jesus ngadto sa pito ka kongregasyon diha sa Pinadayag kapitulo 2 ug 3 bahin sa mga butang sama sa sektaryanismo, pagsimbag mga diyosdiyos, pakighilawas, sa Jezebel nga impluwensiya, sa pagkadagaang, ug sa pagkadili-mabinantayon. Sa among bahin, AMONG PATALINGHOGAN UG SUNDON ang “gipamulong sa espiritu ngadto sa mga kongregasyon.”
(5) AMONG GIKASILAGAN ang imoralidad ug pagkamatinugoton sa Kakristiyanohan ug sa iyang mga klero, ug among gidawat ang tin-aw nga paghukom ni Jehova nga gipamulong diha sa Pinadayag 21:8 nga kadtong magpadayon sa ilang kahugaw—mga makihilawason, mga bakakon, ug susama niini—bug-os laglagon. AMONG BUG-OS-KASINGKASING ITUBOY ang mga sukdanan sa Bibliya bahin sa sekso, kaminyoon, ug panimalaynong kinabuhi.
(6) AMONG GIKASILAGAN ang kasiglohan nang espirituwal nga pagpamampam sa mga klero sa Dakong Babilonya pinaagi sa pakigkunsabo sa mga magmamando sa kalibotan aron makabatog gahom, bahandi, ug sa madaogdaogong pagmando ibabaw sa komung mga tawo. AMONG GIHUKOM ang pagtabang sa mga matinud-anog kasingkasing sa pagsunod sa panawag sa manulonda diha sa Pinadayag 18:4: “Gumula kaniya, katawhan ko.”
(7) AMONG GIKASILAGAN ang dakong pagkasad-an sa dugo nga miresultag kapin sa 100 ka milyong mga kinabuhi nga gihalad diha sa gubat niining sigloha lamang, diin dakog kapasanginlan niini ang pakighilawas sa dakong bigaon uban sa politikanhong mga gahom. KAMI NALIPAY nga ang tinudlong panahon duol na alang sa Diyos sa pagpakanaog ug hudisyal nga paghukom sa Dakong Babilonya, sumala sa tin-awng gipadayag sa Pinadayag 18:21-24.
Ingong mga Saksi ni Jehova, AMONG GIISIP NGA KALIPAY UG PRIBILEHIYO ang pagpahayag sa kalibotan nga sa 1914 “ang gingharian sa kalibotan nahimong gingharian sa atong Ginoo [Jehova] ug sa iyang Kristo.” (Pinadayag 11:15) AMONG GIHUKOM nga magpadayong maisogon sa pagpahibalo sa gipahayag nga mga paghukom ni Jehova diha sa Dakong Babilonya sa pagpasidaan sa umaabot nga gubat sa Diyos sa Armageddon. KAMI DETERMINADO sa pagpalanog, sa makusog nga tingog ug “ngadto sa tanang nasod ug banay ug pinulongan ug katawhan,” sa malipayong balita nga ang “usa ka bag-ong langit ug bag-ong yuta” duol na alang sa pagpanalangin sa matinumanong katawhan. (Pinadayag 14:6; 21:1) KAMI NALIPAY nga ingong resulta niining proklamasyon, usa ka dakong panon nga kapin sa tulo ka milyon gikan sa tanang kanasoran karon nagkahiusa uban kanamo sa tibuok globo. Uban sa manulonda nga naglupad sa tunga sa kalangitan, kaming tanan mopahayag: “Kahadloki ang Diyos ug kaniya ihatag ang himaya, tungod kay ang takna sa iyang paghukom miabot na, ug busa simbaha ang Usa nga naghimo sa langit ug yuta ug sa dagat ug sa mga tuboran sa tubig.”—Pinadayag 14:7.
[Mga Pangutana sa Pagtuon]
1. Unsa ang gikalipayan karon sa mga Saksi ni Jehova?
2. Diha sa matag usa sa pito ka punto sa Resolusyon, ipahayag (a) kon unsay gikasilagan sa mga Saksi ni Jehova ug (b) kon unsang positibong pagdason ang gihimo sa mga Saksi.
3. (a) Unsang kalipay ug pribilehiyo ang nabatonan sa mga Saksi ni Jehova? (b) Unsa ang gihukom sa mga Saksi? (c) Unsa usab ang atong determinadong buhaton? (d) Unsang kalipay ug deklarasyon ang giaambitan sa mga Saksi ni Jehova?