Paghimo sa Bug-os-Panahong Pag-alagad nga Usa ka Karera
Sumala sa Giasoy ni Max Larson
NIADTONG 1910 ang akong inahan, kansang mga ginikanan pulos nangamatay na, mibiya sa Denmark ug misakayg barko paingon sa Tinipong Bansa. Siya niadto 18 anyos pa lang, dili makamaog Iningles, ug walay kailang tawo nianang nasora.
Sa pag-abot sa New York City, misakay siyag tren paingon sa South Dakota, usa ka biyaheng kapig 2,400 kilometros. Sa South Dakota, diin may sityo sa mga Danes, nahibalag niya ang usa ka lalaki nga nahimo nakong amahan. Sila naminyo niadtong Septiyembre 20, 1911.
Sayo sa 1913 si Papa sa kinaugalingon mipaingon sa Montana sakay sa may-tabon nga karwahe aron sa pagtrabaho sa yuta didto. Gitukod niya didto ang usag-kuwartong balayng troso. Sa nahuman kadto sa ting-init, ang akong inahan miabot sakay sa tren aron moduyog kaniya, kauban sa akong igsoong lalaki, si Norman, nga pila pa ka bulan ang edad.
Duha ka tuig sa ulahi gimabdos ang ikaduhang anak. Sumala sa akong gisulting pasiaw, ako “mitabang” kang Mama sa pag-atop, sanglit kana ang iyang gibuhat ngadto sa usa ka sumpay sa balay sa adlaw una pa ako mahimugso. Sa sunod adlaw, Abril 29, 1915, sa dihang si Papa miabot gikan sa uma alang sa paniudto, si Mama miingon: “Sa akong hunahuna manganak na ako.” Niadtong hapona ako nahimugso. Apan sa pagkagabii, sa dihang nahiuli na usab si Papa, si Mama mibakod na ug nakadigamog panihapon alang kaniya!
Tulo ka tuig sa ulahi ang akong igsoong babaye si Jean natawo sa samang dapit. Sa sunod tuig ang among pamilya mibalhin ngadto sa silangang Montana, diin si Papa miabang sa usa ka uma. Sa 1921 ang ikaduha kong igsoong babaye, si Laverna, natawo, ug kaming upat ka bata nagdako sa luag nga kapatagan sa Montana.
Ang Pagkaumol sa Akong Kinabuhi
Ang akong mga ginikanan maoy Luterano, ug matag Dominggo kaming unom manimba. Apan sa wala madugay ang usa ka silingan, usa ka Internasyonal nga Estudyante sa Bibliya, sumala sa pagtawag sa mga Saksi ni Jehova niadto, misugod sa pagbisita kang Mama ug pagtuon sa Bibliya uban niya. Tapos sa duha ka tuig, gidawat ni Mama ang mga kamatuoran sa Bibliya nga iyang nahikat-onan, ug sa 1925 siya nabawtismohan sa usa ka pasungan sa mga kabayo. Si Papa o kaming mga anak wala modawat sa iyang bag-ong-nakaplagang pagtuo, apan kaming tanan nalipay nga dili na mosimba sa Luteran nga Simbahan. Si Mama kanunay mosulti kanamo: “Dili ninyo buot moalagad kang Jehova, apan ayaw gayod ninyo paglapasa ang iyang mga balaod.” Kadtong tambaga nakatabang namo nga dili masugamak sa away.
Ang among pamilya sa unom nag-uma sa 320 ektaryang yuta pinaagig 14 ka kabayo ug usa ka traktora. Wala kamiy koryente o sistema sa tubo sa sulod sa balay, ug ang tanan namong tubig kinahanglang hakoton gikan sa usa ka atabay sa 4 kilometros nga gilay-on. Tungod sa hulaw sa sinugdan sa katuigang 1930 ug kapakyasan sa pag-ani sulod sa upat ka tuig, mihukom kami sa pagbalhin ngadto sa Washington State. Sa pagpangandam sa pagbalhin, kinahanglang balhinon namo ang pila ka butang sa umahan ug panimalay gikan sa Montana ngadto sa Washington. Busa ang akong asaynment mao ang pagkuyog sa tren ug pagtino nga ang among mga kabayo gipakaon ug gipainom ug tubig sa biyahe. Tapos sa unom ka adlaw, ako sa kataposan nakaabot sa kasadpang baybayon sa Washington.
Didto ako mitabang kang Papa sa pagtukod ug pagpalihok sa usa ka dairy farm. Tapos sa mga usa ka tuig, sa edad 20, ako nagkinaugalingon, nga nagdrayb ug mga trak sa kabukiran ug migugol usab ug unom ka bulan sa Alaska ingong inhenyero sa barko. Sa 1938 ang akong igsoong babaye si Jean ug ako nakabatog mga trabaho sa Seattle ug nagpuyo sa usa ka sakayan nga balay sa Lake Union. Niadtong ting-inita, si Mama, kinsa nagpuyo 80 kilometros ang gilay-on, mitambong sa tinuig nga kombensiyon sa mga Saksi ni Jehova sa Seattle. Sanglit ang dapit sa kombensiyon malakaw ra gikan sa among sakayan nga balay, gidapit namo siya nga moestar uban namo. Siya miestar, ug kami miuyon nga motambong sa kombensiyon.
Paghukom Bahin sa Akong Karera
Sa gabii sa Sabado, si Joseph F. Rutherford, presidente niadto sa Watch Tower Bible and Tract Society, midiskurso sa ulohang “Mga Mahigugmaon sa Pagkamatarong.” Ang iyang pakigpulong naghisgot sa bug-os-panahong ministeryo, o payunir nga pag-alagad. Human niadto si Bill Griffith, nga naglingkod sa akong tupad, miingon: “Max, anaa ra. Magpayunir ta!”
“Okey,” ako mitubag. “Atong buhaton kana.”
“Nangomedya ka ba?” nangutana si Bill.
“Wala,” mitubag ako. “Tapos sa pagkadungog nianang pakigpulonga, ako kombinsido nga kini ang matarong butang nga buhaton.”
“Apan dili ka man gani magmamantala. Dili ka man bawtismado.”
“Tinuod, apan bag-o pa silang mipahibalo nga adunay bawtismo ugma. Magpabawtismo ako ugma.”
Busa, nga mahinamon, miadto kami sa Departamento sa Pag-alagad sa Kanataran aron makakuha sa among mga aplikasyon sa payunir. Didto nahibalag namo si Brader Van Amburgh, ang sekretaryo-tesorero sa Sosyedad. Sa gisultihan namo siya kon unsay among gibuhat, kami iyang gidala sa daplin ug nakigsulti kanamo sama sa usa ka amahan. “Karon ayaw ninyog buhata kini nga daw kini eksperimento o panimpalad,” matud niya. “Ginabuhat ninyo ang matarong nga butang, apan sulod kamo niini nga daw kini ang inyong tibuok-kinabuhing karera.” Ug kadtong tambaga kanunay nga nakatabang kanakog dako. Busa among gihatag ang among mga aplikasyon, ug sa sunod adlaw, Hunyo 5, 1938, ako nabawtismohan.
Unang Payunir nga Asaynment
Sa sunod adlaw, Lunes, gipahibalo ko ang akong amo nga ako mohunong sa akong trabaho aron mahimong ministro. Gigugol ko kadtong unang semana sa mabinantayong pagtuon sa kinaulahing basahon sa Sosyedad, nga nag-ulohang Enemies, ug mitambong sa tanang tigom. Sa ikaduhang semana, gitun-an ko ang sunod kinabag-ohang basahon, ang Riches. Ug sa ikatulong semana, akong nadawat ang akong payunir nga asaynment, nga mao ang Raymond, Washington.
Didto, si Bill ug ako nakakaplag sa usa ka grupo sa 27 nga naghimog mga tigom diha sa balay sa usa sa mga Saksi. Ang among mga instruksiyon mao ang pagdumala sa tanang tigom ug pagtabang sa mga magmamantala ug pagbansay nila sa pagdumalag mga pagtuon sa Bibliya, nga usa ka bag-ong buluhaton niadtong panahona.
Sa unang Tigom sa Pag-alagad, sa Huwebes, gihangyo ko ang alagad sa kompaniya, sumala sa pagtawag niadto sa nagadumalang magtatan-aw, nga mokuyog nako sa sunod gabii aron mosulay sa pagsugod sa usa ka pagtuon sa Bibliya. Siya miingon nga siya okupado. Busa si Bill ug ako milakaw nga kamikami lang. Sa pagbalik, kami gipahunong sa usa ka kinasang-an aron makaagi ang parada sa American Legion. Sa among katingala, ang pangulo sa parada mao ang alagad sa kompaniya.
Niadtong unang Dominggo, gisugdan ko ang akong unang pagtuon sa Bibliya uban sa usa ka lalaki. Human niadto, gidumala ko ang akong unang Pagtuon sa Watchtower sa kongregasyon. Unya ra ba, kadto maoy sa Hunyo 1, 1938, nga isyu, nga nagpailaila sa teokratikanhong administrasyon sulod sa mga kongregasyon. Sa 27 nga nakig-uban, 3 lamang ang midawat sa bag-ong teokratikanhong kahikayan.
Usa ka Pamilya sa mga Payunir
Wala madugay sa akong pagsugod sa pagpayunir, ang akong mga igsoong babaye ug akong igsoong lalaki, si Norman, misulod usab sa bug-os-panahong ministeryo. Si Norman ug ang iyang asawa nagbaligya sa ilang uma, nagpalit ug 3.7 metros nga treyler, ug uban sa ilang tres-anyos nga anak babaye, si Joan, nanglakaw aron sa pagsangyaw. Lain pay ato, sa dihang sila nagtrabaho sa Raymond sa 1941, si Norman misulat nako nga ang 24 nga misupak sa teokratikanhong kahikayan mibulag ug mikuyog sa usa ka apostatang grupo. Bisan pa niana, kadtong unang pagtuon nako sa Bibliya niadto mao ang alagad sa kompaniya!
Ang anak babaye ni Norman si Joan ug iyang bana, si Maurice O’Callaghan, karon anaa sa ilang ika-24ng tuig sa pagduawg mga kongregasyon diha sa buluhatong sirkito. Ang akong manghod nga babaye, si Laverna, mitungha sa ika-12ng klase sa misyonaryong tunghaang Gilead sa 1949 ug natudlo sa Italya. Ang sayong kalamposan sa misyonaryong buluhaton didto misangpot sa iyang pagkapalagpot ngadto sa Switzerland, diin siya nagapuyo gihapon uban sa iyang bana.
Tinguha sa Mas Dakong Pag-alagad
Tapos sa pag-alagad nga regular payunir sa duha ka bulan, ako natudlo sa buluhatong espesyal payunir. Mikuyog kang Bill ug nako niadtong panahona mao si Warren Henschel, ang magulang nga lalaki ni Milton Henschel. Si Milton karon maoy usa ka membro sa Nagamandong Lawas sa mga Saksi ni Jehova.
Maoy sa unang bulan sa espesyal nga pagpayunir nga ako mihapit usa ka gabii sa pagduaw kang Albert Hoffman. Siya ang rehiyonal, o nagapanaw, nga magtatan-aw, ug nagpuyo sa usa ka treyler kauban sa iyang asawa, si Zola, tabok sa karsada gikan sa Kingdom Hall. Sulod niadtong katuigan sa Depresyon, kadaghanan nga ang mga basahon ibaylo namog mga pagkaon. Niadtong adlawa nakabaylo akog usa ka dakong basket sa peras, mao nga miduaw ako kang Brader Hoffman ug nangutana kaniya kon gusto ba niyag pipila. Siya nalipay kaayo ug ako gipadayon.
Kadto maoy mga alas 9:00 sa dihang gisuginlan niya ako bahin sa Bible House (nga karon gitawag Bethel), ang hedkuwarter sa kalibotan sa mga Saksi ni Jehova sa Brooklyn, New York. Sa kataposan, ang iyang asawa miingon: “Nasayod ba kamog unsa nang orasa karon? Alas 4:30.” Nag-estoryahay kami sa tibuok gabii! Una matulog sa dapit sa kisame sa Kingdom Hall, ako misulat nga nangayog aplikasyon sa Bethel, ug migawas dayon ako ug gipadala sa koreyo ang akong hangyo.
Sa matag adlaw akong giampo kana kang Jehova, ug tulo ka bulan sa ulahi ako nalipay sa pagkadawat sa akong sulat sa pagdapit ngadto sa Brooklyn Bethel. Sa pagpangandam sa biyahe, gihatag ko ang akong kotse ngadto sa akong igsoong babaye si Jean, nga sa maong panahon usa na usab ka espesyal payunir. Sulod sa unom ka adlaw ug unom ka gabii, ako misakay sa bus agi sa duha ka bagyo sa niyebe sa Montana ug sa Dakotas ug sa kataposan nakaabot sa New York City, Enero 14, 1939.
Pag-alagad sa Bethel
Ako gilista sa alagad sa Bethel, si Grant Suiter, ug dayon gipadala ngadto sa pabrika aron moreport kang Nathan Knorr, ang alagad sa pabrika. Ang una kong asaynment mao ang pagbugkot sa mga karton sa libro diha sa Departamento sa Shipping. Sa ikaduhang semana, ako naasayn ngadto sa dapit sa rotary-press nga makina sa imprenta. Miingon si Brader Knorr: “Kon makatuon ka sa pagpaandar niining makina sa imprenta sa unom ka bulan, ikaw ang mahimong operetor, sanglit ang operetor karon maoy ibutang sa bag-ong makina sa imprenta.” Nakakat-on ako ug nagkalipay sa bug-os sa pagpaandar sa makina sa imprenta.
Tapos sa usa ka tuig ug tunga diha sa pressroom, si Brader Knorr mianha sa imprentahan usa ka adlaw ug miingon: “Max, gusto ba nimong motrabaho sa opisina?”
“Oy, Brader Knorr, kana ang kataposang trabaho nga akong pilion. Apan kon mao kana ang akong asaynment, himoon ko kanang panguna kong interes.”
“Report nako sa opisina sa buntag sa Lunes,” siya mitubag.
Ako didto sukad niadto. Nahauna, ako mitrabaho ingong luyoluyo ni Brader Knorr, ug dayon sa dihang namatay si Brader Rutherford sa Enero 8, 1942, si Brader Knorr nahimong presidente, ug ako natudlong magtatan-aw sa pabrika. Ako niadto 26 anyos ug may tulo ra ka tuig nga kasinatian sa Bethel. Busa gibati ko ang kabug-at sa responsabilidad.
Bisan pa niana, ang dinihogang mga magtatan-aw sa lainlaing mga departamento sa pabrika mahigugmaong nagtabang nako. Ang ilang mapaubsanon, matinabangong tinamdan nakapalalom ug dako sa akong gugma ug pagpabili kanila. Ang panguna kong tinubdan sa tabang ug pagbansay mao si Brader Knorr. Sulod sa kapin sa 35 ka tuig, hangtod sa iyang pagkamatay sa 1977, nakapribilehiyo ako sa pagtrabaho uban niya diha sa mga kalihokang pamatigayon sa pagpamatik ug pagpanukod sa Sosyedad. Siya may talagsaong katakos sa pagdumala, ug gitabangan niya akog dako sa pagtuman sa akong asaynment.
Sa Atubangan sa Opisyales sa Gobyerno
Panahon sa Gubat sa Kalibotan II, dihay dakong kanihit sa galamitong materyales nga gikinahanglan namo sa pagpadayon sa among buluhaton sa pagpatik. Busa, gihimo ko ang ubay-ubayng biyahe ngadto sa Washington, D.C., aron makigtagbo sa mga Hunta sa Produksiyon sa Gubat ug sa mga komite sa Senado. Mihangyo ako kanila sa papel ug sa ubang suplay, ug si Jehova nagpanalangin ug dako sa maong mga paningkamot.
Sa usa ka higayon gihimo ko ang akong presentasyon pinaagi sa pagpasundayag sa lainlaing mga panid gikan sa iladong mga mantalaan nga nag-anunsiyog dili-hinungdanong mga butang. nga nagtudlo sa usa ka tibuok-panid nga anunsiyo sa kupo nga balhibo diha sa pangunang mantalaan sa New York, ako miingon: “Ang gidaghanon sa papel nga gamiton alang sa maong anunsiyo sa usa ka edisyon sa Dominggo katumbas sa katibuk-ang ekstrang tonelada nga among gihangyo alang sa tibuok nga tuig.”
“Napahayag nimo pag-ayo ang imong punto,” mitubag ang usa ka senador. Ingong resulta sa pagpanalangin ni Jehova sa maong mga biyahe, kami wala gayod makapahunong sa among mga makina sa imprenta panahon sa gubat tungod kay nahutdan sa papel o sa ubang suplay. Apan, dayag, wala kami niadto magkinahanglag daghan kaayong suplay sa papel sama sa among gikinahanglan karong adlawa.
Gipadakong Pasilidad sa Pabrika
Napulog-duha ka tuig una ako mosulod sa Bethel, ang Sosyedad mitukod sa iyang unang walo-ka-andanang pabrika sa 117 Adams Street, nga mikobre sa katunga sa usa ka bloke sa siyudad. Apan sa pagka 1949 gikinahanglang tukoron ang nuybe-andanang pabrika ug opisina sa nabiling katunga sa maong bloke sa siyudad. Ang bloke napuno sa usa ka dakong pabrika nga may duolag 15,000 metro kuwadrado nga luna sa salog.
Maoy niadtong panahona nga ako natudlo sa pagdumala sa pagpanukod alang sa Sosyedad dinhi sa hedkuwarter. Sa Brooklyn kami niadto may usa ra ka tinukod alang sa opisina ug mga kalihokan sa pabrika ug usa ka residensiyal nga tinukod. Apan karon, 40 anyos sa ulahi, kami may kapin sa 10 ka tinukod alang sa pabrika ug kalihokan sa opisina ug mga 20 ka residensiyal nga tinukod dinhi lang sa Brooklyn!
Sa sinugdan sa katuigang 1950, gisulayan namo ang pagbaton sa propiedad sa tabok sa dalan ngadto sa amihanan sa among tinukod sa 117 Adams Street, apan wala modawat ang tag-iya sa among tanyag. Ngani, siya dili na pahangyo, sanglit gibanabana niya nga ang Sosyedad moapas sa iyang taas nga prisyo. Mao nga kami miliso sa among pagtagad ngadto sa bloke sa silangan sa among pabrika sa Adams Street, tabok lang sa Pearl Street. Kadto usa ka luna nga nalangkoban sa walo ka separadong lote. Ang matag tag-iya kinahanglang saboton nga separado, apan gibuksan ni Jehova ang dalan aron makuha ang tanang walo ka propiedad sa usa ra ka tuig sa aberids lamang nga bili nga $97 matag metro kuwadrado!
Sa maong dapit gitukod sa Sosyedad ang iyang 13-andana nga pabrika sa 77 Sands Street sa 1955 ug 1956. Kadto ang ikaduha namong pabrika, ug tungod niadto ang among luna sa salog mikapin sa doble nga nahimong 33,000 metro kuwadrado. Ugaling, sanglit ang organisasyon kusog ug tubo, naamgohan nga sa dili madugay among gikinahanglan ang dugang lugar. Busa sa 1958 gipalit namo ang pabrikang naglungtad na sa eskina sa Prospect ug Pearl ug nagsugod paggamit niana ingong pondohanan.
Karon ang bugtong lugar nga nabilin diin kami makakonektar ngadto sa among ubang tinukod pinaagig mga taytayan ibabaw sa mga kalye mao ang lugar sa amihanan nga gisulayan namo sa pagpalit nga sayosayo. Naamgohan namo nga ang tag-iya lagmit maningkamot gihapon nga makabaton sa iyang sobra ka mahal nga prisyo kon ang Watchtower Society ang mosulay sa pagpalit niana. Busa gihangyo namo ang lain nga ahente sa yuta nga mosulay sa pagpalit niana. Gihikay niya ang prisyo sa pagpalit nga ubos kaayo kay sa among gitanyag. Di na mistil isulti pa, ang tag-iya nasuko kaayo sa nasayran niya nga ang titulo sa ulahi gibalhin ngadto sa Watchtower Society.
Niadtong 1966 ug 1967, gitukod namo sa maong lote ang diyes-andanang pabrika nga may 21,000 metro kuwadradong luna sa salog. Karon kami may upat ka bloke sa siyudad nga may mga tinukod sa pabrika—ang tanan konektado sa ibabaw-sa-kalyeng mga taytayan. Sa ulahi, niadtong 1983 ug 1986, gipalit namo ang duha ka tinukod sa pabrika tabok sa mga kalye pahabagatan, nga ibabaw niana nakatukod kamig 49 metro nga taytayan nga nagakonektar niining mga tinukora ngadto sa among upat ka ubang pabrika. Kining unom konektadong pabrika dunay 95,000 metro kuwadradong luna sa salog, o mga 9 ektarya. Niadtong 1983 gipalit usab namo ang dako kaayong 93,000 metro kuwadradong tinukod sa Furman Street, sa pantalan pila ka bloke ang kalayo, diin ang among pasilidad sa shipping nahimutang karon.
Pagkabaton sa Hugpong sa mga Opisina
Ang laing makaiikag nga kasinatian sa akong pakigsabot sa mga pagpamalit ug propiedad mao ang Squibb Pharmaceuticals nga hugpong sa pulo ka tinukod nga konektado sa usag usa. Human sa among pagpalit, upat kanila ang giguba, ug ang usa ka bag-ong tinukod gihiusa uban sa naglungtad nang tinukod nga nahimong 25 Columbia Heights, ang hedkuwarter karon sa Watch Tower Society. Kini ang pagkahitabo sa pagpalit niining propiedara.
Sa pagka 1969 kami nanglantaw sa pagpadako sa dugang sa among pasilidad sa patikanan. Apan maayo ang ekonomiya sa negosyo, busa, sa giteleponohan ko ang matag tag-iya sa propiedad sa lugar, walay mausa ang interesadong mobaligya.
Niadtong panahona, ako miadto sa North Carolina, diin ang galingan sa papel nahimutang nga nagsuplay sa among papel alang sa Bibliya. Didto nakahisgot ako sa usa sa mga tawo sa galingan sa among panginahanglan ug yuta sa Brooklyn. Sa sulagma ang igsoong lalaki sa maong tawo maoy personal nga higala sa usa sa mga tag-iya sa hugpong sa mga tinukod sa Squibb. Gihimo niya ang gikinahanglang mga pakigkontak ug dayon gipahibalo ako nga sa paghibalik sa Brooklyn, tawgon ko gayod ang maong tawo.
Sa gihimo ko kadto, ang tawo mipamatuod nga ang Squibb nagplano, sa nahaigong panahon, sa pagbaligya sa iyang mga propiedad sa Brooklyn ug pagbalhin sa gawas sa siyudad. Siya miingon nga kon sila andam na, siya motawag ra kanako, ug kami magkasabot. Tapos sa ubay-ubayng mga bulan ang tawag miabot, ug ako giingnan nga sila andam nang mobaligya ug kami moadto sa ilang opisina sa sunod adlaw.
Si Brader Knorr ug ako nagsabot ug mihukom kon unsang prisyoha ang among gihunahuna nga ibayad. Sa panagtagbo sa sunod adlaw, kami gisultihang ang prisyo dili mahangyo. “Gusto namo ang tulo ka milyong dolyar nga cash,” matud nila. Gisulayan namo ang pagpatim-aw nga wala matingala, sanglit kana ubos kaayo kay sa prisyo nga andam namong ibayad. Di na mistil isulti, ang pagpalit gihimo dayon. Niadtong panahona, kami bag-o pang nakatapos sa pagtukod sa among upat-milyong-dolyar nga bag-ong pabrika, apan sa dihang ang katawhan sa Ginoo nahibalo sa among dugang panginahanglan sa salapi, ang salapi daling nabatonan.
Dugang Residensiyal nga mga Tinukod
Sa katuigang 1950, nakapalit kamig propiedad tabok sa kalye gikan sa 124 Columbia Heights ug sa 1959 ug 1960 nagtukod sa usa ka dakong bag-ong residensiyal nga tinukod. Apan sukad 1965 nahimong mas lisod ang pagtukod ug bag-ong mga residensiya. Niadtong tuiga ang gobyerno nagtudlo sa lugar diin nahimutang ang Bethel nga usa ka lugar nga makasaysayanhon, usa ka mohon. Kana misangpot sa hilabihang mga pagpiot sa pagtukod ug pagbag-o. Bisan pa niana, sa tabang ni Jehova kami sa kanunay nakatagana sa among mga panginahanglan.
Niadtong 1967, pananglitan, miaplay kami alang sa sayes-andanang residensiyal nga tinukod sa 119 Columbia Heights. Tungod sa lagda sa mga mohon, gikunhoran na namo ang among unang giplanong 12 ka andana ngadto sa 6. Ugaling, ang lokal nga mga awtoridad sa maong panahon nagtinguha nga labing menos amo kanang kuhaag usa pa ka andana.
Sa Hunyo, gikontak ko ang presidente sa distrito sa Brooklyn, kinsa miingon nga kon makapahimutang kami sa pundasyon sa dili pa ang miting sa Septiyembre sa Hunta sa Kalkulasyon, ang kinatas-ang hunta sa gobyerno sa siyudad, maningkamot siya nga ipadayong unom ka andana ang among tinukod. Ang among organisasyon sa pagtukod gipakusgan namog maayo, ug kami nakabubo sa mga pundasyon sa pagka Septiyembre.
Ang presidente sa distrito nagtawag kanako sa adlaw una husayon sa publiko ang among kaso. Gihangyo niya nga kami maatua sa City Hall duha ka oras sa dili pa sugdan sa Hunta sa Kalkulasyon ang publikong miting niini ug makigkita kaniya sa likod. Busa si Brader Knorr ug Brader Suiter, ang among sekretaryo-tesorero, ug ako miadto sa City Hall sayo kaayo sa pagkasunod buntag. Samtang gihisgotan namo ang labing maayong paagi sa pagpresentar sa among kaso atubangan sa Hunta sa Kalkulasyon, ang usa ka teknikalidad mitungha nga naglangkit sa Komisyon sa Plano sa Siyudad. Gihimo ang pagtelepono aron tin-awon kadto. Dihadiha, ang komisyonado sa plano sa siyudad miingon nga siya manaog aron sulbaron mismo ang kahimtang. “Sanglit aduna unyay dakong pagsupak sa publiko sa inyong kaso,” siya miingon, “Moboluntaryo ako sa paghawas sa Watchtower Society atubangan sa Hunta.”
Natural nga kami nalipay sa iyang tanyag. Karon, ang paagi atubangan sa Hunta sa Kalkulasyon mao nga ilang tawgon ang mga kaso sa ilang kalendaryo alang sa adlaw, ug kon may mga pagsupak nga madunggan, nan ang kaso ioktaba hangtod sa hapon. Kon walay mga pagtutol, hukman dayon nila ang kaso. Ang among kaso gitawag sayo sa buntag, ug ang komisyonado sa plano sa siyudad mitindog ug miingon ngadto sa alkalde: “Ako ang mosulti alang sa Watchtower Society.”
“Nasayod ka nga dili among paagi nga itugot ang diskusyon sa dihang ang kaso tawgon una [kasagaran nga ang diskusyon himoon sa hapon],” mitubag ang alkalde. “Ugaling, nasayod ko nga okupado ka kaayo, Komisyonado, busa himoon ko ang eksepsiyon ug ihatag ang imong hangyo.” Ang komisyonado mipadayon sa pagpresentar sa among kaso, ug ang Hunta sa Kalkulasyon mibotar nga ang tanan pabor sa among hangyo. Samtang kami migawas sa lawak nga husayanan, ang abogado sa kontra nagdalagan nga nagsinggit: “Duna koy usa ka oras nga argumento batok niining kasoha.” Apan kadto ulahi na kaayo! Kami milabay ra, nga nagpasalamat kang Jehova tungod sa kadaogan.
Igaingon ko nga maoy magantihon kaayong pribilehiyo latas sa katuigan ang paghawas sa Sosyedad niining mga transaksiyona. Ug maoy dakong kalipay ang pagkakita sa dako kaayong pag-uswag sa tibuok-kalibotang buluhaton sa pagwali nga tungod niana gikinahanglan ang pagpalit niining tanan nga tinukod. Ang usa ka dakong tabang sa pag-atiman niining mga butanga mao ang pagkahimo nakong bise-presidente sa Watchtower Bible and Tract Society of New York, Inc., niadtong Enero 1, 1977.
Malipayon sa Bethel nga Pag-alagad
Sukad sa una kong pag-abot sa Bethel niadtong 1939, ang pamilyang Bethel midako gikan sa mga 185 ngadto sa kapin sa 2,800 regular nga membro sa Brooklyn ug kapin sa 900 sa Watchtower Farms! Kadaghanan ako suknaon: “Unsay nakatabang nimo sa pagpabilin sa Bethel sa 50 anyos?” Ang akong tubag kanunay mao: “Ako walay laing gihunahuna gawas sa pag-alagad sa Bethel.”
Gawas pa, ang aplikasyon alang sa pag-alagad sa Bethel nga akong gipel-apan ug gipirmahan nangutana: “Mouyon ka bang mopabilin sa Bethel hangtod nga ikaw kuhaon sa Ginoo?” Siya wala pa magkuha nako, mao nga ako ania pa nga nagakalipay sa pag-alagad kang Jehova. Sukad sa adlaw sa akong dedikasyon, ako determinado nga himoon ang tibuok-panahong pag-alagad nga akong tibuok-kinabuhing karera.
Sa una nakong mga tuig sa Bethel, ang mga kahikayan wala magtugot sa kaminyoon, mao nga, sama sa daghan pang uban, ako nakontento sa pagkaulitawo ug sa pag-alagad sa Bethel. Ugaling, sa dihang ang polisa sa pamilyang Bethel nausab, nga nagtugot sa pagminyo, giminyoan ko si Helen Lapshanski niadtong Abril 7, 1956. Siya misulod sa Bethel sa 1951. Gipabilhan namo pag-ayo ang panag-uban nga may pagtinabangay nga gihatag namo sa usag usa.
Sayo sa among kaminyoon, si Helen gitakboyan sa multiple sclerosis, ug sa katuigang dili pa dugay ang sakit migrabe. Apan sa tabang sa usa ka walker ug gipaandar-sa-bateriyang kareton, siya makalakawlakaw. Siya nagpadayon sa paghupot sa talagsaon, masadyaong espiritu ug nakig-ambit sa trabaho sa Bethel kada adlaw, nga nagaalagad sa opisina sa Balayng Bethel.
Sa katuigan sa among pagkabata, nga nagtubo pa, ang akong igsoong babaye si Jean ug ako suod kaayo ug nagbuhat nga magkauban. Busa, siya determinado kanunay nga mosunod kanako, ug niadtong 1943 siya gidapit sa Bethel. Niadtong 1952 siya ug si Russell Mock nagminyo, ug silang duha nagaalagad dinhi nga kauban namo ingong mga membro sa pamilyang Bethel.
Hugot kong gituohan nga ang Bethel mao ang labing maayong dapit sa yuta niining bahina sa umaabot nga yutang Paraiso. Wala ko gayod pagbasoli bisan sa usa ka gutlo nga gihimo ang tibuok-panahong pag-alagad nga akong tibuok-kinabuhing karera. Pagkamakalipay ang pagtan-aw ug pagpakig-ambit sa dakong pagtubo sa yutan-ong organisasyon ni Jehova! Maoy akong determinasyon, sa tabang ni Jehova, sa pagpadayon sa paghimo sa Bethel nga akong balay ug pagkugi sa tibuok kalag sa pagpauswag sa intereses sa Gingharian.
[Kapsiyon sa panid 30]
“Hugot kong gituohan nga ang Bethel mao ang labing maayong dapit sa yuta niining bahina sa umaabot yutang Paraiso”
[Mga hulagway sa panid 24, 25]
Ibabaw: Ang propiedad sa 360 Furman Street, nga gipalit sa 1983
Ubos: Ang propiedad sa Columbia Heights nga among gipalit gikan sa Squibb Pharmaceuticals niadtong 1969
Wala: Ang akong pangunang tinubdan sa tabang ug pagbansay mao si Brader Knorr
Ubos: Sa pagka 1986 among nakonektar ang unom ka tinukod sa pabrika pinaagig ibabaw-sa-kalyeng mga taytayan
[Hulagway sa panid 27]
Ang pabrika human nga kini gipadako niadtong 1949
[Hulagway sa panid 30]
Among adlaw sa kasal