‘Among Nabuhat ang Angay Namong Mabuhat’

SUMALA SA GIASOY NI GEORGE COUCH

Human Nga Gigugol Namo Ang Buntag Sa Balay-balay Nga Pagsangyaw, Ang Akong Kauban Mipagawas Ug Duha Ka Sanwits. Sa Pagkahuman Namog Kaon, Mihulbot Akog Sigarilyo Aron Manigarilyo. “Unsa Ka Na Ka Dugay Sa Kamatuoran?” Nangutana Siya. “Kagabii Ang Unang Tigom Nga Akong Natambongan Sukad,” Giingnan Ko Siya.

AKO natawo sa Marso 3, 1917, sa usa ka uma mga 50 kilometros silangan sa Pittsburgh, Pennsylvania, T.B.A., duol sa gamayng lungsod sa Avonmore. Didto gipadako sa akong mga ginikanan ang upat nako ka igsoong lalaki, usa ka igsoong babaye, ug ako.

Kami wala makadawat ug dakong relihiyosong pagbansay. Usa ka higayon misimba ang akong mga ginikanan, apan sila mihunong pagsimba sa dihang kaming mga bata gagmay pa. Hinuon, kami nagtuo sa Maglalalang ug ang among pagkinabuhi ingong pamilya nagtuman sa pangunang mga prinsipyong makaplagan diha sa Bibliya.

Ang labing maayong pagbansay nga akong nadawat gikan sa akong mga ginikanan maoy bahin sa responsabilidad​—kon unsaon pagdawat ug pagtuman niana. Mahinungdanon kana sa kinabuhi sa uma. Apan ang among kinabuhi dili lunlon trabaho. Kami nagpahimulos sa makapalig-on nga lulinghayaw, sama sa pagdula sa basketbol ug besbol, pagsakayg kabayo, ug paglangoylangoy. Nihit ang kuwarta niadtong mga adlawa, apan makapahimuot ang kinabuhi sa uma. Kami nagtungha sa usag-kuwartong eskuylahan samtang diha sa elementarya ug nagtungha sa lungsod sa hayskul namong katuigan.

Usa ka gabii ako naglakaw sa lungsod kuyog sa usa nako ka higala. Ang usa ka nindot-ug-dagway nga dalaga migawas sa iyang balay nga mitimbaya sa akong higala. Ako gipailaila niya kang Fern Prugh. Sa kakombenyente, siya nagpuyo sa bloke diin nahimutang ang hayskul. Kadaghanan nga sa pag-agi nako sa iyang balay, si Fern mag-atiman sa mga buluhaton sa gawas. Dayag, siya kugihan, nga nakapadayeg nako kaniya. Naugmad namo ang suod nga panaghigala ug gugma sa usag usa ug naminyo sa Abril 1936.

Pagkakontak sa Kamatuoran sa Bibliya

Sa wala pa ako matawo, dihay usa ka tigulang nga babaye nga gimaltratar sa mga tawo sa lungsod tungod sa iyang relihiyon. Ang akong inahan mobisita kaniya ma-Sabado inig-adto sa lungsod aron sa pagpamalit. Si Mama maglimpiyo sa iyang balay ug siya ang sugosugoon, nga naghimo niana hangtod ang babaye namatay. Ako nagtuo nga si Jehova nagpanalangin kang Mama kay siya maluloton kaayo niadtong bayhana, kinsa Estudyante sa Bibliya, sumala sa ngalan niadto sa mga Saksi ni Jehova.

Usa ka panahon human niadto, ang batang anak nga babaye sa akong iyaan kalit nga namatay. Ang simbahan wala kaayo makapahupay sa akong iyaan, apan usa ka silingan nga Estudyante sa Bibliya nakapahupay kaniya. Ang Estudyante sa Bibliya misaysay kaniya kon unsay mahitabo sa dihang ang usa ka tawo mamatay. (Job 14:​13-15; Ecclesiastes 9:​5, 10) Tinubdan kadto sa dakong kahupayan. Ang akong iyaan, sa baylo, nakigsulti kang Mama bahin sa paglaom sa pagkabanhaw. Kadto nakahaling sa interes ni Mama, sanglit ang iyang mga ginikanan namatay man sa bata pa siya ug maikagon siyang mahibalo kon unsay mahitabo sa usa ka tawo panahon sa kamatayon. Kadtong kasinatiana nagsilsil diha kanako sa kahinungdanon nga pahimuslan kanunay ang kahigayonan sa pagsangyaw sa dili-pormal nga paagi.

Sa katuigang 1930, si Mama nagsugod pagpamati sa mga sibya sa radyo sa buntag sa Dominggo ni Joseph F. Rutherford, presidente niadto sa Watch Tower Bible and Tract Society. Niadtong mga tuiga, gisugdan sa mga Saksi ang balay-balayng buluhaton sa dapit nga among gipuy-an. Ilang ipahimutang ang mabitbit nga ponograpo sa among tugkaran ilalom sa landong sa kahoy ug ipatokar ang naplakang mga wali ni Brader Rutherford. Ang maong mga plaka ug ang Bantayanang Torre ug Golden Age (karon Pagmata!) nga mga magasin nagbuhi sa interes ni Mama.

Pila ka tuig sa ulahi, sa 1938, usa ka postkard gipadala sa mga suskritor sa Bantayanang Torre nga nagdapit kanila alang sa usa ka espesyal nga tigom sa usa ka pribadong balay mga 25 kilometros ang kalayo. Gusto ni Mama nga motambong, busa si Fern ug ako ug duha sa akong mga magulang lalaki mikuyog kaniya. Si John Booth ug si Charles Hessler, nagapanawng mga magtatan-aw sa mga Saksi ni Jehova, mihatag ug mga pakigpulong alang sa mga usa ka dosena kanamo. Human niadto, gisugdan nila pag-organisar ang usa ka grupo nga mosangyaw sa pagkabuntag. Walay mausang miboluntaryo sa pagkuyog kanila, busa si Brader Hessler mipili kanako ug nangutana, “Mahimo bang mokuyog ka namo?” Wala ako masayod sa eksakto kon unsay ilang buhaton, apan wala ako makahunahuna ug katarongan nga dili gayod ako makatabang kanila.

Nagbalay-balay kami hangtod sa mga udto, ug unya gipagawas ni Brader Hessler ang duha ka sanwits. Nanglingkod kami sa ang-ang sa simbahan ug misugod pagkaon. Maoy human sa akong paghulbot niadtong sigarilyo nga nasayran ni Brader Hessler nga usa pa lang ka tigom ang akong natambongan. Sa among balay siya nanihapon niadtong gabhiona mismo ug gihangyo kami nga dapiton ang among mga silingan alang sa panaghisgot sa Bibliya. Human sa panihapon, iyang gihimo ang pagtuon sa Bibliya uban namo ug gihatag ang usa ka pakigpulong ngadto sa grupo sa mga napulo ka silingan nga nanganha. Gisultihan niya kami nga angayng duna kamiy pagtuon sa Bibliya kada semana. Bisan pag wala mouyon niana ang among mga silingan, gihikay nako ug ni Fern nga magbaton ug senemanang pagtuon sa Bibliya sa balay.

Pag-uswag Diha sa Kamatuoran

Wala madugay human niadto, si Fern ug ako migula sa pagsangyaw sa kanataran. Kami didto sa likod nga lingkoranan sa sakyanan, ug bag-o pa namong nadagkotan ang mga sigarilyo sa dihang ang akong magulang nga lalaki milingi kanamo ug miingon: “Bag-o ko pang nahibaloan nga dili diay manigarilyo ang mga Saksi.” Dihadiha, gilabay ni Fern ang iyang sigarilyo sa bentana​—ang akoa akong gitapos pagyupyop. Bisan pag gusto namong manigarilyo, wala na gayod kami mopunit pag-usab ug sigarilyo.

Human sa among bawtismo sa 1940, si Fern ug ako didto sa usa ka panagkatigom diin gitun-an namo ang usa ka artikulong nagdasig sa pagpayunir, sumala sa pagtawag sa bug-os-panahong buluhaton sa pagsangyaw. Sa pagpamauli namo, usa ka brader ang nangutana: “Nganong dili man mo magpayunir ni Fern? Walay makababag kaninyo.” Wala kami makasupak kaniya, busa gitanyag namo ang among kaugalingon. Gitunol nako ang 30-adlawng pahibalo sa akong gitrabahoan, ug gihimo namo ang mga kahikayan sa pagpayunir.

Gikonsulta namo ang Watch Tower Society bahin sa dapit nga kami angayng mag-alagad, ug unya mibalhin kami sa Baltimore, Maryland. Didto usa ka balay alang sa mga payunir gimentinar, ug ang bayranan alang sa pagpuyo ug pagkaon maoy $10 ang bulan. May gamay kaming natigom nga kuwarta nga abi namog makaigo kanamo hangtod Armagedon. (Pinadayag 16:​14, 16) Kon buot sabton, kami naghunahuna kanunay nga duol na kaayo ang Armagedon. Busa sa pagsugod namo sa pagpayunir, kami mibiya sa among balay ug mihunong sa kanhing mga pangagpas.

Nagpayunir kami sa Baltimore gikan sa 1942 hangtod 1947. Kusog ang pagsupak sa buluhaton sa mga Saksi ni Jehova niadtong mga tuiga. Inay mosakay sa among kotse paingon sa kabalayan sa among mga estudyante sa Bibliya, may panahong magpadrayb kami hangtod sa balay sa among mga estudyante sa Bibliya. Sa maong paagi dili mahiwa ang mga ligid sa among kotse. Walay mausa nga moangay sa maong pagsupak, bisan pa niana makaingon ako nga malipayon kami kanunay sa pagsangyaw sa kanataran. Ngani, kami nagpaabot ug diyutayng paukyab diha sa pagbuhat sa buluhaton sa Ginoo.

Sa wala madugay nahurot namog gasto ang tanang kuwartang among natigom. Nadaot ang mga ligid sa among kotse, ug ingon man ang among mga sinina ug sapatos. Nasakit kami sa duha o tulo ka higayon sulod sa tagdugayng mga yugto. Dili sayon nga magpadayon, apan wala gayod kami maghunahuna nga moundang. Wala gani kami maghisgot niana. Gimenosmenosan namo ang ubang mga butang sa kinabuhi aron makapabilin kami sa pagpayunir.

Mga Kausaban sa Asaynment

Niadtong 1947 kami mitambong sa kombensiyon sa Los Angeles, California. Samtang didto, ang akong magulang lalaki nga si William ug ako gihatagan matag usa ug sulat nga nagtudlo kanamo sa nagapanawng buluhaton sa pagduaw ug pagtabang sa mga kongregasyon. Wala kami makadawat ug espesyal nga pagbansay alang sa maong buluhaton niadtong panahona. Kami nangadto lang. Sa sunod pito ka tuig, si Fern ug ako nag-alagad sa Ohio, Michigan, Indiana, Illinois, ug New York. Niadtong 1954 kami gidapit nga motungha sa ika-24 nga klase sa Gilead, usa ka tunghaan alang sa pagbansay ug mga misyonaryo. Samtang nagtungha, si Fern gitakboyan ug polyo. Ikalipay, siya naayo ra, ug kami naasayn sa nagapanawng buluhaton sa New York ug Connecticut.

Samtang nag-alagad kami sa Stamford, Connecticut, si Nathan H. Knorr, ang presidente niadto sa Watch Tower Society, mihangyo kanamo nga mogugol sa hinapos-sa-semana uban niya ug sa iyang asawa, si Audrey. Gipapanihapon nila kamig lamiang bipstik uban ang dekorasyon. Amo silang nahimamat sayosayo pa, ug igoigo ang akong pagkaila kang Brader Knorr sa pag-amgo nga may giplano siya sa iyang hunahuna gawas pa sa pagpakig-uban kanamo ug sa panihapon. Sa taudtaod niadtong gabhiona siya nangutana kanako, “Gusto ba ninyong mosulod sa Bethel?”

“Dili ako segurado; wala ako masayod pag-ayo sa kinabuhi sa Bethel,” mitubag ako.

Human sa pagpalandong bahin niana sulod sa ubay-ubayng semana, gisultihan namo si Brader Knorr nga mosulod kami kon maoy iyang gusto. Sa sunod semana, among nadawat ang usa ka sulat sa pagreport sa Bethel sa Abril 27, 1957, ang among ika-21ng anibersaryo sa kasal.

Niadtong unang adlaw sa Bethel, si Brader Knorr mihatag kanakog tin-awng direksiyon kon unsay gidahom. Giingnan niya ako: “Dili ka na alagad sa sirkito; ania ka dinhi aron motrabaho sa Bethel. Kini ang labing hinungdanong buluhaton nga kinahanglang imong buhaton, ug buot namong gamiton nimo ang imong panahon ug kusog sa pagpadapat sa pagbansay nga imong madawat dinhi sa Bethel. Buot namong kamo magpabilin.”

Makahuloganon ang Kinabuhi sa Bethel

Ang unang asaynment nga akong nabatonan maoy sa mga Departamento sa Magasin ug Koreyo. Sa ulahi, human sa mga tulo ka tuig, si Brader Knorr nagpahibalo kanako sa pagreport sa iyang opisina. Iya akong gipahibalo niadto nga ang tinuod nga hinungdang ako gipasulod sa Bethel maoy aron magtrabaho sa balay. Ang iyang mga instruksiyon maoy prangka kaayo, “Ania ka dinhi aron dumalahon ang Balayng Bethel.”

Ang pagdumala sa Balayng Bethel nagpahinumdom kanako sa mga leksiyong gitudlo kanako sa akong mga ginikanan samtang ako nagtubo pa sa uma. Ang usa ka Balayng Bethel sama kaayo sa regular nga panimalay. Anaay mga sinina nga labhan, mga pagkaon nga lutoon, mga plato nga hugasan, mga higdaan nga hiposon, ug uban pa. Ang organisasyon sa balay naningkamot sa paghimo sa Bethel nga usa ka hayahayng dapit nga puy-an, nga matawag sa usa ka tawo nga iyang balay.

Nagtuo ako nga adunay daghang leksiyon nga hikat-onan sa mga pamilya sa paagi sa pagpalakat sa Bethel. Mosayo kamig bangon sa buntag ug sugdan ang among adlaw uban ang espirituwal nga mga hunahuna pinaagi sa paghisgot sa inadlawng teksto sa Bibliya. Gidahom kami nga magkugi ug magkinabuhi sa timbang apan puliking pagkinabuhi. Ang Bethel dili samag usa ka monasteryo, ingon sa paghunahuna tingali sa pipila. Daghan ang among mahimo tungod sa among naeskedyul nga paagi sa pagkinabuhi. Daghan ang nag-ingon nga ang pagbansay nga ilang nadawat dinhi nakatabang kanila sa ulahi sa pagdawat ug mga responsabilidad diha sa ilang mga pamilya ug sa Kristohanong kongregasyon.

Ang batan-ong mga lalaki ug mga babaye nga mosulod sa Bethel mahimong iasayn sa pagpanghinlo, paglaba, o trabaho sa imprentahan. Ang kalibotan tingali magpatuo kanamo nga ang maong hago nga buluhaton magpaubos ug dili nindot. Bisan pa niana, ang mga batan-on sa Bethel nakapabili nga ang maong mga giasayn nga buluhaton kinahanglanon aron ang among pamilya moobra sa tukma ug malipayong paagi.

Ang kalibotan tingali magpasiugda usab sa hunahuna nga gikinahanglan nimo ang katungdanan ug kadungganan aron mahimong tinuod nga malipayon. Sayop kana. Kon atong buhaton kon unsay giasayn kanato nga buhaton, kita ‘nagbuhat sa angay natong mabuhat,’ ug atong madawat ang panalangin ni Jehova. (Lucas 17:10) Atong masinati ang tinuod nga katagbawan ug kalipay kon atong hinumdoman ang katuyoan sa atong buluhaton​—ang pagbuhat sa kabubut-on ni Jehova ug pauswagon ang intereses sa Gingharian. Kon ato kanang hinumdoman, ang bisan unsang asaynment mahimong makapalipay ug makapatagbaw.

Usa ka Espesyal nga Bahin sa Pag-uswag

Panahon sa Cleveland, Ohio, nga kombensiyon niadtong 1942, kapin sa dekada una kami mosulod sa Bethel, si Brader Knorr mipahayag sa pakigpulong nga “Kalinaw​—Molungtad ba Kaha Kini?” Iyang gitin-aw nga ang Gubat sa Kalibotan II, nga nagsilaob na niadto, matapos ug unya may panahon sa kalinaw nga motaganag higayon alang sa gipadakong pagsangyaw. Ang Tunghaan sa Gilead aron magbansayg mga misyonaryo ug ang Tunghaan sa Teokratikanhong Ministeryo aron pauswagon ang mga katakos sa pagpakigpulong publiko sa mga igsoong lalaki gitukod sa 1943. Giorganisar usab ang dagkong mga kombensiyon. Ilado ilabina sa katuigang 1950 ang didto sa Yankee Stadium, New York. Maylabot sa mga kombensiyon didto niadtong 1950 ug 1953, ako nakahigayon sa pagtabang paghikay sa dako kaayong Trailer City nga nakapapuyog tinagpulo ka libo sulod sa walo ka adlaw sa matag usa nianang mga kombensiyona.

Human niadtong mga kombensiyona, lakip ang kinadak-an sa tanan sa 1958, dihay dagkong mga uswag sa mga magmamantala sa Gingharian. Sa direkta naapektahan niadto ang among trabaho sa Bethel. Sa hinapos sa katuigang 1960 ug sinugdanan sa katuigang 1970, kami kulang kaayog lugar ug mga kuwarto aron papuy-an sa mga trabahante. Aron matagan-ag puy-anan ang among nagdakong pamilya, kinahanglang makabaton kamig mas daghang lawak-higdaan, mga kosina, ug mga lawak-kan-anan.

Si Brader Knorr mihangyo kang Brader Max Larson, ang magtatan-aw sa pabrika, ug kanako nga mangitag angayang lote alang sa pagpalapad. Niadtong 1957, sa pag-abot nako sa Bethel, ang among pamilya sa duolag 500 nagpuyo sa usa ka dakong residensiyal nga tinukod. Apan latas sa katuigan, ang Sosyedad nagpalit ug nag-ayo sa tulo ka dagkong hotel sa duol​—ang Towers, Standish, ug Bossert​—ingon man sa daghang gagmayng mga apartment. Niadtong 1986 ang Sosyedad nagpalit sa lote nga gibarogan sa Hotel Margaret ug naghimo sa maanindot bag-ong tinukod nga usa ka balay alang sa mga 250 ka tawo. Dayon sa sinugdanan sa 1990, ang usa ka 30-andanang residensiya gitukod aron papuy-an ug dugang 1,000 ka trabahante. Ang Brooklyn Bethel karon makapapuyo ug makapakaon sa kapin ug 3,300 ka membro sa among pamilya.

May yuta usab nga napalit sa Wallkill, New York, duolag 160 kilometros gikan sa Brooklyn Bethel. Latas sa katuigan, sugod sa hinapos sa katuigang 1960, ang mga residensiya ug usa ka dakong imprentahan gitukod didto. Karon, mga 1,200 ka membro sa among pamilyang Bethel nagpuyo ug nagtrabaho didto. Sa 1980 gisugdan ang pagpangitag mga 250 ektarya nga yuta nga duolduol sa New York City ug sayon makaabot sa haywey. Ang ahente sa propiedad real mikatawa ug miingon: “Asa ba mo makakitag ingon nianang matanga sa yuta? Dili gayod kana posible.” Apan sa sunod buntag siya mitawag ug miingon: “Nakaplagan ko na ang inyong yuta.” Karon, kini nailhang Watchtower Educational Center sa Patterson, New York. Didto ang mga tunghaan ginapalihok ug adunay usa ka pamilya sa kapig 1,300 ka ministro.

Mga Leksiyon nga Akong Nakat-onan

Akong nasayrang ang usa ka maayong magtatan-aw maoy usa nga makakuhag bililhong impormasyon gikan sa uban. Kadaghanan sa mga ideya nga nakapribilehiyo ako sa pagpatuman ingong magtatan-aw sa Bethel naggikan sa uban.

Sa pagsulod nako sa Bethel, daghan ang tigulang, nga sama nako karon. Kadaghanan kanila wala na sa pagkakaron. Kinsay mopuli niadtong matigulang ug mamatay? Dili kanunay mga tawo nga labaw ug katakos. Sila mao ang mga ania dinhi, nga matinumanong nagbuhat sa ilang trabaho, nga naghimo sa ilang kaugalingon nga andam.

Ang laing hinungdanong butang nga hinumdoman mao ang bili sa usa ka buotang asawa. Ang pagpaluyo sa akong minahal nga asawa, si Fern, maoy dakong tabang kanako aron matuman ang akong teokratikanhong mga asaynment. Ang mga bana adunay responsabilidad sa pagtino nga malipayon ang ilang mga asawa sa ilang mga asaynment. Ako maningkamot nga may maplano nga gustong buhaton ni Fern ug nako. Dili kinahanglang kana gastoso, butang lang nga lahi sa naandan. Nag-agad sa bana ang pagbuhat sa mga butang nga makapalipay sa iyang asawa. Ang iyang panahon nga kauban siya maoy bililhon ug daling molabay, busa angay nga pahimuslan niya pag-ayo kana.

Ako nalipay nga nabuhi sa kataposang mga adlaw nga gihisgotan ni Jesus. Kini ang labing talagsaong panahon sa tibuok kasaysayan sa tawo. Kita makatan-aw ug makakita pinaagi sa atong mga mata sa pagtuo kon giunsa pag-ugmad sa Ginoo ang iyang organisasyon sa pagpangandam sa pag-abot sa gisaad nga bag-ong kalibotan. Samtang hinumdoman ko ang tibuok nakong kinabuhi sa pag-alagad kang Jehova, akong makita nga si Jehova mao ang nagpalihok niining organisasyona​—dili mga tawo. Kita mga alagad lamang niya. Tungod niana, kinahanglang kanunay kitang mosalig kaniya alang sa direksiyon. Sa dihang ipatin-aw niya kon unsay angay natong buhaton, angay nga mosunod dayon kita ug mokooperar.

Kooperar sa bug-os sa organisasyon, ug garantisado nga masinati nimo ang tugob, malipayong kinabuhi. Bisan kon unsay imong ginabuhat​—kon kaha pagpayunir, sirkitong pag-alagad, pag-alagad uban sa usa ka kongregasyon ingong magmamantala, pag-alagad sa Bethel, o misyonaryong pag-alagad​—sunda ang direksiyon nga gihan-ay, ug mahala ang imong asaynment. Paningkamot gayod sa pagkalipay sa matag asaynment ug matag adlaw sa trabaho sa pag-alagad kang Jehova. Kapoyon ka, ug tingali masobrahan ka sa trabaho o mobatig kaluya usahay. Kana ang panahong kinahanglang hinumdoman nimo ang katuyoan sa pagpahinungod sa imong kinabuhi kang Jehova. Kana maoy pagbuhat sa iyang kabubut-on, dili ang imoha.

Walay adlaw nga miabot ako alang sa trabaho ug wala malipay sa akong gibuhat. Ngano? Tungod kay sa dihang maghago kita nga tibuok-kalag alang kang Jehova, kita may katagbawan tungod sa pagkahibalo nga ‘atong nabuhat ang angay natong mabuhat.’

[Hulagway sa panid 19]

Ang Departamento sa Magasin

[Hulagway sa panid 19]

Trailer City, 1950

[Hulagway sa panid 19]

Pagpayunir sa Baltimore, 1946

[Hulagway sa panid 19]

Sa Trailer City uban ni Fern niadtong 1950

[Hulagway sa panid 22]

Uban ni Audrey ug Nathan Knorr

[Hulagway sa panid 23]

Watchtower Educational Center sa Patterson, New York

[Hulagway sa panid 24]

Uban ni Fern karon