Mga Magmamantala sa Gingharian Nagtaho

Nakakaplag Silag Hinungdan nga Magbag-o

ANG mga membro sa gang ug mapintasong mga tawo makabag-o ba sa ilang kagawian? Unsay makatabang nila sa pagbuhat niana? Ang dagkong kausaban sa kagawian posible sumala sa makita sa kahimtang ni Saulo sa Tarso, nga nagbag-o gikan sa paglutos sa mga Kristohanon ngadto sa pagkahimong Kristohanon mismo. Siya sa ulahi nailhang si apostol Pablo. (Galacia 1:13, 14; 1 Timoteo 1:13) Ang susamang dagkong kausaban gitaho gikan sa Kenya.

◻ Ang usa ka batan-ong lalaki usa ka membro sa gang sa dapit sa Nairobi ug gipadala ngadto sa kasadpang Kenya aron mosusi sa mga posibilidad sa pagtulis sa mga bangko didto. Siya miestar uban sa usa ka tigulang nga lalaki ug nakakaplag sa tumpok sa daang mga magasin sa Pagmata! diha sa iyang balay. Nalingaw kaayo ang batan-ong lalaki sa pagbasa sa maong mga magasin nga bug-os niyang nahikalimtan ang iyang mga plano sa pagtulis sa mga bangko. Sa nabasa niya ang tanan, nangita pa siyag dugang, ug ang tigulang nga lalaki misulti kaniya nga may moabot kada duha ka semana pinaagi sa koreyo. Sukad niadto ang batan-ong lalaki naghangyo sa iyang tagbalay nga moadto sa opisina sa koreyo sa kada adlaw sa pagpangitag dugang magasin. Kasamtangan, midesidir siya sa pagbiya sa iyang daotang mga dalan, sa pagsunod kon unsay iyang nakat-onan gikan sa mga magasin, ug pagkahimong usa ka Saksi ni Jehova. Gisugdan gani niya ang pagsulti sa mga silingan nga siya usa sa mga Saksi ni Jehova. Sa ulahi, ang usa ka espesyal payunir mitrabaho sa teritoryo ug natingala sa pagkakita niining batan-ong lalaki nga nag-angkong Saksi. Nasugdan ang usa ka pagtuon sa Bibliya uban kaniya, siya mihamtong, ug karong adlawa siya usa ka regular payunir. Ang tukmang kahibalo sa Bibliya mihatag niyag hinungdan sa pagbag-o sa iyang kinabuhi.

◻ Usa ka lalaki sa Argentina nakakaplag usab ug hinungdan sa pagbag-o sa iyang mabangisong pagkinabuhi. Sulod sa 20 anyos, gidagmalan niya ang iyang asawa, kinsa usa ka Saksi. Giingon pa nga mikalot pa siyag usa ka bangag sa iyang tugkaran nga may krus sa ibabaw niana, uban sa hunahuna nga patyon ang tawong nangawat sa iyang mga manok ug ilubong siya didto. Tungod sa pagkapintasan sa tawo, gilikayan siya sa mga silingan.

Giduaw siya sa magtatan-aw sa sirkito. Samtang didto, gitanyagan sa magtatan-aw sa sirkito ang lalaki sa usa ka pagtuon sa Bibliya ug natingala siya sa dihang miingon siya nga malipay siyang motuon sa Bibliya. Ang igsoong lalaki nagtuon sa brosyur nga Tagamtama ang Kinabuhi sa Yuta sa Walay Kataposan! uban kaniya. Miuswag ang lalaki sa kahibalo sa Bibliya ug sa espirituwal nga pagsabot. Siya karon nagatambong sa tanang tigom. Nagustohan kaayo niya ang mga tigom ug pagpakig-uban sa mga igsoon nga siya miingon “Kini ang dapit nga gusto kong puy-an.”

Ang kausaban sa maong tawo talagsaon kaayo nga ang mga silingan nangutana sa iyang asawa kon kinsang doktora ang nagtambal kaniya. Sa gisaysay niya nga ang kausaban nahitabo kay siya nagtuon sa Bibliya uban sa mga Saksi ni Jehova, usa ka silingan nakadayeg kaayo nga siya mihangyog usa ka Bibliya. Ang laing silingan misuskribir sa usa sa atong mga magasin.

Ang tukmang kahibalo sa Bibliya naghatag niining mga tawhana ug hinungdan nga magbag-o sa ilang pagkinabuhi, ug kini makatabang kang bisan kinsa nga matinguhaon sa mas makahuloganong kinabuhi karon ug sa paglaom nga kinabuhing dayon sa malipayong bag-ong kalibotan sa Diyos.​—Juan 17:3.