Ipahimutang ang mga Magasin sa Imong Ministeryo
1, 2. Sa unsang paagi Ang Bantayanang Torre ug Pagmata! nakatandog sa kinabuhi sa mga tawo?
1 “Makaiikag, nunot-sa-panahon, ug makapadasig.” “Ang labing makapadasig nga mga magasin nga akong nabasa sukad.” Kining mga komentoha naghubit pag-ayo sa gibati sa mga magbabasa sa tibuok kalibotan bahin sa Ang Bantayanang Torre ug Pagmata! Sa pagkatinuod, ang atong mga magasin maoy bililhon kaayong mga himan sa pag-abot sa “tanang matang sa mga tawo” uban sa maayong balita.—1 Tim. 2:4.
2 Ang usa ka negosyante nakadawat ug kopya sa magasing Pagmata! nga nakapainteres kaniya. Sa ulahi, gibasa niya ang kaubang gula sa Ang Bantayanang Torre, nga dunay artikulo nga nakaaghat kaniya sa pag-usisa sa Trinidad nga iyang gituohan sa tibuok niyang kinabuhi. Kini nakapukaw sa iyang interes. Unom ka bulan sa ulahi siya nabawtismohan. Laing lalaki ang regular nga nagadawat ug mga magasin apan wala gayod kini basaha. Ang iyang asawa, sa laing bahin, naglikay sa mga Saksi apan nagabasa sa mga magasin nga gikuha sa iyang bana. Ang kasingkasing sa asawa natandog sa saad sa Bibliya bahin sa usa ka yutan-ong paraiso nga mapuno sa matarong nga mga tawo. Sa ngadtongadto, ang asawa, iyang anak lalaki, ug iyang manghod nga babaye nahimong mga alagad ni Jehova.
3. Unsay bentaha sa pagtanyag sa mga magasin ingong paris?
3 Itanyag Kini Ingong Paris: Sama sa gipakita sa maong mga pananglitan, dili kita makaseguro kon kinsay mobasa sa atong mga magasin o kon unsay makapukaw sa ilang interes. (Eccl. 11:6) Busa, adunay bentaha ang pagtanyag sa Ang Bantayanang Torre ug Pagmata! ingong paris, bisan tuod kasagaran usa lang ka magasin ang atong ipasiugda sa atong presentasyon. Sa pipila ka kahimtang, haom tingali ang pagtanyag ug lainlaing mga gula sa atong mga magasin sa usa ka pagduaw.
4. Sa unsang paagi mahimo natong ieskedyul ang atong pagpanagtag ug magasin?
4 Mapuslanon ang pag-eskedyul ug usa ka adlaw matag semana sa pagpakig-ambit sa pagpanagtag ug magasin. Sa 2005 Calendar of Jehovah’s Witnesses, ang matag Sabado gigahin ingong “Adlaw sa Magasin.” Siyempre, tungod kay lainlain man ang lokal ug personal nga mga kahimtang, ang uban mogahin ug laing adlaw sa pagpanagtag lamang sa atong mga magasin. Bahin ba kini sa imong senemanang eskedyul?
5. Unsang mga kahigayonan sa pagpahimutang ug mga magasin nga kita angayng magmaalisto, ug unsay makatabang kanato sa paghimo niana?
5 Paghimog Personal nga Tumong: Ang paghimog personal nga tumong kada bulan bahin sa mapahimutang nga mga magasin makatabang kanato nga mas mahunahunaon sa pagpanagtag ug magasin. Aduna ka bay ruta sa magasin? Ginatanyag mo ba ang mga magasin sa mga tawong imong mahibalag diha sa ministeryo? Ikatanyag mo ba ang mga magasin samtang nagsangyaw diha sa kadalanan, sa teritoryong negosyohanan, ug sa publikong mga dapit? Aduna ka bay dalang mga magasin sa dihang ikaw mobiyahe, mamalit, ug moadto sa imong mga kasabot? Pahimusli ang matag kahigayonan sa pagtabang sa uban nga makabenepisyo gikan sa Ang Bantayanang Torre ug Pagmata!
6. Sa unsang paagi atong magamit pag-ayo ang daandaang mga gula sa mga magasin?
6 Mahimong himoon usab natong tumong ang pagpahimutang sa daandaang mga gula nga anaa kanato. Bisan tuod ang mga magasin wala mapahimutang sulod sa usa o duha ka bulan sumala sa petsa sa gula niini, bililhon gihapon ang impormasyon niini. Ipahimutang kana sa interesadong mga tawo. Alang sa milyonmilyong katawhan, ang mga magasing Ang Bantayanang Torre ug Pagmata! maoy “usa ka pulong . . . sa hustong panahon.” (Prov. 25:11) Gamiton nato kini sa pagtabang sa minilyong uban pa nga makaila ug makaalagad kang Jehova.