Paggahin ug Panahon Alang sa Buluhatong Magasin
1 Si Jehova nagtino nga aduna unyay ‘pakigdait, usa ka kaugmaon, ug usa ka paglaom’ alang kanilang nagasunod sa Iyang mga dalan. (Jer. 29:11) Ang impormasyon bahin niining maong palaabuton gipresentar sa tukma-panahong paagi diha sa Ang Bantayanang Torre ug Pagmata! Kining mga magasina makabenepisyo sa tanang matang sa katawhan. (1 Tim. 2:4) Ikaw ba ug ang imong pamilya sa makanunayon nagagahin ug panahon alang sa pagpanagtag ug magasin?
2 Kon ang imong mga napahimutang nga magasin nagakakunhod, sa unsang paagi kini matul-id? Usa ka kinahanglanon mao ang paghupot nga buhi sa imong pagpabili alang sa mga kaundan sa atong mga magasin. Usa ka lalaki misulat: “Ang pagbasa sa inyong mga magasin maoy usa ka makalilipay gayod nga kasinatian. Kini dili baratohon, ubos-kalidad nga ‘mga maglilipay’ apan nagaunod ug paggiya ug pagtultol kon unsaon paghimo sa kinabuhi nga makahuloganon.” Ang Bantayanang Torre ug Pagmata! maoy mga resulta sa maampingong pagpanukiduki ug maoy mga tagana sa “matinumanon ug maalamong ulipon.” (Mat. 24:45) Kini maoy epektibong mga himan sa pag-abot sa mga kasingkasing sa katawhan.
3 Sinatia ang mga artikulo sa mga magasin nga imong ginatanyag. Tan-awa ang mga punto nga nagahisgot sa kinabag-ohang mga suliran diha sa inyong komunidad. Magmaandam sa pagpakigsulti sa mga lalaki, mga babaye, ug mga batan-on nga ikahibalag nimo sa mga pultahan o sa dalan. Ipakita kon sa unsang paagi ang mga magasin nagalangkit sa mga pamilya sa kinatibuk-an.
4 Magmahunahunaon sa Magasin: Ang pagpamatuod pinaagig magasin angay nga mag-okupar ug hinungdanong bahin sa imong eskedyol sa pag-alagad. Unsa man ang labing maayong mga panahon alang kanimo sa pagtanyag sa mga magasin? Nasulayan ba nimo ang pagsangyaw sa usa ka oras o kapin pa sa gabii una pa ang inyong Pagtuon sa Libro sa Kongregasyon? Ang pagsangyaw sa magabii nagmabungahon gayod sa pipila ka dapit. Ang Sabado maoy usa ka maayong adlaw sa pagpanagtag ug mga magasin, apan ang ubang adlaw magamit usab niining kalihokana. Ang balaybalay ug tindahan-por-tindahan nga buluhaton angay nga usa ka makanunayong bahin sa Adlaw sa Magasin.
5 Ang kada usa kinahanglang may regular nga order alang sa mga kopya nga igpanagtag sa matag gula sa mga magasin. Kon may daandaan ikaw nga mga gula, kini magamit sa pagpakita sa mga tagbalay sa nagakadaiyang mga ulohan nga gikobrehan sa mga magasin. Ngadto-ngadto, ang pipila ka daandaang kopya ikabilin diha sa mga pinuy-anan sa mga tigulang ug mga ospital kon itugot. Ang tanan sa maong mga magasin maihap ingong mga napahimutang diha sa imong binulang tarhitang Field Service Report.
6 Pinaagig pagpadapat sa mga sugyot sa ibabaw, sa walay duhaduha makita nimo ang pag-uswag sa gidaghanon sa mga magasin nga mapanagtag. Ang mabuot-kasingkasing nga mga tawo kinsa nabug-atan sa kinabuhi niining karon nga sistema moapresyar sa makapahayahay nga impormasyon diha sa Ang Bantayanang Torre ug Pagmata! Sanglit kini patikon na man diha sa upat ka kolor sugod karong bulana, kini maoy dugang hinungdan nga magmasiboton bahin niini. Busa, magmahunahunaon sa magasin, ug pausbawa ang pagpanagtag sa magasin sa inyong teritoryo.