Pagbatog Kalipay Pinaagig Dugang mga Napahilunang Magasin
1 Pinaagi ni Kristo Jesus, si Jehova nagmugna ug yutan-ong organisasyon nga nailhan tungod sa mahinangpon, mabungahong mga mamumuo niana. (Sal. 110:3; Mat. 9:37, 38) Sa dihang atong pagatagdon ang kalidad maingon man ang gidak-on sa atong ministeryo, ang dugang kangaya moresulta gayod. (Luc. 10:17) Kini ilabinang tinuod samtang kita nagapanlimbasog sa pagpauswag sa atong personal nga pagpanagtag sa mga magasing Bantayanang Torre ug Pagmata!
2 Ang pagpanagtag sa magasin maoy usa sa dakong mga paagi sa pagpakaylap sa balita sa Gingharian. Apan sa ubang dapit namatikdan nga ang napahimutang nga mga magasin nagaus-os. Sa unsang paagi kining hiliga masulbad? Unsa ang pipila sa mga kinahanglanon nga atong pagahinumdoman nga magpaarang kanato sa pagpahimutag dugang mga magasin?
USA KA POSITIBONG PAAGI
3 Ang unang tikang mao: MAGMAHUNAHUNAON SA MAGASIN. Kini mas daling makab-ot kon kita regular nga mga tigbasa mismo sa maong mga magasin. Sa dihang ato nang masinati ang mga kaundan niana, buot tang gamiton ang kada higayon sa pagtanyag niana ngadto sa publiko. Alang sa kadaghanan kanato, ang kada Sabado maoy maayo kaayong higayon sa pagpakig-ambit sa buluhatong magasin. Daghang kongregasyon nagahikay ug tunga-semanang buluhatong magasin para niadtong dili makagula sa Sabado. Nakaplagan sa pipila nga maayong panahon ang mga gabii sa buluhatong magasin. Ang buluhaton sa kadalanan, pag-adto sa katindahanan, impormal nga pagpamatuod ug mga rota sa magasin maoy maayo kaayong mga paagi sa pagpanagtag sa mga magasin.
4 Ang ikaduhang sugyot mao: YANOHA RA. Ang pipila ka magmamantala taas kaayo ang mga presentasyon mao nga sila wala makapahiluna ug mga magasin. Ang uban migamit sa Ulohan nga Mahisgotan sa buluhatong magasin. Pero, dili kini rekomendado. Ang Disyembre 1, 1956 nga Watchtower nag-ingon: “Usa ka mubo, diretso-sa-punto nga presentasyon mao ang labing maayo sa dihang nagatanyag sa mga magasin. Ang tumong mao ang pagpahiluna ug daghang kopya. Sila mohimo sa ilang kaugalingong ‘pagsulti.’ Ang Sosyedad nagasugyot ug tunga-minuto ngadto sa usa ka minuto nga presentasyon, usa ka maayong-pagkatagik nga pulong sa usa ka punto nga gihisgotan diha sa magasin nga itanyag.”
5 Sunod: MAHIMONG MABALHINBALHINON. Pag-andam ug labaw kay sa usa ka presentasyon. Nan ikaw makaarang sa pagpakigsulti sa mga tawong sa tanang matang ug ikapasibo ang imong presentasyon sa ilang intereses.
6 Ultimang Sugyot: MAGHIMOG PERSONAL NGA TUMONG. Mahinumdoman mo nga gipasiugda kini diha sa pakaping “Mga Magasin nga Nagapunting sa Dalan sa Kinabuhi,” sa Mayo 1, 1984 nga Atong Ministeryo sa Gingharian. Basin gusto mong maninguha nga makaaberids ug usa ka magasin sa matag oras nga ikaw anaa sa pagsangyaw. Ang imong personal nga tumong kinahanglang makataronganon, nga nagatagad sa imong personal nga mga kahimtang ug ang panahon nga imong magugol diha sa pag-alagad sa kanataran.
7 Pinaagi sa iyang makitang kapunongan, si Jehova nagapadayon sa pagtagana sa atong gikinahanglan aron mouswag sa atong pakig-ambit sa ministeryo. Aduna kita ing makapadasig, nunot-panahong mga magasin nga magamit. Karon ang ato mismong tinagsatagsa ka panlimbasog gikinahanglan aron moduyog sa mga kahikayan sa kongregasyon sa pagpanagtag sa magasin. Sanglit kay ang maong kalihokan nagahimaya man kang Jehova, kita makatagamtam ug kalipay gikan sa napauswag nga pakig-ambit sa ministeryo uban sa mga magasin.—Juan 15:8.