Abota ang Kasingkasing sa Imong Gitun-an sa Bibliya
1 Buot ba nimong ang imong gitun-an sa Bibliya mopadapat sa iyang nakat-onan? Aron matukmod ang imong gitun-an sa Bibliya sa paglihok, kinahanglang aboton nimo ang iyang kasingkasing. Sa adlaw sa Pentekostes 33 K.P., ang makapalihok nga pakigpulong ni Pedro “nagsamad sa kasingkasing” sa mga 3,000 ka tawo, kinsa “misagop sa iyang pulong nga kinasingkasing” ug nabawtismohan nianang adlawa. (Buh. 2:37, 41) Unsaon nimo pag-abot ang kasingkasing sa imong gitun-an sa Bibliya?
2 Pangandam Pag-ayo: Ayawg sulayi pagkobre ang daghan kaayong materyal nga diyutay na lamang ang panahon sa pagpangatarongan uban sa ginatun-an. Tinoa sa abante pa ang mga puntos nga imong ipatugbaw, ug tinoa nga imong masabtan ug mapadapat nga epektibo ang mga kasulatan. Palandonga pag-una ang mga pangutana nga mahimong motungha sa hunahuna sa estudyante tungod sa iyang kagikan.
3 Sundoga ang Paagi ni Jesus sa Pagtudlo: Si Jesus migamit ug mga ilustrasyon aron pagpayano sa malisod nga mga puntos ug pagbulig sa iyang mga gitun-an sa pagsabot sa usa ka kahimtang. (Luc. 10:29-37) Sa susama, imong masilsil ang maayong mga pagtulon-an sa kasingkasing sa imong gitun-an sa Bibliya pinaagig paghupot nga yano sa imong mga ilustrasyon, nga nagakuha niana gikan sa kasarangang mga butang sa kinabuhi, ug pagpadapat niana ilabina sa mga kahimtang sa ginatun-an.
4 Ang mga pangutana ilabinang makatabang sa pag-abot sa mga kasingkasing sa mga gitun-an sa Bibliya, ingon sa sagad gipasundayag ni Jesus. (Luc. 10:36) Apan ayawg katagbaw kon ang gitun-an yano lamang nagabasa sa tubag diha sa libro. Gamita ang nagaagak nga mga pangutana sa pagtultol sa iyang hunahuna ngadto sa usa ka konklusiyon nga mahimong wala pa niya mapalandong kaniadto. Pagsukna ug punto-de-vista nga mga pangutana sa pagtino kon unsay iyang gituohan sa personal sa usa ka butang. Kini makabulig kanimo sa pagsabot sa mga bahin nga gikinahanglan pa ang dugang tabang.
5 Kon ang ginatun-an sa Bibliya wala mouswag, kinahanglan nimong tinoon ang mga hinungdan. Nganong nagaukon-ukon man siya sa paglihok? May pipila ba ka Kasulatanhong punto nga wala niya masabti? Siya ba nagaduhaduha sa paghimog pipila ka kausaban sa iyang paagi sa kinabuhi? Kon ang gitun-an sa Bibliya nagasulay sa ‘pagkiangkiang sa duha ka magkalaing opinyon,’ tabangi siya sa pag-ila sa kapilegrohan sa iyang pagbuhat niana.—1 Hari 18:21.
6 Si apostol Pablo nakaamgo nga ang pagtudlo sa mga kamatuoran sa Bibliya maoy usa ka nagaluwas-kinabuhing buluhaton, ug busa siya nagtambag sa mga Kristohanon sa ‘paghatag ug kanunayng pagtagad sa ilang pagpanudlo.’ (1 Tim. 4:16) Ang imong mga gitun-an sa Bibliya kinahanglang makakat-on ug labaw pa kay sa mga kamatuoran lamang bahin sa Bibliya ug mga panghitabo sa kalibotan. Sila kinahanglang makabaton ug tukmang kahibalo bahin kang Jehova ug kang Jesus ug magaugmad ug personal nga relasyon uban kanila. Pinaagi lamang sa pagbuhat niana nga sila mapalihok sa pagpasundayag sa ilang pagtuo pinaagig mga buhat. (Sant. 2:17, 21, 22) Sa dihang ang kasingkasing sa gitun-an maabot, siya matukmod sa pagsunod sa kurso nga magapasidungog kang Jehova ug magpanalipod sa iyang kaugalingong kinabuhi.—Prov. 2:20-22.