Pangandam Pag-ayo sa Pagpanudlo
1. Sa dihang magdumalag pagtuon sa Bibliya, nganong maningkamot kita nga maugmad diha sa estudyante ang pagpabili?
1 Sa dihang kita magdumalag pagtuon sa Bibliya, kinahanglan kitang mangandam pag-ayo kon buot natong molihok ang estudyante sa pag-alagad kang Jehova. Aron magmabungahon ang atong mga paningkamot, atong tabangan ang estudyante nga pabilhan ang kamatuoran nga iyang nakat-onan sa Bibliya. (Deut. 6:5; Prov. 4:23; 1 Cor. 9:26) Unsaon nato kana paghimo?
2. Sa unsang paagi ang pag-ampo makatabang kanato sa dihang mangandam sa pagtuon?
2 Pag-ampo sa Dihang Mangandam: Sanglit si Jehova maoy magpatubo sa binhi sa kamatuoran diha sa kasingkasing sa estudyante, haom lamang nga atong sugdan ang pagpangandam sa pagtuon pinaagi sa pag-ampo alang sa estudyante ug sa iyang mga panginahanglan. (1 Cor. 3:6; Sant. 1:5) Ang maong pag-ampo makatabang usab kanato sa pagtino kon unsang dugang tabang ang atong mahimo aron ang iyang kasingkasing mapuno sa “tukmang kahibalo” sa kabubut-on ni Jehova.—Col. 1:9, 10.
3. Sa unsang paagi kita mangandam nga magkonsiderar sa kahimtang sa estudyante?
3 Konsideraha ang Estudyante: Nasayod si Jesus nga kinahanglan niyang konsiderahon ang mamiminaw aron mahimong epektibo ang iyang pagpanudlo. Sa labing menos duha ka higayon, siya gipangutana: “Unsay buhaton ko aron makapanunod sa kinabuhing walay kataposan?” Gitubag sila ni Jesus sa lainlaing paagi. (Luc. 10:25-28; 18:18-20) Angay natong konsiderahon kon unsay kinahanglang mahibaloan sa estudyante samtang kita mangandam. Unsang gisitar nga mga teksto ang angayng basahon uban kaniya? Unsa ka daghang impormasyon ang hisgotan? Unsa nga mga punto sa gitun-ang materyal ang lagmit lisod sabton o dawaton sa estudyante? Kon atong pangandaman daan ang mga pangutana nga tingali isukna sa estudyante, mahimong mas epektibo ang atong tubag.
4. Unsay nalakip sa maayong pagpangandam?
4 Repasoha ang Materyal: Bisag kadaghan na nato matun-i ang materyal sa miagi, karon pa ang unang higayon nga ato kanang matun-an uban sa maong estudyante. Aron atong maabot ang iyang kasingkasing, ang maayong pagpangandam hinungdanon sa matag pagtuon. Kini nagpasabot nga atong buhaton kon unsay atong gidasig sa estudyante nga iyang himoon. Repasoha ang materyal, lakip na ang gisitar nga mga teksto, nga magkonsiderar sa kahimtang estudyante, ug mahimo usab nimong badlisan ang pangunang mga punto.—Roma 2:21, 22.
5. Sa unsang paagi kita makasundog kang Jehova?
5 Si Jehova interesado gayod sa pag-uswag sa matag estudyante sa Bibliya. (2 Ped. 3:9) Pinaagi sa paggahig panahon sa pagpangandam sa matag pagtuon sa Bibliya, kita nagpasundayag ug susamang gugma ug kahangawa.