Tipigi
Pagdumalag Mauswagong mga Pagtuon sa Bibliya
Kini nga pasukip maoy hugpong sa pangunang mga punto gikan sa serye sa mga artikulo bahin sa pagdumalag mauswagong mga pagtuon sa Bibliya nga makita diha sa Atong Ministeryo sa Gingharian. Gidasig ang tanan nga tipigan kini nga pasukip ug susihon kini sa dihang magdumalag mga pagtuon sa Bibliya. Dugang pa, ang mga punto gikan ning maong pasukip mahimong ipasiugda panahon sa mga tigom sa dayon nang pagsangyaw, ug mahimong gamiton usab kini sa mga magtatan-aw sa pag-alagad ingong basehanan sa ilang mga pakigpulong sa dihang moduaw sa mga grupo sa pagtuon sa libro.
Bahin 1: Unsa ba ang Pagtuon sa Bibliya?
Kon ikaw adunay regular ug sistematiko nga mga panaghisgot sa Bibliya, bisag dili dugay, ginamit ang Bibliya uban sa usa sa gisugyot nga mga publikasyon, ikaw nagadumala ug usa ka pagtuon sa Bibliya. Ang pagtuon mahimong itaho kon kini nadumala na sulod sa duha ka higayon human ikapasundayag ang kahikayan sa pagtuon ug kon dunay katarongan sa pagtuo nga magpadayon ang pagtuon.—km 7/04 p. 1.
Gisugyot nga mga Publikasyon
◼ Unsay Gikinahanglan sa Diyos Kanato?
◼ Kahibalo nga Motultol sa Kinabuhing Walay Kataposan
◼ Simbaha ang Bugtong Matuod nga Diyos
◼ Ikaw Mahimong Higala sa Diyos! Mahimong gamiton kini uban sa mga tawo nga may limitadong edukasyon o dili kaayo makamaong mobasa.
Bahin 2: Pagpangandam sa Pagdumala sa Pagtuon
Kinahanglan natong ipresentar ang impormasyon sa paagi nga makatandog sa kasingkasing sa ginatun-an. Kini nagkinahanglan ug bug-os nga pagpangandam nga anaa sa hunahuna ang kaayohan sa ginatun-an.—km 8/04 p. 1.
Kon Unsaon sa Pagpangandam
◼ Susiha ang tema, ang mga sub-ulohan, ug ang bisan unsang mga hulagway sa maong kapitulo o leksiyon.
◼ Puntinga ang mga tubag sa pinatik nga mga pangutana, nga markahan lamang ang yawing mga pulong ug mga prase.
◼ Hukmi kon unsang mga tekstoha ang basahon panahon sa pagtuon. Paghimog mugbong mga nota diha sa panaplin sa gitun-ang publikasyon.
◼ Pag-andam ug mubong repaso sa pangunang mga punto.
Ipahiuyon ang Leksiyon sa Panginahanglan sa Ginatun-an
◼ Pag-ampo mahitungod sa maong ginatun-an ug sa iyang mga panginahanglan.
◼ Hunahunaa daan ang mga punto nga hayan malisdan siya sa pagsabot o pagdawat.
◼ Tagda kini: Unsay kinahanglan niyang masabtan o buhaton aron makahimo siyag espirituwal nga pag-uswag? Sa unsang paagi akong maabot ang iyang kasingkasing?
◼ Segun sa gikinahanglan, pag-andam ug usa ka ilustrasyon, pagpatin-aw, o sunodsunod nga mga pangutana aron matabangan ang ginatun-an sa pagsabot sa kahulogan sa usa ka punto o teksto.
Bahin 3: Epektibong Paggamit sa Kasulatan
Ang atong tuyo sa pagdumalag mga pagtuon sa Bibliya mao ang “paghimog mga tinun-an” pinaagi sa pagtabang sa mga tawo sa pagsabot ug pagdawat sa mga pagtulon-an sa Pulong sa Diyos ug sa pagpadapat niana sa ilang mga kinabuhi. (Mat. 28:19, 20; 1 Tes. 2:13) Busa, ang pagtuon kinahanglang masentro sa Kasulatan.—km 11/04 p. 8.
Pagtudlo Pinasukad sa Pulong sa Diyos
◼ Ipakita sa ginatun-an kon unsaon sa pagpangita sa espesipikong mga teksto diha sa kaugalingon niyang kopya sa Bibliya.
◼ Basaha ug hisgoti ang mga teksto sa Bibliya nga nagpakitag Kasulatanhong pamatuod sa atong mga tinuohan.
◼ Paggamit ug mga pangutana. Imbes ipatin-aw ang mga teksto sa Bibliya ngadto sa ginatun-an, hangyoa siya nga maoy mopatin-aw sa mga teksto kanimo.
◼ Himoa kining yano. Ayawg ipatin-aw ang tanang bahin sa teksto. Hisgoti lang kon unsay gikinahanglan aron mapatin-aw ang punto.
◼ Paghimog praktikal nga kapadapatan. Tabangi ang ginatun-an sa pagsabot kon sa unsang paagi mapadapat ang mga teksto sa Bibliya nganha kaniya mismo.
Bahin 4: Pagbansay sa mga Ginatun-an sa Pagpangandam
Ang ginatun-an nga abanteng magbasa sa leksiyon, maglinya sa mga tubag, ug maghunahuna kon unsaon pagpahayag niana sa iyang kaugalingong mga pulong sagad kusog nga mouswag sa espirituwal. Busa, sa dihang maregular na ang pagtuon, duyog ninyong andamon ang usa ka leksiyon aron ipakita sa ginatun-an kon unsaon pagpangandam. Sa kadaghanang ginatun-an, mapuslanon nga duyog ninyong andamon ang tibuok nga kapitulo o leksiyon.—km 12/04 p. 1.
Paglinya ug Paghimog mga Nota
◼ Isaysay kon unsaon pagpangitag laktod nga mga tubag sa pinatik nga mga pangutana.
◼ Ipakita sa ginatun-an ang imong kopya sa ginatun-ang publikasyon nga pangunang mga pulong o mga prase lamang ang imong gilinyahan.
◼ Tabangi ang ginatun-an sa pagsabot nga ang matag gisitar nga teksto nagsuportar sa usa ka punto diha sa parapo, ug ipakita kaniya kon unsaon paghimog mugbong mga nota diha sa kilid sa iyang ginatun-an nga publikasyon.
Pagsuta ug Pagrepaso
◼ Ipakita sa ginatun-an kon unsaon niya pagsusi ang ulohan sa kapitulo o leksiyon, mga sub-ulohan, ug mga ilustrasyon sa dili pa sugdan ang iyang detalyadong pagpangandam.
◼ Dasiga ang ginatun-an nga repasohon ang pangunang mga punto sa kataposan sa pagpangandam.
Bahin 5: Tinoa Kon Unsa ka Daghang Materyal ang Kobrehan
Ang gidaghanon sa materyal nga pagakobrehan magdepende sa katakos ug mga kahimtang sa magtutudlo ug sa ginatun-an.—km 1/05 p. 1.
Tukora ang Lig-ong Pagtuo
◼ Mas hinungdanon nga atong tabangan ang ginatun-an nga tin-awng makasabot sa materyal kay sa kobrehan ang daghang materyal sulod lamang sa mubong panahon.
◼ Gamita gayod ang bisan unsang panahon nga gikinahanglan aron matabangan ang ginatun-an sa pagsabot ug pagdawat sa iyang nakat-onan.
◼ Gahinig igong panahon ang paghisgot sa yawing mga teksto nga maoy gibasehan sa mga pagtulon-an.
Ayawg Langana ang Pagtuon
◼ Kon ang ginatun-an makiling sa pagsulti ug daghan bahin sa personal nga mga butang, tingali angay natong hikayon nga hisgotan kanang mga butanga inigkahuman sa pagtuon.
◼ Ayaw pagsulti ug daghan panahon sa pagtuon. Limitahe ang paghisgot sa may-kalangkitan nga mga punto ug mga kasinatian aron ang ginatun-an dili mababagan sa pagkuhag tukmang kahibalo sa paninugdang mga pagtulon-an sa Bibliya.
Bahin 6: Kon Mangutana ang Ginatun-an
Sa dihang matukod na pag-ayo ang pagtuon sa Bibliya, kasagaran labing maayo nga mahisgotan ang mga pagtulon-an sa Bibliya sa sistematikong paagi imbes nga kalit magbalhinbalhin gikan sa usa ka ulohan ngadto sa laing ulohan. Kini makatabang sa ginatun-an nga makatukod ug pundasyon sa tukmang kahibalo ug mouswag sa espirituwal.—km 2/05 p. 6.
Magmasinaboton
◼ Ang mga pangutana nga dunay kalabotan sa ginatun-ang materyal sagad nga mahimong tubagon dayon.
◼ Ang mga pangutanang walay kalabotan sa ginatun-ang materyal o nanginahanglag panukiduki mahimong hisgotan sa laing higayon. Mapuslanon tingali ang pagsulat sa maong mga pangutana.
◼ Kon ang ginatun-an malisdan sa pagdawat sa usa ka pagtulon-an, pangitag dugang materyal nga bug-os naghisgot sa maong ulohan.
◼ Kon dili gihapon makombinsir ang ginatun-an, biyai una ang maong ulohan nga hisgotan kana sa laing higayon ug ipadayon ang pagtuon.
Magmakasaranganon
◼ Kon dili ka segurado sa tubag sa pangutana, ayaw paghatag ug kaugalingong opinyon.
◼ Inanayng tudloi ang ginatun-an kon unsaon sa pagpanukiduki.
Bahin 7: Itanyag ang Pag-ampo Panahon sa Pagtuon
Aron ang mga ginatun-an sa Bibliya mouswag sa espirituwal, hinungdanon ang panalangin ni Jehova. Busa, haom ang pagbukas ug pagtapos sa pagtuon pinaagig pag-ampo.—km 4/05 p. 8.
Kon sa Unsang Paagi Isugyot nga Kamo Mag-ampo
◼ Ang pag-ampo mahimong itanyag sa unang higayon mismo uban sa mga tawong relihiyoso.
◼ Alang sa ubang ginatun-an, kinahanglan natong ilhon ang haom nga panahon sa pagsugyot nga kamo mag-ampo.
◼ Ang Salmo 25:4, 5 ug ang 1 Juan 5:14 mahimong gamiton sa pagpatin-aw kon nganong angayng mag-ampo.
◼ Ang Juan 15:16 mahimong gamiton sa pagpatin-aw kon nganong angay kitang moampo kang Jehova pinaagi ni Jesu-Kristo.
Kon Unsay Ilakip sa mga Pag-ampo
◼ Maoy haom ang pagdayeg kang Jehova ingong Tuboran sa instruksiyon.
◼ Ipahayag ang sinserong interes alang sa ginatun-an.
◼ Ipahayag ang pagpabili alang sa organisasyon nga gigamit ni Jehova.
◼ Hangyoa si Jehova nga panalanginan ang mga paningkamot sa ginatun-an sa pagpadapat sa iyang nakat-onan.
Bahin 8: Giyahi ang mga Ginatun-an Ngadto sa Organisasyon
Ang atong tumong sa pagdumalag mga pagtuon sa Bibliya dili lang ang pagtudlo ug doktrinal nga impormasyon kondili ang pagtabang usab sa mga ginatun-an nga mahimong bahin sa Kristohanong kongregasyon. Paggahin ug pipila ka minuto matag semana panahon sa pagtuon sa pagpaambit ug usa ka punto bahin sa organisasyon ni Jehova.—km 5/05 p. 1.
Mga Tigom sa Kongregasyon
◼ Isaysay ang matag tigom sa kongregasyon. Dapita sila sa pagtambong sukad gayod sa unang pagtuon.
◼ Ipaambit ang talagsaong mga punto nga gipresentar sa mga tigom.
◼ Dasiga sila nga makatambong sa Memoryal, mga asembliya, ug sa duaw sa magtatan-aw sa sirkito.
◼ Gamita ang mga hulagway diha sa atong mga publikasyon sa pagtabang kanila nga mahanduraw kon unsay ginahimo didto.
◼ Dasiga sila sa pagbasa sa brosyur nga Mga Saksi ni Jehova—Kinsa Sila? Unsay Ilang Gituohan?
Gamita ang mga Video Aron Madasig Sila sa Pagpabili
◼ Jehovah’s Witnesses—The Organization Behind the Name
◼ Our Whole Association of Brothers
◼ United by Divine Teaching
◼ To the Ends of the Earth
Bahin 9: Pag-andam sa mga Ginatun-an sa Pagsangyaw sa Di-Pormal nga Paagi
Sa dihang ang mga ginatun-an sa Bibliya mosugod sa pagpasundayag ug pagtuo sa ilang nakat-onan, matukmod sila sa pagpakigsulti bahin niana.—km 6/05 p. 1.
Dasiga Sila nga Mosangyaw
◼ Aduna bay mga higala ug mga membro sa pamilya nga ilang madapit sa pagduyog sa pagtuon?
◼ Duna ba silay mga kauban sa trabaho, mga eskolmet, o uban pang mga kaila nga nagpakitag interes?
Bansaya Sila sa Pagpaambit sa Ilang mga Gituohan
◼ Sa dihang maghisgot ug haom nga mga punto panahon sa pagtuon, pangutan-a ang ginatun-an, “Sa unsang paagi magamit nimo ang Bibliya aron ipatin-aw kining kamatuorana ngadto sa imong pamilya?”
◼ Tabangi ang ginatun-an nga masabtan nga kinahanglan nga magmatinahoron ug magmahigalaon sa dihang makig-estorya sa uban bahin sa Diyos ug sa iyang mga katuyoan.
◼ Ang brosyur nga Mga Saksi ni Jehova—Kinsa Sila? Unsay Ilang Gituohan? mahimong gamiton sa mga ginatun-an aron tabangan ang mga higala ug mga membro sa pamilya nga masabtan ang atong pinasukad-sa-Bibliya nga mga gituohan ug kalihokan.
Bahin 10: Pagbansay sa mga Ginatun-an Diha sa Balay-Balay nga Ministeryo
Sa dihang matino sa mga ansiyano nga ang usa ka ginatun-an sa Bibliya kuwalipikado na nga mahimong di-bawtismadong magmamantala, siya makasugod sa pagkuyog sa kongregasyon diha publikong pagsangyaw.—km 7/05 p. 1.
Mag-uban sa Pagpangandam
◼ Ipakita sa bag-ong magmamantala kon asa niya makaplagi ang gisugyot nga mga presentasyon.
◼ Tabangi siya sa pagpilig yano nga presentasyon nga magamit diha sa lokal nga teritoryo.
◼ Dasiga siya nga ipasiugda ang Bibliya diha sa iyang ministeryo.
◼ Pagbansaybansay mong duha. Ipakita kaniya kon unsaon pagtubag nga mataktikanhon ang kasagarang mga pagtutol.
Magkuyog sa Pagsangyaw
◼ Paobserbaha ang ginatun-an samtang gamiton nimo ang presentasyon nga giandam ninyong duha.
◼ Konsideraha ang personalidad ug mga abilidad sa ginatun-an. Sa pipila ka kahimtang, basin labing maayo nga bahin lang sa presentasyon ang iyang isulti.
◼ Tabangi ang bag-ong magmamantala sa pagbaton ug regular nga eskedyul sa pagpakigbahin sa ministeryo.
Bahin 11: Pagtabang sa Bag-ong mga Magmamantala sa Paghimog mga Balikduaw
Ang pagpangandam alang sa pagbalikduaw magsugod sa unang duaw. Dasiga ang bag-ong magmamantala nga magpakitag sinserong interes sa iyang mga gikaestorya. Anam-anam nga bansaya siya sa pag-agda sa mga tagbalay nga ipahayag ang ilang mga hunahuna, pagpaminaw sa ilang mga komento, ug pagmatikod sa mga butang nga ilang gikabalak-an.—km 8/05 p. 1.
Pagpangandam sa Pagbalikduaw
◼ Repasoha ang inyong naestoryahan sa unang duaw, ug tabangi ang bag-ong magmamantala sa pagpili ug usa ka ulohan nga makadani sa tagbalay.
◼ Pag-andam ug usa ka mubong presentasyon nga mogamit ug usa ka teksto sa Bibliya uban sa usa ka parapo diha sa tun-anang publikasyon.
◼ Pag-andam ug pangutana nga mahimong ipatungha sa kataposan sa panaghisgot.
Makugihong Paloapa ang Interes
◼ Dasiga ang bag-ong magmamantala sa pagbalik dayon sa tanang nagpakitag interes.
◼ Tabangi ang bag-ong magmamantala nga masabtan ang panginahanglan sa pagbalik sa makadaghan aron maabtan ang mga tawo sa balay.
◼ Tudloi ang bag-ong magmamantala kon unsaon paghimog kasabotan sa pagbalikduaw, ug tabangi siya nga masabtan ang panginahanglan sa pagbalik sumala sa gisaad.
Bahin 12: Pagtabang sa mga Ginatun-an sa Pagsugod ug Pagdumalag mga Pagtuon sa Bibliya
Hinungdanon gayod nga imong sundon si Jesus pinaagi sa paghatag ug maayong panig-ingnan diha sa imong ministeryo. Samtang matikdan sa imong ginatun-an ang imong panig-ingnan diha sa ministeryo, iyang masabtan nga ang tumong sa paghimog mga balikduaw mao ang pagsugod ug mga pagtuon sa Bibliya.—km 9/05 p. 1.
Pagtanyag ug Pagtuon sa Bibliya
◼ Ipatin-aw ngadto sa ginatun-an nga kasagaran dili kinahanglang detalyadong isaysay ang kahikayan sa pagtuon.
◼ Kasagaran labing maayong ipasundayag lamang ang pagtuon ginamit ang usa o duha tingali ka parapo gikan sa tun-anang publikasyon.
◼ Repasoha ug bansaybansaya ang usa sa mga sugyot sa pagsugod ug mga pagtuon sa Bibliya.—km 8/05 p. 4; km 5/02 p. 6.
Pagbansay sa mga Ginatun-an nga Mahimong mga Magtutudlo
◼ Dasiga ang mga ginatun-an sa pagpalista sa Teokratikanhong Tunghaan sa Ministeryo.
◼ Hikaya nga makauban kanimo ang bag-ong magmamantala ngadto sa lain nimong mga ginatun-an sa Bibliya diin sila mahimong makaambit ug gamay sa pagpanudlo.