Pagdumalag Pagtuon sa Bibliya sa Balay
1 Sa unsang paagi dumalahon ang usa ka epektibong pagtuon sa Bibliya sa balay? Unsaon pagtagad ang mga kasulatan? Kinsa ang angayng mobasa sa mga parapo? Unsaon nato pagtabang sa estudyante sa paghimo sa kamatuoran nga iyang kaugalingon? Unsang mga lit-ag ang kinahanglang likayan?
2 Kon Unsaon Pagdumala ang Pagtuon: Sa linangkob nga pagkasulti, ang pagtuon sa Bibliya sa balay nagasunod sa sumbanan sa Pagtuon sa Bantayanang Torre. Una, ang parapo basahon. Unya ang nagadumala sa pagtuon mosukna sa pangutana nianang parapoha ug tugotan ang estudyante nga motubag. Kon nagapanuko ang estudyante, ang tagdumala kinahanglang mosuknag nagagiyang mga pangutana sa pagtabang sa estudyante nga mangatarongan diha sa ulohan ug modangat sa hustong konklusiyon.
3 Tagda kon sa unsang paagi ang mga kasulatan mapadapat sa materyal. Ipakita sa estudyante ang gikutlong mga kasulatan, ug pangatarongan uban kaniya kon sa unsang paagi kana mapadapat. Kon ang mga kasulatan gisitar apan wala kutloa, maayo nga susihon kana diha sa Bibliya. Dayon ipabasa kana sa estudyante ug komentohan kon sa unsang paagi kana nagasuportar sa giingon diha sa parapo.
4 Buligi ang Estudyante sa Paghimo sa Kamatuoran nga Iyang Kaugalingon: Dasiga ang estudyante nga mangandam pag-ayo sa pagtuon. Ipasiugda nga ang pagbasa mahinungdanon sa pagkat-on. Ang pipila ka tagdumala magapabasa sa tanang parapo sa estudyante. Ang uban mobanosbanos sa estudyante sa pagbasa niana. Ang maayong pagpanghukom angayng himoon, nga nagabutang sa hunahuna sa espirituwal nga pag-uswag sa estudyante.
5 Ang pagkobre sa tun-anang materyal sa naandang paagi nga walay mapuslanong pagpadapat makabulig man sa estudyante sa pagkuhag kahibalo, apan gituohan ba niya ang iyang nakat-onan? Kon himoon man gayod niya ang kamatuoran nga iyang kaugalingon, suknaa siya kon sa unsang paagi ang materyal nakaapektar kaniya sa personal. Unsaon niya paggamit ang iyang nakat-onan? Gamita ang nagausisang mga pangutana aron aboton ang kasingkasing sa estudyante.
6 Likaying mga Lit-ag: Adunay mga lit-ag nga likayan kon nagadumalag pagtuon sa Bibliya. Kon ang mga ulohan motungha nga walay labot sa materyal nga gihisgotan, maoy sagad labing maayo nga hisgotan kana sa kataposan sa pagtuon o sa laing higayon. Usab, mahinungdanon nga ang estudyante mohatag ug mga tubag sa iyang kaugalingong mga pulong inay nga basahon kana gikan sa libro. Kini makabulig kanimo ingong tagdumala sa pagtino kon ang estudyante nakasabot ba sa materyal.
7 Nganong dili kana himoong imong tumong nga makadumalag labing menos usa ka pagtuon sa Bibliya? Dili kana malisod nga buhat kon mosalig ka kang Jehova ug mosunod sa pasukaranang pamaagi sa Pagtuon sa Bantayanang Torre. Ang labing epektibong paagi sa paghimog mga tinun-an maoy pinaagig pagdumala ug pagtuon sa Bibliya sa balay.—Mat. 28:19, 20.