Paggamit ug Maayo sa Ang Bantayanang Torre ug Pagmata!
1 Ang Bantayanang Torre ug Pagmata! mao ang labing bililhon ug labing mapuslanong mga magasin nga mabasa sa katawhan karong adlawa. Ngano? Tungod kay ang espirituwal nga mga kamatuoran nga nasulod niini may malungtarong epekto alang sa kaayohan sa mga kinabuhi sa katawhan. Hinuon, daghan ang wala sa bug-os mabalaka sa ilang espirituwal nga panginahanglan, o wala sila masayod kon asa mopaingon aron pagtagbaw niini. Maoy atong pribilehiyo ang pagsundog kang apostol Pablo pinaagig pagtabang sa katawhan sa pagbuka sa ilang mga mata sa espirituwal nga paagi.—Mat. 5:3; Buh. 26:18.
2 Magmapositibo ug Pangandam Gayod: Malagmit adunay samag karnero nga mga tawo sa inyong teritoryo nga mosanong sa kamatuoran. Ang pipila mahimong yano lamang nga nanginahanglag pagdasig sa pagbasa sa mga magasin. Busa, magmapositibo ug magmahaylohon samtang imong itanyag Ang Bantayanang Torre ug Pagmata! Padayong andama ang suplay sa mga magasin ug pahimusli ang tanang kahigayonan sa pagpanagtag niini, bisan kon nagapaila sa ubang mga basahon.
3 Unsa man ang makapahimo natong labaw nga epektibo sa pagpanagtag ug mga magasin? Sa pagsugod, kinahanglan gayod nga apresyahon nato mismo ang bili niini. Angay nga sinati ta sa mga artikulo diha sa mga magasin nga atong ginatanyag, ug kini magapausbaw sa atong pagsalig ug sa atong kasibot sa pagtanyag niini. Hupti kining panghunahunaa sa dihang basahon mo kini sa sinugdanan. Magmaalisto sa pagpilig mga puntos nga ikapatugbaw diha sa ministeryo. Suknaang kaugalingon: ‘Ngadto kang kinsa man kining artikuloha ilabinang makadani? Ang usa ba ka asawa, batan-ong tawo, o tingali usa ka negosyante moapresyar niini? Kini bang puntoha makaikag gayod sa usa ka estudyante, sa usa ka minyong tawo, o sa usa nga nahangawa bahin sa kahimtang sa palibot?’ Aron nga magmaepektibo gayod, angay nga makaarang kita sa pagrekomendar sa mga magasin pinasukad sa atong personal nga kahibalo ug pagpahimulos sa tukma-panahong mga artikulo niini.
4 Gamitag Maayo ang Daandaang mga Gula: Hinumdomi, Ang Bantayanang Torre ug Pagmata! dili mawad-an ug bili, bisan kon kini dili ikapahimutang tanan sulod sa usa o duha ka bulan sa petsa sa paggula niini. Ang impormasyon nga nasulod niini dili mahimong momenos ang kahinungdanon sa paglabay sa panahon, ug dili ta angayng magpanuko sa pagtanyag sa daandaang mga kopya kon kini anaa pa sa maayong kahimtang. Ang pagtugot sa daandaang mga magasin nga magtipun-og ug dili gayod maggamit niini magapakitag kakulang sa apresasyon alang niining bililhong mga instrumento. Ang matag magasin nasudlan sa mga kamatuoran nga may purohang makapukaw ug makatagbaw sa espirituwal nga mga gana. Inay nga ihiklin ang daandaang mga isyu ug hikalimtan ang may kalabotan niini, dili ba mas maayo nga maghimog espesyal nga panikaysikay sa pagpahiluna niini diha sa mga kamot sa interesadong katawhan o sa labing menos magbilin niini sa dihang ang mga tawo wala sa balay?
5 Ang magasing Pagmata! nakabulig sa daghan nga sa sinugdanan dili mahiligon sa espirituwal nga mga tawo sa pagkahimong matinguhaon sa ilang espirituwal nga panginahanglan. Ang Bantayanang Torre maoy usa ka yawing instrumento sa programa sa espirituwal nga pagpakaon sa katawhan ni Jehova. Kining mga magasina nagasangkap ug maayo sa usag usa, ug kini nagadulag mahinungdanong papel aron nga ikasangyaw ang maayong balita.
6 Samtang pahimuslan nato ang tanang kahigayonan sa pagpahilunag mga magasin, kita makabaton ug bug-os nga pagsalig sa pagkaepektibo niini sa pagtagbaw sa espirituwal nga mga panginahanglan sa samag karnerong mga tawo. Buot natong mentinahon ang positibong tinamdan, mangandam gayod, ug magmakanunayon sa ministeryo. Ingong mga magmamantala sa maayong balita, hinaot nga kitang tanan makanunayong maggamit ug maayo sa mga magasing Bantayanang Torre ug Pagmata!