Pagtanyag sa Maayong Balita—Uban sa mga Magasin
1 Nagaingon ang Ecclesiastes 12:12, “Sa pagbuhat sa daghang basahon walay kataposan.” Ang maong mga pulong tinuod karon samtang mga binilyong mga panid sa pinatik nga materyal moparang sa pagtagad sa mga magbabasa. Kini mopatunghag hagit ngadto sa mga magmamantala sa maayong balita sa Gingharian. Sa unsang paagi atong makombensir ang mga tawo nga ang The Watchtower ug Awake! mao ang labing takos nga mga magasin nga gipatik karong mga adlawa?
BILILHONG MGA MAGASIN
2 Maayong susihon ang ato mismong tinamdan ngadto sa mga magasin. Giisip mo ba ang mga magasin nga bililhon, nga maikagong nagapaabot sa matag bag-ong gula? Nagaeskedyol ka ba ug panahon sa pagbasa sa tanang artikulo? Kon sa personal atong ginapabilhan ang mga magasin, ang atong kadasig ug kinasingkasing nga pagtuo moabag kanato sa pagtanyag niana nga malamposon ngadto sa uban.
3 Ang mga tawo sa atong teritoryo nagakinahanglan sa bililhong impormasyon nga anaa sa Bantayanang Torre ug Pagmata! sama gayod sa atong pagkinahanglan niana. Diha sa Septiyembre 15, 1989, Bantayanang Torre, ang ulohang “Unsa may Atong Gikinahanglang Buhaton Aron Maluwas?” mihatag ug mapuslanong pagpalig-on maylabot sa atong panggawi ug paagi sa kinabuhi. Ang di pa dugay nga mga artikulo sa Pagmata! naghisgot sa dili hustong paagi sa pagdumala sa tawo sa kakahimtangan sa yuta ug sa mga saad sa Diyos sa pagpasig-uli sa paraiso sa yuta. Pagkadagaya gayod sa espirituwal nga pagkaon nga gitagana niining mga magasina aron pukawon diha sa mga tawo ang pagkamahunahunaon sa ilang espirituwal nga panginahanglan!
SINATIA ANG IMONG MGA MAGASIN
4 Ang labing maayong paagi sa pagdani sa mga tawo nga sila makabenepisyo gikan sa pagbasa sa mga magasin mao ang pagpakita kanila ug espisipikong punto nga angay kanila. Kini nagakinahanglan nga kita bug-os masinati sa mga magasin ug andam sa abante. Samtang basahon mo kana sa imong kaugalingon, magmaalisto sa mga puntos nga magamit mo sa ministeryo. Nganong dili markahan kining mga puntoha diha sa imong personal nga mga kopya ug unya repasohon ang imong mga nota sa dihang mangandam ka alang sa pag-alagad sa kanataran nga dala ang maong isyu?
5 Samtang magbasa ka sa kaugalingon, mangutana: Aduna ba ing mga artikulo nga ilabinang modani sa mga doktor, mga abogado, o mga magtutudlo? Ang paghimog mga listahan sa mga tawo nga buot mong tanyagan niining mga magasina mahimong mapuslanon kaayo.
6 Human maghisgot bahin sa paghimog daghang basahon, nag-ingon ang Ecclesiastes 12:12 nga ang “hilabihan nga pagtuon niini makapabudlay sa unod.” Ang pagbasa sa kalibotanong literatura makapakapoy sanglit kay wala kanay gitaganang espirituwal nga kahupayan. Sa kasukwahi, pagkamapasalamaton ta sa pagpanagtag sa Bantayanang Torre ug Pagmata!, nga nagapasidungog kang Jehova ug nagamantala sa iyang Gingharian!—Prov. 3:9.