Ginabasa ba Nimo ang mga Magasin?

¹ Mao ni ang gisulti sa usa ka misyonaryong magtiayon sa Aprika bahin sa atong mga magasin: “Ang Bantayanang Torre nagtabang namo sa pagpabiling igmat sa espirituwal diha sa among teritoryo. Nakadawat kamig pagdasig ug paglig-on gikan sa matag gula.” Duna ka bay samang dulot nga pagpabili sa atong mga basahon? Ug ikaw ba ingon ka masiboton sa pagbasa niana?

² Nagkinahanglag dakong panahon ang pag-andam sa mga artikulo sa magasin nga mabasa lamang sa pipila ka minutos. Sa pagkahibalo niini, imo ba lamang hapawan ang mga artikulo, tan-awon ang mga hulagway, o usahay basahon ang artikulo nga nakakuha sa imong pagtagad? Maalamon kita kon labaw pa niana ang atong himoon. Kinahanglang gahinan natog panahon ang pagbasa ug pagsusi sa tanang artikulo sa matag isyu sa atong mga magasin. Ang Bantayanang Torre mao ang atong pangunang basahon alang sa tukma-sa-panahong espirituwal nga pagkaon. Ang Pagmata! nagdalag makapaikag ug impormatibong mga artikulo sa nagkalainlaing mga ulohan. Ang atong makat-onan pinaagi sa pagbasa ning mga magasina dili lamang magpalig-on nato sa espirituwal apan usab mag-andam nato alang sa mas epektibong pagpakig-ambit diha sa ministeryo. Ingong matinuorong mga magbabasa sa atong kaugalingon, kita magmainiton sa pagtanyag sa mga magasin ngadto sa uban.

³ Kon Unsaon Pagpalambo ang mga Batasan sa Pagbasa: May mahimo ka pa bang mas maayo aron sa pagsunod sa imong pagbasa sa mga magasin? Aniay duha ka sugyot nga misaler sa daghan. (1) Paghimog regular nga eskedyul sa pagbasa. Pinaagig paggahin lamang ug 10 o 15 minutos kada adlaw sa pagbasa, mahibulong ka sa kadaghan sa imong mabasa sulod sa usa ka semana. (2) Paghimog sistema sa pagsubay sa imong mabasa. Tingali imong kudlitan ang sinugdanan sa matag artikulo nga imong gibasa. Kon wala kini, mahimong masayloan mo pagbasa ang ubang mga artikulo o bisan ang tibuok magasin. Hinungdanon ang pagmugnag rutina sa pagbasa nga mosaler alang kanimo ug sa pagsunod niana.​—Itandi ang Filipos 3:16.

⁴ “Ang kasaligan ug mabuot nga ulipon” maalamong misanong sa nagakausab nga mga panahon pinaagig pagpatik ug mga artikulo nga naghisgot sa tinuod nga mga panginahanglan sa mga tawo. (Mat. 24:45) Sa pagkatinuod, ang mga magasin nakatandog sa atong mga kinabuhi. Ang gikusgon sa atong espirituwal nga pag-uswag maoy, sa dakong gilapdon, gigamhan sa kalidad sa atong teokratikanhong mga batasan sa pagbasa. Ang dagayang espirituwal nga panalangin giandam alang niadtong mogahin ug panahon sa pagbasa sa tanang magasin.