Ikaw ba Motan-aw Lamang sa Panagway sa Gawas?

SI Heinz, usa ka tin-edyer nga natukmod sa pagdumot, nagplano sa pagpatay sa iyang amaama. Ikalipay, wala siya makabatog kaisog sa paghimo niana. Ubay-ubayng katuigan sa ulahi mihukom siya sa paghikog apan wala usab makapadayon sa pagbuhat niana. Nalangkit siya sa pagpangawat ug pagbaligyag droga, nga tungod niana siya napriso. Dayon napakyas ang iyang kaminyoon.

Karong adlawa si Heinz dili na giyanon sa mga droga. Siya may binuotang pangabuhi. Siya may malipayong kaminyoon ug maayong relasyon uban sa iyang amaama. Unsay nakahimo sa kalainan? Misugod siya sa pagtuon sa Bibliya uban sa mga Saksi ni Jehova. Inanay, ang iyang panglantaw sa kinabuhi nagsugod sa pagkausab.

Sa walay duhaduha, daghan nga nakaila sa karaang Heinz nag-isip nga siya walay-paglaom nga kaso. Salamat nga alang sa daghang tawong sama kaniya, ang Diyos wala mosurender kaniya ingong dili na matubos. Nganong dili man? Ang katarongan mao: “Ang Diyos nagatan-aw dili sumala sa makita sa tawo, kay ang tawo nagatan-aw sa makita sa mga mata; apan alang kang Jehova, siya nagatan-aw sa kasingkasing.”​—1 Samuel 16:7.

Kana ang usa ka dakong kalainan tali sa tawo ug sa Diyos. Kita makiling sa paghukom sumala sa panagway sa gawas. Moingon pa gani kita nga “ang unang mga impresyon maoy malungtarong mga impresyon.” Sa laing mga pulong, makiling kita sa pagklasipikar sa mga tawo pinasukad sa unang mga reaksiyon. Apan ang Diyos, kay siya makabasa sa kasingkasing, maoy matarong ug walay pinalabi. Ug kana ang hinungdang iyang gipadala ang iyang Anak, si Jesu-Kristo, nganhi sa yuta aron nga “ang tanang matang sa mga tawo mamaluwas ug mahidangat sa tukmang kahibalo sa kamatuoran.” (1 Timoteo 2:4) May labot niini, ang dedikadong mga Kristohanon nagbaton sa pribilehiyo sa pagkahimong “mga masigkamagbubuhat sa Diyos” pinaagi sa aktibong pagwali sa maayong balita sa Gingharian sa Diyos ngadto sa tanang tawo. (1 Corinto 3:9) Bisan pa niana, ang mga Kristohanon may mga limitasyon​—dili sila makabasa sa mga kasingkasing sa mga tawo. Busa kinahanglang sila mahimong walay pinalabi ug molikay nga magmapihigon tungod sa panagway sa gawas.

Ang igsoon ni Jesus sa inahan nga si Santiago nasayod niining kapeligrohan diha sa unang Kristohanong kongregasyon. Matud niya: “Mga igsoon, kay nagtuo man kamo sa atong Ginoong Jesu-Kristo, nga nagahari sa himaya, kinahanglang dili kamo magpadayag sa pagkagarboso. Pananglitan, duha ka dumuduaw tingali mosulod sa inyong dapit sa pagsimba, ang usa maoy tawong may maayong-panapot uban ang mga singsing nga bulawan, ug ang lain maoy tawong kabos nga dili maayo ang panapot. Pananglitan kon hatagan ninyog linaing pagtagad ang tawong may maayong panapot . . . Wala ba kamo makasabot nga kamo may panagsumpaki ug nagahukom sumala sa bakak nga mga sukdanan?” Pinasukad niini, dili ba kita usahay masayop sa paghukom sa mga tawo nga moanha sa Kingdom Hall sa unang panahon?​—Santiago 2:1-4, The New English Bible.

Gihatag ni Jesus ang Panig-ingnan

Gitan-aw ni Jesus ang mga tawo, dili ingong mga makasasala nga dili na matubos, kondili lagmit sinserong mga tawo nga buot magbag-o kon hatagan sa gikinahanglang tabang ug tukmang panukmod. Kana ang hinungdan siya “mihatag sa iyang kaugalingon sa katumbas nga lukat alang sa tanan.” (1 Timoteo 2:6) Sa iyang pagsangyaw, wala siya mag-isip kang bisan kinsa nga may maayong kasingkasing ingong dili matandog, dili takos sa pagtagad. Ang iyang pagtan-aw sa mga tawo wala magpadayag sa garbosong mga pagbati sa pagpakamatarong-sa-kaugalingon.​—Lucas 5:12, 13.

Pagkalahi sa mga Pariseo, nga bahin kanila atong mabasa: “Apan ang mga eskriba ug mga Pariseo, sa ilang pagkakita nga siya nakigsalo sa mga makasasala ug mga maniningil sa buhis, miingon ngadto sa iyang mga tinun-an: ‘Nganong nakigsalo siya sa mga maniningil sa buhis ug sa mga makasasala?’ Sa pagkadungog niini si Jesus miingon kanila: ‘Ang maayo rag lawas wala magkinahanglan ug mananambal, kondili ang mga masakiton. Ako mianhi sa pagtawag, dili sa mga tawong matarong, kondili sa mga makasasala.’”​—Marcos 2:16, 17.

Siyempre, kini wala magkahulogan nga si Jesus mikonsentir sa malimbongon ug daotang mga buhat nga gihimo sa maong mga makasasala ug mga maniningil sa buhis. Apan nasayod siya nga ang mga tawo mahimong hisakpan sa daotang pagkinabuhi, tingali nga dili gani tinuyo o tungod sa mga kahimtang nga dili magamhan. Busa gipakita niya ang pagkamasinabtanon, kay “giabot ug kaluoy kanila, tungod kay sila nahisama sa mga karnero nga walay magbalantay.” (Marcos 6:34) Mahigugmaon niyang gihimo ang kalainan tali sa ilang daotang mga lihok ug sa ilang lagmit maayong mga kasingkasing.

Sa pagpakiglabot sa iyang mga sumusunod, si Jesus mitan-aw saylo sa panagway sa gawas. Sila maoy mga makasasala nga kasagarang nakahimog kasaypanan, apan si Jesus dili kay dimakataronganong nangitag kahingpitan, nga kanunay nagbadlong kanila tungod sa matag gamayng kalapasan. Nasayod siya nga maayo ang ilang mga intensiyon o, sumala sa ato tingaling isulti karong adlawa, nga ang ilang kasingkasing anaa sa hustong dapit. Ang ilang gikinahanglan mao ang tabang ug pagdasig; sa paghatag niini, si Jesus dili gayod tihik. Walay pagduhaduha niini, gitan-aw niya ang mga tawo sumala sa pagtan-aw sa Diyos kanila. Naningkamot ba kita sa pagsundog sa iyang kahibulongang panig-ingnan?

Ikaw ba “Nagahukom Uban sa Matarong nga Paghukom”?

Kas-a si Jesus giatubang sa usa ka pundok sa nagpakamatarong-sa-kaugalingong mga reklamador nga napikal tungod kay siya nangayo sa Igpapahulay. Gipahimangnoan niya sila: “Hunong na kamo sa paghukom sumala sa panagway sa gawas, apan magahukom kamo uban sa matarong nga paghukom.” Nganong sila wala malipay sa pagtan-aw kang Jesus ingong tighimog milagro nga nakahimo “sa usa ka tawo nga bug-os maayog lawas” inay sa pagkahimong “nasuko sa labihan” ug pagtan-aw kaniya ingong manlalapas sa kasugoan sa Igpapahulay? Pinaagi sa paghukom pinasukad sa panagway sa gawas, gipadayag nila ang ilang daotang mga motibo. Gipadayag nila nga ang ilang paghukom maoy nagapakamatarong-sa-kaugalingon ug dili matarong sa samang panahon.​—Juan 7:23, 24.

Sa unsang paagi kita tingali makahimo sa samang sayop? Pinaagi sa pagkapakyas sa pagkalipay sa dihang ang usa ka tawong mahinulsolon mobalik sa kongregasyon o sa dihang ang kalibotanon kaayong tawo makakat-on sa kamatuoran ug mosugod sa pagpahimulos sa espirituwal nga pagpang-ayo. Usahay kita makahukom sa mga tawo pinasukad sa ilang dili-naandang sinina o pamostura ug isipon silang dili gayod posibleng mahimong mga Saksi. Bisan pa niana, daghang kanhing hippies ug uban pa nga may dili-naandang mga pagkinabuhi ang sa kataposan nangahimong Kristohanong mga Saksi ni Jehova. Bisan pag kana sila nagahimog mga pagpasibo, dili nato buot tugotang “ang paghukom pinasukad sa panagway sa gawas” magbuta kanato sa maayo nilang kahimtang sa kasingkasing.

Pagkalabi pang maayo, ug nahiuyon sa maayong panig-ingnan ni Jesus, ang pag-ampo alang kanila ug paghatag kanilag praktikal nga tabang aron makadangat sa Kristohanong kahamtong! Ang pagkakita diha kanilag hinungdan sa pagkalipay basin lisod. Apan kon si Jehova nagadani kanila nganha kaniya pinaagi ni Kristo, kinsa ba kita nga mosalikway kanila pinasukad sa atong kaugalingong mapig-ot nga mga sukdanan? (Juan 6:44) Ang nagpakamatarong-sa-kaugalingong paghukom sa usa ka tawo, sa dihang kita wala masayod sa kasingkasing o sa mga sirkumstansiya, makabutang nato sa dalan sa dili-maayong paghukom.​—Itandi ang Mateo 7:1-5.

Inay kay hukman nga mapig-oton ang maong mga bag-ohan, angay nga kita motabang, modasig, ug motambag kanila pinaagi sa panig-ingnan. Ugaling, bisan pag magpakitag kalulot, tinong dili nato buot mosobra sa pagdayeg sa mga bag-ohan nga tingali ilado sa kalibotan. Kana maoy usa ka matang sa pagkamadapigon. Kana usab usa ka ilhanan sa pagkadili-hamtong sa atong bahin. Mahitungod sa tawo mismo, ang ato bang sobrang pagdayeg motabang kaniya nga magmapainubsanon? O dili ba kaha, hinunoa, nga mobati siyag kaulaw?​—Levitico 19:15.

Ayaw Pagdahom ug Labaw kay sa Gidahom sa Diyos

Ang atong pagkakita sa uban limitado kaayo kon itandi sa kang Jehova, nga nagabasa sa kasingkasing. (1 Cronicas 28:9) Ang pag-ila niini mopugong nato sa pagkahimong modernong-adlaw, nagapakamatarong-sa-kaugalingong mga Pariseo, nga nagasulay sa pagpugos sa mga tawo nganha sa atong kaugalingong ginama-tawo nga hulmahan sa pagkamatarong aron sila mohaom sa atong ideya kon unsay husto. Kon mosulay kita sa pagtan-aw sa mga tawo sumala sa pagkakita sa Diyos kanila, dili kita modahom ug labaw gikan kanila kay kaniya. Kita “dili mosaylo sa mga butang nga nahisulat.” (1 Corinto 4:6) Kini hinungdanon ilabina nga ibutang sa kasingkasing sa Kristohanong mga ansiano.​—1 Pedro 5:2, 3.

Ikailustrar nato kini kon bahin sa sinina. Ang kinahanglanon sa Bibliya​—ang kinahanglanon sa Diyos​—mao nga ang sinina sa Kristohanon kinahanglang hapsay ug hinlo, maayong-pagkahikay ug dili mopadayag sa kakulang sa “pagkamakasaranganon ug maayong hunahuna.” (1 Timoteo 2:9; 3:2) Nan, dayag nga ang mga ansiano sa usa ka kongregasyon “misaylo sa mga butang nga nahisulat” pila ka tuig nga miagi pinaagi sa pagbaod nga ang matag publikong mamumulong sa ilang kongregasyon magsul-ob ug puting pang-ibabaw nga sinina, bisan pag ang mga hilaw nga kolor sa malangkobon dinawat sa maong nasod. Ang bisitang mga mamumulong nga mitungha nga may dekolor nga pang-ibabaw nga sinina gipailis sa usa sa ubay-ubayng puti pang-ibabaw nga mga sinina nga gitipigan sa Kingdom Hall alang gayod sa maong mga emerhensiya. Angay gayod nga kita magbantay aron dili nato ipatuman ang atong personal nga gusto sa uban! Ug pagkaangay ang tambag ni Pablo: “Ipaila ang imong pagkamakataronganon sa tanang tawo”!​—Filipos 4:5.

Maayong Sangpotanan sa Pagtan-aw Saylo sa Panagway sa Gawas

Ang pag-ila nga kita dili makabasa sa mga kasingkasing sa mga tawo motabang nato sa paghupot ug maayong relasyon uban niadtong alirong kanato, sa sulod ug sa gawas sa Kristohanong kongregasyon. Kini motabang nato sa paghunahunang positibo bahin sa uban, nga dili magkuwestiyon sa ilang mga motibo, “kay bisan kita sa nangagi walay salabotan, masukihon, nangahisalaag, mga ulipon sa nagkalainlaing mga pangibog ug mga kalingawan.” (Tito 3:3) Kay nakaamgo niini, kita maandam nga mowali sa tanan, bisan niadtong si kinsa, sumala sa panagway sa gawas, daw dili takos. Kon buot sabton, ang desisyon sa pagdawat o pagsalikway sa kamatuoran maoy ilaha. Ang responsabilidad sa pagwali niana ngadto sa tanan maoy atoa.

Daghan sa mga Saksi ni Jehova, sama kang Heinz, malipayon nga sila giabiabi sa Kristohanong kongregasyon sa mga igsoong lalaki ug babaye nga mitan-aw saylo sa panagway sa gawas ug wala mohukom sumala sa unang mga impresyon.

Tagda si Frank, kinsa mitungha sa usa ka Dominggo sa usa ka Kingdom Hall sa mga Saksi ni Jehova sa habagatang Alemanya. Unsay nakita niadtong nanambong? Usa ka batan-ong lalaki nga nagkato ug may bungot ug buhok nga abot sa abaga, nga nagbisteg hugawng sinina, ilado nga tigkanunayan sa lokal nga mga bar ug kusog nga hinabako​—usa ka tawo nga nagpasagad sa iyang trato ug sa ilang kaluhang mga bata. Bisan pa niana, siya mainitong giabiabi sa tigom. Siya nakadayeg kaayo nga siya mibalik usa ka semana sa ulahi. Unsay ilang nakita sa maong panahon? Usa ka batan-ong lalaki nga hapsay nag sinudlayan ug nagsul-ob sa hinlong sinina. Sa ikatulong semana ilang nakita ang usa ka batan-ong lalaki nga wala na magtabako, nga sa maong panahon giubanan sa iyang trato ug ilang duha ka anak. Sa ikaupat nga Dominggo, ilang nakita ang usa ka batan-ong lalaki ug usa ka batan-ong babaye nga bag-o pang nakabatog lisensiya sa kasal aron malegal ang ilang relasyon. Sa ikalimang Dominggo, ilang nakita ang usa ka batan-ong lalaki nga nagbugto sa tanang koneksiyon sa bakak nga relihiyon. Karong adlawa, mga upat ka tuig sa ulahi, ilang makita, sumala sa gitaho sa usa sa mga Saksi ni Jehova, “ang usa ka pamilya nga makahatag ug maayo kaayong impresyon nga maghunahuna ka nga sila maoy atong mga igsoon sa daghan nang katuigan.”

Ang kalidad sa usa ka libro dili kanunayng ibanaag diha sa pagkatahi niini ni ang balay sa atubangan niini. Sa susama, ang tinuod nga kalidad sa usa ka tawo dili kanunayng ibanaag sa panagway sa gawas. Ang mga Kristohanon nga mosulay sa pagtan-aw sa mga tawo sama sa Diyos dili mohukom sumala sa unang impresyon. Ang Diyos nagatagad sa “tinago nga pagkatawo sa kasingkasing,” ug tungod niana kita makapasalamat.​—1 Pedro 3:3, 4.