Gitan-aw Mo ba ang Panggawas nga Panagway Lamang?
1 Samtang atong ginahimo ang atong publikong ministeryo, ang una natong impresyon sa ubang mga tawo hayan magpaduhaduha nato sa pagpaambit sa maayong balita kanila. Pananglitan, unsaon nimo sa pagsanong kon ang isog-ug-tinan-awan nga lalaki kanunayng nagtan-aw nimo nga matahapon sa dihang imong giduaw ang iyang silingan nga nagpakitag interes sa kamatuoran? Usa ka payunir nga sister nga nakasinati niini mihukom sa pagduol sa lalaki ug nakigsulti kaniya. Ang lalaki mitagad niya nga binastos. Apan, katingalahan, naminaw siya sa mensahe sa Bibliya ug uban sa pipila ka kahinam miuyon nga motuon. Ingong resulta sa dili paghukom sa sister sa panggawas nga mga panagway, ang dalan naablihan alang niini nga lalaki ug sa iyang asawa sa pagkat-on sa kamatuoran.
2 Ang laing sister sa sinugdan nalisang sa panggawas nga panagway sa taas-ug-buhok nga batan-ong lalaki apan sa mubo mapadayonon sa pagsangyaw kaniya sa panahong moanha siya sa tindahan nga gitrabahoan sa sister. Ang iyang mga paningkamot nagbungag maayong mga resulta, ug ang batan-ong lalaki usa ka bawtismadong Saksi na karon. Unsay magpugong kanato sa pagkanayon gilayon nga ang maong mga tawo dili mosanong?
3 Pagsundog sa Panig-ingnan ni Jesus: Nahibalo si Jesus nga iyang itugyan ang iyang kinabuhi alang sa tanan. Busa, wala siya mapugngi sa panggawas nga panagway sa uban. Iyang naamgohan nga bisan kadtong adunay makauulaw sa moral nga mga reputasyon tingali mahinangop nga magbag-o kon hatagag hustong tabang ug pagdasig. (Mat. 9:9-13) Siya misulay sa pagtabang sa dato man ug kabos. (Mat. 11:5; Mar. 10:17-22) Hinaot nga dili nato hukman ang mga tawo nga atong mahibalag diha sa ministeryo pinaagi sa ilang panggawas nga panagway, nga magpakabuta sa atong kaugalingon kon unsa ang hayan maayog kahimtang nga kasingkasing. (Mat. 7:1; Juan 7:24) Unsay makatabang kanato sa pagsundog sa talagsaong panig-ingnan ni Jesus?
4 Pinaagi sa atong pagtuon sa Bibliya, kita nakakat-on sa pagpabili nga ang Pulong sa Diyos adunay gahom sa pag-usab sa panghunahuna, gawi, ug personalidad sa usa ka tawo. (Efe. 4:22-24; Heb. 4:12) Busa, kita angayng maghupot ug positibong tinamdan pinaagig pagsangyaw sa tanan ug itugyan ang uban sa mga kamot ni Jehova, ang Usa nga makabasa sa tawhanong mga kasingkasing.—1 Sam. 16:7; Buh. 10:34, 35.
5 Hinaot nga ang atong di-mapihigong pagpaambit sa maayong balita sa tanang matang sa mga tawo, walay sapayan sa ilang panggawas nga panagway, makadugang sa buluhatong dakong pagpangani niining kataposang mga adlaw.—1 Tim. 2:3, 4.