Kita Gitudloan ni Jehova
1 Ilalom sa balaang pagtultol ang usa ka internasyonal nga edukasyonal nga programa naglihok karon sa 233 ka nasod. Walay ikatanyag kining kalibotana nga makatandi niana. Ang atong Dakong Instruktor, si Jehova, nagtudlo kanato kon sa unsang paagi kita makabaton ug kaayohan karon samtang siya mag-edukar usab kanato alang sa kinabuhing dayon.—Isa. 30:20; 48:17.
2 Mga Tunghaan sa Balaang Edukasyon: Hunahunaa ang mga tunghaan nga sa pagkakaron nagalihok alang sa kaayohan sa katawhan ni Jehova. Ang Tunghaan sa Teokratikanhong Ministeryo, nga gidumala matag semana sa mga 87,000 ka kongregasyon, nagbansay sa minilyon ka magmamantala sa Gingharian aron mahimong epektibong mga ministro sa maayong balita. Nagpalista ka ba niana? Ikaw ba kauban sa linibo nga nakatambong sa duha-ka-semanang Tunghaan sa Payunir nga Pag-alagad? Hayan ang gikunhorang kinahanglanong oras alang sa mga regular payunir magpaarang sa mas pa sa pagpayunir ug mokuwalipikar sa pagtambong niini nga tunghaan. Ang duha-ka-bulan nga Ministerial Training School, nga gidumala karon diha sa pangunang mga pinulongan sa tibuok kalibotan, nagsangkap sa di-minyong mga ansiyano ug ministeryal nga mga alagad sa pag-abaga ug mas dakong teokratikanhong mga responsabilidad. Sa popanahon, ang tanang ansiyano ug ministeryal nga mga alagad magdawat ug linaing instruksiyon diha sa Tunghaan sa Ministeryo sa Gingharian.
3 Ang mga pasilidad sa Watchtower Educational Center sa Patterson, New York, gigamit sa pagpahigayon sa tulo ka espesyal nga mga tunghaan, nga magtaganag abanteng teokratikanhong pagbansay. Ang lima-ka-bulan nga kurso sa Watchtower Bible School of Gilead nag-andam sa mga ministro alang sa misyonaryong buluhaton sa langyawng kanataran. Ang mga membro sa Komite sa Sanga gikan sa tibuok kalibotan mitambong sa duha-ka-bulang kurso bahin sa organisasyon sa sangang buhatan. Sa Mayo 1999 usa ka bag-ong duha-ka-bulan nga kurso alang sa nagapanawng mga magtatan-aw gisugdan uban sa usa ka klase sa 48 ka estudyante gikan sa Tinipong Bansa ug Canada. Ang tanang alagad ni Jehova sa kataposan makadawat ug mga kaayohan gayod gikan sa pagbansay nga gitagana ni Jehova pinaagi niining lainlaing mga tunghaan.
4 Gitudloan Alang sa Unsang Katuyoan? Usa ka membro sa Nagamandong Lawas miingon: “Ang atong edukasyonal nga programa karon gidisenyo sa pagdala sa tanang katawhan ni Jehova bisan asa ngadto sa maayong kahimtang sa pagkahamtong nga gihubit sa Proverbio 1:1-4.” Hinaot nga si Jehova padayong maghatag sa matag usa kanato sa “dila sa mga natudloan.”—Isa. 50:4.