Teokratikanhong Tunghaan sa Ministeryo
Katuyoan: Aron ang mga magmamantala mahimong epektibong magwawali ug magtutudlo sa maayong balita.
Gidugayon: Permanente.
Lokasyon: Kingdom Hall.
Kuwalipikasyon: Aktibong nakig-uban sa kongregasyon, midawat sa mga pagtulon-an sa Bibliya, ug nagkinabuhi uyon sa Kristohanong mga prinsipyo.
Pagpaenrol: Ang gustong magpaenrol moduol sa magtatan-aw sa tunghaan.
Si Sharon, nga naparalisar tungod sa amyotrophic lateral sclerosis (ALS), miingon: “Ang tunghaan nagtudlo nako sa pagpanukiduki ug sa pagpresentar sa impormasyon sa lohikal nga paagi. Nakakat-on sab ko nga magmahunahunaon sa espirituwal nga panginahanglan sa uban, dili lang sa akoa.”
Si Arnie, nga dugay nang nag-alagad ingong nagapanawng magtatan-aw, miingon: “Nagdako ko nga nganga mosulti ug dili makatan-aw sa uban. Kini nga tunghaan nakatabang nako nga makabatog kompiyansa ug mobating may pulos. Pinaagi sa pagbansay ni Jehova, nakat-onan nako ang mga teknik sa pagginhawa ug pag-concentrate. Mapasalamaton kaayo ko nga makadayeg sa Diyos diha sa kongregasyon ug sa akong ministeryo.”
Bethel Entrants’ School
Katuyoan: Pagtabang sa bag-ong mga Bethelite nga molampos sa ilang pag-alagad.
Gidugayon: 45 minutos matag semana sulod sa 16 ka semana.
Lokasyon: Bethel.
Kuwalipikasyon: Permanenteng membro sa pamilyang Bethel o temporaryong boluntaryo nga giaprobahang mag-alagad sa Bethel sa usa ka tuig o kapin pa.
Pagpaenrol: Awtomatikong ienrol ang bag-ong mga Bethelite.
Si Demetrius, nga nakatungha niini sa katuigang 1980, miingon: “Sa tabang niini nga tunghaan, miuswag ang akong batasan sa pagtuon ug nakaalagad ko sa Bethel sa daghang katuigan. Ang mga instruktor, kurikulum, ug praktikal nga tambag nagkombinsir nako nga si Jehova nahingawa nako ug gusto niya nga magmalipayon ko sa pag-alagad sa Bethel.”
Si Kaitlyn mikomento: “Natabangan ko sa pagpokus sa kon unsay labing importante—ang pagbuhat sa mga butang sumala sa kabubut-on ni Jehova. Tungod sa Entrants’ School, mas napabilhan nako si Jehova, ang Bethel, ug ang iyang organisasyon.”
Kingdom Ministry School
Katuyoan: Pagbansay sa mga nagapanawng magtatan-aw, ansiyano, ug usahay, ministeryal nga mga alagad sa pag-atiman sa ilang mga responsabilidad sa kongregasyon ug sa organisasyon. (Buh. 20:28) Hisgotan dinhi ang bag-ong mga situwasyon, pamaagi, ug dinaliang mga panginahanglan sa mga kongregasyon. Kini nga tunghaan ipahigayon matag pipila ka tuig sumala sa direksiyon sa Nagamandong Lawas.
Gidugayon: Sa milabayng mga tuig, kini nga tunghaan gipahigayon nga duha ngadto sa duha ka adlaw ug tunga alang sa mga nagapanawng magtatan-aw, usa ka adlaw ug tunga alang sa mga ansiyano, ug usa ka adlaw alang sa ministeryal nga mga alagad.
Lokasyon: Sagad sa Kingdom Hall o Assembly Hall.
Kuwalipikasyon: Nagapanawng magtatan-aw, ansiyano, o ministeryal nga alagad.
Pagpaenrol: Ang mga ansiyano ug ministeryal nga alagad makadawat ug imbitasyon gikan sa magtatan-aw sa sirkito. Ang mga nagapanawng magtatan-aw makadawat ug imbitasyon gikan sa sangang buhatan.
“Sulod lang sa mubong panahon, ang tunghaan naghisgot ug daghang impormasyon. Apan kini nagdasig sa mga ansiyano ug nagtabang kanila nga magpabiling malipayon ug magpadayon sa pag-alagad kang Jehova. Ang bag-ohan ug dugay nang mga ansiyano nakakat-on nga mahimong epektibong magbalantay ug magkahiusa ‘sa samang panghunahuna.’”—Quinn (sa ubos).
“Kini nagtabang kanamo nga mas masabtan ang espirituwal nga mga butang, nagpasidaan kanamo sa mga kapeligrohan, ug naghatag kanamog praktikal nga mga sugyot sa pag-atiman sa panon. Pagkamahigugmaon ni Jehova!”—Michael.
Pioneer Service School
Katuyoan: Pagtabang sa mga payunir nga ‘matuman sa bug-os ang ilang ministeryo.’—2 Tim. 4:5.
Gidugayon: Duha ka semana.
Lokasyon: Pilion sa sangang buhatan; sagad sa Kingdom Hall.
Kuwalipikasyon: Labing menos usa ka tuig nang regular payunir.
Pagpaenrol: Ang kuwalipikadong mga payunir awtomatikong ienrol ug pahibaloon sa magtatan-aw sa sirkito.
“Natabangan ko sa tunghaan nga masagubang ang mga kalisdanan sa akong kinabuhi ug ministeryo,” matod ni Lily (sa tuo). “Miuswag ang akong paagi sa pagtuon, pagpanudlo, ug paggamit sa Bibliya. Mas makatabang na ko sa uban, makasuportar sa mga ansiyano, ug makaamot sa pag-uswag sa kongregasyon.”
Si Brenda, nga kaduha nang nakaeskuyla, miingon: “Kini nakatabang nako nga 100 porsiyentong unahon ang espirituwal nga mga butang, pahaiton ang akong konsensiya, ug magpokus sa pagtabang sa uban. Mahinatagon gayod si Jehova!”
School for Congregation Elders
Katuyoan: Pagtabang sa mga ansiyano sa pag-atiman sa ilang mga responsabilidad sa kongregasyon ug sa pagpalig-on sa ilang espirituwalidad.
Gidugayon: Lima ka adlaw.
Lokasyon: Pilion sa sangang buhatan; sagad sa Kingdom Hall o Assembly Hall.
Kuwalipikasyon: Ansiyano.
Pagpaenrol: Ang sangang buhatan maoy mag-imbitar sa mga ansiyano.
Matikdi kining mga komento gikan sa pipila nga nakaeskuyla sa ika-92 nga klase sa United States:
“Nakabenepisyo kaayo ko niini. Natabangan ko sa pagsusi sa akong kaugalingon ug sa pag-atiman sa mga karnero ni Jehova.”
“Mas makadasig na ko sa uban pinaagi sa pagpasiugda sa pangunang mga punto sa Bibliya.”
“Akong ipadapat ang tanan nakong nakat-onan sa tunghaan sa tibuok kong kinabuhi.”
School for Traveling Overseers and Their Wives
Katuyoan: Pagtabang sa mga magtatan-aw sa sirkito ug distrito nga mahimong mas epektibo sa pag-alagad sa mga kongregasyon samtang sila “naghago sa pagpanulti ug sa pagpanudlo.”—1 Tim. 5:17; 1 Ped. 5:2, 3.
Gidugayon: Duha ka bulan.
Lokasyon: Pilion sa sangang buhatan.
Kuwalipikasyon: Magtatan-aw sa sirkito o distrito.
Pagpaenrol: Ang sangang buhatan maoy mag-imbitar sa mga nagapanawng magtatan-aw ug sa ilang asawa.
“Mas napabilhan namo si Jesus ingong ulo sa organisasyon. Among nakita nga kinahanglan gyong dasigon ang mga igsoon ug palig-onon ang panaghiusa sa matag kongregasyon. Nasilsil sab sa among hunahuna nga bisag motambag ug mobadlong usahay ang mga nagapanawng magtatan-aw, ang ilang pangunang tumong mao ang pagtabang sa mga igsoon nga mobating gihigugma sila ni Jehova.”—Joel, unang klase, 1999.
Bible School for Single Brothers
Katuyoan: Pagbansay sa tagsaanong mga ansiyano ug ministeryal nga alagad alang sa dugang mga responsabilidad sa organisasyon ni Jehova. Daghan sa mograduwar iasayn diha sa ilang nasod diin may panginahanglan. Ang uban iasayn sa laing nasod kon andam silang modawat niini. Ang pipila mahimong iasayn sa lagyo ug hilit nga mga lugar ingong temporaryong mga espesyal payunir aron sugdan ug ipalapad ang buluhatong pagsangyaw.
Gidugayon: Duha ka bulan.
Lokasyon: Pilion sa sangang buhatan; sagad sa Kingdom Hall o Assembly Hall.
Kuwalipikasyon: Tagsaanong mga brader nga 23 ngadto sa 62 anyos, maayog panglawas, ug gustong moalagad diin may mas dakong panginahanglan. (Mar. 10:29, 30) Sila kinahanglang regular payunir labing menos duha ka tuig, ug ansiyano o ministeryal labing menos duha ka tuig nga walay hunong.
Pagpaenrol: Dunay miting panahon sa sirkitong asembliya aron ihatag ang dugang impormasyon alang sa gustong moeskuyla.
“Pinaagi sa pagpahimulos niini nga tunghaan, akong gitugotan ang espiritu ni Jehova sa paghimog mga kausaban sa akong kaugalingon,” matod ni Rick nga migraduwar sa ika-23 nga klase sa United States. “Kon hatagan ka ni Jehova ug asaynment, tabangan ka niya nga molampos. Akong nakat-onan nga kon isentro nako ang akong hunahuna sa kabubut-on sa Diyos ug dili sa akong kaugalingon, palig-onon ko niya.”
“Akong napabilhan ang organisasyon sa Diyos, ug para nako samag milagro ang paglihok niini,” miingon si Andreas nga nag-alagad sa Germany. “Kini nga pagbansay nag-andam kanako alang sa buluhaton sa umaabot. Ang daghang panig-ingnan sa Bibliya nagtudlo usab kanako niini nga kamatuoran: Kon akong alagaran ang akong mga igsoon ug si Jehova, moresulta kinig tinuod nga kalipay.”
Bible School for Christian Couples
Katuyoan: Hatagag linaing pagbansay ang mga magtiayon aron mas magamit pa sila ni Jehova ug sa iyang organisasyon. Daghan sa mograduwar iasayn diha sa ilang nasod diin may mas dakong panginahanglan. Ang pipila mahimong iasayn sa laing nasod kon andam silang modawat niini. Mahimo silang iasayn sa lagyo ug hilit nga mga lugar ingong temporaryong espesyal payunir aron sugdan ug ipalapad ang buluhatong pagsangyaw.
Gidugayon: Duha ka bulan.
Lokasyon: Kini nga tunghaan gisugdan didto sa United States, ug sugod sa Septiyembre 2012, kini himoon usab diha sa mga teritoryo sa piniling mga sangang buhatan, sagad sa Kingdom Hall o Assembly Hall.
Kuwalipikasyon: Magtiayong nag-edad ug 25 ngadto sa 50, maayog panglawas, anaa sa kahimtang nga makaalagad diin may mas dakong panginahanglan, ug duna niini nga tinamdan: “Ania ako! Ipadala ako.” (Isa. 6:8) Labing menos duha ka tuig nang minyo ug nag-alagad nga bug-os panahon labing menos duha ka tuig nga walay hunong. Ang bana kinahanglang ansiyano o ministeryal labing menos duha ka tuig nga walay hunong.
Pagpaenrol: Dunay miting panahon sa distritong kombensiyon aron ihatag ang dugang impormasyon alang sa gustong moeskuyla. Kon walay himoong miting sa mga distritong kombensiyon sa inyong nasod ug buot ninyong moaplay, puwede mong mosulat sa inyong sangang buhatan alang sa dugang impormasyon.
“Nausab gyod ang among kinabuhi sa walo ka semana nga pagtungha! Usa kini ka dakong kahigayonan alang sa mga magtiayon nga gustong magpalapad sa ilang ministeryo. Determinado mi nga huptang balanse ang among kinabuhi aron maalamon namong magamit ang among panahon.”—Eric ug Corina (sa ubos), unang klase, 2011.
Watchtower Bible School of Gilead
Katuyoan: Pagbansay sa mga estudyante aron mag-alagad ingong misyonaryo sa mga lugar nga dakog populasyon, ingong nagapanawng magtatan-aw, o ingong Bethelite. Katuyoan niini nga mahimong mas organisado ug mouswag ang kalihokan sa kanataran ug sa sangang buhatan.
Gidugayon: Lima ka bulan.
Lokasyon: Watchtower Educational Center, Patterson, New York, U.S.A.
Kuwalipikasyon: Magtiayong anaa na sa espesyal nga bug-os panahong pag-alagad—mga misyonaryo nga wala pa makaeskuyla sa tunghaan, espesyal payunir, nagapanawng magtatan-aw, o Bethelite. Sila kinahanglang anaa sa maong pribilehiyo labing menos tulo ka tuig nga walay hunong. Sila kinahanglang larinong makasulti, makabasa, ug makasulat ug Iningles.
Pagpaenrol: Ang mga magtiayon mahimong dapiton sa Branch Committee sa pag-aplay.
Si Lade ug Monique nga taga-United States nag-alagad na karon sa Africa. “Ang Gilead School nag-andam kanamo sa pag-adto bisan asa kami ipadala ug sa pag-alagad uban sa minahal nga mga igsoon,” matod ni Lade.
Si Monique midugang: “Samtang akong gipadapat ang akong nakat-onan sa Pulong sa Diyos, mas nagmalipayon ko sa akong asaynment. Akong giisip ang kalipay ingong dugang pamatuod sa gugma ni Jehova.”
School for Branch Committee Members and Their Wives
Katuyoan: Pagtabang sa mga Branch Committee sa pagdumala sa mga puy-anang Bethel, paghatag pagtagad sa mga butang nga makaapektar sa mga kongregasyon, ug sa pagdumala sa mga sirkito ug distrito. Makat-onan usab nila ang bahin sa paghubad, pag-imprenta, ug pagpadalag mga literatura.
Gidugayon: Duha ka bulan.
Lokasyon: Watchtower Educational Center, Patterson, New York, U.S.A.
Kuwalipikasyon: Membro sa Branch Committee o Country Committee o itudlo niini nga katungdanan.
Pagpaenrol: Ang Nagamandong Lawas maoy mag-imbitar sa maong mga brader ug sa ilang asawa.
Si Lowell ug Cara sa ika-25 nga klase nag-alagad sa Nigeria. “Ako napahinumdoman nga bisag unsa pa ka puliki o unsang buluhaton ang gihatag kanako, malipay lamang si Jehova kon buhaton kana sumala sa iyang paagi,” matod ni Lowell. “Gipasiugda usab sa tunghaan nga angay natong sundogon ang gugma nga gipakita ni Jehova sa iyang mga alagad.”
Si Cara midugang: “Akong gipamalandong kini nga komento, ‘Kon dili nako mapatin-aw sa simpleng paagi ang usa ka punto, kinahanglang tun-an una nako ang maong ulohan sa dili pa ko motudlo sa uban.’”