Bug-os Ka Bang Nagpatudlo Kang Jehova?

1. Unsa ka hinungdanon kang Jehova ang pagpanudlo?

¹ Buot ni Jehova nga atong “Dakong Instruktor” nga kita matudloan. (Isa. 30:20) Gisugdan niya ang pagpanudlo human niya lalanga ang iyang panganayng Anak. (Juan 8:28) Human morebelde si Adan, si Jehova wala mohunong sa pagpanudlo, apan mahigugmaon niyang gitudloan ang dili hingpit nga mga tawo.—Isa. 48:17, 18; 2 Tim. 3:14, 15.

2. Unsang programa sa pagpanudlo ang ginahimo karon?

² Giorganisar ni Jehova karon ang kinadak-ang programa sa pagpanudlo. Si Isaias nagtagna nga minilyon sa tibuok kalibotan ang manungas sa simbolikong “bukid sa balay ni Jehova.” (Isa. 2:2) Ngano? Aron matudloan sa mga dalan ni Jehova! (Isa. 2:3) Sa 2010 nga tuig sa pag-alagad, ang mga Saksi ni Jehova migugol ug kapig 1.6 ka bilyong oras sa pagsangyaw ug pagpanudlo bahin sa Bibliya. Dugang pa, kada semana gihimo ang Kasulatanhong pagpanudlo diha sa kapig 105,000 ka kongregasyon sa tibuok yuta, ug ang Biblikanhong mga publikasyon gipatik sa matinumanon ug maalamong ulipon sa kapig 500 ka pinulongan.

3. Sa unsang paagi ikaw nakabenepisyo sa pagpanudlo ni Jehova?

³ Pahimusli Gayod Kini: Kita nakabenepisyo gayod sa pagpanudlo sa Diyos! Atong nakat-onan nga ang Diyos dunay ngalan ug siya may kahingawa kanato. (Sal. 83:18; 1 Ped. 5:6, 7) Nahibaloan nato ang tubag sa hinungdanong mga pangutana sa kinabuhi, sama sa: Nganong ang tawo mag-antos ug mamatay? Unsaon nako pagkaplag sa tinuod nga kalipay? Unsay katuyoan sa kinabuhi? Gihatagan usab kita ni Jehova ug moral nga giya aron ‘magmalamposon ang atong dalan.’—Jos. 1:8.

4. Unsang mga programa sa pagpanudlo ang mapahimuslan sa mga alagad sa Diyos, ug nganong maningkamot gayod kita nga matudloan ni Jehova?

⁴ Dugang pa, gihikay ni Jehova ang linaing programa sa pagpanudlo aron mapauswag ang pag-alagad sa iyang katawhan. Anaa sa panid 4-6 kini nga mga programa. Bisag dili itugot sa atong kahimtang nga makapahimulos sa pipila niini, naningkamot ba gayod kitang makabenepisyo sa pagpanudlo sa Diyos nga bukas alang kanato? Gidasig ba nato ang mga batan-on, nga kanunayng giawhag sa mga magtutudlo ug sa uban nga mangagpas ug taas nga edukasyon, sa paghimog espirituwal nga mga tumong ug sa pagkab-ot sa kinatas-ang edukasyon nga iya sa Diyos? Kon maningkamot gayod kita nga matudloan ni Jehova, kita magmalipayon karon ug makabatog kinabuhing dayon sa umaabot.—Sal. 119:105; Juan 17:3.

Edukasyonal nga mga Programa sa Organisasyon ni Jehova

Mga Klase sa Pagbasa ug Pagsulat

Katuyoan: Tudloan ang mga tawo sa pagbasa ug pagsulat aron sila makatuon sa Bibliya ug makatudlo sa kamatuoran sa uban.
Gidugayon: Depende sa panginahanglan.
Lokasyon: Lokal nga Kingdom Hall.
Kinsay Makaapil: Ang tanang magmamantala ug mga interesado.
Unsaon Pag-aplay: Organisahon sa mga ansiyano ang klase sa pagbasa ug pagsulat depende sa lokal nga panginahanglan, ug dasigon nila sa pagtambong ang tanan nga makabenepisyo niini.

Teokratikanhong Tunghaan sa Ministeryo

Katuyoan: Pagbansay sa mga magmamantala aron mahimong epektibong magwawali ug magtutudlo sa maayong balita.
Gidugayon: Permanente.
Lokasyon: Lokal nga Kingdom Hall.
Kinsay Makaenrol: Tanang magmamantala. Ang uban usab nga aktibong nakig-uban sa kongregasyon, midawat sa mga pagtulon-an sa Bibliya, ug nagkinabuhi uyon sa Kristohanong mga prinsipyo.
Unsaon Pag-aplay: Pakigsulti sa magtatan-aw sa Teokratikanhong Tunghaan sa Ministeryo.

Klase sa Pagtuon ug Langyawng Pinulongan

Katuyoan: Tudloan ang mga magmamantala sa pagsangyaw sa maayong balita sa langyawng pinulongan.
Gidugayon: Upat o lima ka bulan. Ang klase sagad himoon sa Sabado sa buntag sulod sa usa o duha ka oras.
Lokasyon: Sagad sa duol nga Kingdom Hall.
Kinsay Makaenrol: Mga magmamantala nga maayog baroganan ug buot mosangyaw sa langyawng pinulongan.
Unsaon Pag-aplay: Ang mga klase hikayon sa sangang buhatan sumala sa panginahanglan.

Pagpanukod ug mga Kingdom Hall

Katuyoan: Pagtukod ug pag-ayo ug mga Kingdom Hall. Kini dili tunghaan, apan pinaagi niini ang mga boluntaryo tudloan ug lainlaing kahanas aron sila makatabang sa pagpanukod.
Gidugayon: Depende sa kahimtang sa boluntaryo.
Lokasyon: Bisan asa, ubos sa pagdumala sa Regional Office sa Kingdom Hall Construction Desk. Ang ubang mga boluntaryo imbitahon aron makatabang sa dapit nga naapektohan sa kalamidad.
Kuwalipikasyon: Bawtismadong mga brader ug sister nga giaprobahan sa lawas sa mga ansiyano, may kahanas man o wala.
Unsaon Pag-aplay: Mopil-ap ug Application for Kingdom Hall Construction Volunteer Program (A-25) gikan sa magtatan-aw sa sirkito o mahimo kining pangayoon gikan sa sangang buhatan.

Tunghaan sa Payunir nga Pag-alagad

Katuyoan: Pagtabang sa mga payunir nga ‘matuman sa bug-os ang ilang ministeryo.’—2 Tim. 4:5.
Gidugayon: Duha ka semana.
Lokasyon: Pilion sa sangang buhatan; sagad sa duol nga Kingdom Hall.
Kuwalipikasyon: Labing menos usa ka tuig nang regular payunir.
Unsaon Pag-enrol: Ang kuwalipikadong mga payunir awtomatikong ilista ug pahibaloon sa magtatan-aw sa sirkito.

Bethel Entrants’ School

Katuyoan: Kini nga tunghaan gidisenyo sa pagtabang sa bag-ong mga Bethelite aron magmalamposon sila sa ilang pag-alagad.
Gidugayon: Usa ka oras matag semana sulod sa 16 ka semana.
Lokasyon: Bethel.
Kuwalipikasyon: Permanente nga membro sa pamilyang Bethel o dugay nang temporaryong boluntaryo (usa ka tuig o kapin pa).
Unsaon Pag-enrol: Ang kuwalipikadong mga membro sa pamilyang Bethel awtomatikong ilista.

Kingdom Ministry School

Katuyoan: Bansayon ang mga ansiyano ug ministeryal nga alagad sa pag-atiman sa ilang mga responsibilidad sa organisasyon. (Buh. 20:28) Kini nga tunghaan ieskedyul sa Nagamandong Lawas.
Gidugayon: Di pa dugay, kini gihimo nga usa ka adlaw ug tunga alang sa mga ansiyano ug usa ka adlaw alang sa mga ministeryal.
Lokasyon: Sagad sa duol nga Kingdom Hall o Assembly Hall.
Kuwalipikasyon: Mga ansiyano ug ministeryal nga alagad.
Unsaon Pag-enrol: Ang kuwalipikadong mga ansiyano ug ministeryal imbitahon sa magtatan-aw sa sirkito.

School for Congregation Eldersa

Katuyoan: Aron matabangan ang mga ansiyano sa pag-atiman sa ilang mga responsibilidad sa kongregasyon.
Gidugayon: Lima ka adlaw.
Lokasyon: Pilion sa sangang buhatan; sagad sa duol nga Kingdom Hall o Assembly Hall.
Kuwalipikasyon: Ansiyano.
Unsaon Pag-enrol: Ang kuwalipikadong mga ansiyano imbitahon sa sangang buhatan.

School for Traveling Overseers and Their Wivesb

Katuyoan: Aron ang magtatan-aw sa sirkito ug distrito mahimong mas epektibo sa pag-alagad sa mga kongregasyon ug sa ‘pagpanulti ug pagpanudlo’ ug sa pagbantay sa panon nga ilang giatiman.—1 Tim. 5:17; 1 Ped. 5:2, 3.
Gidugayon: Duha ka bulan.
Lokasyon: Pilion sa sangang buhatan.
Kuwalipikasyon: Magtatan-aw sa sirkito o distrito.
Unsaon Pag-enrol: Ang kuwalipikado nga nagapanawng mga magtatan-aw ug ilang asawa imbitahon sa sangang buhatan.

Bible School for Single Brothersc

Katuyoan: Aron bansayon ang tagsaanong mga ansiyano ug ministeryal sa pagdawat ug dugang mga responsibilidad. Ang kadaghanan nga mograduwar iasayn sa dapit nga may panginahanglan diha sa ilang nasod. Ang pipila iasayn sa ubang nasod kon itugot sa ilang kahimtang.
Gidugayon: Duha ka bulan.
Lokasyon: Pilion sa sangang buhatan; sagad sa Assembly Hall o Kingdom Hall.
Kuwalipikasyon: Tagsaanong mga brader nga nag-edad ug 23 ngadto sa 62, maayog panglawas, ug buot moalagad sa mga igsoon ug mosangyaw sa dapit nga may panginahanglan. (Mar. 10:29, 30) Sila kinahanglang padayong nag-alagad ingong mga ansiyano ug ministeryal sa labing menos duha ka tuig.
Unsaon Pag-aplay: Kon anaa kini nga tunghaan sa inyong nasod, may miting panahon sa sirkitong asembliya alang niadtong gustong magpaenrol. Ang dugang impormasyon ihatag panahon sa miting.

Bible School for Christian Couplesd

Katuyoan: Hatagag linaing pagbansay ang mga magtiayon aron mas bug-os silang magamit ni Jehova ug sa iyang organisasyon. Ang kadaghanang mograduwar iasayn sa dapit nga may panginahanglan sa ilang nasod. Ang pipila iasayn sa laing nasod kon itugot sa ilang kahimtang.
Gidugayon: Duha ka bulan.
Lokasyon: Ang unang mga klase gihimo sa Watchtower Educational Center sa Patterson, New York, U.S.A. Dayon kini pagahimoon sa mga dapit nga pilion sa sangang buhatan, sagad sa Assembly Hall o Kingdom Hall.
Kuwalipikasyon: Mga magtiayon nga nag-edad ug 25 ngadto sa 50, maayog panglawas, ug anaa sa kahimtang nga makaalagad sa dapit nga may panginahanglan ug may tinamdan: “Ania ako! Ipadala ako.” (Isa. 6:8) Dugang pa, sila kinahanglang labing menos duha ka tuig nang minyo ug padayong nag-alagad nga bug-os panahon sa labing menos duha ka tuig.
Unsaon Pag-aplay: Kon anaa kini nga tunghaan sa inyong nasod, may miting panahon sa espesyal nga asembliya alang niadtong gustong magpaenrol. Ang dugang impormasyon ihatag panahon sa miting.

Watchtower Bible School of Gilead

Katuyoan: Pagbansay sa mga payunir ug sa ubang bug-os panahong mga alagad aron mahimong misyonaryo.
Gidugayon: Lima ka bulan.
Lokasyon: Watchtower Educational Center, Patterson, New York, U.S.A.
Kuwalipikasyon: Mga magtiayon nga tulo ka tuig nang bawtismado ug nag-edad ug 21 ngadto sa 38 sa dihang nag-aplay. Sila kinahanglang makasultig Iningles, labing menos duha ka tuig nang minyo, maayog panglawas, ug padayong nag-alagad nga bug-os panahon sa labing menos duha ka tuig. Ang mga payunir nga nag-alagad sa ubang nasod (lakip ang mga misyonaryo); nagapanawng magtatan-aw; membro sa pamilyang Bethel; graduwado sa Ministerial Training School, sa Bible School for Single Brothers, ug sa Bible School for Christian Couples makaaplay usab kon sila kuwalipikado.
Unsaon Pag-aplay: Sa piniling mga sangang buhatan, may miting panahon sa distritong kombensiyon alang niadtong gustong magpaenrol. Ang dugang impormasyon ihatag panahon sa miting. Kon walay miting panahon sa mga kombensiyon sa inyong nasod ug gusto kang moaplay, pagsulat sa sangang buhatan alang sa dugang impormasyon.

School for Branch Committee Members and Their Wives

Katuyoan: Aron ang mga membro sa Branch Committee mahimong mas epektibo sa pagdumala sa mga puy-anang Bethel, sa lainlaing mga departamento niini, lakip ang paghubad, pagpatik, ug pagpadalag mga literatura, ingon man sa pagdumala sa mga sirkito ug distrito ug sa mga kalihokan sa kongregasyon bahin sa pag-alagad.—Luc. 12:48b.
Gidugayon: Duha ka bulan.
Lokasyon: Watchtower Educational Center, Patterson, New York, U.S.A.
Kuwalipikasyon: Membro sa Branch Committee o Country Committee o itudlo niini nga katungdanan human mograduwar niini nga tunghaan.
Unsaon Pag-enrol: Ang kuwalipikadong mga brader ug ilang mga asawa imbitahon sa Nagamandong Lawas.

a Sa pagkakaron, kini nga tunghaan wala pa sa matag nasod.

b Sa pagkakaron, kini nga tunghaan wala pa sa matag nasod.

c Sa pagkakaron, kini nga tunghaan wala pa sa matag nasod.

d Sa pagkakaron, kini nga tunghaan wala pa sa matag nasod.