Mga Magmamantala sa Gingharian Nagtaho
‘Usa ka Maayong Taho Gikan sa Lagyong Kayutaan’
◻ SA YELOHONG Greenland ang pila ka magmamantala nga milibot aron sa pagsangyaw nakahibalag sa usa ka batan-ong Norwego nga midawat sa librong Life—How Did It Get Here? By Evolution or by Creation? Ugaling, wala siya magpakitag dakong interes. Sa ilang sunod nga pagduaw niining halayong dapit, siya miingon kanila nga nabasa niya ang libro sa makadaghan ug gusto niyag dugang libro. Gibilin kaniya ang ubay-ubayng libro ug brosyur. Nasubo siya sa pagkahibalong ang mga magmamantala dili makabalik hangtod sa sunod tuig apan gikuha ang adres sa mga Saksi. Usa ka bulan sa ulahi, sa ilang katingala, siya nanuktok sa ilang pultahan. Giasoy niyang natumba siya sa yelo uban sa iyang scooter sa niyebe sa pagpaingon niya sa iyang sakayan, ug dayon gidangtag unom ka oras ang iyang paglawig aron makaabot sa mga Saksi. Gusto niyang makakuhag dugang basahon ug mahisgotan ang kamatuoran. Mitambong siyag tigom niadtong gabhiona ug mihimog mga plano sa pagtambong kas-a sa usa ka bulan. Siya mianha alang sa bisita sa magtatan-aw sa sirkito ug nadasig kaayo. Siya mibulag na sa simbahan ug karon nagasangyaw sa maayong balita diha sa iyang dapit. Kon ang yelo sa tingtugnaw mopugong niya sa pagtambong sa mga tigom pinaagi sa sakayan, siya mosakayg helicopter, nga mogasto siyag $150 sa usa ka biyahe.
Pila kanato ang maningkamot sa ingon aron mouswag sa atong ministeryo?
◻ Daghang tawo ang nagasanong sa maayong balita sa Madagascar. Uban ang kapin lang sa 3,200 ka magmamantala sa Gingharian, 16,205 ang mitambong sa Memoryal sa kamatayon ni Kristo. Ang mga igsoon naningkamot pag-ayo sa pag-abot sa tanang tawo sa isla.
Pananglitan, 17 sa 30 ka magmamantala sa Isaonjo nga Kongregasyon mihukom sa pagsangyaw sa usa ka teritoryo mga daghang kilometrahe ang gilay-on. Migikan sila sa ilang balangay tunga sa oras lapas sa tungang gabii. Sa duha ka oras mibaktas sila sa titip nga mga dalandalan ug agi sa lapokong mga tubigong dapit. Dayon misulod sila sa tropikanhong lasang sa 2:30 s.b. Kay giliminan pa sa kangitngit ang lasang, ang pila ka igsoong lalaki nahidasmag sa mga bato. Ang pipila nahidugmo sa mga lanaw sa tubig diha sa lungag sa kabatoan. Ang lasang may mga alimatok, ug gipaak sila sa daghang insekto. Ang kadaghanan sa mga igsoong babaye samang nagkalisodlisod. Ang lapok usahay abot sa tuhod. Ang tanang 17 ka magmamantala nagarasan sa usa o laing paagi, apan sa kataposan sila nakagawas sa lasang sa 6:30 s.b.!
Ang pagsangyaw sa kanataran misugod sa 6:45 s.b. Ang kadaghanan sa katawhan nagdawat nga maluluton sa mga magmamantala. Ang usa nga sa sinugdan wala magdawat sa ingon mao ang asawa sa pangulo sa usa ka Protestanteng relihiyon. Matud niya: “Ako may kaugalingong relihiyon; igo na kana kanako. Nasayod na ako sa tanan nga ginasulti sa Bibliya.” Sa dihang gipagawas sa magmamantala ang usa ka magasing Bantayanang Torre, ang babaye mapahitas-ong midumili niana, nga miingon: “Daghan akog laing balasahon.” Apan siya misugod sa pagsukitsukit: “Kinsa ba kamo, ug taga diin kamo, ug kinsay nagpadala kaninyo?” Tapos sa pagtubag nila nga malumo ug pag-asoy sa daklit sa tanang paningkamot nga ilang gihimo sa pag-abot sa iyang balangay, gidawat sa babaye ang Bantayanang Torre, nga miingon: “Paliton ko kini. Kinsay nasayod kon kamo gipadala sa Diyos?”
Sa ala 1:30 s.h., ang 17 mibiya sa teritoryo aron mopauli, nga mihimo sa panaw sa menos sa upat ka oras kay adlaw pa man. Sila gikapoy apan luwas, ug milakra sa ilang mga nawong ang kalipay. Sila miingon: “Kadto usa ka adlawng dili hikalimtan alang sa 17 kanamo nga gikan sa Isaonjo nga Kongregasyon.”
Sa pagkamatuod, ang espiritu ni Jehova nagapalihok sa iyang dedikadong mga alagad aron sa pagsangyaw sa maayong balita sa Gingharian “ngadto sa kinalay-ang bahin sa yuta,” ug daghan ang nagasanong sa maayong paningkamot sa mga Saksi.—Buhat 1:8.
[Hulagway sa panid 31]
Dunggoanan sa Umanak, Greenland