Mga Pangutana Gikan sa mga Magbabasa
◼ Nganong ang Kasugoan sa Diyos nag-ingon nga ang usa ka Israelinhon nga lalaki nga nakahimog seksuwal nga relasyon sa usa ka dili sinayoran nga dalagang ulay kinahanglan iyang pakaslan ug dili gayod makabulag kaniya?
Diha sa Exodo 22:16, 17 ug sa Deuteronomio 22:28, 29, atong makita kining sugoa, nga giingon sa uban nga daw walay kaluoy sa mga kababayen-an. Sa pagkatinuod, kini nagdasig ug taas nga sukdanan sa moral sa lalaki ug sa babaye.
Ang Deuteronomio kapitulo 22 nagpadayag ug nagkalainlaing mga kasugoan sa panimalay. Pananglitan, kini naghisgot ug kahimtang sa usa ka lalaki nga wala na mahigugma sa iyang asawa ug nangangkon nga siya dili ulay. Kini nagpadayag usab sa kasugoan sa Diyos bahin sa panapaw ug panglugos. Unya atong mabasa:
“Kon may tawo nga makakaplag ug batan-ong babaye nga ulay nga dili sinayoran, ug iyang kuhaon siya ug mohigda ipon kaniya, ug makit-an sila, ang lalaki nga mihigda ipon kaniya magahatag sa amahan sa batan-on nga babaye ug kalim-an ka buok nga salapi, ug siya mahimong asawa niya kay iyang gipakaulawan siya. Dili niya bulagan siya sa tanan niya nga adlaw.”—Deuteronomio 22:28, 29.
Kini maoy usa ka kaso sa pinugos nga pagdaldal sa daotan ug/o sa pakighilawas. Kon ang usa ka walay konsensiya nga lalaki mobating may kagawasan nga makigsekso sa usa ka ulay, ang babaye ang mapildihan ug dako. Gawas sa posibilidad nga siya makabaton ug anak nga pinaangkan, ang iyang bili ingong pangasaw-onon mawala, kay daghang Israelinhong mga lalaki dili mangasawa kaniya sa dihang mawala na ang iyang pagkaulay. Apan, unsay makapugong sa usa ka lalaki sa pagpanamastamas sa usa ka ulay? Ang Kasugoan sa Diyos nga “balaan ug matarong.”—Roma 7:12.
Ang Moisesnon nga balaod adunay tagana sa pagtugot sa lalaki sa pagbulag sa iyang asawa sa pipila ka hinungdan. (Deuteronomio 22:13-19; 24:1; Mateo 19:7, 8) Apan ang atong mabasa diha sa Exodo 22:16, 17 ug sa Deuteronomio 22:28, 29 nagpakita nga ang kapilian sa pagbulag nawala human sa gawas sa kaminyoon nga pakighilawas. Nan, kini makapugong sa lalaki (o sa ulay nga babaye) sa pagsukol sa tintasyon sa pakigbahin sa pakighilawas. Ang lalaki dili makabati, ‘Siya matahom ug madanihon, busa makiglipaylipay ako niya bisan siya dili nako pakaslan.’ Hinunoa, kining balaora maoy mopugong sa imoralidad tungod kay mopatimbangtimbang kini sa umaabot nga tagsala sa taas-ug-abot nga mga sangpotanan sa pakighilawas—sa pakig-ipon sa babaye sa tibuok niyang kinabuhi.
Ang Kasugoan nagpakubos usab sa problema sa anak nga pinaangkan. Ang Diyos misugo: “Walay anak nga pinaangkan ang magasulod sa kongregasyon ni Jehova.” (Deuteronomio 23:2) Busa kon ang nanaldal nga lalaki sa pakighilawas sa babayeng ulay mapugos sa pagpakasal kaniya, ang ilang pakighilawas dili mosangpot ug anak nga pinaangkan taliwala sa mga Israelinhon.
Ingnon ta, nga ang mga Kristohanon nagkinabuhi sa usa ka kahimtang sa katilingban nga lahi sa karaang mga Israelinhon. Dili kita ilalom sa mga balaod sa Moisesnong Kasugoan, apil niining balaora nga nagsugo nga kinahanglang magpakasal ang duha ka tawo nga nakapakighilawas. Bisan pa, dili kita makahunahuna nga ang paghimog gawas sa kaminyoon nga pakighilawas maoy usa ka dili-hinungdanong butang. Kinahanglan hatagan sa mga Kristohanon ug seryosong pagpalandong ang taas-ug-tagal nga mga sangpotanan, sama nga kining balaora nagpalihok sa mga Israelinhon sa pagsunod.
Ang pagpanaldal sa pakighilawas sa tawong dili-minyo makadaot sa katungod sa usa sa pagsulod sa Kristohanong kaminyoon ingong maputli nga ulay (lalaki o babaye). Ang gawas sa kaminyoon nga pakighilawas magaapektar usab sa mga katungod kang bisan kinsa nga mahimo unyang kapikas sa indibiduwal, nga mao, ang katungod sa indibiduwal sa pagminyo ug maputli nga Kristohanon. Labaw sa tanan, ang pakighilawas kinahanglang likayan tungod kay ang Diyos nag-ingon nga kini daotan; kini maoy usa ka sala. Tukmang misulat ang apostol: “Kay ang kabubut-on sa Diyos mao kini, ang pagbalaan kaninyo, aron kamo managlikay sa pakighilawas.”—1 Tesalonica 4:3-6; Hebreohanon 13:4.