Handurawa ang Usa ka Kalibotan nga Walay Kadalo
IKAW ba makahanduraw ug usa ka kalibotan diin ang mga tawo magtinabangay imbes mag-indigay? Diin tratahon sa mga tawo ang ubang mga tawo sa paagi nga maoy ilang buot nga itratar kanila? Kini mao ang mga kinaiyahan sa usa ka kalibotan nga walay kadalo. Pagkatahom nga kalibotan unya kana! Moabot kaha kini? Oo, kana moabot. Apan sa unsang paagi ang kadalo—nga nakagamot pag-ayo sa katawhan—mahanaw?
Aron matubag, kinahanglang makasabot una kita sa sinugdanan sa kadalo. Ang Bibliya nagpakita nga kini dili usa kinaiyahan sa tawhanong rasa. Ang propeta nga si Moises nagpahinumdom kanato nga walay depekto sama sa kadalo ang makita sa sinugdan diha sa unang tawo, ang hingpit nga linalang sa dili-dalo nga Maglalalang: “Ang Bato, hingpit ang iyang buhat, kay ang tanan niya nga mga dalan matul-id.” Busa, karon, diin man gikan ang kadalo? Ang unang tawhanong paris nagtugot niini nga mougmad diha kanila—si Eva sa mahakugong paghandom sa iyang makuha gikan sa pagkaon sa bunga nga gidili sa Diyos, si Adan sa kadalo nga dili mawala kaniya ang iyang matahom nga asawa. Si Moises midugang, sa mga pulong nga matuod usab kang Adan ug Eva: “Sila milihok nga malaglagon sa ilang kaugalingon; sila dili iyang mga anak, ang sayop anaa kanila.”—Deuteronomio 32:4, 5; 1 Timoteo 2:14.
Sa panahon sa tibuok kalibotang Lunop sa adlaw ni Noe, ang kadalo ug kaulag miugmad ngadto sa kahimtang nga “ang pagkadaotan sa tawo sa yuta dako ug ang tanang kiling sa mga hunahuna sa iyang kasingkasing lonlon nga kadaotan lamang.”—Genesis 6:5.
Kining nangibabaw nga tinamdan sa kadalo sa tawo nagpadayon hangtod karon, maorag miabot na sa kinapungkayan sa karong ingrato ug hakog nga katilingban.
Pagwagtang sa Kadalo Pinaagig Edukasyon
Maingon nga mitubo ang kadalo taliwala sa katawhan, busa ang pagbaliskad niini posible. Ang kadalo mabuntog. Apan, aron mahitabo kini, ang hustong edukasyon ug pagbansay kinahanglan, uban ang higpit nga pagsunod sa mga kabalaoran ug mga kalagdaan sa paggawi. Kini daw makataronganong pamation, apan kinsay motagana nianang matanga sa edukasyon ug sa pagtino nga ang natun-an ipadapat—bisag ipugos kon gikinahanglan?
Kana nga edukasyon kinahanglan magagikan sa usa ka tinubdan nga walay kadalo mismo. Kinahanglang wala gayoy bisan unsang natagong mga motibo o magapaabot ug butang baylo niana nga pagbansay. Dugang pa, ang bili ug pagkapraktikal sa pagkadili-dalo kinahanglang itudlo ug ipasundayag. Ang usa nga nagtuon kinahanglang kombinsido nga dili lamang nga ang maong paagi sa kinabuhi posible kondili kini maoy pinili nga paagi, nga mohatag mga kaayohan sa iyang kaugalingon ug niadtong nagapalibot kaniya.
Ang Diyos sa langit lamang ang makatagana niining matanga sa edukasyon, kay kinsa nga tawo o organisasyon sa yuta ang adunay mga katakos ug kasinatian? Ang tanang mga tawo dili-kuwalipikado pinasukad niining kamatuoran sa Bibliya: “Ang tanan nakasala ug nakabsan sa himaya sa Diyos.”—Roma 3:23.
Makalilipay, si Jehova, ang Diyos sa langit, nagatagana niana nga edukasyon diha sa iyang sinulat nga basahon, o giya, ang Balaang Bibliya. Ang iyang Anak, si Jesu-Kristo, hawod niining matanga sa pagtulon-an sa dihang siya usa pa ka tawo sa yuta. Sa tunga-tunga sa inilang Wali sa Bukid ni Jesus, siya naghisgot sa usa ka paagi sa kinabuhi nga katingalahang pamation alang sa kadaghanan niadtong nagpatalinghog, kay gilakip niadto ang pagkadili-mahakogon bisan ngadto sa imong mga kaaway o sa mga magsusupak. Si Jesus miingon: “Higugmaa ang inyong mga kaaway ug sa pag-ampo niadtong nagalutos kaninyo; aron mahimo kamong mga anak sa inyong Amahan nga anaa sa langit, kay siya nagapasubang sa iyang adlaw ibabaw sa mga tawong daotan ug maayo ug nagpaulan ibabaw sa mga tawong matarong ug dili-matarong. Kay kon higugmaon ninyo silang nahigugma kaninyo, unsay balos nga inyong madawat? Dili ba nagabuhat man sa ingon ang mga maniningil ug bahis?”—Mateo 5:44-46.
Ang bahin sa misyon ni Jesus sa yuta mao ang pagbansay sa dili-dalo nga mga magtutudlo aron nga sila sa baylo makatudlo sa uban niining walay-kadalo nga paagi sa kinabuhi. Sa ulahi human sa kamatayon ug pagkabanhaw ni Jesus, si apostol Pablo nahimong usa niana nga mga magtutudlo. Diha sa daghan niyang mga dinasig nga sulat, si Pablo nag-awhag sa pagwagtang sa kadalo. Pananglitan, siya misulat sa mga taga-Efeso: “Apan ang pakighilawas ug ang tanang matang sa kahugaw o kadalo dili gayod pagahisgotan taliwala kaninyo, kay kini dili angay sa mga tawong balaan.”—Efeso 5:3.
Sa susama karong adlawa, ang mga Saksi ni Jehova nagatudlo sa mga lalaki ug mga babaye sa pagsumpo sa mga kiling sa kadalo. Sa ulahi sila usab mahimong kuwalipikado sa paglakaw ug sa pagtudlo sa uban nianang diyosnong mga dalan.
Ang mga Kamatuoran sa Bibliya Nagalihok
Apan tingali ikaw mangutana: ‘Ang dili-hingpit ba nga mga tawo, nga diin ang kadalo nakagamot na, makaluka gayod niini diha sa ilang mga personalidad?’ Oo, sila makaluka niini. Dili bug-os, siyempre, apan sa usa ka sukod nga tinuod talagsaon. Atong tagdon ang usa ka pananglitan niini.
Usa ka napamatud-ang kawatan nagpuyo sa Espanya. Ang iyang balay puno sa mga kinawat nga mga butang. Unya siya misugod sa pagtuon sa Bibliya uban sa mga Saksi ni Jehova. Ingong resulta, ang iyang tanlag misugod sa pagtulisok kaniya, busa siya mihukom sa pag-uli sa mga butang nga iyang gikawat ngadto sa mga tag-iya. Iyang giduol ang iyang amo kanhi sa trabaho ug mitug-an nga iyang gikawat ang iyang bag-ong washing machine. Ang amo, nga nakadayeg kaayo sa iyang nabag-ong kaispan, midesider nga dili na lamang isumbong siya sa kapolisan apan gipabayad lang ang kawatan kanhi sa kantidad sa washing machine.
Dayon, ang nabag-ong kawatan determinado sa pagduaw sa mga tawo nga iyang nahinumdoman nga iyang nakawatan ug sa pag-uli sa iyang nakawat nga mga butang. Ang tanan nga iyang naduaw nahibulong nga tungod sa iyang pagpadapat sa mga prinsipyo sa Bibliya, siya aduna niining dakong kausaban sa kaisipan.
Karon giatubang siya ug tinuod nga kalisod. Siya wala makaila sa mga tag-iya sa daghang mga butang nga anaa pa kaniya. Busa, human nga nakaampo kang Jehova, siya miadto sa mga hedkuwarter sa kapolisan ug gitunol ang unom ka isteryo nga radyo nga iyang gikawat diha sa mga awto. Ang mga polis natingala, kay siya wala may rekord diha kanila. Sila mihukom nga pamultahon na lang siya ug silbihan ang mubong sentensiya sa pagkapriso.
Kining kawatan niadto karon aduna nay usa ka hinlo nga tanlag, human nga gibiyaan ang iyang kinabuhi sa krimen ug kadalo aron mahimong bahin sa tibuok-kalibotang kongregasyon sa mga Saksi ni Jehova.
Ang libo-libo sa samang mga pananglitan mahimong ikahatag dayon. Bisan tuod nga minoridad lamang ang mihimog kausaban sa ilang mga kinabuhi sa mga molupyo sa yuta, ang kamatuoran nga daghan ang nakahimo niana nagpasundayag sa gahom alang sa maayo nga modangat tungod sa kahibalo ug sa pagpadapat sa mga prinsipyo sa Bibliya.
Matag labay sa tuig, dugang ug dugang mga tawo ang midawat niining dalana sa kinabuhi. Ang instruksiyon sa Bibliya ginahatag diha sa kapin sa 60,000 ka kongregasyon sa mga Saksi ni Jehova sa tibuok yuta. Ang mga Saksi niining panahona wala magpaabot nga mausab ang kalibotan sa katibuk-an, nga mahanaw ang kadalo gikan sa kaliboan ka milyon nga nagakinabuhi karon. Bisan pa niana, ang tagna sa Bibliya nagpaila nga sa dili madugay gikan karon, ang usa ka walay-kadalo nga dalan sa kinabuhi molukop sa tibuok nga yuta!
Usa ka Walay-Kadalo nga Bag-ong Kalibotan
Wala na unyay dapit alang sa kadalo ug kahakog sa umaabot nga bag-ong kalibotan. Si apostol Pedro nagpasalig kanato nga ang pagkamatarong mao unyay timaan dili lamang alang sa “mga bag-ong langit” kondili alang usab sa “bag-ong yuta.” (2 Pedro 3:13) Apil unya ang kadalo sa “nangaging mga butang” nga milabay na, duyog sa mga sakit, kagul-anan, bisan ang kamatayon.—Pinadayag 21:4.
Busa, kon ikaw naguol sa pagdaghan sa kadalo ug sa mahakogon nga dalan sa kinabuhi nga makita sa atong tanang palibot karong adlawa, magmadasigon! Pagsugod na karon sa pagkinabuhi alang sa umaabot nga bag-ong kalibotan nga sa dili madugay mahimong kamatuoran. Uban sa tabang sa Diyos, paningkamot nga mahanaw ang kadalo gikan sa imong kaugalingong kinabuhi. Duyog sa pagtabang sa uban nga makita ang mga kaayohan nga bisan karon mapahimuslan pinaagi sa Kristohanong pagkinabuhi. Ibutang ang imong pagtuo ug pagsalig sa mga saad ni Jehova nga Diyos nga ang kadalo sa dili madugay mahimong kauban sa daghang dili-maayong mga butang nga ‘dili na pagahinumdoman, ni motungha pa sa atong mga kasingkasing.’—Isaias 65:17.
[Hulagway sa panid 5]
Si Jesus naghisgot bahin sa usa ka dalan sa kinabuhi nga nagpasiugda ug pagkadili-mahakogon, dili kadalo
[Hulagway sa panid 7]
Sa dili madugay—usa ka kalibotan nga walay kadalo