Kinabuhi ug Ministeryo ni Jesus

Ilhanan sa Kataposang mga Adlaw

KARON Martes na sa hapon. Samtang naglingkod si Jesus diha sa Bukid sa mga Olibo, nagtan-aw sa templo sa ubos, si Pedro, Andres, Santiago, ug Juan miduol kaniya. Sila nabalaka bahin sa templo, sanglit mao pay pagtagna ni Jesus nga ‘walay mahibiling usa ka bato nga pinatong sa bato nga dili pagatumpagon.’

Apan dayag nga adunay daghan pa nga anaa sa ilang mga hunahuna samtang sila miduol kang Jesus. Sa pila lang ka semana sa miagi, siya naghisgot bahin sa iyang “presensiya,” usa ka panahon sa “dihang ang Anak sa tawo igapadayag.” Ug sa mas sayo pa nga okasyon, iyang gisultihan sila bahin sa “konklusyon sa sistema sa mga butang.” Busa ang mga apostol gusto gayod nga masayod.

“Tug-ani kami,” sila miingon, “kanus-a man kini mahitabo [nga misangpot sa kalaglagan sa Jerusalem ug sa templo niini], ug unsa may ilhanan sa imong presensiya ug sa konklusyon sa sistema sa mga butang?” Sa bug-os, tulo ka bahin ang ilang pangutana. Una, sila gustong masayod bahin sa kataposan sa Jerusalem ug sa templo niini, unya mahitungod sa presensiya ni Jesus diha sa gahom sa Gingharian, ug sa kataposan bahin sa kataposan sa enterong sistema sa mga butang.

Diha sa iyang taas nga tubag, gitubag ni Jesus ang tanang tulo ka bahin sa pangutana. Siya mihatag ug ilhanan nga nagpaila kon kanus-a matapos ang Hudiyohanong sistema sa mga butang; apan siya mihatag ug daghan pa. Siya mihatag usab ug ilhanan nga mopasidaan sa iyang umaabot nga mga disipulo nga sila nagpuyo na sa panahon sa iyang presensiya ug duol na ang kataposan sa enterong sistema sa mga butang.

Sa midagan ang mga tuig, misugod ang mga apostoles sa pagkakita sa katumanan sa tagna ni Jesus. Oo, ang mismong mga butang nga iyang gitagna misugod sa pagkahitabo sa ilang adlaw. Busa, ang mga Kristohanon nga buhi sa 37 ka tuig sa ulahi, sa 70 K.P., wala masapni nga wala mahibalo sa kalaglagan sa Hudiyohanong sistema duyog sa templo niini.

Apan, ang presensiya ni Kristo ug ang konklusyon sa sistema sa mga butang wala mahitabo sa 70 K.P. Ang iyang presensiya sa Gingharianong gahom nahitabo sa ulahi pa kaayo. Apan kanus-a? Ang pagkonsiderar sa tagna ni Jesus mobutyag niini.

Si Jesus nagtagna nga aduna unyay “mga gubat ug dungog-dungog mahitungod sa mga gubat.” “Managgubat ang nasod batok sa nasod,” ug adunay kagutmanan, mga linog, ug mga kamatay. Ang iyang mga disipulo pagadumtan ug pagapatyon. Ang mini nga mga propeta motungha ug magapahisalaag sa daghan. Ang pagkadaotan mosanay, ug mobugnaw ang gugma sa kadaghanan. Sa samang panahon, ang maayong balita sa Gingharian igawali sa tanang gipuy-ang yuta sa pagpamatuod ngadto sa tanang kanasoran.

Bisan tuod ang tagna ni Jesus adunay limitado nga katumanan sa wala pa malaglag ang Jerusalem sa 70 K.P., ang dakong katumanan niini mahitabo sa panahon sa iyang presensiya ug sa konklusyon sa sistema sa mga butang. Ang mainampingon nga pagsobli sa mga hitabo sa kalibotan sukad sa 1914 nagbutyag nga ang dakong tagna ni Jesus nagakatuman na sukad niadtong tuiga.

Laing bahin sa ilhanan nga gihatag ni Jesus mao ang pagtungha sa “dulumtanang butang nga mopahinabog kalumpagan.” Sa 66 K.P. kining dulumtanang butang mitungha diha sa porma sa “nagkampong kasundalohan” sa Roma nga milikos sa Jerusalem ug giguba ang kota sa templo. “Ang dulumtanang butang,” nagbarog sa dapit nga dili angay niyang barogan.

Diha sa dakong katumanan sa ilhanan, ang dulumtanang butang mao ang Liga sa Kanasoran ug ang manununod niini, ang Hiniusang Kanasoran. Kining organisasyon sa kalinaw sa kalibotan gilantaw sa Kakristiyanohan ingon nga kapuli sa Gingharian sa Diyos. Pagkadulumtanan! Sa ulahi, hinunoa, ang politikanhon nga mga gahom nga kaanib sa HK mobali sa Kakristiyanohan (antitipikong Jerusalem) ug lumpagon siya.

Busa si Jesus mitagna: “Aduna unyay dakong kasakitan nga ang ingon wala pa mahitabo sukad sa pagkatukod sa kalibotan hangtod karon, ug kini dili na gayod mahitabo pa.” Samtang ang kalaglagan sa Jerusalem sa 70 K.P. sa pagkamatuod maoy usa ka dakong kasakitan, nga dunay kapin sa usa ka milyon nga gitaho nga namatay, kadto dili kaayo dako nga kasakitan kon itandi sa globonhong Lunop sa mga adlaw ni Noe. Busa ang dakong katumanan niining bahina sa tagna ni Jesus moabot pa. Mateo 24:2-22; 13:40, 49; Marcos 13:3-20; Lucas 21:7-24; 19:43, 44; 17:20-30; 2 Timoteo 3:1-5.

◆ Unsay nakapukaw sa mga pangutana sa mga apostol, apan unsay anaa sa ilang mga hunahuna?

◆ Unsang bahina sa tagna ni Jesus ang natuman sa 70 K.P., apan unsay wala mahitabo niadto?

◆ Kanus-a nga ang tagna ni Jesus unang natuman, apan kanus-a ang dakong katumanan niini?

◆ Unsa ang dulumtanang butang nga diha sa una ug sa kataposang mga katumanan niini?

◆ Nganong ang dakong kasakitan wala pa modangat sa kataposang katumanan niini uban sa pagkalaglag sa Jerusalem?