Ang Pulong sa Diyos Maoy Kamatuoran

“Balaana sila pinaagi sa kamatuoran; ang imong pulong maoy kamatuoran.”—JUAN 17:17.

1. Giunsa sa salmista pag-isip ang Bibliya, apan unsay pag-isip niini sa daghan karong adlawa?

ANG imong pulong maoy lamparahan sa akong tiil, ug kahayag sa akong alagianan.” (Salmo 119:105) Kana ang gipamulong sa Hebreohanong salmista. Minoriya lamang karong adlawa ang adunay pagtahod nga sama niana alang sa Pulong sa Diyos. Niining ika-20ng siglo, ang Pulong sa Diyos nagalungtad diha sa sinulat nga dagway ingong ang Balaang Bibliya. Kini gihubad sa mas daghang pinulongan ug gipanagtag nga mas kaylap kay sa bisan unsang laing basahon sa kasaysayan. Bisan pa niana, daghan ang dili motuo niini ingong lamparahan alang sa ilang mga tiil. Bisan kadtong nagaangkong mga Kristohanon, nagapalabi, sa kadaghanang bahin, sa pagsunod sa ilang kaugalingong mga ideya inay kay itugot nga hayagan sa Bibliya ang ilang alagianan.—2 Timoteo 3:5.

2, 3. Unsay pag-isip sa mga Saksi ni Jehova sa Bibliya, ug unsang mga kaayohan ang gihatag niini kanila?

² Sa dakong kasukwahi, kitang mga Saksi ni Jehova mouyon sa salmista. Alang kanato, ang Bibliya mao ang hinatag-sa-Diyos nga giya. Kita nasayod nga “ang tibuok nga Kasulatan gidasig sa Diyos ug mapuslanon alang sa pagtudlo, sa pagbadlong, sa pagtul-id sa mga butang, sa pagdisiplina sa pagkamatarong.” (2 Timoteo 3:16) Lahi sa daghan karong adlawa, dili nato buot moeksperimento sa mga butang maylabot sa moralidad ug kagawian. Kita nasayod kon unsay matarong tungod kay ang Bibliya nagasulti kanato.

³ Nakahatag kinig daghang dagkong kaayohan kanato. Kita nakaila kang Jehova, ug kita nakakat-on sa iyang halangdong mga katuyoan alang sa yuta ug sa katawhan, mao nga kita masaligon nga ang usa ka masanagong kaugmaon posible alang kanato ug sa atong mga pamilya. Kita bug-os nagauyon sa salmista nga miingon: “Gihigugma ko gayod ang imong kasugoan! Sa tibuok nga adlaw kini mao ang akong gipalandong. Ang imong sugo nagahimo kanakong labi pang makinaadmanon kay sa akong mga kaaway, tungod kay kini akoa man sa panahong walay katinoan.”—Salmo 119:97, 98.

Pagsangyaw Pinaagi sa Kagawian

4. Ang pag-ila sa Bibliya ingong Pulong sa Diyos nagabutang sa unsang obligasyon diha kanato?

⁴ Busa, kita may tanang hinungdan sa pag-uyon sa mga pulong ni Jesus nga gipahinungod sa iyang Amahan: “Ang imong pulong maoy kamatuoran.” (Juan 17:17) Apan ang pag-ila niining kamatuorana nagabutang sa usa ka obligasyon diha kanato. Kinahanglang tabangan nato ang uban sa pag-ampo nga ang Pulong sa Diyos mao ang kamatuoran. Niining paagiha sila usab makapahimulos sa mga panalangin nga atong nasinati. Sa unsang paagi makatabang kita nila sa maong paagi? Sa usa ka butang, kinahanglang manlimbasog gayod kita sa pagpadapat sa mga prinsipyo sa Bibliya diha sa atong adlaw-adlawng mga kinabuhi. Sa maong paagi, ang mga tawong matarong ug kasingkasing makakita nga ang dalan sa Bibliya mao gayod ang labing maayo.

5. Unsang tambag ang gihatag ni Pedro bahin sa pagpamatuod pinaagi sa atong kagawian?

⁵ Kana ang diwa sa tambag ni apostol Pedro ngadto sa Kristohanong mga babaye kansang mga bana dili mga magtutuo. Siya miingon kanila: “Kamong mga asawa, magpasakop kamo sa inyong mga bana, aron nga, kon sila dili masinugtanon sa pulong, sila madani nga walay usa ka pulong pinaagi sa kagawian sa ilang mga asawa.” (1 Pedro 3:1) Kini mao usab ang prinsipyo nga nagpaluyo sa iyang tambag ngadto sa tanang Kristohanon—mga lalaki, mga babaye, ug mga bata—sa dihang siya miingon: “Batoni ninyo ang maayong kagawian taliwala sa mga nasod, aron nga, sa butang nga sila nagapasipala kaninyo ingong mga mamumuhat ug daotan, sila ingong sangpotanan sa inyong maayong mga buhat nga niana sila mga nakasaksi maghimaya sa Diyos sa adlaw sa iyang pagsusi.”—1 Pedro 2:12; 3:16.

Ang Labaw nga Kaalam sa Bibliya

6. Giunsa ni Pedro pagtabang nato sa pagsabot nga angay natong tabangan ang uban sa pagpabili sa Bibliya?

⁶ Dugang pa, ang mga Kristohanon makatabang sa uban sa pagpabili sa Bibliya kon ilang buhaton ang sumala sa ginatambag usab ni Pedro: “Balaana ninyo ang Kristo ingong Ginoo diha sa inyong mga kasingkasing, nga kanunay maandam sa pagpanalipod sa atubangan sa tanan nga mangayo kaninyo sa usa ka katarongan sa paglaom diha kaninyo, apan magahimo niana uban sa kalumo ug halalom nga pagtahod.” (1 Pedro 3:15) Ang Kristohanong mga ministro angay makaarang sa pagpanalipod sa Bibliya ug pagpatin-aw ngadto sa uban nga kini mao ang Pulong sa Diyos. Sa unsang paagi mahimo nila kana?

7. Unsang kamatuoran bahin sa Bibliya ang nagapasundayag nga kini mao gayod ang Pulong sa Diyos?

⁷ Ang usa ka makadaning pangatarongan hikaplagan diha sa basahong Proverbio. Didto atong mabasa: “Anak ko, kon imong dawaton ang akong mga pulong ug mahalon ang akong mga sugo sa imong kaugalingon, aron sa pagpamati sa kaalam . . . , imong hikaplagan ang kahibalo mismo sa Diyos. Kay si Jehova nagahatag ug kaalam; gikan sa iyang baba adunay kahibalo ug pagsabot.” (Proverbio 2:1-6) Ang kaalam mismo sa Diyos hikaplagan diha sa mga panid sa Bibliya. Sa dihang makita sa usa ka tawong sinsero ang maong dakong kaalam, siya makaamgo gayod nga ang Bibliya labaw pa sa pagkapulong lamang sa tawo.

8, 9. Sa unsang paagi ang tambag sa Bibliya bahin sa paghupot ug timbang nga panglantaw bahin sa pagbatog bahandi napadayag nga tukma?

⁸ Tagda ang pipila ka pananglitan. Karong adlawa, ang kalamposan sa kinabuhi kasagarang ginasukod pinasukad sa salapi. Kon dako ang kinitaan sa usa ka tawo, giisip nga siya mas malamposon. Bisan pa niana, ang Bibliya nagapasidaan batok sa pagbutang ug sobrang pasiugda sa materyal nga mga butang. Si apostol Pablo misulat: “Kadtong matinguhaon gayod nga madato mahulog sa pagpanulay ug sa lit-ag ug sa daghang binuang ug makadaot nga mga pangibog, nga magabalhog sa mga tawo ngadto sa kalaglagan ug kadaotan. Kay ang gugma sa salapi mao ang gamot sa tanang matang sa makadaot nga mga butang, ug tungod sa pagpangab-ot niining gugmaha ang pipila nangahisalaag gikan sa pagtuo ug nalagbaslagbasan sa ilang kaugalingon sa daghang kasakit.”—1 Timoteo 6:9, 10; itandi ang Mateo 6:24.

⁹ Gipakita sa kasinatian unsa ka tukma kining pasidaana. Ang usa ka klinikal nga sikologo miingon: “Ang pagkahimong Numero 1 ug dato dili mopabati kanimo nga matagbawon, kontento, tinuod nga tinahod o minahal.” Oo, kadtong nagagugol sa tanan nilang kusog sa pagpangagpas sa bahandi kasagarang mosangpot nga mobatig kayugot ug kapakyasan. Ang Kasulatan, samtang nagaila sa bili sa salapi, nagapunting sa butang labi pang hinungdanon: “Ang kaalam maoy alang sa panalipod maingon nga ang salapi maoy alang sa panalipod; apan ang kaayohan sa kahibalo mao nga ang kaalam mismo nagatipig nga buhi sa mga nakatag-iya niini.”—Ecclesiastes 7:12.

10. Nganong angay natong pamatian ang tambag sa Bibliya sa pagbantay sa atong mga panagkauban?

¹⁰ Ang Bibliya adunay daghang samang mga ideya. Ang lain pa mao: “Ang nagalakaw uban sa mga tawong manggialamon mahimong manggialamon, apan siya nga nagapakiglabot sa mga buangbuang mosangpot sa kadaotan.” (Proverbio 13:20) Kini napamatud-an usab pinaagi sa kasinatian. Ang pagpiit sa isigkaingon mitultol sa daghang batan-on ngadto sa paghuboghubog, pag-abusar sa droga, ug imoralidad. Si bisan kinsang makighugoyhugoy sa mga tiggamit ug daotang sinultihan sa kadugayan makadiskobreng sila nagagamit ug daotang sinultihan. Daghan ang nagapangawat gikan sa ilang mga amo kay ‘ang tanan nagabuhat niini.’ Sa pagkamatuod, sumala sa ginaingon usab sa Bibliya: “Ang daotang mga panagkauban makadaot sa mapuslanong mga batasan.”—1 Corinto 15:33.

11. Giunsa sa pagpakita sa usa ka sikolohikal nga pagtuon sa kaalam sa pagsunod sa Bulawanong Lagda?

¹¹ Usa sa labing bantogang mga tambag sa Bibliya mao ang gitawag nga Bulawanong Lagda: “Busa, ang tanang butang nga buot ninyong buhaton sa mga tawo nganha kaninyo, buhaton usab ninyo ang sama ngadto kanila.” (Mateo 7:12) Kon mosunod ang mga tawo niining lagdaa, ang kalibotan tin-awng mahimong mas maayong dapit. Apan kon ang mga tawo sa malangkobon dili mosunod sa lagda, mas maayo nga ikaw sa kaugalingon magahimo niana. Ngano? Kay kita gibuhat sa pagtagad sa uban ug paghunahuna kanila. (Buhat 20:35) Ang usa ka sikolohikal nga pagtuon nga gihimo sa Tinipong Bansa sa pagsusi kon unsay reaksiyon sa mga tawo sa dihang sila nagtabang sa uban nahidangat niining konklusyona: “Nan, mopatim-aw nga ang pagtagad sa uban usa gayod ka bahin sa tawhanong kinaiyahan sama sa pagtagad sa atong kaugalingon.”—Mateo 22:39.

Ang Tambag sa Bibliya—Maalamon sa Linain

12. Unsay usa ka butang nga nagahimo sa Bibliya nga linain?

¹² Karong adlawa, hinuon, adunay daghang tinubdan sa tambag sa gawas sa Bibliya. Ang mga mantalaan nagadalag mga lindog sa panambag, ug ang mga tindahan punog mga libro bahin sa pagtagana sa kaugalingon. Dugang pa, anaa ang mga sikologo, propesyonal nga mga magtatambag, ug uban nga nagahatag ug tambag sa nagkalainlaing mga natad. Apan ang Bibliya linain sa labing menos tulo ka bahin. Nahauna, ang iyang tambag kanunayng mapuslanon. Kini dili lamang teoriya, ug kini dili moobra sa atong kadaotan. Si bisan kinsang nagasunod sa tambag sa Bibliya mouyon sa salmista sa dihang siya miingon ngadto sa Diyos diha sa pag-ampo: “Ang imong mga pahinumdom napamatud-ang kasaligan kaayo.”—Salmo 93:5.

13. Unsay nagpadayag nga ang Bibliya labaw kaayo kay sa tawhanong mga tinubdan sa kaalam?

¹³ Ikaduha, ang Bibliya nakabarog sa pagsulay sa panahon. (1 Pedro 1:25; Isaias 40:8) Ang tambag gikan sa tawhanong mga tinubdan nailado sa pagkamabalhinon, ug ang mauso sa usa ka tuig kasagarang sawayon sa sunod nga tuig. Ugaling, bisan pag ang Bibliya nakompleto halos 2,000 ka tuig kanhi, kini naundan gihapon sa labing maalamong tambag nga anaa, ug ang mga pulong niini mapadapat sa tibuok nga kalibotan. Kini mapadapat nga may samang epekto bisan kon kita nagapuyo sa Aprika, sa Asia, sa Habagatan o Amihanang Amerika, sa Uropa, o sa kaislahan sa dagat.

14. Sa unsang paagi ang tambag sa Pulong sa Diyos molabaw?

¹⁴ Sa kataposan, ang nagkalainlain kaayong tambag sa Bibliya dili hitupngan. Ang usa ka proverbio sa Bibliya nagaingon: “Si Jehova mismo nagahatag sa kaalam,” ug bisan kon unsang sulirana o desisyona ang atong atubangon, adunay kaalam diha sa Bibliya nga motabang nato sa pagsulbad niini. (Proverbio 2:6) Mga bata, mga tin-edyer, mga ginikanan, mga katigulangan, mga empliyado, mga amo, mga tawong may awtoridad, ang tanan nakakaplag nga ang kaalam diha sa Bibliya mapadapat kanila. (Proverbio 4:11) Bisan pag moatubang kita sa mga kahimtang nga wala hisayri sa panahon ni Jesus ug sa iyang mga apostol, ang Bibliya nagahatag kanatog tambag nga mosaler. Pananglitan, sa unang siglo, ang pagtabako wala hisayri sa Tungang Sidlakan. Karon adlawa, kini kaylap. Bisan pa niana, si bisan kinsa nga magmatikod sa tambag sa Bibliya sa paglikay nga “mailalom sa pagbulot-an [o magamhan] sa bisan unsa” ug sa paghupot nga mahinlo gikan sa “tanang kahugawan sa unod ug sa espiritu” molikay niining bisyoha nga makapagiyan ug makadaot sa panglawas.—1 Corinto 6:12; 2 Corinto 7:1.

Alang sa Atong Malungtarong Kaayohan

15. Nganong giangkon sa daghan nga ang Bibliya kinaraan na?

¹⁵ Matuod, daghan ang nagaingon nga ang Bibliya kinaraan na ug dili na angay niining ika-20ng siglo. Bisan pa niana, ang rason lagmit mao nga ang Bibliya wala magsulti sa butang buot nilang mabatian. Ang pagsunod sa Kasulatanhong tambag moobra alang sa atong malungtarong kaayohan, apan kasagarang gikinahanglan ang pailob, disiplina, ug pagdili-sa-kaugalingon—mga hiyas nga dili popular sa kalibotan nga nagadasig nato sa pagtinguhag dihadihang katagbawan.—Proverbio 1:1-3.

16, 17. Unsang hatag-as nga mga sukdanan sa seksuwal nga moralidad ang ginahatag sa Bibliya, ug sa unsang paagi kini wala tagda sa modernong panahon?

¹⁶ Tagda ang bahin sa seksuwal nga moralidad. Ang Kasulatanhong mga sukdanan estrikto kaayo. Ang bugtong dapit alang sa pakigsekso maoy sulod sa kaminyoon, ug ang tanang pakigsekso sa gawas sa kaminyoon gidili. Atong mabasa: “Ang mga makihilawason, mga tigsimbag diyosdiyos, mga mananapaw, mga lalaking gihuptan alang sa dili-kinaiyanhong mga katuyoan, mga lalaking nagahigda uban sa mga lalaki . . . dili magapanunod sa gingharian sa Diyos.” (1 Corinto 6:9, 10) Dugang pa, alang sa mga Kristohanon ang Bibliya nagabaod sa monogamiya, usa ka bana alang sa usa ka asawa. (1 Timoteo 3:2) Ug bisan tuod adunay hingaping mga kaso diin ang diborsiyo o panagbulag tingali ikatugot, ang Bibliya nagaingon nga sa malangkobon ang bugkos sa kaminyoon maoy sa tibuok nga kinabuhi. Si Jesus mismo miingon: “Siya nga naglalang kanila gikan sa sinugdanan nagbuhat kanila nga lalaki ug babaye ug miingon, ‘Tungod niini ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod’ . . . Busa sila dili na duha, kondili usa ka unod. Busa, kon unsay gihiusa sa Diyos ayaw pag-ipabulag sa tawo.”—Mateo 19:4-6, 9; 1 Corinto 7:12-16.

¹⁷ Karong adlawa, kining mga sukdanana kaylap nga wala tagda. Gitugotan ang luag seksuwal nga mga buhat. Ang seksuwal nga relasyon tali sa nagadeyt nga mga tin-edyer giisip nga normal. Ang pagpuyopuyo nga walay kasal gidawat na. Taliwala sa kasadong mga magtiayon, ang pangerida sa bisan haing kapikas kasagaran na. Ug ang diborsiyo kaylap niining modernong kalibotan. Bisan pa niana, kining luag nga mga sukdanan wala magpatunghag kalipay. Ang daotang sangpotanan nagpamatuod nga ang Bibliya husto diay sa pag-insistir sa estriktong moral nga mga sukdanan.

18, 19. Unsay misangpot sa kaylap nga dili pagtagad sa mga sukdanan ni Jehova sa moralidad?

¹⁸ Ang Ladies’ Home Journal miingon: “Ang pasiugda sa sekso nga nagtimaan sa katuigang kan-uman ug kapitoan nagpatungha dili sa walay-kinutobang kalipay kondili sa seryosong tawhanong kagul-anan.” Ang “seryosong tawhanong kagul-anan” nga gitumong dinhi nagaapil sa iya sa mga batang nadaot sa diborsiyo sa ilang mga ginikanan ug sa iya sa mga hamtong nga nagaantos sa lalom emosyonal nga kasakit. Kini nagaapil usab sa pag-uswag sa tagsag-ginikanan nga mga pamilya ug epidemya sa batan-ong mga dalaga nga nanganak bisan pag sila daw may gatas pa sa baba. Dugang pa, kini nagaapil sa epidemya sa mga sakit nga gipasa sa sekso, sama sa herpes sa kinatawo, gonorea, sipilis, chlamydia, ug AIDS.

¹⁹ Tungod niining tanan, ang propesor sa sosyolohiya miingon: “Tingali kita hamtong nga igo sa pagpalandong kon kaha mas maayo pa kanatong tanan ang pagpasiugda sa paglikay sa una-kaminyoong sekso ingong usa ka polisa nga labing makatagana sa mga panginahanglan sa atong mga lungsoranon ug ilang katungod sa kagawasan: kagawasan sa sakit, kagawasan sa wala-kagustohing pagmabdos.” Ang Bibliya tukmang nagaingon: “Malipayon ang tawong kusgan nga nagabutang kang Jehova ingon nga iyang pagsalig ug wala magliso sa iyang nawong ngadto sa masukihong katawhan, ni ngadto niadtong nangahulog ngadto sa kabakakan.” (Salmo 40:4) Kadtong nagasalig sa kaalam sa Bibliya wala hilimbongi sa kabakakan niadtong wala magsunod sa Bibliya ug nagaingon nga ang mas luag moral nga kalagdaan nagapatunghag kalipay. Ang maalamon, bisan pag ekstriktong mga sukdanan sa Bibliya maoy sa labing dakong kaayohan.

Lisod nga mga Suliran sa Kinabuhi

20. Unsang mga prinsipyo sa Bibliya ang napamatud-ang makatabang niadtong nagaatubang sa tumang kakabos sa ilang mga kinabuhi?

²⁰ Ang kaalam sa Bibliya nagatabang usab kanato sa pagdumala sa lisod nga mga suliran nga atong giatubang sa kinabuhi. Pananglitan, sa ubay-ubayng kayutaan, adunay mga Kristohanong nagailaid sa hilabihang kakabos. Apan gisagubang nila ang ilang kakabos ug sa gihapon nakakaplag sa kalipay. Sa unsang paagi? Pinaagi sa pagsunod sa dinasig nga Pulong sa Diyos. Giisip nilang seryoso ang mga pulong makahupay sa Salmo 55:22: “Itugyan ninyo ang inyong palas-anon diha kang Jehova mismo, ug siya magalig-on kaninyo.” Sila nagasalig sa Diyos alang sa kusog sa pag-antos. Unya ginapadapat nila ang mga prinsipyo sa Bibliya ug ginalikayan ang makadaot, mausikong mga bisyo, sama sa pagtabako ug paghuboghubog. Sila makugihon, sumala sa ginasugyot sa Bibliya, ug busa kasagarang makakaplag nga sila makapakaon sa ilang mga pamilya sa dihang ang mga tawong tapolan o kadtong mawad-ag paglaom mapakyas. (Proverbio 6:6-11; 10:26) Dugang pa, sila nagapamati sa pasidaan sa Bibliya: “Ayaw kamo pagkasina niadtong nagabuhat sa pagkadili-matarong.” (Salmo 37:1) Dili sila mosulod sa sugal o sa kriminal nga kalihokan, sama sa pagbaligyag mga droga. Kining mga butanga tingali motanyag sa madaling “solusyon” sa ilang mga suliran, apan ang layog-abot nga mga bunga maoy mapait.

21, 22. (a) Sa unsang paagi ang usa ka Kristohanong babaye nakabatog tabang ug paghupay gikan sa Bibliya? (b) Unsang dugang kamatuoran bahin sa Bibliya ang nagatabang nato sa pag-amgo nga kini maoy Pulong sa Diyos?

²¹ Ang pagsunod ba sa Bibliya tinuod nagatabang niadtong kabos kaayo? Oo, sumala sa gipamatud-an sa daghan, daghang kasinatian. Usa ka Kristohanong biyuda sa Asia misulat: “Bisan tuod ako nagakinabuhing duol sa kakabos, ako dili mayugtanon. Ang kamatuoran sa Bibliya naghupong kanako sa positibong panglantaw.” Mitaho siya nga ang usa ka iladong saad nga gipahayag ni Jesus natuman sa iyang kahimtang. Matud ni Jesus: “Nan, ipadayon ninyo ang pagpangita nga una sa gingharian ug sa iyang pagkamatarong, ug kining tanang butang igadugang ra kaninyo.” (Mateo 6:33) Siya nagapamatuod nga pinaagi sa pag-una sa iyang pag-alagad sa Diyos diha sa iyang kinabuhi, siya kanunayng nagadawat, sa usa o laing paagi, sa materyal nga mga kinahanglanon sa kinabuhi. Ug ang iyang Kristohanong pag-alagad nagahatag kaniya sa dignidad ug tumong sa kinabuhi nga nagahimong maantos ang iyang kakabos.

²² Sa pagkamatuod, ang giladmon sa kaalam niini nagapadayag nga ang Bibliya tinuod nga mao ang Pulong sa Diyos. Walay basahong gigama lamang sa mga tawo ang makakobre sa daghan kaayo nagkalainlaing bahin sa kinabuhi ug matugkaron kaayo ug kanunayng husto. Apan adunay laing kamatuoran bahin sa Bibliya nga nagapasundayag sa balaang tinubdan niini. Kini adunay gahom sa pagbag-o sa mga tawo sa pagkamaayo. Atong hisgotan kini sa sunod artikulo.

Makasaysay Ka Ba?

◻ Sa unsang paagi ang mga Saksi ni Jehova gipanalanginan tungod sa ilang pagdawat sa Bibliya ingong Pulong sa Diyos?

◻ Ingong mga magtutuo sa Pulong sa Diyos, unsang obligasyon ang atong nabatonan, ug sa unsang paagi ang atong kagawian makatabang nato sa pagtuman sa maong obligasyon?

◻ Unsay nagahimo sa maalamong tambag sa Bibliya nga labaw kay sa tawhanon lamang nga tambag?

◻ Unsa ang pila ka pananglitan nga nagapakita sa giladmon sa tambag sa Bibliya?