Mga Pangutana Gikan sa mga Magbabasa

◼ Kanus-a gisugdan ang paghuyop sa trompeta sa pito ka manulonda sa Pinadayag?

Sa Pinadayag mga kapitulo 8, 9, ug 11, atong mabasa ang bahin sa pito ka manulonda nga mihuyop sa pito ka trompeta, nga nagpahibalo sa grabeng mga hampak diha sa mga bahin sa katawhan. Kini nagahawas sa mga pahayag sa mga paghukom ni Jehova nga gimantala sa katawhan ni Jehova sa panahon sa kataposan sugod ilabina sa kombensiyon sa Cedar Point niadtong 1922.—Tan-awa ang Pinadayag—Hingpit nga Sangkoanan Niini Haduol Na!, mga kapitulo 21 ngadto 23 ug kapitulo 26.

Ang unang upat ka huyop sa trompeta nagbutyag sa patay sa espirituwal nga kahimtang sa bahin sa Kakristiyanohan nga mao “ang yuta” ug “ang dagat,” ingon man ang nahulog nga kahimtang sa klero ug ang espirituwal nga kangitngitan sa Kakristiyanohan.—Pinadayag 8:7-12.

Ang kasaysayan nagapakita nga ang publikong pagbutyag sa maong mga kamatuoran nagsugod gayod una pa sa 1922. Pananglitan, ang pakigpulong “Milyonmilyong Buhi Karon Mahimong Dili na Gayod Mamatay,” nga unang gipahayag sa 1918 ug gipatik sa pormang pulyeto sa 1920, naghisgot sa kapakyasan sa Kakristiyanohan ug sa nagsingabot nga kalaglagan niining kalibotana. Ang The Golden Age sa Septiyembre 29, 1920, sa tin-aw nagpadayag sa Kakristiyanohan ingong makihilawason, tikasan, ug naglimbong sa katawhan.

Nan, nganong ang librong Pinadayag nga Sangkoanan nagaingon nga ang maong upat ka trompeta misugod lamang sa pagkahuyop sa kombensiyon sa Cedar Point niadtong 1922? Kay niadto nga ang panawag migula nga “imantala, imantala, imantala ang Hari ug ang Gingharian,” nga naghatag ug dakong pagdasig sa buluhatong pagsangyaw. Ang Nobyembre 1, 1922, isyu sa The Watch Tower, nag-ingon: “Ang mga higala . . . nag-isip ingong pasikaranan sa kombensiyon nga ang tinuod nga pribilehiyo ug katungdanan sa gikonsagrar karon sa yuta mao ang pagmantala sa presensiya sa Ginoo, ang dakong Hari sa mga hari, ug nga ang iyang gingharian ania na, ug kini ang labing hinungdanong butang nga ilang pagabuhaton.”

Pagamatikdan usab nga bisan tuod ang tanang upat sa maong mga mensahe sa paghukom gimantala sa mga Saksi ni Jehova sukad 1922, ang matag usa sa baylo nakadawat ug kusganong pagdasig gikan sa pagsagop sa upat ka resolusyon sa mga kombensiyong gihimo tali sa 1922 ug 1925. Tinagpulo ka milyong kopya sa maong mga resolusyon sa ingon gipanagtag sa pinatik nga dagway, nga epektibong nagyagyag sa patay sa espirituwal nga kahimtang sa Kakristiyanohan.—Tan-awa ang librong Pinadayag nga Sangkoanan, panid 133, parapo 15.

Ang kataposang tulo ka huyop sa trompeta naglangkit sa “mga kaalaotan.” (Pinadayag 8:13) Sila lahi sa unang upat ka huyop sa trompeta sa pagkaaging sila maylabot sa ispisipikong mga hitabo. Ang ikalimang huyop sa trompeta nalangkit sa pagkagawas sa katawhan sa Diyos niadtong 1919 gikan sa “bung-aw.” Ang ikaunom maylabot sa “mga mangangabayo” ug sa dako kaayong internasyonal nga pagsangyaw nga nagsugod sa 1922. Ang ikapito nalangkit sa pagkatawo sa Gingharian sa Diyos sa 1914.—Pinadayag 9:1-19; 11:15-19.

Ang matag usa niining mga hitaboa nagdalag kaalaotan kang Satanas ug sa iyang kalibotan. Ang pagkagawas sa mga dinihogan niadtong 1919 gikan sa bung-aw sa pagkawalay-kalihokan nakapasakit sa klero sa Kakristiyanohan ug nagpasundayag sa bug-os nga pagsalikway ni Jehova kaniya. Sukad sa 1922 hangtod karong adlawa, ang labihan kadaghang mangangabayo nagpatay sa Kakristiyanohan, sa espirituwal nga pagkasulti, nga nagyagyag sa iyang patayng kahimtang ug nagpasidaan sa iyang umaabot nga kalaglagan. Ug tapos sa pagkatawo sa Gingharian niadtong 1914, si Satanas gipalagpot sa langit, nga nakaukay sa malaglagong kasamok taliwala sa katawhan. Sa dili madugay pagawagtangon sa Gingharian ang daw malig-ong tawhanong kapunongan nga gitukod ni Satanas (ang yuta), nga magapapas sa rebelyosong katawhan (ang dagat) sa Armageddon.—Pinadayag 11:17–12:12; 21:1.

Sa Cedar Point nga kombensiyon sa 1922, ang tanang tulo ka “kaalaotan” nadayag sa kalibotan sa katibuk-an. Ang pagsangyaw nga niadto gisugdan nagpatin-aw nga “ang mga dulon” nahigawas sa “bung-aw” ug nagsugod na ang pagdasdas ang “mga mangangabayo.” Ug ang makapukaw nga panawag sa pagmantala sa Hari ug sa Gingharian bug-os nahiuyon sa huyop sa ikapitong trompeta. Ang Marso 1, 1925, isyu sa The Watch Tower nagtin-aw nga ang mga hitabo sa 1914, 1919, ug 1922 gitagna sa Pinadayag kapitulo 12. Kadto maoy mas lalom nga pagsabot sa pagkatawo sa Gingharian, ug kadto matinumanong gimantala sa mga Saksi ni Jehova. Dugang pa, ang pagpahibalo sa maong masakit nga impormasyon nakadawat ug dakong pagdasig gikan sa pagsagop ug sa misunod nga pagpanagtag sa kusganong mga resolusyon panahon sa mga kombensiyon nga gihimo gikan sa 1926 hangtod 1928.—Tan-awa ang Pinadayag—Hingpit nga Sangkoanan Niini Haduol Na!, mga panid 147, 149, 172.

Busa, ang paghuyop sa pito ka trompeta nagsugod sa 1922 ug nagpadayon sa katuigang 1920. Sukad niadto, ang katawhan ni Jehova sa maisogon mikooperar sa mga manulonda sa pagsulti sa tanang tawo nga ang Kakristiyanohan maoy patay sa espirituwal, ang iyang klero maoy napukang mga pangulo, ug sa dili madugay siya ug ang nahibilin niining satanasnong kalibotan pagalaglagon.