Pakigdait sa Kalibotan—Unsay Tinuod nga Kahulogan Niini?

ANG pakigdait sa kalibotan nga anaa sa hunahuna sa Diyos nagalangkit ug labaw pa kay sa globonhon nga pag-undang sa gubat o nukleyar nga pagkatabla. Kini makita gikan sa paagi sa paggamit sa Bibliya sa pulong “pakigdait.”

Pananglitan, diha sa Hebreohanong Kasulatan (ang “Daang Testamento”) ang pulong alang sa pakigdait mao ang sha·lohmʹ. Ang usa ka porma niining pulonga gigamit diha sa Genesis 37:14, diin gisultihan sa patriarkang Jacob ang iyang anak nga si Jose: “Tan-awa kon hilwas ug maayo ba ang imong mga igsoon ug kon hilwas ug maayo ba ang mga kahayopan, ug pahibaloa ako.”a Ang sha·lohmʹ gigamit pag-usab dinhi sa Genesis 41:16, diin kini gihubad nga “kaayohan.”

Busa, sa Biblikanhon nga diwa, ang tinuod nga pakigdait nagalangkit dili ang yanong paghunong sa mga away kondili nalangkit usab ang maayong panglawas, kahilwasan, ug kabulahanan. Gipakita sa among miaging gula nga ang mga tawo wala makasulbad sa gumonhap kon unsaon sa pagpatunghag pakigdait. Si Jesu-Kristo lamang, ang “Prinsipe sa Pakigdait,” mao ang motakdo sa tanang butang ug mopatunghag matuod nga pakigdait sa yuta. (Isaias 9:6, 7) Palandonga, pananglitan, kon unsa ang mga tagna sa Bibliya diha sa Salmo 72:7, 8 mahitungod sa pagmando niana nga usa: “Sa iyang mga adlaw molambo ang mga matarong, ug ang kadagaya sa pakigdait hangtod nga ang bulan mahanaw na. Magagahom usab siya gikan sa dagat ngadto sa laing dagat ug gikan sa Suba ngadto sa mga kinatumyan sa yuta.” Handurawa—maayong panglawas, kahilwasan, ug kabulahanan sa tibuok yuta nga sukod! Ang Gingharian sa Diyos lamang ang makahimo niini, ug kini magahimo ug daghan pa. Ang Bibliya naghatag kanato ug daghang kulbahinam nga matagnaong mga pag-aninaw ngadto niining umaabot nga pakigdait sa kalibotan. Atong konsiderahon ang pipila niini.

Globonhong Disarmamento—Sa Paagi sa Diyos!

Ang Salmo 46:8, 9 nag-ingon: “Umari kamo, tan-awa ang mga buhat ni Jehova, unsa ang mga pagkalaglag nga gibuhat niya sa yuta. Nagapahunong siya sa gubat hangtod sa kinatumyan sa yuta. Gibali niya ang pana, ug gibunggo niya ang bangkaw; sa kalayo gisunog niya ang mga karro.” Ang mga pulong “pana,” “bangkaw,” ug ‘karro,’ maoy mga simbolo sa bisan unsang matang sa hinagiban sa gubat o galamiton sa gubat. Busa labaw ang himoon ni Jehova kay sa pagkunhod sa mga hinagiban o bisan bug-os nga pagdisarmamento. Iyang bug-os wagtangon ang nukleyar nga mga hinagiban, ang mga kanyon, mga tangke, mga missile launcher, mga granada, plastik nga mga bomba, mga riple, mga posil—bisan unsa nga mahimong hulga sa globonhon nga pakigdait!

Apan, ang mga hinagiban lamang dili mopahinabog gubat. Sa kasagaran, ang gubat nagagikan sa madumtanon, dalo, o mabangis nga kinaiyahan sa dili-hingpit nga mga tawo. (Itandi ang Santiago 4:1-3.) Busa atakehon sa Gingharian sa Diyos ang hinungdan sa gubat pinaagi sa pagwala niining daotang mga taras sa personalidad diha sa mga tawo. Sa unsang paagi? Pinaagi sa usa ka tibuok-yutang edukasyonal nga programa. “Ang yuta mapuno sa kahibalo ni Jehova ingon sa mga tubig nga nagatabon sa dagat.”—Isaias 11:9.

Kay “natudloan ni Jehova,” ang katawhan dili na makakita ug mga panagbangi sa rasa ingong hinungdan sa away, pagdumot, o kasuko. (Juan 6:45) “Ang Diyos walay pinalabi,” ug ang mga molupyo sa yuta mopabanaag sa iyang kawalay-pinalabi. (Buhat 10:34) Wagtangon usab sa Gingharian ang bisan unsang posibilidad alang sa nasodnong away pinaagi sa pagwagtang sa nasodnong mga utlanan. ‘Gikan sa dagat ngadto sa laing dagat hangtod ngadto sa kinatumyang mga bahin sa yuta,’ ang tanan manumpa sa ilang pagkamainandamon ug mapasalamatong pagkamaunongon ngadto sa pagmando ni Kristo.—Salmo 72:8.

Busa kana nga pakigdait molungtad, ang Gingharian magawagtang usab sa labing makapabahin nga puwersa diha sa kasaysayan sa tawo: ang bakak nga relihiyon. (Sofonias 2:11) Ang katawhan mahiusa sa iyang pagsimba sa bugtong matuod nga Diyos. (Isaias 2:2, 3) Ang tibuok-kalibotang panag-igsoonay ang mangibabaw!

Pakigdait Diha sa Panimalay

Apan, unsay kapuslanan, sa pakigdait sa kalibotan kon ang pribadong mga balay maoy mga panggubatan diin ang mga pag-insulto, masakit nga mga pulong, ug mga hulga kanunay nga ginahimo. Mao kanay kahimtang sa daghang mga pamilya karong adlawa. Ang ubang mga pamilya nagtago ug lalom nga pagkagamot nga mga pagdumot sa likod sa lambong sa pagbungolay.

Busa ang matuod nga pakigdait nag-apil sa kalinaw sa pamilya. Ilalom sa edukasyonal nga programa sa Gingharian, ang mga bana ug mga asawa pagatudloan sa pakiglabot sa usag usa diha sa gugma ug pagtahod. (Colosas 3:18, 19) Ang mga anak pagatudloan nga ‘magmasinugtanon sa ilang mga ginikanan diha sa tanang butang.’ (Colosas 3:20) Wala na unyay masukihong mga tin-edyer nga makapahigawad ug makapabalaka sa ilang mga ginikanan. Ang pagsunod mao unya ang lagda, ang kooperasyon mao ang balaod. Ang mga kabataan makalingawng tan-awon ug makalipay nga ikauban.

Karong adlawa, ang kalisod sa panalapi nakapasamot kaayo sa tensiyon sa pamilya, kay ang duha ka ginikanan napugos sa pagpas-an sa mabug-at nga mga luwan sa sekular nga trabaho. Apan ubos sa pagmando ni Kristo, ang mga pamilya mahuwasan sa madugmokong pinansiyal nga palas-anon—mahal nga mga abang, nagtaas nga balayranan sa interes, dagkong mga buhis, pagkawalay-trabaho. Daghan unya ang matagbawon, mahagitong trabaho. Ug walay usa nga mahimong walay-balay. Matikdi kon giunsa sa pagpasiugda sa tagna diha sa Isaias 65:21-23 kining mga kamatuorana: “Ug sila magatukod ug mga balay ug magapuyo niana . . . Sila dili magatukod ug lain ang magapuyo; sila dili magatanom ug lain ang magakaon. . . . Ang akong mga pinili magapahimulos pag-ayo sa buhat sa ilang mga kamot. Sila dili magabuhat nga walay kapuslanan, ni manganak alang sa kagul-anan; kay sila mao ang kaliwatan sa gipanalanginan ni Jehova, ug ang ilang kaliwatan magauban kanila.”

Handurawa ang pagpuyo diha sa usa ka palibot nga dili ka atakehon sa mga talan-awon, mga tingog, ug mga baho sa hugaw sa siyudad! Handurawa ang pagpuyo diha sa lunhaw nga yuta—imong yuta—nga maayo kaayong pagkakultibar, pinatahom, hininloan. Handurawa ang paghingos sa hangin nga makapalagsik sa kahinlo ug kadalisay; makadungog, dili sa mabangis yabag nga tingog sa modernong sibilisasyon, kondili sa makahupay, nga mga tingog sa kinaiyahan. Matuod, ang pipila ka bulahang mga indibiduwal nagatagamtam na sa usa ka sukod niining mga butanga. Apan ubos sa Gingharian sa Diyos, ang malinawong kahimtang sa pagkinabuhi tagamtamon sa tanan kanato. Wala na unyay kabus, ni gigutom, ni ginapahimuslan.—Salmo 72:13, 14, 16.

Ang Bibliya dugang nagsaad nga “ang daotan, pagaputlon.” (Proverbio 2:22) Kini nagkahulogan nga mawala na ang krimen. Kon ang imong gamayng bata mogawas aron sa pagdula, ikaw walay kabalak-an bahin sa mga tig-abuso sa bata o sa kidnaper nga nagpahipi diha sa kangitngit, sa mga kotse nga gipadagan sa hubog nga drayber nga walay kontrol nga nagdagan, o naglibodlibod nga mga gang sa nabuang sa droga nga mga batan-on. Ang imong mga anak magdula nga luwas ug halayo gayod sa kapeligrohan.

Pakigdait ug ang Imong Personal nga Kahimsog

Sa kataposan, anaa ang bahin sa personal nga kahimsog. Bisan ang Paraiso nga kahimtang dili makapawala sa kaul-ol sa kanser o sa mga pagngutngot sa mga lutahan. Busa ang matuod nga pakigdait kinahanglan mag-apil sa pagwala sa sakit, balatian, ug kamatayon. Posible ba kining butanga? Samtang dinhi pa sa yuta, si Jesu-Kristo subsob nga nakapakita sa iyang gahom ibabaw sa mga balatian sa tawo. (Mateo 8:14-17) Gikan sa iyang langitnon bantaaw nga dapit, si Kristo makahimog mga milagro sa tibuok yuta! “Niana unyang panahona,” nagasaad ang Bibliya, “ang mga mata sa mga buta mangabuka, ug ang mga igdulongog sa mga bungol makadungog. Unya ang tawo nga piang molukso sama sa lagsaw, ug ang dila sa amang magaawit.”—Isaias 33:24; 35:5, 6.

Apan, ang kampaniya ni Kristo batok sa tawhanong kagul-anan dili mohunong dinha. Si apostol Pablo nagbatbat mahitungod sa pagkahari ni Kristo: “Kay kinahanglang magahari siya hangtod nga ibutang sa Diyos ang tanang mga kaaway diha sa ilalom sa iyang mga tiil. Ug ang kataposang kaaway nga paglaglagon mao ang kamatayon.” (1 Corinto 15:25, 26) Kini nagkahulogang pangbungkag sa tanang kadaot nga gipahinabo sa kamatayon diha sa katawhan gikan sa sinugdan. Sumala sa gipatin-aw ni Jesu-Kristo mismo: “Ang takna nagasingabot na nga ang tanan nga anaa sa handomanang mga lubnganan makadungog sa tingog [ni Kristo] ug managpanggula.” (Juan 5:28, 29) Ang dili-maisip nga milyon-milyon kinsa nagkinabuhi sa kagul-anan makabaton ug higayon sa pakig-ambit sa umaabot nga pakigdait sa kalibotan.

Ikaw ba moambit niana? Ang mga Saksi ni Jehova nagaawhag kanimo sa pagtuon ug dugang pa mahitungod sa ginatudlo sa Bibliya niining bahina.b Ang palaabuton sa pakigdait sa kalibotan kulbahinam kaayo, matuod gayod, nga igasalikway. Makasalig ka nga kon maningkamot ka sa pagtuon ug sa pagpadapat sa Pulong sa Diyos, “ang Diyos sa pakigdait magauban kanimo”—sa walay kataposan!—Filipos 4:9.

[Mga footnote]

[Hulagway sa panid 5]

Hunongon ni Jehova ang gubat “sa kinatumyang bahin sa yuta”

[Credit Line]

USAF Official Photo

[Hulagway sa panid 6]

Ang mga bana ug mga asawa pagatudloan sa pakiglabot sa usag usa nga makigdaiton