Ang Ikatulong Milenyo—Pagatumanon ba Niini ang Imong mga Paglaom?

ANG paubos nga ihap nagsugod na. Ang usa ka orasang digital sa atubangan sa kultural nga sentro sa Beaubourg sa Paris, Pransiya, nagapakita sa gidaghanon sa mga segundong nahibilin. Mopadayon kini sa wayhunong paubos nga ihap hangtod sa tungang gabii sa Disyembre 31, 1999. Nianang orasa, mahitabo ang butang nga nasaksihan kas-a lang sa nangagi sa atong Komung Panahon: ang pagsulod sa usa ka bag-ong milenyo, ang ikatulong milenyo.

“Ang 2000 maoy, sa usa ka paagi, ‘ang kinadakoan gidahom nga okasyon’ sa kasaysayan sa tawo sukad masukad,” nagpasabot ang sosyal nga tigdukiduki nga si Bernward Joerges sa Berlin, Germany. Nganong may maong pagdahom? Kon buot sabton, ang tuig 2000 maoy usa pa ka petsa sa agos sa panahon. Gawas pa, ang petsa giila lamang niadtong nagasunod sa Kasadpanhong kalendaryo. Sumala sa Islāmic nga kalendaryo, ang 2000 K.P. motakdo sa Islāmic nga tuig 1420; sumala sa Hudiyonhong kalendaryo, sa 5760 A.M.

Apan sa usa ka interbiyo sa Swekong mantalaang Dagens Nyheter, si Propesor Joerges nagpatin-aw: “Tungod sa koloniyalismo ug imperyalismo, ang atong Gregorianong kronolohiya, nga nagsugod sa gituohang pagkatawo ni Kristo, nakaabante na sa dagkong mga bahin sa kalibotan.” Ang tuig 2000 sa ingon mahimong tibuok-yutang timaan sa panahon alang sa dakodakong bahin sa katawhan. Matud ni Propesor Joerges: “Ang tanang tawo maglangkit sa ilang pribadong biyograpiya ingon man sa tanan ubang butang sa maong okasyon.”

Bisan pa niana, ang daghan naghunahuna dili lamang sa pagtimaan sa panahon. “Ang dagkong mga proyekto ug mga programa sa ‘pagtimaan’, nga nagahatag bili ug nagasaulog niining okasyona nagapadayon na sa tanang ang-ang sa kinabuhi ug sa tanang hut-ong sa katilingban,” miangkon si Joerges. Midugang siya nga “sa tibuok nga kalibotan, ang dagkong negosyanteng mga tiggamag proyekto ug ‘mga hanas sa pasundayag’ nagahanduraw ug nagadesinyog dagkong mga okasyon.” Ang ubang mga mananagna nag-ingon nga “lunopan kita sa daghan kaayong libro bahin sa miaging siglo. Ang tanang media sa masa mangabuang bahin sa pagbag-o sa milenyo. Ang usa ka estasyon sa TV sa West Germany nagaplanog 24-oras nga sibya sa mga pagsubang sa adlaw sa tibuok nga yuta.”

Ang media tinong makisaw bahin sa kataposang batang natawo sa 1999 ug sa unang matawo sa 2000. Ang mga manunulat maikag sa pagkaplag sa pipila nga nahibilin nga natawo sa ika-19ng siglo sa pagsukna kon unsay pagbati nga nabuhi sa tulo ka siglo ug sa duha ka milenyo! Gibati pa sa pipila nga kining tanang pagkakisaw bahin niining milenyoha mopatungha sa usa ka matang sa kaguliyang sa masa. Sumala sa usa ka masulob-ong tagna, sa pagbagting sa tungang gabii sa maong Gabii sa Bag-ong Tuig, daghan ang maghikog.

Bisan pa sa maong dayag nga paghinobra, hisabtang ang okasyon mopukaw sa kaikag. Alang sa daghan sa atong nalugda-sa-suliran nga kalibotan, ang bag-ong milenyo giisip ingong usa ka sulo sa paglaom, usa ka ganghaan sa maayong kaugmaon. Ang pipila nagalaom nga ang siyensiya ug teknolohiya mopatungha sa ugma-damlag diin kita makakaon nga mas maayo ug mabuhing taas pa, magtrabahog menos ug magpabilin sa balay sa dugang pa; diin ang mga robot maglibre nato gikan sa makalaayng mga trabaho; diin ang kontroladong fusion magbalhin sa tubig ngadto sugnod. Napanan-aw nila ang umaabot nga may holograph TV, Picturephones, dekolor nga mga makinang fax, ug dihadiha-mohubad nga mga telepono. Nangandoy sila sa pagsusi sa Bulan, Mars, o sa ubang mga langitnong planeta, sa pagmina sa ilang bahandi.

Apan dili tanan malaomon kaayo. Nakita sa pila ka tigdukiduki ang bag-ong milenyo ingon nga magpasulod sa usa ka panahon sa dili-makontrolar nga pagtubo sa populasyon sa kalibotan ug sa pagkadaot sa silinganan. Ang polusyon sa hangin maghimo sa atmospera sa yuta ngadto sa nagaalisngaw nga greenhouse. Ang mga taluktok sa yelo matunaw ug motubo ang kadagatan, nga magalunop sa mabungahon, gipuy-ang mga dapit apan magbalhin sa minilyong ektarya sa kaumahan nga mga desyerto. Mapanan-aw nila ang pagkahugno sa ekonomiya sa kalibotan, politikanhong kahuyang nga mouyog sa mga gobyerno ug mga katilingban, dili-makontrolar nga krimen, ug pinakadaotan sa tanan, usa ka nukleyar nga kalaglagan nga magwagtang sa tanang tawhanong kinabuhi.

Ang mga mananagna tag-as ug mga banabana bisan pag sila mubo sa kapihoan kon bahin sa nagsingabot nga milenyo. Daghan kaayong dili-makita-daang mga butang ang nalangkit aron tukmang matagna ang umaabot. Ang usa ka propesyonal nga mabalak-on sa umaabot nagpakasama niana sa pagdulag ahedres: “Sa dili pa ako mohimo sa sunod nga pagduso, tan-awon kong abante ang labing daghang pagduso kutob sa mahimo. Apan human nga ang akong kaatbang mohimo sa iyang pagduso, usbon ko kana sa paghimo.”

Kon unsay anaa sa tuig 2000, panahon ray mag-igo. Hinuon, kini wala magkahulogang ang imong umaabot mahimong dili piho. Ang Bibliya nagahatag ug igong ebidensiya nga kita duol na sa pagsingabot sa labi pang makahuloganong milenyo kay sa usa nga mosugod sa wala nay pulo ka tuig. Kining nagsingabot nga Milenyo molabaw sa tanang tawhanong mga pagdahom! Unsa sa tukma ang kahulogan niini? Unsay malangkit niini? Ikaw gidapit namo sa pagbasa sa among sunod nga artikulo ug sayra kon unsay ginaingon sa Bibliya.