2000​—Tiniman-an ba nga Tuig?

ADUNA bay talagsaong butang labot sa tuig 2000? Ang mga tawo nga nagpuyo sa kayutaan sa Kasadpan kasagarang naglantaw niana ingong unang tuig sa ikatulong milenyo. Ang dakong mga preparasyon sa pagsaulog niana gisugdan na. Ang dagkong elektronikong mga relo gipanaod na sa pag-ihap sa mga segundo hangtod ang bag-ong milenyo magsugod. Ang mga bayle sa pagsaulog sa Bisperas sa Bag-ong Tuig ginahikay na. Ang mga T-shirt nga dunay mga eslogan may kalabotan sa kataposan sa milenyo gipamaligya na sa mga tindahan sa lungsod ug sa mga shopping mall sa dagkong siyudad.

Ang mga iglesya, dagko ug gagmay, moduyog sa tibuok-tuig nga mga kasaulogan. Sa unang bahin sa sunod tuig, si Papa Juan Paulo II gipaabot nga mobiyahe ngadto sa Israel sa pagpanguna sa mga Romano Katoliko nianang gitawag nga “ang pangilin sa Iglesya Romana Katolika sa pagsaulog sa milenyo.” Gibanabana nga mga duha ug tunga ka milyon ug unom ka milyong turista, gikan sa mga debotado ngadto sa mga mangusyoso lang, nagplano sa pagduaw sa Israel sunod tuig.

Nganong daghan kaayong tawo ang nagplano sa pagduaw sa Israel? Mipahayag alang sa papa, si Roger Cardinal Etchegaray, usa ka opisyal sa Batikano, miingon: “Ang tuig 2000 maoy usa ka pangilin ni Kristo ug sa iyang kinabuhi niining yutaa. Busa natural lamang nga ang Papa moanhi dinhi.” Sa unsang paagi ang tuig 2000 nalangkit kang Kristo? Ang tuig 2000 kasagarang gihunahuna nga magtimaan sa eksaktong 2,000 ka tuig gikan sa pagkatawo ni Kristo. Apan tinuod ba kini? Atong tan-awon.

Ang tuig 2000 mas makahuloganon ngadto sa mga sakop sa pipila ka relihiyosong mga grupo. Sila kombinsido nga sulod sa sunod tuig o kapin pa, si Jesus mobalik sa Bukid sa mga Olibo ug ang gubat sa Armagedon, nga gihisgotan diha sa basahon sa Pinadayag, pagasangkaon diha sa walog sa Megiddo. (Pinadayag 16:14-16) Sa pagpaabot niining mga hitaboa, gipamaligya sa gatosang molupyo sa T.B. ang ilang mga balay ug ang kadaghanan sa ilang mga kabtangan ug namalhin ngadto sa Israel. Aron makabenepisyo ang bisan kinsa nga dili makabiya sa ilang mga balay, usa ka iladong ebanghelisador sa T.B. gikataho nga nagsaad sa pagsibya sa pagbalik ni Jesus diha sa telebisyon​—nga de kolor!

Sa Kasadpang kayutaan, ang mga plano sa pagsugat sa ikatulong milenyo nagkakusog. Apan, ang mga tawo sa ubang kayutaan nagpadayon sa ilang normal nga mga kalihokan. Kining mga tawhana​—ang kadaghanan sa populasyon sa kalibotan—​dili motuo nga si Jesus sa Nasaret mao ang Mesiyas. Ni gidawat nila ang B.C.-A.D. nga paagi sa pagpetsa.a Daghang Muslim, pananglitan, nagagamit ug ilang kaugalingong kalendaryo, nga sumala niini ang sunod tuig maoy 1420​—dili 2000. Ang mga Muslim nag-ihap sa mga tuig gikan sa petsa sa dihang mikalagiw ang propetang si Muḥammad gikan sa Mecca ngadto sa Medina. Sa kabug-osan, ang mga tawo sa tibuok-kalibotan nagagamit ug 40 ka nagkalainlaing mga kalendaryo.

Ang tuig 2000 aduna bay kahulogan alang sa mga Kristohanon? Ang Enero 1, 2000, tinuod ba gayod nga usa ka makahuloganong adlaw? Kining mga pangutanaha tubagon sa sunod nga artikulo.

[Footnote]