Haduol Na—Usa ka Kalibotan nga Walay Kasakit!

HADUOL na ang usa ka kalibotan nga walay kasakit? Nindot nga balita kana alang sa mga tawong nag-antos sa balik-balik nga sakit—kon sa pisikal, mental, o emosyonal man ang ilang sakit! Pananglitan, minilyon ang malipay gayod sa pagkawala sa labihang kasakit nga gipahinabo sa pipila ka matang sa kanser, ang sakit nga tic douloureux, ug ang sakit sa kasingkasing nga angina pectoris. Kadtong gisakit sa grabeng sakit sa utok mahupayan gikan sa ilang dili-mahubit nga mga pag-antos. Ug minilyon pa ang malipay kon matapos na unta ang ilang emosyonal nga kasakit nga gipahinabo sa mga pagbating sama sa kahadlok, kaguol, pagkasad-an, kabalaka, ug kapakyasan matapos. Apan buot ba gayod kitang makakita sa kataposan sa tanang kasakit?

“Ang pagkadili-mobati ug kasakit delikado,” matud sa anatomistang si Allan Basbaum sa University of California sa San Francisco. Iyang gipahayag kining mga pulonga nga may maayong katarongan. Ingong pang-alarma, ang kasakit sa lawas nagpahibalo kanato nga adunay makadaot nga butang ang nagakahitabo.

Ang pagkadili-mobatig sakit sa lawas sa pagkatinuod peligroso. Kini giilustrar niini nga taho sa magasing Time. “Ang tam-is nga pahiyom sa dose-anyos nga batang lalaki nahimong makapatandog nga kalainan sa iyang makaluluoy nga panagway. Ang iyang mga braso ug mga batiis nadaot ang porma ug nangapiko, nga daw nag-antos siya sa gabok nga mga bukog. Daghang mga tudlo nangawala. Mitabon ang dakong samad sa iyang usa ka tuhod, ug ang nagpahiyom nga mga ngabil nangasamad. Ang iyang hitsura daw panagway sa usa ka bata nga dinagmalan . . . Siya natawo nga may grabe talagsaong depekto sa gene nga naghimo kaniyang dili-mobatig kasakit. Ang iyang mga tudlo nangapislat o sunog tungod kay dili niya kuhaon ang iyang kamot gikan sa mga butang nga mainit o peligroso. Ang iyang mga bukog ug mga lutahan nadaot ang porma tungod kay kusog siyang mobundak sa iyang mga tiil kon maglakaw o magdagan. Ang iyang tuhod nasamad tungod sa pagkamang ibabaw sa mahait nga mga butang nga dili makabatig kasakit. Kon mabalian siya ug bukog o malisa ang bat-ang, wala siyay bation nga kasakit nga igong makasinggit ug tabang.”

Basolon dayon sa mga tawo ang Diyos nga maoy hinungdan sa mga sakit ug sa mga kaguol nga naagoman sa minilyon. Ugaling, kita ba hustong makabasol sa Diyos sa giantos nga mga kasakit sa katawhan?

Ang Diyos ba ang Mabasol?

Sulod sa 6,000 na ka tuig karon, ang katawhan naulipon sa pisikal, mental, ug emosyonal nga kasakit. Sa pagkamatuod, sa milabayng 19 ka siglo, ang Kristohanong apostol Pablo tukmang miingon: “Ang tanang kalalangan nanagduyog sa pag-agulo ug anaa sa kasakitan hangtod karon.” (Roma 8:22) Bisan pa sa daghang pawala sa sakit nga mabatonan diha sa mga botika ug sa mga paningkamot sa mga doktor ug mga sikyatrista, ang kaylap nga pagkaulipon sa kasakit sa tanang matang nagapadayon. Aw, gitunglo sa uban ang Diyos tungod sa ilang mga pag-antos, sama sa asawa sa tawong si Job nga nagsugo kaniya sa pagtunglo sa daghan nang kasiglohang miagi! Hinunoa, sama sa iyang naamgohan mismo, ang maong espiritu maoy binuang ug dili-maayo.—Job 2:9, 10.

Ang pagkaulipon karon sa tawo sa kasakit dili hustong ibasol sa Diyos. Hinunoa, ang pagbasol nahasandig diha sa usa ka dili-makitang bakakon ug sa atong unang mga ginikanan. Sa unsang paagi?

Ang Kasulatan nagpaila nga bisan pag sa sinugdan matarong, ang usa ka espiritung linalang nahimong hakog alang sa gahom ug kabantog. Sa banagbanag sa tawhanong kinabuhi sa yuta, siya nagpanglantaw ug usa ka rasa sa katawhan diha sa usa ka paraisong yuta, ang tanan nagahatag sa bug-os nga debosyon sa Labing Makakagahom nga Diyos, si Jehova. Gitukmod sa usa ka kasingkasing nga nakabaton ug daotang tinguha, kining espiritung linalang mirebelde batok sa Maglalalang, nga gusto ug tawhanong pagsimba ug debosyon alang sa iyang kaugalingon. Ang iyang daotang mga tinguha nadayag sa dihang siya malalangong namakak. Kini, sa baylo, nagpatungha ug kasal-anan sa kalibotan.

Gisultihan ni Jehova nga Diyos ang unang tawo, si Adan, nga ang pagkaon ug bunga gikan sa kahoy sa pagkahibalo sa maayo ug daotan mosangpot ug kamatayon. (Genesis 2:15-17) Apan ang asawa ni Adan, si Eva, nadaldal sa pagsupak. Gigamit ang bitin ingong usa ka tigpamaba, ang espiritu nga Maglilimbong nag-ingon kaniya: “Dili gayod kamo mamatay. Kay hingbaloan sa Diyos nga sa adlaw nga kamo mokaon niini mangabuka ang inyong mga mata [ni Eva ug sa iyang bana] ug kamong [duha] nga mahisama sa Diyos, nga mahibalo sa maayo ug sa daotan.” (Genesis 3:1-5) Mao kana ang unang bakak, ug kini nakahatag ug ngalan niining daotang espiritu nga linalang ingon nga mao ‘ang amahan sa bakak.’ (Juan 8:44) Ang iyang paggamit sa bitin niadtong higayona sa tanaman sa Eden nakakaplag ug katugbang diha sa Kasulatanhong pag-ila kaniya nga mao “ang orihinal nga bitin, ang usa nga gitawag Yawa ug Satanas.”—Pinadayag 12:9.

Ang sala nagpatunghag pag-agulo ug pagkaulipon sa kasakit sa katawhan. Tinuod sumala sa gipadayag sa pulong sa Diyos, sa adlaw mismo nga nakasala si Adan, gipahayag sa Diyos ang hukom nga kamatayon diha sa mga makasasala. Sa hudisyal nga paagi, gikan sa punto-de-bista ni Jehova, si Adan ug Eva namatay nianang adlawa. (Itandi ang Lucas 20:37, 38.) Sa Eden, gisultihan ni Jehova ang maong makasasala nga unang babaye: “Padaghanon ko sa hilabihan gayod ang imong kasakit sa pagpanamkon; sa kasakit ikaw magapanganak ug mga anak.” (Genesis 3:16) Modugang ang masakit nga paglungtad ni Adan gawas sa tanaman sa Eden diha sa usa ka yuta nga halayo na sa paraisonhong kahimtang. Miingon si Jehova: “Sa singot sa imong nawong ikaw magakaon ug tinapay hangtod nga ikaw mopauli sa yuta, kay gikan niini gikuha ikaw. Kay abog ka ug sa abog ikaw mopauli.” (Genesis 3:17-19) Ang pagkaulipon sa kasakit sa ingon nagsugod alang sa tawhanong rasa.

Busa, karon, ang pagkaulipon sa kasakit gilangkit uban sa pagkadili-hingpit, sala, ug kamatayon nga napanunod gikan kang Adan. Sumala sa pagkapahayag niana ni apostol Pablo: “Pinaagi sa usa ka tawo ang sala misulod sa kalibotan ug ang kamatayon misulod pinaagi sa sala, ug nga tungod niini ang kamatayon mikuyanap ngadto sa tanang tawo sanglit silang tanan nakasala man.” (Roma 5:12) Apan ang Pulong sa Diyos motabang kanato nga maantos ang kasakit, kay kini nagpadayag kanato kon nganong si Jehova nagatugot niini ug nagapasalig kanato nga kini sa dili madugay matapos. Gitugotan sa Diyos ang samag-bitin nga ‘amahan sa mga bakak,’ si Satanas nga Yawa, sa pagsakit sa matarong nga Job ug mao nga nasulayan ang iyang pagkamaunongon. Ang sumbong ni Satanas mao nga si Job nag-alagad sa Diyos tungod sa kahakog, dili sa gugma. (Job 1:8-12) Apan si Job nagpabiling matinumanon sa Diyos, nagpamatuod nga ang dili-hingpit nga mga tawo makaalagad Kaniya tungod sa gugma ug maunongong molaban sa Iyang pagkasoberano bisan pa sa grabe nga mga pagsulay sa ilang pagtuo. Ang pag-antos ni Job ingong maghuhupot sa integridad nakaamot sa pagbalaan sa ngalan ni Jehova, nagpamatuod nga si Satanas maoy usa ka bakakon, ug naghatag sa dagayang mga ganti nianang sulondang patriarka. (Job 42:12-17; Santiago 5:11) Gikan sa eksperyensiya ni Job, atong ikahinapos nga sa dihang pagatumanon na ang katuyoan sa Diyos, ang pagkaulipon sa katawhan sa kasakit matapos. Apan sa unsang paagi nga kita makatino bahin niana?

Kon sa Unsang Paagi Matapos ang Kasakit

Sa pagkatinuod, si Jehova nagtagana ug usa ka bug-os epektibong paagi sa pagtapos sa tawhanong pagkaulipon sa kasakit. Kini iyang gihimo pinasukad sa halad lukat sa iyang Anak, si Jesu-Kristo. Si Jesus mao “ang Kordero sa Diyos nga magakuha sa sala sa kalibotan.” (Juan 1:29) Siya mianhi sa yuta, “dili aron pagaalagaron, kondili sa pag-alagad ug sa paghalad sa iyang kalag [iyang hingpit tawhanong kinabuhi] ingon nga lukat alang sa daghan.” (Mateo 20:28) Tungod sa pagkamasupilon, giwala ni Adan ang hingpit tawhanong kinabuhi, uban sa tanang mga katungod ug mga palaabuton niini. Ug mao gayod kana ang gitubos pinaagi sa halad lukat ni Jesus. (1 Timoteo 2:5, 6; Hebreohanon 7:26) Sa pagkamatuod, “Gihigugma gayod sa Diyos ang kalibotan [sa katawhan] nga iyang gihatag ang iyang bugtong Anak, aron nga ang tanang motuo kaniya dili malaglag kondili makabaton ug kinabuhing dayon.”—Juan 3:16.

Ang Diyos usab espisipikong nagsaad nga ang pagkaulipon sa kasakit matapos. Nagtagna ug usa ka panahon sa dihang ang kasakit nga nalangkit sa sala mawala na unya, ang Kristohanong apostol Juan gidasig sa Diyos sa pagsulat:

“Nakita ko ang usa ka bag-ong langit ug usa ka bag-ong yuta, kay ang unang langit ug ang unang yuta nangahanaw na, ug ang dagat wala na. . . . Nadungog ko ang usa ka makusog nga tingog gikan sa trono nga nagaingon: ‘Tan-awa! Ang puloy-anan sa Diyos anaa uban sa mga tawo, ug siya magapuyo uban kanila, ug sila mahimong iyang katawhan. Ug ang Diyos gayod mao ang magpakig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ug wala na usab unyay pagminatay, ni paghilak ni kasakit. Kay ang unang mga butang nangagi na.’ Ug ang Usa nga naglingkod sa trono [si Jehova nga Diyos] miingon: ‘Tan-awa! Ginabag-o ko ang tanang mga butang.’ Usab, miingon siya: ‘Isulat mo kini, kay kining mga pulonga kasaligan ug matuod.’”—Pinadayag 21:1-5.

Ang masinundanong katawhan sa dili madugay makadawat sa bug-os nga kaayohan sa halad lukat ni Jesus. Kini mahitabo ubos sa pagmando sa Gingharian nga dugay nang giampo sa mga matarong, sa pag-ingon: “Amahan namo nga anaa sa mga langit, balaanon unta ang imong ngalan. Moabot unta ang imong gingharian. Matuman unta ang imong pagbuot, maingon sa langit, mao man usab sa yuta.” (Mateo 6:9, 10) Sa langitnong Gingharian, si Jesu-Kristo magamando hangtod igabutang niya ang tanang mga kaaway ubos sa iyang mga tiil, lakip ang pagkaulipon sa kasakit ug ang kataposang kaaway, ang kamatayon.—1 Corinto 15:25, 26.

Oo, may labot sa mga tawong masinundanon, sa dili madugay ang Diyos, ‘magapahid sa tanang mga luha, ug ang kamatayon wala na, ug wala na usab unyay pagminatay, ni paghilak, ni kasakit.’ (Pinadayag 21:4) Unya ang mosunod nga matagnaong mga pulong nga karon adunay espirituwal nga aplikasyon may literal nga katumanan usab: “Dayega si Jehova, O kalag ko, . . . nga maoy nagapasaylo sa tanan mong kasal-anan, nga maoy nagaayo sa tanan mong balatian.” “Wala nay molupyo ang magaingon: ‘Ako masakiton.’”—Salmo 103:1-3; Isaias 33:24.

Kanus-a ang Kataposan sa Kasakit?

Ang kataposan sa pagkaulipon sa kasakit haduol na. Oo, kini mahitabo sa atong adlaw, ug kini mismo nga kaliwatan makakita niana. Ang katumanan sa tagna sa Bibliya nagpakita nga kita nagkinabuhi na sa kataposan niining daotang sistema sa mga butang. Ang dili-hitupngang mga gubat, gutom, ug mga linog, ingon man sa tibuok-yuta nga pagsangyaw sa

maayong balita sa mga Saksi ni Jehova, maoy bahin sa daghang bahin nga “ilhanan” sa dili-makita nga “presensiya” ni Jesus diha sa langitnong himaya sa Gingharian.—Mateo 24:3-14, 21, 34.

Sa dili madugay, “ang unang langit ug ang unang yuta,” ang organisadong sistema sa mga butang ni Satanas nga Yawa uban ang katukoran sa kagamhanan niini, mahanaw na unya. Ang magubot nga “dagat” sa daotang katawhan mohunong na sa paglungtad. Busa kita nagabarog sa ngilit sa gipanalanginan sa Diyos nga “bag-ong langit” nga kagamhanan ibabaw sa “usa ka bag-ong yuta,” ang matarong tawhanong katilingban. Diin diha niini “magapuyo ang pagkamatarong.”—Pinadayag 21:1; 2 Pedro 3:13.

Uban niana nga mga panalangin ubos sa usa ka bag-ong kagamhanan—ang Gingharian sa Diyos—nga haduol na kaayo, magmadasigon. Pangitaa ang dugang kahibalo sa bag-ong kalibotan nga walay kasakit ug kamatayon. Sa pagkamatuod, paabota ang mahimayaong adlaw nga karon haduol na kaayo sa dihang ang tanang nahigugma ug nagmasinundanon sa Diyos nga Jehova mabuhi diha sa usa ka kalibotan nga walay kasakit.