Batan-ong mga Alagad sa Panahon sa Bibliya
ANG Bibliya nagahisgot bahin sa daghang batan-on nga nag-isip nga seryoso sa ilang pag-alagad sa Diyos ug si kinsa tugob gipanalanginan sa pagbuhat niana. Kon kita batan-on o tigulang ug ubanon, kining maayong mga sulundan sa Bibliya makapalig-on kaayo.
Si Jose 17 anyos lamang sa gibaligya siya sa kaulipnan sa Ehipto. Didto, nga halayo sa iyang pamilya ug wala makita sa mga nakaila kaniya, si Jose nagpamatuod sa iyang integridad o katarong. Sa gisulayan sa paghaylo si Jose sa asawa ni Potipar, siya miingon: “Unsaon nako sa paghimo niining dakong pagkadaotan ug magpakasala batok sa Diyos?” Bisan atubangan sa gamhanang si Paraon, ang labing gamhanang hari sa iyang adlaw, gipahimuslan ni Jose ang higayon nga ihatag sa Diyos ang pasidungog alang sa badbad sa mga damgo ni Paraon. Siya dagayang gipanalanginan. Gigamit siya sa Diyos sa pagluwas sa mga Ehiptohanon ug sa iyang pamilya gikan sa kamatayon tungod sa kagutmanan ug sa pagdala sa iyang amahan, si Jacob, ug iyang panimalay ngadto sa Ehipto.—Genesis 37:2; 39:7-9; 41:15, 16, 32.
Si Moises ug Ubang Matinuohong Batan-on
Ang anak babaye ni Paraon nagsagop kang Moises nga samag iyang kaugalingong anak, apan ang inahan ug amahan ni Moises nakaarang sa pagtudlo kaniya bahin sa matuod nga Diyos. Ang Bibliya nagaingon nga sa midako na, si Moises “midumiling tawgon nga anak sa anak babaye ni Paraon, nga mipalabing pagadagmalan uban sa katawhan sa Diyos inay nga magbaton sa umalaging kalipayan sa sala.” Gigamit sa Diyos si Moises sa pagpagawas sa iyang katawhan sa Ehipto, sa pagdawat sa Kasugoan sa Sinai, ug sa pagsulat sa dakong bahin sa Bibliya. Bisan unsay imong edad, ginaugmad ba nimo ang determinasyon sa pag-alagad sa Diyos sama kang Moises?—Hebreohanon 11:23-29; Exodo 2:1-10.
Ang Kasulatan nagasugilon kanato bahin sa “mga batang gagmay” nga namati kauban sa uban pa sa nasod sa gibasa ang Kasugoan sa Diyos ngadto sa Israel. (Deuteronomio 31:10-13) “Ang tanan nga makasabot na aron mamati” nagbarog “gikan sa banagbanag hangtod sa kaudtohon” aron mamati sa Kasugoan sa mga adlaw ni Nehemias. (Nehemias 8:1-8) Bisan pag ang mga gagmayng bata wala makasabot sa tanang butang, sila nakaapresyar nga sila angay mahigugma, mosimba, ug mosugot kang Jehova nga Diyos. Bisan unsay imong edad, nakapamati ka ba panahon sa mga kombensiyon ug mga asembliya diin gihisgotan ang Pulong sa Diyos? Nakakat-on ka ba sa kahinungdanon sa pagsugot kaniya, sama sa gihimo niadtong batan-ong mga Israelinhon?
Si David, Josias, ug Jeremias
Gipili sa Diyos si David, ang kinamanghoran sa walo ka managsoong lalaki, alang sa espesyal nga pag-alagad ug miingon bahin kaniya: “Akong nakita si David ang anak ni Isai, usa ka tawong giuyonan sa akong kasingkasing, nga magabuhat sa tanang butang nga akong gitinguha.” Gipili siya sa Diyos aron mahimong “usa ka magbalantay” sa iyang katawhan, ug gihimo ni David ang maong pag-alagad, samtang nagpamatuod sa iyang gugma kang Jehova latas sa daghang katuigan. Misulat siyag kapin sa 70 sa mga Salmo ug nahimong katigulangan ni Jesu-Kristo. Bisan bata o tigulang, gipabilhan ba nimo ang mga dalan sa Diyos, ug ginabuhat ba nimo ang mga butang iyang gitinguha, sama kang David?—Buhat 13:22; Salmo 78:70, 71; 1 Samuel 16:10, 11; Lucas 3:23, 31.
Si Josias nahimong hari sa dihang siya otso anyos pa lamang. Sa dihang mga 15 anyos na, “samtang siya bata pa, siya misugod sa pagpangita sa Diyos ni David nga iyang amahan.” Sa wala pay 20 anyos, si Josias misugod sa usa ka kampanya batok sa bakak nga pagsimba. Sa ulahi, iyang gipaayo ang templo, ug, iyang gipasig-uli ang maputling pagsimba diha sa yuta. Atong mabasa: “Sa tanan niyang adlaw sila wala motipas sa pagsunod kang Jehova ang Diyos sa ilang mga amahan.” Kitang tanan dili mahimong usa ka hari sama kang Josias, apan kita makaalagad sa Diyos ug makabarog nga malig-on batok sa bakak nga pagsimba, bisan kon unsay atong edad.—2 Cronicas 34:3, 8, 33.
Ang Diyos nga labing makagagahom miingon kang Jeremias: “Sa wala pa ikaw buhata nako diha sa tiyan naila ko na ikaw, ug sa wala pa ikaw mogula sa tagoangkan gibalaan ko na ikaw. Gitudlo ko ikaw nga manalagna alang sa mga nasod.” Si Jeremias mitutol nga siya bata pa kaayo aron mahimong manalagna: “Ah, Soberanong Ginoong Jehova! Ania ako dili mahibalo nga mosulti, kay ako usa ka bata lamang.” Si Jehova mitubag: “Ayaw pag-ingon, ‘Ako usa ka bata lamang.’ Apan ngadto sa tanan kang bisan kinsa ikaw akong paadtoon, ikaw moadto; ug ang tanan nga akong igasugo kanimo, igasulti mo.” Sa kapin sa 40 ka tuig kanay gibuhat ni Jeremias, ug bisan sa dihang buot niyang mohunong, siya dili makahunong. Ang pulong sa Diyos “nahisama sa nagasiga nga kalayo nga natuob diha sa [iyang] mga bukog.” Kinahanglang siya mosulti gayod! Bisan unsay imong edad, ginaugmad ba nimo ang matang sa pagtuo nga nabatonan ni Jeremias, nga nag-uswag sa pag-alagad sa Diyos sama sa iyang gibuhat?—Jeremias 1:4-8; 20:9.
Si Daniel, Jesus, ug Timoteo
Nakabati ka ba bahin kang Daniel? Siya tingali wala pay 20 anyos sa dihang siya uban sa ubang “mga bata” gidalang mga binihag ngadto sa hukmanan sa gamhanang Nabukodonosor, ang hari sa Babilonya. Bisan pa sa pagkabatan-on ni Daniel, siya determinado nga mosugot sa Diyos. Si Daniel ug iyang mga kauban midumili sa paghugaw sa ilang kaugalingon pinaagi sa mga pagkaon nga basin naglapas sa Kasugoan sa Diyos o nahugaw tungod sa paganong mga rituwal. Sulod sa kapin sa 80 anyos, si Daniel wala matarog, nga nagpadayon sa paghupot sa iyang integridad hangtod sa punto nga midumili sa paghunong sa pag-ampo ngadto sa Diyos, bisan pag kadto misangpot sa iyang pagkatambog ngadto sa mga liyon. Giisip ba nimo ang imong pag-alagad sa Diyos ug imong mga pag-ampo nga ingon ka seryoso? Angay gayod.—Daniel 1:3, 4, 8; 6:10, 16, 22.
Sa edad nga 12 anyos, si Jesus nakaplagang naglingkod taliwala sa relihiyosong mga magtutudlo sa templo sa Jerusalem, “nga namati kanila ug nagsukitsukit kanila. Apan ang tanan nga namati ngadto sa [batang si Jesus] kanunay nahingangha sa iyang pagsabot ug sa iyang mga tubag.” Ang Kasulatanhon kahang panaghisgot sa mga tawong tigulang sa templo makaikag kanimo sama kang Jesus? Ang uban kaha mahingangha sa imong pagsabot ug imong mga tubag? Karong adlawa, daghang batan-ong Saksi nga nagatuon, nagapamati pag-ayo, ug nagasalmot sa Kristohanong mga tigom may Kasulatanhong kahibalo nga makapahingangha sa mga edaran na.—Lucas 2:42, 46, 47.
Ikaw sama ba kang Timoteo, kinsa ingong usa ka bata natudloan sa “balaang mga kasulatan”? Sa dihang siya usa ka batan-on, si Timoteo “gikataho nga maayo sa mga igsoon” diha sa labing menos duha ka kongregasyon. Gipili ni apostol Pablo nga si Timoteo mokuyog niya, dili aron mahimong kargador lamang, kondili aron sa pagtabang kang Pablo sa pagpanudlo sa uban. Ikaw kaha mapili alang sa maong mga pribilehiyo? Ang imo bang kalihokan “gikataho nga maayo,” dili lamang diha sa imong kaugalingong kongregasyon kondili diha usab sa uban?—2 Timoteo 3:15; Buhat 16:1-4.
Unsang Matanga sa Kaugmaon ang Buot Nimo?
Posible ba nga ang mga batan-on karong adlawa mahimong matinuohon sama kang Jose, Moises, David, ug uban pa? Oo, posible. Tinuod, daghang batan-on ang interesado lamang sa paglingawlingaw. Apan ang uban nagagamit nga maalamon sa ilang pagkabatan-on, pinaagi sa pagkaila sa Diyos ug sa iyang kabubut-on alang kanila. Kini sila nagatuman sa tagna sa Bibliya: “Ang imong katawhan magatanyag sa ilang kaugalingon nga kinabubut-on sa adlaw sa imong militaryong kusog. . . . Imong nabatonan ang pundok sa mga batan-ong lalaki nga sama sa mga yamog.”—Salmo 110:3.
Ang maong buotang mga batan-on nagapakitag kaalam nga labaw sa ilang panuigon, sanglit ang Diyos makatabang kanila sa pagpalampos sa ilang kinabuhi karon ingon man paghatag kanilag mahimayaong kaugmaon diha sa umaabot nga bag-ong kalibotan. (1 Timoteo 4:8) Ugaling, sa unsang paagi ang usa ka batan-on karon makaugmad ug pagtuo nga sama niadtong mga batan-on nga gihisgotan diha sa Bibliya? Kon buot nimong masayran, gidapit ka namo sa pagbasa sa artikulong “Malipayong mga Batan-on nga Nagaalagad Kang Jehova,” sugod sa panid 10 niining magasina.
[Mga hulagway sa panid 5]
Ang batan-ong si Moises wala matental sa bahandi sa Ehipto
Ang batan-ong si David giuyonan sa kasingkasing ni Jehova
[Mga hulagway sa panid 6]
Bisan pag gibati ni Jeremias nga siya “usa lamang ka bata,” siya maisogong miwali sa dili-popular nga mensahe
Sa 12 anyos, gipahingangha ni Jesus ang mga tigulang pa niya tungod sa iyang pagsabot sa Pulong sa Diyos
[Hulagway sa panid 7]
Sa Israel bisan ang mga gagmayng bata nagpatalinghog sa dihang gibasa ang Kasugoan sa Diyos. Nagapatalinghog ka ba?