Malipayong mga Batan-on nga Nagaalagad Kang Jehova

“Bisan ang usa ka bata mailhan pinaagi sa iyang mga buhat, pinaagi sa kon ang iyang kagawian maputli ba ug matarong.”—PROVERBIO 20:11, New International Version.

1. Unsa ang pipila sa talagsaong mga butang ginaingon sa Bibliya bahin kang Samuel?

ANG batang si Samuel tingali tres ngadto singko anyos pa lang sa misugod siya sa “pag-alagad” sa tabernakulo ni Jehova sa Shilo. Usa sa iyang mga buluhaton mao ang pagbukas sa “mga pultahan sa balay ni Jehova.” Ang Bibliya nagaingon nga “si Samuel mitubo ug labi pang gikahimut-an sa panglantaw ni Jehova ug sa mga tawo.” Sa midako na, gipabalik niya ang Israel sa matuod nga pagsimba. Siya mialagad sa Diyos “sa tanang adlaw sa iyang kinabuhi.” Bisan pa sa dihang siya “tigulang ug ubanon” giawhag niya ang katawhan nga “kahadloki ninyo si Jehova, ug . . . alagara siya sa kamatuoran.” Dili ba kahibulongan kon ang mga tawo makasulti niining mga butanga bahin kanimo sama nga ang Bibliya nagasulti niini bahin kang Samuel?—1 Samuel 1:24; 2:18, 26; 3:15; 7:2-4, 15; 12:2, 24.

2. Unsay makat-onan sa mga gagmayng bata panahon sa mga tigom sa katawhan ni Jehova karong adlawa?

² Kon ikaw usa sa mga Saksi ni Jehova o nagatambong sa ilang Kristohanong mga tigom, ipasarap ang imong mga mata sa sulod sa Kingdom Hall diin ginatun-an kining leksiyona. Imong makita ang mga tawo sa tanang panuigon. Lagmit adunay mga tawo nga “tigulang ug ubanon na.” Anaa usab ang mga ginikanan, mga batan-on, gagmayng mga bata, ug bisan mga masusong gikugos. Ang labing gagmayng mga bata makakat-on na ba? Oo. Suknaa lamang kadtong si kinsa gidala na sa maong mga tigom sa dihang sila bata pa. Mosugilon sila kanimo nga matinud-anon nga sukad sa ilang linghod nga panuigon, sila nagtuon sa pagtahod sa Diyos, sa paghigugma sa iyang katawhan, ug pagpabili sa mga dapit diin siya gisimba. Sa pag-aginod sa panahon, ang mga gagmayng bata nakakat-on sa kahibulongang mga kamatuoran. Daghang batan-on, sa pagtubo sa kahibalo ug pagpabili, nahimong bahin sa ‘batan-ong mga lalaki ug mga ulay, mga tigulang lalaki ug mga batang lalaki si kinsa giagda sa salmista nga “dayega ninyo ang ngalan ni Jehova, kay ang iyang ngalan lamang maoy hataas uyamot.”—Salmo 148:12, 13.

3. Ngano man nga ang mga batan-on nga nahibalo sa Bibliya lahi ug panglantaw sa kinabuhi kay niadtong wala mahibalo?

³ Kon ikaw usa ka batan-on kansang mga ginikanan regular nga nagadala kanimo sa maong mga tigom, ikaw bulahan ilabina. Daghang ubang batan-on nabalaka sa mga suliran sa kalibotan. Daghan ang tingali nahadlok nga ang mga tawo maglaglag sa yuta. Ikaw nahibalo nga dili itugot sa Diyos nga kana mahitabo, ni itugot niyang ang mga tawo magpadayon sa paglaglag niining matahom nga planeta. Inay nga itugot nga kana mahitabo, ang Diyos, sumala sa Bibliya, “maglaglag niadtong nagalaglag sa yuta.” Ikaw nahibalo nga ang Bibliya nagasaad nga haduol na ang masanagong kaugmaon diha sa matarong bag-ong kalibotan sa Diyos.—Pinadayag 11:18; Salmo 37:29; 2 Pedro 3:13.

Imong Kaugalingong Pagtuo

4. Ang pagkahibalo sa mga paagi sa Diyos nagabutang sa unsang responsabilidad diha sa mga batan-on, ug sa unsang paagi ang batan-ong si Samuel usa ka maayong panig-ingnan niini?

⁴ Sa sinugdan, ang dalan sa Kristohanong kamatuoran tingali maoy ginasubay sa imong mga ginikanan. Tingali ikaw mitambong sa Kristohanong mga tigom kay ikaw gidala nila, ug tingali ikaw nakaambit sa diyosnong pag-alagad tungod kay sila nakig-ambit man. Apan, sa pag-aginod sa panahon, ang pag-alagad ug pagsugot kang Jehova maoy imong kalipay mismo. Ang inahan sa batang si Samuel nagpasugod niya sa matarong nga dalan, apan iya kanang gisunod sa personal. Atong mabasa: “Bisan ang usa ka bata mailhan pinaagi sa iyang mga buhat, pinaagi sa kon ang iyang kagawian maputli ba ug matarong.”—Proverbio 20:11, NIV.

5. (a) Unsa ka bililhon kaayo ang Bibliya? (b) Unsay gisulti ni Pablo kang Timoteo mahitungod sa pagkabililhon sa sinulat nga Pulong sa Diyos?

⁵ Ang Kasulatan nagasugid kanato kon unsay gikinahanglan sa Diyos gikan kanato. Kini tin-awng nagapakita kanato kon unsaon sa pagpahimuot kaniya, nga nagataganag daghang impormasyon nga makahimog dako kaayong kaayohan kanato. Si apostol Pablo nagsulti sa iyang batan-ong magtatabang si Timoteo: “Ang tibuok nga Kasulatan gidasig sa Diyos ug mapuslanon sa pagtudlo, sa pagbadlong, sa pagtul-id sa mga butang, sa pagdisiplina sa pagkamatarong, aron ang tawo sa Diyos mahimong bug-os may katakos, nga hingpit sinangkapan alang sa tanang maayong buhat.”—2 Timoteo 3:16, 17.

6. Unsay ginaingon sa basahon sa mga Proverbio bahin sa kahinungdanon sa kahibalo ug diyosnong kaalam?

⁶ Ang Bibliya nagasugo usab kanato nga “magpatalinghog sa disiplina ug magmaalamon.” Kini nagaingon nga “mahala” ang mga sugo sa Diyos, nga “sangpiton ang pagkamasinabtanon,” ug “magpadayon sa pagpangita” sa pag-ila sama sa imong pagpangita sa natagong mahal nga bahandi. Kon sundon nimo kining tambaga, unya “kamo makasabot sa pagkahadlok kang Jehova, ug kamo makakaplag sa kahibalo mismo sa Diyos.” Atong makaplagan usab kining tambaga: “Karon, O mga anak, patalinghog kamo kanako; oo, malipayon kadtong nagabantay sa akong mga dalan mismo. Patalinghog sa disiplina ug magmaalamon, ug ayaw pagpakitag pagpabaya. Malipayon ang tawo nga mamati kanako . . . Kay ang usang makakaplag kanako makakaplag gayod ug kinabuhi, ug makabaton sa maayong kabubut-on gikan kang Jehova.” Gipabilhan ba nimo sa ingon ang Bibliya ug gihimo ang maong matang sa paningkamot sa pagkat-on sa mga butang ginapamulong niini?—Proverbio 2:1-5; 8:32-35.

Batoni ang Kahibalo

7. Unsa ang labing hinungdanong mga butang nga angay natong makat-onan?

⁷ Ang pila ka batan-on nasayod sa tanang estadistika bahin sa mga dula o sila makasulti kanimo sa tanan bahin sa ilang paboritong grupong mag-aawit. Sila daling mahibalo ug mahinumdom niini kay interesado sila niini. Apan ang labing hinungdanong pangutana mao, Unsay ilang nahibaloan bahin sa Diyos? Palandonga lamang kon unsay iyang nahimo. Gibuhat sa Diyos ang uniberso. Gitagna niya kon unsay buhaton sa mga tawo ug kon unsay mahitabo sa dugay na una kini sila mahitabo. Dili lamang ang Bibliya nagasugid kanato bahin sa Diyos apan kini nagatudlo usab kanato sa unsang paagi kita makapahimuot kaniya. Kini nagapakita kanato sa unsang paagi kita makabatog malipayong kinabuhi karon ug sa unsang paagi kita makabatog kinabuhing walay kataposan diha sa iyang matarong bag-ong kalibotan. Dili ba kana labi pang hinungdanon kay sa pagkahibalo kon kinsay nakadaog sa usa ka dula sa bola o pagkahibalo sa mga ngalan sa mga manunogtog si kinsa daling hikalimtan sa mga tawo?—Isaias 42:5, 9; 46:9, 10; Amos 3:7.

8. Unsang maayong panig-ingnan ang gihatag ni Josias ug Jesus?

⁸ Sa dihang ang batan-ong si Haring Josias 15 anyos pa, siya “misugod sa pagpangita sa Diyos ni David nga iyang katigulangan.” Sa dihang si Jesus 12 anyos pa, siya nakaplagan nga “naglingkod sa taliwala sa mga magtutudlo” sa templo ni Jehova, “nga nagpatalinghog kanila ug nagsukitsukit kanila.”a Bisan unsay imong panuigon, ikaw ba, sama kang Josias ug Jesus, nakaugmad ug tinuod nga interes sa pagkat-on bahin sa mga butang nahimo ug pagahimoon sa Diyos?—2 Cronicas 34:3; Lucas 2:46.

9. (a) Unsay problema sa daghang batan-on? (b) Unsay makahimo sa pagbasa ug pagtuon nga mas sayon, ug imo ba kining nadiskobrehan nga tinuod sa personal?

⁹ Bisan pa niana, ikaw makaingon: ‘Ang pagtuon hago nga buluhaton.’ Daghang tawo, batag tigulang, wala makabasag igo aron ang pagbasa mahimong sayon. Kon daghan ang imong mabasa, mahimong labi pang sayon ang pagbasa. Kon magtuon kag mas daghan, mahimong labi pang sayon ang pagkakat-on. Imong idugtong ang bag-ong mga ideya ngadto sa mga butang imo nang nahibaloan, nga mahimong labi pang sayon ang pagsabot ug paghinumdom kanila.

10. (a) Sa unsang paagi ikaw makapahimulos ug dugang sa Kristohanong mga tigom? (b) Unsa ang imong kaugalingong kasinatian niining bahina?

¹⁰ Unsay makatabang nimo nga makakat-on ug daghan pa bahin sa Diyos? Tingali ikaw mahimong mas regular sa pagtambong sa Kristohanong mga tigom. Makapangandam ka ba daan ug makig-ambit? Pananglitan, makabaton ka bag lalom pang kahibalo gikan sa maong leksiyon pinaagi sa pagtan-aw sa mga Kasulatan nga gisitar apan wala makutlo? Nakasulat ka bag usa o duha ka pulong diha sa panaplin sa pagpahinumdom kanimo kon unsay idugang sa maong mga teksto ngadto sa parapo o sa leksiyon? O gibatasan ba nimo ang pag-apil sa labing menos usa sa maong mga teksto diha sa komento nga nagapasundayag sa imong pagpabili sa Kasulatanhong panaghisgot? Ang usa ka ansiano sa kongregasyon nga nakatambong sa mga tigom nga regular sa daghang katuigan nag-ingon: “Malisdan ako sa pagbutang sa akong hunahuna sa bisan unsang leksiyon nga wala nako maandam, apan makapahimuot gayod ang pagsunod sa leksiyon nga akong natun-an sa bug-os.”

11. Sa unsang paagi ikaw makakat-on ug labaw pa gikan sa mga pakigpulong nga gipasukad sa Bibliya, ug nganong kini hinungdanon kaayo?

¹¹ Sa dihang ikaw mamati sa mga pakigpulong sa Bibliya, nagasulat ka bag mugbong mga nota sa pagtabang nimo sa pag-analisar giunsa sa paghan-ay ang pakigpulong ug sa pagbutang sa imong hunahuna diha sa ginapamulong? Gitandi ba nimo ang imong nabatian sa imo nang nahibaloan mao nga ikaw makasabot niana nga mas dali ug makahinumdom nga labaw pa niana? Si Jesus miampo: “Kini nagkahulogan sa kinabuhing walay kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Dili ba ang kahibalo nga motultol sa kinabuhi ang labing maayong kahibalo nga mahimo nimong mabatonan? Matikdi kon unsay ginaingon sa Bibliya bahin niini: “Kay si Jehova mismo nagahatag sa kaalam; gikan sa iyang baba anaay kahibalo ug pag-ila. Inigsulod sa kaalam sa imong kasingkasing ug ang kahibalo makapahimuot sa imong kalag mismo, ang katakos sa panghunahuna magabantay kanimo, ang pag-ila mismo magapanalipod kanimo.”—Proverbio 2:6, 10, 11.

Mouswag sa Pagpabili

12. Unsa ang pipila sa talagsaong mga butang nga nahimo sa Diyos alang kanato?

¹² Tinuod bang gipabilhan nato ang nahimo sa Diyos alang kanato? Gilalang niya ang usa ka matahom nga yuta ug giandam kini alang sa kinabuhi. Gilalang niya ang atong unang mga ginikanan, sa ingon nagpaposible nga kita mangatawo. Gihikay niya nga kita magbaton sa pagpaluyo sa mga pamilya ug sa mahigugmaong kongregasyon. (Genesis 1:27, 28; Juan 13:35; Hebreohanon 10:25) Gipadala niya ang iyang kaugalingong panganay nga Anak sa yuta aron sa pagtudlo kanato sa dugang bahin sa Iyang kaugalingon ug sa pagtagana sa lukat nga mopaposible sa kinabuhing walay kataposan. Tinuod mo bang gipabilhan ang maong kahibulongang mga gasa? Nagadasig ba kana kanimo sa pagdawat sa iyang imbitasyon sa pagkat-on bahin kaniya ug pag-alagad kaniya?—Mateo 20:28; Juan 1:18; Roma 5:21.

13. Nganong gibati nimo nga ang Diyos interesado sa mga indibiduwal?

¹³ Ang Maglalalang sa uniberso interesado sa mga tawo. Gitawag niya si Abraham “akong higala,” ug siya miingon kang Moises: “Ako nakaila kanimo pinaagi sa ngalan.” (Isaias 41:8; Exodo 33:12) Ang basahong Pinadayag nagapaila nga ang Diyos dunay simbolikong basahon, o “basahon sa kinabuhi,” nga nasudlan sa mga ngalan sa iyang matinumanong mga alagad “sukad sa pagkatukod sa kalibotan.” Maapil kaha dinha ang imong ngalan?—Pinadayag 3:5; 17:8; 2 Timoteo 2:19.

14. Sa unsang paagi ang pagsunod sa mga prinsipyo sa Bibliya makapauswag sa imong kinabuhi?

¹⁴ Ang mga prinsipyo sa Diyos mosaler. Ang pagbuhat sa mga butang sa iyang paagi magwagtang sa daghang problema—imoralidad, pagkagiyan sa droga, alkoholismo, wala-kagustohing pagmabdos, sakit venereal, kapintasan, pagbuno, ug sa taas nga listahan sa ubang mga sakit. Ang pagsunod sa iyang mga dalan motabang usab kanimo sa pagkaplag sa tinuod nga mga higala ug pagkinabuhi sa mas malipayong kinabuhi. Dili ba kana takos nga pagabuhaton? (1 Corinto 6:9-11) Bisan ang usa ka batan-on nga determinado sa pagbuhat sa mga butang sa paagi sa Diyos makabatog labawng kusog sa pagbuhat kon unsay matarong. Ang Bibliya nagaingon: “Uban sa usang maunongon [si Jehova] molihok nga maunongon.” Kini nagapasalig usab kanato nga siya dili “mobiya sa iyang mga maunongon” o “motalikod sa iyang katawhan.”—Salmo 18:25; 37:28; 94:14; Isaias 40:29-31.

Pag-uswag sa Pag-alagad sa Diyos

15. Unsang diyosnong tambag ang gihatag ni Solomon sa mga batan-on?

¹⁵ Ang imo bang mga tumong nasentro sa himalatyon daang kalibotan o sa matarong bag-ong kalibotan? Nagapamati ka ba sa Diyos, o nagapamati ka ba sa maalamon-sa-kalibotang mga tawo nga nagasupak kaniya? Ang kalingawan, hataas nga edukasyon, o mohurot-sa-panahong sekular nga karera mauna ba kay sa Diyos ug sa iyang pag-alagad? Ang makinaadmanong si Haring Solomon misulat sa tibuok basahon sa Bibliya nga Ecclesiastes sa pagpakita kon unsay angay mauna sa atong mga kinabuhi. Siya mihinapos: “Hinumdomi, karon, ang imong Dakong Maglalalang sa mga adlaw sa imong pagkabatan-on, sa dili pa moabot ang mga adlaw sa katalagman, o moabot ang mga katuigan sa dihang ikaw moingon: ‘Ako walay kalipay kanila.’ Ang kataposan sa butang, kay ang tanan nadunggan na, mao: Kahadloki ang matuod nga Diyos ug bantayi ang iyang mga sugo. Kay kini mao ang tibuok nga katungdanan sa tawo.”—Ecclesiastes 12:1, 13.

16. Sa unsang paagi ang mga batan-on makatinguha sa dugang mga pribilehiyo?

¹⁶ Ang tanang gulangong Kristohanong mga igsoon nga imong nailhan—ang mga ansiano, mga payunir, ug inyong mga magtatan-aw sa sirkito ug distrito—sa kaniadto mga bata. Unsay mitultol sa mga panalangin nga ilang gipahimuslan karong adlawa? Gihigugma nila ang Diyos ug buot moalagad kaniya. Daghan kanila sa pagkabatan-on nagpahimulos sa ekstrang panahong ilang nabatonan aron makabatog kahibalo ug kasinatian. Sila nagtuon ug nakig-ambit sa mga tigom. Sila nakigbahin sa pagpanudlo, ug sila nagtinguha sa dugang mga pribilehiyo—pagpayunir, pag-alagad sa Bethel, o ubang magantihong buluhaton. Sila dili ‘super nga mga batan-on;’ sila may kasagarang intereses ug mga kabalaka sama kanimo. Bisan pa niana, sila nagkugi nga nahiuyon sa tambag: “Bisan kon unsay inyong ginabuhat, buhata kana nga tibuok kalag ingon nga ngadto kang Jehova, ug dili ngadto sa mga tawo.”—Colosas 3:23; itandi ang Lucas 10:27; 2 Timoteo 2:15.

17. Unsay makatabang sa mga batan-on nga mouswag sa pag-alagad sa Diyos?

¹⁷ Komosta ka man? Gipabilhan mo ba gayod ang diyosnong mga butang? Gipili ba nimo ang mga higala taliwala niadtong nagauna sa espirituwal nga mga butang? Ginadasig ba nimo ang uban nga makig-ambit uban kanimo diha sa Kristohanong buluhaton? Nagakuyog ka ba sa Kristohanong pag-alagad uban sa mas gulang, mas eksperyensiadong mga igsoon aron makatuon gikan kanila, makatilaw sa ilang kalipay, ug madasig sa ilang maayong mga binuhatan? Usa ka Saksi mahinumdom sa adlaw, halos 20 anyos kanhi, sa dihang sa unang panahon mainiton siyang gidapit sa usa ka tigulang nga mouban kaniya sa pagsangyaw sa kanataran. Kadto, siya miingon, mao ang punto sa kausaban sa iyang kinabuhi: “Sa unang panahon ako mikuyog tungod kay buot ko, dili lang tungod kay gidala ako sa akong mga ginikanan.”

18. Unsa ang mga butang nga hunahunaon sa dili pa mopresentar sa kaugalingon alang sa bawtismo?

¹⁸ Kon ikaw nagauswag sa pagbuhat sa mga butang sa paagi sa Diyos, basin ikaw magsugod sa paghunahuna sa bawtismo. Hinungdanon nga hinumdoman nga ang bawtismo dili usa ka rituwal sa pagsulod sa pagkahamtong. Kini wala magpakita nga ikaw nagatubo, ni kini butang nga angay nimong buhaton kay ang imong mga higala naghimo sa maong lakang. Una mohangyo nga magpabawtismo, angay nga ikaw magbatog paninugdang kahibalo sa kamatuoran ug magkinabuhing nahiuyon sa Pulong sa Diyos. Angay nga ikaw may igoigong kasinatian sa pagpakig-ambit sa maong kahibalo sa uban ug pag-amgo nga kini hinungdanong bahin sa matuod nga pagsimba. (Mateo 24:14; 28:19, 20) Angay usab nga ikaw mahibalo nga tapos sa paghimo niining hinungdanong Kristohanong lakang ikaw gidahom nga magkinabuhing nahiuyon sa matarong nga mga prinsipyo sa kagawian.b Sa imong kasingkasing, angay nga imo nang gipahinungod ang imong kinabuhi ngadto sa imong mahigugmaong langitnong Amahan.—Itandi ang Salmo 40:8, 9.

19. Kanus-a angay magpabawtismo ang usa ka tawo?

¹⁹ Ang bawtismo maoy usa ka lakang nga imong himoon sa dihang hugot na ang imong hukom nga bisan unsay mahitabo sa nahibilin mong kinabuhi, ikaw moalagad sa Diyos. Kini katilingbanong ilhanan nga ikaw nakahimog kompleto, walay-pag-ukon-ukon, ug dili-kondisyonal nga pagpahinungod kang Jehova pinaagi kang Jesu-Kristo sa pagbuhat sa kabubut-on sa Diyos. Usa ka Kristohanong ansiano nahinumdom sa adlaw, halos tunga sa siglo kanhi, sa dihang siya nakaamgo: “Kinahanglan ako may pagabuhaton niini!” Si Michelle, usa ka batan-ong Saksi nga nabawtismohan sa Newcastle, Inglaterra, pila ka tuig kanhi, miingon: “Sa panuigong 13, ako nakaamgo nga angay kong ipahinungod ang akong kinabuhi ug mabawtismohan; walay butang akong palabihon sa pagbuhat kay sa pag-alagad sa Diyos.”

20. (a) Unsang maayong panig-ingnan ang gihatag na sa tinagpulo ka libong batan-on? (b) Unsaon pag-isip kining lakanga?

²⁰ Tinagpulo ka libong batan-on ang nabawtismohan dili pa dugay. Sila nagtuon sa Pulong sa Diyos ug nakakat-on sa iyang mga dalan, ug unya, pinaagi sa bawtismo sa tubig, malipayon silang miduyog sa daghang tigulang sa katilingbanong pagpasimbolo sa ilang pahinungod ngadto sa Diyos. Sila nahibalo nga ang bawtismo dili kataposan apan sinugdanan lamang sa tinuod dedikadong pagkinabuhi nga determinado nilang sundon diha sa pag-alagad kang Jehova sa walay kataposan.

[Mga footnote]

Unsaon Nimo Pagtubag?

◻ Nganong hinungdanon kaayo ang kahibalo sa Pulong sa Diyos?

◻ Sa unsang paagi ikaw makakat-on ug dugang pa gikan sa Kristohanong mga tigom?

◻ Unsang mga panalangin gikan sa Diyos ang angay magdasig nato sa pagsugot kaniya?

◻ Sa unsang paagi ikaw makauswag sa pag-alagad sa Diyos?

◻ Kanus-a angay magpabawtismo ang usa?