Ang Pagsalig Kang Jehova Mosangpot sa Kalipay
SUMALA SA GIASOY NI JACK HALLIDAY NATHAN
Ikaw basin nakabati sa pamulong, “Natawong may platang kutsara sa iyang baba.” Aw, sa natawo ako niadtong 1897, kana halos literal nga natuman sa akong kahimtang.
KADTO ang ika-60ng tuig sa pagmando ni Hara Victoria, ang iyang diyamanteng anibersaryo. Ang mga bata nga natawo niadtong tuiga sa Inglaterra gigasahan ug platang kutsara. Diha niadto sa iyang himaya ang Britanikong Imperyo, nga nag-ani sa mga benepisyo sa Industriyal nga Rebolusyon diha sa kaugalingong nasod ug sa mauswagong patigayon gikan sa malamboong mga koloniya sa gawas sa nasod.
Ang akong lolo usa ka Hudiyo, ug ang akong amahan nahimong usa ka eskolar sa Hebreohanon, nga batid kaayo sa Hebreohanong Kasulatan. Apan ang akong lola maoy anak nga babaye sa usa ka Anglikanong obispo, ug tungod sa iyang impluwensiya, ang akong amahan nagdawat kang Jesu-Kristo nga Mesiyas. Ang akong mga ginikanan naimpluwensiyahan sa mga sinulat ni Charles Taze Russell, mao nga kami wala gayod magtuog Trinidad o sa doktrinang impiyernong-kalayo.
Sa bata pa ako, ang mga kabayo ang pangunang paagi sa transportasyon sa Inglaterra, ug diyutay ra ang karwahe nga walay kabayo, o mga awto. Niadtong 1913, tungod sa akong gugma sa mga kabayo, mianib ako sa kabayog-sakyanan nga unit sa teritoryal armi (militia). Sa pagsilaob sa Gubat sa Kalibotan I, ako gibalhin ngadto sa regular nga armi ug gipadala ngadto sa Gregong natad, diin ako gimalarya. Sa ulahi, ako gipadala ngadto sa kasadpanhong natad sa Pransiya ingong tigmasinggan ug sa kadugayan nahimong priso sa mga Aleman niadtong 1917.
Pagkaplag sa Usa ka Katuyoan sa Kinabuhi sa India
Pagkatapos sa gubat niadtong 1918, walay makita nga trabaho sa Inglaterra, mao nga ako mianib na usab sa armi ug miadto sa India ingong bahin sa garison sa panahon sa kalinaw. Niadtong Mayo 1920 misugmat ang malarya, ug gipaadto ako sa kabungtoran aron magpauli sa lawas. Didto akong gibasa ang tanang basahon nga akong makuptan, apil ang Bibliya. Ang pagbasa sa Kasulatan nakapasamot sa akong interes bahin sa pagbalik sa Ginoo.
Mga bulan sa ulahi, sa Kanpur, gisugdan nako ang usa ka grupo sa pagtuon sa Bibliya, nga naglaom nga makakat-on ug dugang bahin sa pagbalik sa Ginoo. Didto nako mahibalag si Fredrick James, kanhi usa ka Britanikong sundalo nga karon usa ka masibotong estudyante sa Bibliya. Gipatin-aw niya kanako nga si Jesus presente na sukad 1914, nga dili makita sa tawo. Kadto ang labing makalilipay nga balita nga sukad akong nadungog. Ang una kong tinguha mao nga mogawas sa armi. Ang pag-ulag dugo ug kamatayon sa Uropanhong gubat nakapayugot nako. Buot ko nga mahimong usa ka makigdaitong misyonaryo ug magwali niining maayong balita bahin sa presensiya ni Kristo.
Ugaling, ang armi wala mosugot nga ako pagawason. Sa kapulihay, ila akong gipadala ngadto sa kasadpang India, nga karon Pakistan. Samtang didto, gibasa ko ang Studies in the Scriptures, ni Charles Taze Russell, ug labi pang nakombinsir nga ako angay mosanong sa panawag sa pagwali. Nagsugod ako sa pagbatog daotang mga damgo nga nakahatag nakog depresyon. Kay nawad-ag paglaom gisulatan ko si Brader James, nga midapit nako sa iyang balay sa Kanpur. Ang adlaw sa akong pag-abot mao ang Memoryal sa kamatayon sa Ginoo. Kadtong adlawa may dakong epekto sa akong kinabuhi—ako mihukom sa pagpabiling tagsaanon ug paghimo sa bug-os-panahong ministeryo nga akong tumong sa kinabuhi.
Balik sa Inglaterra
Sa hinapos sa 1921, ako gibalik sa Inglaterra, ug sa tingpamulak sa 1922, ako gipagawas sa armi. Niadtong ting-inita si J. F. Rutherford, ang ikaduhang presidente sa Watch Tower Society, mianha sa Inglaterra, ug ako miadto uban sa akong mga ginikanan aron sa pagpamati sa iyang pakigpulong sa Royal Albert Hall, London. Human niadto, ako nadasig sa pagtanyag sa akong pag-alagad sa Bethel, sumala sa pagtawag sa mga sangang-buhatan sa Watch Tower Society, apan ako malulutong gidasig sa paghimog colporteur nga buluhaton (bug-os-panahong pagwali) una. Mao nga miundang ako sa akong trabaho ug gidawat ang usa ka asaynment nga teritoryo sa habagatan sa Inglaterra. Nga walay kasinatian, nga may usa ka crown (50 cents, U.S.) sa akong bulsa, ug pagsalig kang Jehova, gisugdan ko ang akong karera ingong bug-os-panahong ministro. Sa mga Marso 1924, ako gidapit sa Bethel.
Ugaling, sa sunod tuig ako gipagawas sa Bethel, ug ako naguol sa labihan, nga mibating ako gidisiplina tungod sa butang nga dili nako tulubagon. Niadtong mubong panahon, ang Bethel nahimong akong kinabuhi. Apan pinaagi sa pagtugyan sa problema kang Jehova diha sa pag-ampo ug pagsalig nga matuman ang iyang kabubut-on, ako nakapadayon nga matinumanon sa payunir nga asaynment nga gihatag kanako. Niadtong Mayo 1926, ako gidapit pagbalik sa Bethel, diin ako nagpabilin sulod sa sunod 11 ka tuig.
Si Brader Rutherford miduaw na usab sa Inglaterra niadtong 1936 ug gidapit ako nga moadto sa Canada aron makaambit sa buluhaton sa Gingharian didto. Ugaling, tungod sa sayop nga pagsabot, naagoman ko ang dili-pag-uyon ni Brader Rutherford tungod sa pagbutyag sa pila ka tinagong impormasyon. Mahinumdoman ko pa ang iyang eksaktong mga pulong: “Jack, dili ako makasalig kanimo. Gisia ang imong mga tiket!” Pagkamakapaguol nga kasinatian! Apan kadto disiplina nga gikinahanglan kaayo, ug human niadto, uban sa laing igsoong lalaki, ako naasayn ingong payunir sulod sa sunod walo ka bulan. Kadtong pribilehiyoa sa pag-alagad nagwagtang sa akong kaguol, ug ako nakakat-on gikan sa disiplina.
Miuswag nga Pag-alagad sa Canada
Duolag usa ka tuig sa ulahi, sa sunod niyang pagduaw sa Inglaterra, gihisgotan na usab ni Brader Rutherford ang bahin sa Canada. Ako maikagon alang sa oportunidad ug uban ang kasibot midawat sa usa ka asaynment didto. Tapos sa pag-alagad sa pila ka bulan sa Canadian Bethel, ako naasayn ingong usa ka nagapanawng hawas sa Sosyedad sa habagatan-kasadpang Ontario. Kadaghanan sa mga kongregasyon didto gagmay ug nagkinahanglan kaayog pagdasig. Apan pagkamasadyaon kadtong unang katuigan, bisan pa sa pisikal nga kalisdanan gumikan sa grabeng katugnaw ug dili-pihong transportasyon!
Dili ko gayod mahikalimtan ang kamainiton ug espirituhanong pagpabili sa usa ka gamayng nitibong Indian nga kongregasyon duol sa Brantford. Tingtugnaw kadto, ug baga ang niyebe, nga nakapalisod sa akong Model T Ford sa pag-agi. Walay mausa ang nagpaabot kanako, ug sa pag-abot nako, akong nadiskobrehang ang mga igsoong lalaki nangadto sa kakahoyan sa pagkuhag igsusugnod nga kahoy. Busa ako milakaw sa pagpangita kanila, nga ang niyebe tagahawak. Sa dihang sa kataposan sila akong nakaplagan, sila natingala, apan malipayon, nga nakakita kanako. Gibuhian nila ang tanang butang, namauli, ug gihikay ang usa ka tigom niadtong gabhiona mismo.
Sa duol nga Beamsville, ang matinumanong mga igsoon ug ako nakigbisog sa daghang bulan batok sa ginabotohan nga mga ansiano ug mga apostata. Pagkadakong pribilehiyo ang pagtan-aw giunsa sa paglihok sa espiritu ni Jehova aron mahusay ang kahimtang! Ang pagsalig kang Jehova ug pagkamaunongon sa iyang organisasyon misangpot sa daghang panalangin alang sa mga kongregasyon niadtong unang mga katuigan. Daghang mga bata gikan niadtong mga kongregasyona ang nangadagko na nga misulod sa pagkapayunir, misulod sa Bethel, nagpahimulos sa misyonaryong mga asaynment, ug nahimong mga nagapanawng magtatan-aw. Ako wala gayod malimot sa mga kalipay sa pagpuyo uban sa maunongong Kristohanong mga pamilya nga nagpatungha sa maong buotang mga batan-on. Ang maong mga pamilya nahimong akong pamilya, ug ang ilang mga anak nahimong akong mga anak.
Katuigan nga May Pagdili
Panahon sa kaguliyang sa gubat sa 1940, ang buluhaton sa mga Saksi ni Jehova gidili. Pagkamakapakurat! Ang gipasiugda-sa-gobyernong mga anunsiyo sa radyo nagmando kanamo nga ihatag sa kapolisan ang among mga basahon, among mga rekord sa kongregasyon, ug mga yawi sa among Kingdom Hall. Kay nakaamgo sa kadinalian sa kahimtang, gilibot nako ang mga kongregasyon ug giagda sila sa pagtago sa ilang mga basahon ug mga rekord. Ang mga igsoon gidasig sa pagtigom diha sa pribadong mga balay, sa laing balay kada semana. Sa wala madugay gipasig-uli sa mga kongregasyon ang balay-balay nga ministeryo, nga gigamit lamang ang Bibliya. Kadto napamatud-ang usa ka panalangin, kay kaming tanan nakatuon sa mas hanas nga paggamit sa among mga Bibliya.
Sa hinapos niadtong tuiga among nadawat ang daghang suplay sa pulyetong End of Nazism gikan sa Tinipong Bansa. Ang pagpasulod sa maong gidiling mga basahon sa Canada nagkinahanglag dakong kamamugnaon. Ang pila ka igsoong lalaki nagpasakayg nagbaktas nga mga sundalo, nga nanglingkod sa mga karton, nga wala tuyoa nagtaganag takoban alang sa gidiling pulyeto. Unya usa ka buntag sa Nobyembre, tali sa alas tres ug alas sayes, ang tibuok nga nasod daw-kilat nga giatake sa mga Saksi nga nagbilig kopya sa maong pulyeto diha sa ang-ang sa kadaghanang balay sa Canada.
Panahon niadtong mga katuigan sa pagdili, mipadayon ako sa payunir nga pag-alagad sa kasadpanhong probinsiya sa British Columbia. Sa wala pa ang pagdili, ang mga igsoon migamit sa usa ka sakayan aron sa pagduaw sa mga tawo sa kabalangayan sa nahilit nga mga isla gikan sa Vancouver abot sa Alaska. Sa pag-epekto sa pagdili, ang daghang basahon didto sa sakayan, mao nga gibilin kana sa mga Saksi uban sa mahigalaong mga tawo sa pagpaingon sa pantalan diin ang sakayan imbargohon. Sa ulahi, gidala ko ang usa ka sakayan sa pangisda sa pagpangita kon diin ang maong mga basahon, ug unya, panahon sa pangisda sa salmon, gihikay ko nga kuhaon kana sa mga igsoon gikan sa maong mga tawong interesado. Sa wala madugay ang mga basahon gidala ngadto sa Vancouver aron ikatagtag sa daghang dapit, nga gitakoban sulod sa mga kargahan sa mga sakayan sa pangisda.
Sa hinapos sa 1943, nakadawat kamig balita nga gitapos na ang pagdili diha sa mga Saksi ni Jehova. Ugaling, kadto wala wagtanga gikan sa Watch Tower Society. Busa nagpadayon kami sama sa nangagi, nga gigamit lamang ang Bibliya sa among balay-balay nga ministeryo. Apan sa maong panahon kami sa dayag makapaila nga kami mga Saksi ni Jehova. Sa pagsugod sa pagdili, kami may mga 6,700 ka Saksi; sa dihang kana giwagtang, kami maoy 11,000 ka madasigon!
Kinabuhi Ingong Nagapanaw nga Magtatan-aw
Ingong usa ka nagapanawng hawas sa Sosyedad, gikobrehan ko ang dimaihap nga mga milya sulod sa sunod pila ka tuig, nga nagbuhat kauban ug nagdasig sa mga kongregasyon. Sa tingtugnaw, mikuyog ako sa mga igsoon sa linaing sakyanan nga gitawag caboose. Kadto ginuyod-sa-kabayo, may-atop nga kangga, nga kompleto sa dimasudlag hangin nga sug-ang ug panghaw. Kasagaran, nga mogikan sa dili pa mobanabanag ang adlaw nga may sakay nga abot ug unom, kami mobiyahe agi sa lalom nga niyebe sulod sa 35 kilometros o labaw pa, nga moduaw sa mga umahan ubay sa dalan. Ang drayber kinahanglang listo kay ang pangpang sa naanod nga niyebe makapakiling sa caboose, nga mayabo ang mga nagsakay uban ang init nga mga baga gikan sa sug-ang.
Niadtong 1947, gitudlo ako sa pagdumala sa unang distrito sa nasod, nga nagsakop sa tibuok nga nasod. Ako may sirkitong asembliya nga alagaran halos kada semana. Ang mga asembliya gihimo sa ice rinks, mga dulaanan sa potbol, mga karerahan, mga tigomanan sa unyon, ug mga tigomanan sa komunidad. Ang mga kahikayan sa maong mga panagkatigom nagkinahanglag dakong atensiyon sa dili pa mosugod ang programa. Niadtong 1950, si Frank Franske natudlo nga ikaduhang magtatan-aw sa distrito sa Canada, ug sa ulahi gidugang ang lima pa sa maong mga nagapanawng magtatan-aw.
Latas sa katuigan, ako nagbiyahe pinaagig gaang ayroplano, mga sakayan sa pangisda, dagkong snowmobiles uban sa track ug skis nga gitawag bombardiers, sa mga snowplane (mga sakyanan nga may olisi sa luyo ug skis sa atubang aron manehoon), ug sa mas naandang mga sakyanan—tren, bus, ug kotse. Usahay, sakay sa ayroplano mopaibabaw kami sa mga tuktok sa habog nga Rocky Mountains, dayon motidlom deretso ngadto sa lalom nga natagong mga walog aron makaabot sa nahilit nga mga grupo sa mga igsoon.
Sa daghang beses akong natadlastadlas ang Canada. Nakapuyo akog mga balay sa troso nga bugnaw kaayo nga makita namo ang among gininhawa sa mabuntag ug sa mga balay sa uma nga walay modernong mga kasangkapan. Bisan pa niana, latas nianang tanan, nakabaton akog dakong pagbati sa katagbawan, kay nahibalong ako nagbuhat sa buluhaton ni Jehova, nga nagdasig sa katawhan ni Jehova.
Dugang mga Pribilehiyo sa Pag-alagad
Sulod sa miaging 33 ka tuig, ako nakapribilehiyo sa pagkamembro sa pamilyang Bethel sa Canada, ingon man nag-alagad nga mamumulong sa kombensiyon sa Inglaterra, Uropa, Aprika, Australia, New Zealand, ug Halayong Silangan. Sa Australia, nahimamat ko ang anak babaye ni Brader James, kinsa makapadasig kaayo nako sa India. Si Brader James wala gayod mahimong misyonaryo, apan gipasa niya ang maayong espirituwal nga panulondon sa iyang pamilya.
Karong adlawa ako giliyokan sa ginatos ka batan-ong lalaki ug babaye sa Bethel sa Canada. Ang paagi sa paggamit nila sa ilang batan-ong kusog diha sa pag-alagad kang Jehova makapalig-on ug makapadasig. Hanap na ang akong mga mata, apan ginabasahan ako niining mga batan-on. Luya na ang akong mga tiil, apan sila nagadala kanako uban nila sa pagsangyaw sa kanataran. Mangutana ang pipila kon giunsa nako pagsagubang ang mga suliran sa panglawas nga nalangkit sa pagkatigulang. Aw, sa usa ka butang, ako nagatuon sa Pulong sa Diyos sa kada adlaw. Kini nagabutang sa akong hunahuna ug kasingkasing diha sa espirituwal nga mga butang.
Sa pagkamatuod, usa ka dakong pribilehiyo ang paglakaw ug pagpakigsulti uban sa akong langitnong Amahan, si Jehova, sulod sa 69 ka tuig sa dedikadong kinabuhi, nga 67 niana nagugol diha sa bug-os-panahong pag-alagad. Akong kanunayng nadiskobrehan nga si Jehova usa ka mahigugmaon, maluluy-ong Diyos, nga nagapasaylo sa tawhanong mga kahuyangan ug nagahatag gahom ug kusog niadtong nagasalig diha kaniya. Ang akong paglaom mao ang paghupot padayon sa akong integridad ug pagkamaunongon kang Jehova ug sa iyang organisasyon hangtod sa kataposan, nga magasalig sa saad nga sa nahaigong panahon ako mahiusa sa akong minahal nga Ginoo, si Jesu-Kristo, ug sa daghan nakong matinumanong mga igsoong lalaki ug mga babaye sa langitnong himaya.—Salmo 84:12.
[Hulagway sa panid 12]
Ang mga snowplane nagtadlastadlas sa pagbiyahe sa mga katulinong abot ug 80 kilometros matag oras
[Hulagway sa panid 13]
Sa tingtugnaw, ang ginuyod-sa-kabayong caboose ang gigamit sa pagsangyaw sa kapatagan sa Canada