Pag-ila sa Balaang Espiritu
NAHIBALO ka ba nga ang balaang espiritu nakaapektar sa kinabuhi sa matag usa kanato? Ug naamgohan mo ba nga kini makahimog dagkong mga kauswagan sa imong kinabuhi? Kini hayan makapahibulong kanimo. Ngani, tingali mangutana ka: ‘Kinsa o unsa ang balaang espiritu?’
Kon sakop ka sa usa sa mga simbahan sa Kakristiyanohan, ikaw malagmit nakadungog na sa usa ka klerigo nga nagbunyag sa usa ka bata “diha sa ngalan sa Amahan ug sa Anak ug sa Balaang Espiritu.” (Mateo 28:19, The New English Bible) Kon pangutan-on sa pag-ila sa balaang espiritu, ang kadaghanang mga klero dali nga motubag: ‘Ang balaang espiritu mao ang ikatulong persona sa Trinidad, nga managsama diha sa tanang mga paagi ngadto sa Diyos ang Amahan ug ngadto sa Ginoong Jesu-Kristo.’
Bisan pa niana, kini nga panglantaw wala tuohi sa panahon sa unang pipila ka mga siglo sa atong Kumon nga Panahon. Sa pag-ilustrar: Sa 381 K. P.—halos tulo ka siglo human sa kamatayon sa mga apostol ni Jesu-Kristo—si Gregory sa Nazianzus misulat: “Ang pipila nagtuo nga [ang balaang espiritu] maoy usa ka puwersa (energeia), alang sa pipila usa ka linalang, sa pipila nga siya maoy Diyos, ang pipila dili makadesider kon hain niini.”
Karong adlawa, ang kadaghanang mga simbahan diha sa Kakristiyanohan midawat sa Trinitaryanhong panglantaw sa balaang espiritu. Apan kana ba ang gipaluyohan sa Bibliya? O kini ba lamang maoy usa ka opinyon nga gipasukad sa tradisyon? Sa aktuwal, ang Bibliya wala maghisgot sa balaang espiritu diha sa samang paagi nga kini naghisgot sa Diyos o kang Jesus. Pananglitan, diha sa Bibliya, ang balaang espiritu walay usa ka personal nga ngalan.
Kana ba dili usa ka hinungdanong detalye? Dili, ang mga ngalan hinungdanon diha sa Bibliya. Ang Diyos nagpasiugda sa kahinungdanon sa iyang balaang ngalan sa dihang siya miingon: “Ako mao si Jehova. Kini mao ang akong ngalan; ug ngadto kang bisan kinsa dili nako ihatag ang akong kaugalingong himaya, ni ang akong pagdayeg ngadto sa linilok nga mga larawan.” (Isaias 42:8) Ang kahinungdanon sa ngalan ni Jesu-Kristo ginapasiugda una pa sa iyang pagkahimugso sa dihang ang usa ka manulonda miingon kang Maria: “Imong pagatawgon ang iyang ngalang Jesus.” (Lucas 1:31) Kon ang ngalan sa Amahan ug sa Anak hinungdanon kaayo, nganong ang balaang espiritu walay personal nga ngalan? Sa pagkatinuod, kining detalyeha lamang angayng makapahibulong sa usa ka tawo kon kaha ang espiritu maoy tinuod katumbas sa Amahan ug sa Anak.
Ang Kasulatan ug ang Balaang Espiritu
Diha sa Hebreohanong Kasulatan, o sa “Daang Testamento,” adunay mga reperensiya ngadto sa “balaang espiritu” ug sa “akong [Diyos] espiritu.” (Salmo 51:11; Joel 2:28, 29) Atong mabasa nga ang balaang espiritu makapuno sa usa ka tawo, mokunsad kaniya, ug motapot kaniya. (Exodo 31:3; Maghuhukom 3:10; 6:34) Ang pipila sa balaang espiritu sa Diyos mahimong kuhaon gikan sa usa ka tawo ug igahatag ngadto sa lain. (Numeros 11:17, 25) Ang balaang espiritu mahimong magalihok diha sa usa, nagpaarang kaniya sa paghimo ug labaw tawhanong mga buhat.—Maghuhukom 14:6; 1 Samuel 10:6.
Unsay makataronganong ikahinapos gikan sa maong mga pulong? Sa pagkatinuod ang balaang espiritu dili usa ka persona. Sa unsang paagi ang usa ka bahin sa usa ka tawo pagakuhaon gikan kaniya ug igahatag ngadto sa lain? Dugang pa, walay ebidensiya nga samtang dinhi pa si Jesus sa yuta, ang matinumanong mga Hudiyo naglantaw sa balaang espiritu ingong usa ka persona nga katumbas sa Amahan. Sila tinong wala magasimba sa balaang espiritu. Hinunoa, ang ilang pagsimba gitumong lamang ngadto kang Jehova, ang Usa nga gitawag mismo ni Jesus nga “akong Amahan” ug “akong Diyos.”—Juan 20:17.
Sama sa gitawag nga Daang Testamento, ang bahin sa Bibliya nga gitawag ang Kristohanong Gregong Kasulatan, o “Bag-ong Testamento,” nag-ingon nga ang balaang espiritu ‘makapuno’ sa usa ka tawo o “maanaa” kaniya. (Buhat 2:4; Lucas 2:25-27) Ang balaang espiritu ‘gihatag,’ ‘gibubo,’ ug ‘giapod-apod.’ (Lucas 11:13; Buhat 10:45; Hebreohanon 2:4) Sa Pentekostes 33 K.P., ang mga tinun-an nakadawat ug “pipila sa” espiritu sa Diyos. (Buhat 2:17) Ang Kasulatan naghisgot usab sa bawtismo uban sa balaang espiritu ug sa pagdihog niini.—Mateo 3:11; Buhat 1:5; 10:38.
Ang maong mga pulong sa Bibliya nagpamatuod nga ang balaang espiritu dili usa ka persona. Kining konlusyona ginapamatud-an sa dihang atong makita nga ang balaang espiritu gitala uban sa dili-tawhanong mga butang. Pananglitan, ang Bibliya nag-ingon nga si Esteban “napuno sa pagtuo ug sa balaang espiritu.” (Buhat 6:5) Ug si apostol Pablo mirekomendar sa iyang kaugalingon ingong ministro sa Diyos “pinaagi sa kaputli, kahibalo, pagkamainantoson, kalulot, pinaagi sa balaang espiritu, sa gugma nga dili salingkapaw.”—2 Corinto 6:4-6.
Matuod, gipakasama usahay sa Bibliya ang balaang espiritu ngadto sa tawo. Pananglitan, si Isaias miingon nga ang pipila ka mga rebelde ‘nagpaguol sa balaang espiritu sa Diyos.’ (Isaias 63:10) Si Pablo miingon nga kini ‘nagmasulob-on.’ (Efeso 4:30) Ug daghang mga teksto ang nag-ingon nga ang balaang espiritu nagtudlo, nag-agak, nagsulti, ug nagpamatuod. (Juan 14:26; 16:13, 14; 1 Juan 5:7, 8) Apan gipakasama usab sa Bibliya ang balaang espiritu ngadto sa ubang dili buhing mga butang, sama sa kaalam, kamatayon, ug sala. (Proverbio 1:20; Roma 5:17, 21) Kini sa pagkamatuod usa ka tin-aw nga paagi nga ang Kasulatan usahay nagpahayag sa mga butang.
Karong adlawa, kita naghisgot sa Bibliya diha sa samang paagi sa dihang kita moingon nga kini naghisgot sa usa ka butang o nagtudlo sa usa ka doktrina. Sa paggamit sa maong mga ekspresyon, wala nato ipasabot nga ang Bibliya maoy usa ka persona, dili ba? Wala usab ang Bibliya magpasabot nga ang balaang espiritu maoy usa ka persona sa dihang kini migamit sa susamang mga ekspresyon.
Nan, unsa man diay ang balaang espiritu? Kini dili usa ka persona. Hinunoa, kini maoy kaugalingong aktibong puwersa sa Diyos, nga gigamit niya sa pagtuman sa iyang kabubut-on. (Genesis 1:2) Apan sa unsang paagi ang atong mga kinabuhi naapektahan sa balaang espiritu? Ug sa unsang paagi kita sa personal makabenepisyo ug dugang gikan sa kalihokan niini?