Kon sa Unsang Paagi ang Espiritu sa Diyos Nakaapektar Kanimo

“SA SINUGDAN gilalang sa Diyos ang mga langit ug ang yuta. Ang yuta awaaw ug walay sulod, ug ang kangitngit diha sa ibabaw sa nawong sa kahiladman; ug ang Espiritu sa Diyos nagalihok ibabaw sa nawong sa mga tubig.” (Genesis 1:1, 2, Revised Standard Version) Kining pulonga sa Kasulatan nagpasiugda sa talagsaong paagi nga ang matag usa nga buhi nakabatog kaayohan gikan sa balaang espiritu. Kana nga espiritu aktibo panahon sa paglalang, ug salamat sa kalihokan niini, ang yuta nahimong makapahimuot nga pinuy-anan alang sa katawhan.

Apan ang katawhan makabenepisyo pa ug dako gikan sa balaang espiritu. Ang usa ka dinasig nga sanglitanan miingon: “Bumalik kamo sa akong pagbadlong. Igabubo ko unya kaninyo ang akong espiritu; akong ipahibalo kaninyo ang akong mga pulong.” (Proverbio 1:23) Sa atong adlaw ang nakolektang “mga pulong” sa Diyos mabatonan diha sa Balaang Bibliya, gisulat sa mga tawo kinsa “dinasig sa balaang espiritu.” (2 Pedro 1:21; Marcos 12:36; 2 Timoteo 3:16) Sa dihang basahon sa mapaubsanong tawo ang Bibliya, siya makabatog kaayohan gikan sa balaang espiritu.

Balaang Espiritu ug ang Buluhatong Pagsangyaw

Sa dihang ang usa sa mga Saksi ni Jehova moduaw sa imong balay sa paghisgot mahitungod sa maayong balita sa Gingharian, ang balaang espiritu makaapektar sa imong kinabuhi sa laing paagi. Sa unsang paagi kita masayod niana? Bueno, sa dihang si Jesu-Kristo misugod sa pagsangyaw sa maayong balita, iyang gipadapat sa iyang kaugalingon ang mga pulong sa propetang si Isaias, sa pag-ingon: “Ang espiritu ni Jehova ania sa ibabaw kanako, tungod kay siya nagadihog kanako sa pagmantala sa maayong balita ngadto sa mga kabos, . . . sa pagsangyaw sa dalawatong tuig ni Jehova.” (Lucas 4:18, 19; Isaias 61:1, 2) Oo, si Jesus gidihogan sa balaang espiritu sa pagsangyaw sa maayong balita.

Dugang pa, gitagna ni Jesus nga ang pagsangyaw sa maayong balita magpadayon human sa iyang kamatayon. Siya nagtagna: “Kining maayong balita sa gingharian igamantala ngadto sa tanang ginapuy-ang yuta alang sa pagpamatuod ngadto sa tanang kanasoran; ug unya moabot ang kataposan.” (Mateo 24:14) Sa hamubo nga panahon una pa misaka si Jesus sa langit, iyang gihatag ngadto sa iyang mga sumusunod kining sugoa: “Panglakaw kamo . . . ug himoa ninyong mga tinun-an ang katawhan sa tanang kanasoran, magabawtismo kanila diha sa ngalan sa Amahan ug sa Anak ug sa balaang espiritu, magtudlo kanila sa pagtuman sa tanang mga butang nga gisugo ko kaninyo.” (Mateo 28:19, 20) Busa, human sa pagkayab ni Kristo sa langit, ang iyang mga tinun-an nagdala sa ginamhan sa espiritu nga buluhaton sa pagsangyaw ug pagpanudlo. Ang mga Saksi ni Jehova karong adlawa misundog niadtong unang mga tinun-an diha sa pagsangyaw sa maayong balita sa tibuok nga yuta.

Bawtismo ug ang Balaang Espiritu

Sa dihang ang indibiduwal mosanong nga paborable sa maayong balita, si Jesus miingon nga siya angayng bawtismohan “sa ngalan sa Amahan ug sa Anak ug sa balaang espiritu.” Busa ang bag-ong mga tinun-an maapektahan ug dugang sa balaang espiritu. Ang ekspresyon “sa ngalan” sa pagkamatuod nagpasabot “pinaagi sa awtoridad” o “pag-ila sa posisyon.”a Busa, ang pagkamabawtismohan sa ngalan sa Amahan nagpasabot sa pagdawat nga walay pagduhaduha sa pagkasoberano sa Diyos diha sa atong mga kinabuhi. Ang bawtismo sa ngalan sa Anak nagpasabot sa pagdawat kang Jesus ingong Manunubos, Sumbanan, ug Hari. Ug ang bawtismo sa ngalan sa balaang espiritu naglakip sa pagsalig diha sa espiritu ug magpasakop sa gahom niini.b

Ang Balaang Espiritu Diha sa Imong Kinabuhi

Makapasubo, ang pagkamalimbongon, imoralidad, kabangisan, ug pagkadaotan sa katibuk-an nga atong makita diha sa “Kristohanon” nga kayutaan nagpanghimakak sa kamatuoran nga kadaghanan niadtong nagaangkong mga Kristohanon sa pagkamatuod misuki sa balaang espiritu. Apan kadtong kinsa nagpasakop ngadto niini gipanalanginan ug dako. Sa usa ka butang, gisabot nila ug maayo ang ilang nabasa sa dinasig-espiritu nga Bibliya ug gipadapat kini diha sa ilang mga kinabuhi. Busa, sila nakabaton ug kaalam, pagsabot, paghukom, kaabtik, kahibalo, ug katakos sa pangisip. (Proverbio 1:1-4) Kini maoy bililhong mga kabtangan sa atong malisod nga mga panahon.

Ang balaang espiritu motabang usab sa maong mga indibiduwal nga masulbad ang malisod nga mga suliran. Sa karaang mga panahon, gipakita sa Diyos sa iyang katawhan kon sa unsang paagi matuman nila ang malisod kaayo nga tahas. Si Jehova miingon nga kini mahimo “dili pinaagi sa militaryong kusog, ni sa gahom, kondili pinaagi sa [iyang] espiritu.” (Zacarias 4:6) Kon kita magpasakop ngadto sa Diyos ug sa iyang espiritu, kita usab matabangan nga mapalampos ang atong mga tahas ug mabuntog ang mga babag nga sa ingon bug-at ra kaayo alang kanato.​—Mateo 6:33; Filipos 4:13.

Dugang pa, ang espiritu sa Diyos motabang kanato nga mapahimuslan ang usa ka kagawasan nga wala hisayri sa kinabag-an sa kalibotan. Si apostol Pablo misulat: “Diin atua ang espiritu ni Jehova, adunay kagawasan.” (2 Corinto 3:17) Kadtong magpasakop sa espiritu sa Diyos makapahimulos sa kagawasan gikan sa bakak nga relihiyon, patuotuo, kahadlok sa umaabot, ug daghan pang ubang nagaulipong mga butang. Ang espiritu sa Diyos sa pagkamatuod maoy usa ka gahom alang sa kaayohan! Kini gani makausab sa mga tawo. Ang Bibliya naghisgot niini sa dihang kini miingon: “Ang mga bunga sa espiritu maoy gugma, kalipay, kalinaw, pagkamainantoson, kalulot, pagkamaayo, pagtuo, kaaghop, pagpugong sa kaugalingon. Sa maong mga butang walay kasugoan nga kabatok.” (Galacia 5:22, 23) Pagkalahi niining kalibotana unya kon ang matag usa mopahiuyon sa impluwensiya sa espiritu sa Diyos!

Ingong usa ka grupo, ang tinuod nga mga Kristohanon usab nakapahimulos “sa pagkausa sa espiritu diha sa makapahiusang bugkos sa kalinaw.” (Efeso 4:3) Ang panaghiusa ug kalinaw maoy nihit nga mga manggad karong adlawa. Apan sila naglungtad diin ang espiritu sa Diyos aktibo. Sa pagkamatuod, taliwala sa mga Saksi ni Jehova ang makapahiusang bugkos sa balaang espiritu nagdala sa mga tawo sa tanang rasa, pinulongan, ug mga nasyonalidad ngadto sa usa ka tinuod “kapunongan sa mga igsoon.”​—1 Pedro 2:17.

Ang Espiritu sa Diyos ug Ikaw

Nakita ba nimo ang kaayohan sa hinatag-Diyos nga kaalam ug sa pagpahimulos sa matuod nga kagawasan? Dili ba labing maayo nga adunay balaang tabang sa pagsulbad sa mga suliran ug sa pag-ugmad sa gugma, kalipay, kalinaw, pagkamainantoson, kalulot, pagkamaayo, pagtuo, kaaghop, pagpugong sa kaugalingon? Nan pagpasakop sa gahom sa balaang espiritu sa Diyos. Apan sa unsang paagi himoon kini sa usa ka tawo?

Pasagding ang Pulong sa Diyos, ang Bibliya, magaempluwensiya sa imong hunahuna ug kasingkasing. Pakig-uban niadtong kinsa nagtugot sa balaang espiritu nga makaempluwensiya sa ilang mga kinabuhi. Lihok na karon sa pagkat-on ug sa pagbuhat sa balaang kabubut-on. Unya, “hinaot ang Diyos nga nagahatag ug paglaom magapuno kanimo uban ang tumang kalipay ug kalinaw pinaagi sa imong pagtuo, nga ikaw unta magmadagayaon sa paglaom uban sa gahom sa balaang espiritu.”​—Roma 15:13.

[Mga footnote]