Sa Unsang Paagi Mahibaloan Mo Pag-ayo ang Bibliya?
‘Ang basahon ni Thomas? Segurado, kana ang Bibliya. Apan ang basahon ni Jonas dili. Ang dapit nga natawhan ni Kristo? Oh, kana ang Jerusalem—o dili ba Nazareth? Ako dili kaayo segurado kon ang basahon ni Isaias maoy una o ikaduhang bahin sa Bibliya. Pila ba ka buok ang mga apostol? Ako wala gayod mahibalo.’
“KINI nga pakisusi dili kaayo ikatingala kon ang kasayoran gikuha pa taliwala sa mga dili-Kristohanon,” nag-ingon ang magasing Christianity Today. “Ang katingalahan—ug makatugaw—mao ang gidak-on sa kawalay alamag sa Kasulatan nga makita taliwala sa mga Kristohanong born-again.”
Pananglitan, ang gisurbing 22 porsiento sa gitawag mga Kristohanon nagtuo nga adunay basahon gayod si Thomas sa Bibliya, samtang 13 porsiento ang dili segurado. Bahin kang Jonas, 27 porsiento ang nag-ingon nga kini wala sa Bibliya, ug 12 porsiento ang walay ideya. Unom ka porsiento ang dili gani makapanaghap kon diin si Kristo matawo, samtang 16 porsiento ang nag-ingon nga sa Jerusalem, ug 8 porsiento ang miingon nga kadto sa Nazareth. Ang bug-os 13 porsiento ang walay ideya kon diin makita ang basahon ni Isaias diha sa Bibliya, samtang 11 porsiento ang nag-ingon nga kini anaa sa Kristohanong Gregong Kasulatan (“Bag-ong Testamento”). Ug samtang daghan ang nahibalo nga adunay 12 ka mga apostol, 12 porsiento ang mihatag ug laing gidaghanon, gikan sa 2 ngadto sa kapin ug 20, ug 10 porsiento ang walay ideya gayod.
Ang laing pangutana nga nakatugaw pag-ayo maoy kon kaha ang ekspresyong “God Helps those who help themselves” o ang Diyos motabang niadtong kinsa nagatabang sa ilang kaugalingon maoy anaa sa Bibliya o wala. Mga 38 porsiento lamang sa “mga Kristohanon” ang gisurbing nahibalo nga kini wala sa Bibliya, samtang ang mas daghan, 42 porsiento, ang nagtuo nga kini maoy usa ka kinutlo sa Bibliya. Ang nahibilin wala mahibalo.
“Nganong adunay dako kaayong pagkawalay hibangkaagan bahin sa Bibliya?” nangutana ang Christianity Today. “Malagmit gayod, tungod kini sa pagkadili-himasa sa Bibliya. Katunga sa tanang mga Amerikano ang wala magabasa ug Bibliya. Ang mayoriya sa tanang born-again nga mga Kristohanon nagbasa sa Bibliya kas-a o kaduha sa usa ka semana, o wala gayod. Dili ikatingala nga daghan kaayong mga Kristohanon ang diyutay ra kaayog nahibaloan bahin sa Kasulatan!”