Magmaandam Alang sa Adlaw ni Jehova!
Mga Pangunang Punto Gikan sa Unang Tesalonica
ANG adlaw ni Jehova! Ang mga Kristohanong sa karaang Tesalonica nagtuo nga kana nadayag na. Husto ba sila? Kanus-a ba kini moabot? Kana mao ang usa sa hinungdanong butang nga gitumong ni apostol Pablo sa iyang unang sulat ngadto sa mga taga Tesalonica, nga gipadala gikan sa Corinto sa mga tuig 50 sa atong Kumon nga Panahon.
Si Pablo ug Silas nagtukod sa kongregasyon sa Tesalonica, ang administratibong kaulohan sa Romanong lalawigan sa Macedonia. (Buhat 17:1-4) Sa ulahi, sa iyang unang sulat ngadto sa mga taga Tesalonica, si Pablo mitanyag ug komendasyon, mihatag ug tambag, ug nagbatbat sa adlaw ni Jehova. Kita usab makabenepisyo niining sulata, ilabina nga ang adlaw ni Jehova karon haduol na kaayo.
Dayega ug Dasiga
Una gidayeg ni Pablo ang mga taga Tesalonica. (1Te 1:1-10) Gidayeg tungod sa ilang matinumanong buhat ug paglahutay. Dalayegon, usab, nga ilang “gidawat ang pulong ilalom sa daghang kasakitan uban ang kalipay sa balaang espiritu.” Gidayeg mo ba ang uban, sama sa gibuhat ni Pablo?
Ang apostol nagpahimutang ug usa ka maayong panig-ingnan. (2:1-12) Bisan pa sa mabiaybiayong pagtagad sa Filipos, iyang ‘napakigbisogan ang kaisog pinaagi sa Diyos sa pagsulti sa maayong balita’ ngadto sa mga taga Tesalonica. Iyang gilikayan ang pag-ulog-ulog, kadalo, ug pagpangita sa kabantog. Si Pablo dili usa ka palas-anon apan maoy maluluton ngadto kanila sama sa usa ka nagapasuso nga inahan ngadto sa iyang anak. Pagkamaayong panig-ingnan alang sa mga ansiano karong adlawa!
Ang sunod nga mga pulong ni Pablo nagdasig sa mga taga Tesalonica nga magpabiling malig-on sa dihang ginalutos. (2:13–3:13) Ilang giantos ang paglutos sa ilang mga tagilungsod, ug si Timoteo nagdala kang Pablo ug usa ka maayong taho bahin sa ilang espirituwal nga kahimtang. Ang apostol nag-ampo nga sila unta modagaya diha sa gugma ug nga ang ilang mga kasingkasing mamalig-on. Sa susama, ang mga Saksi ni Jehova karon mag-ampo alang sa ginalutos nga mga isigkamagtutuo, magdasig kanila kon posible, ug malipay sa mga taho sa ilang pagkamatinumanon.
Pagpabiling Nagatukaw sa Espirituwal!
Ang mga taga Tesalonica sunod nakadawat ug tambag. (4:1-18) Sila bug-os nga magalakaw diha sa usa ka dalan nga makapahimuot sa Diyos, magapasundayag nga labaw pa sa inigsoong gugma ug magatrabaho aron matagan-an ang ilang mga panginahanglan. Dugang pa, ilang lipayon ang usag usa uban sa paglaom nga sa presensiya ni Kristo ang inanak sa espiritu nga mga magtutuo kinsa namatay pagabangonon nga una ug mahiusa uban kaniya. Human niana, ang nahibiling mga dinihogan diha sa ilang kamatayon ug pagkabanhaw moduyog kang Kristo ug niadtong kinsa nabanhaw na ngadto sa langitnong kinabuhi.
Sunod gibatbat ni Pablo ang adlaw ni Jehova ug nagtanyag ug dugang tambag. (5:1-28) Ang adlaw ni Jehova moabot sama sa usa ka kawatan, uban ang kalit tinong kalaglagan human sa ilang pagsinggit: “Kalinaw ug Kasegurohan!” Busa ang mga taga Tesalonica magpabiling managtukaw sa espirituwal, nga napanalipdan sa kotamaya sa pagtuo ug gugma ug pinaagi sa paglaom sa kaluwasan ingong usa ka salokot. Sila angay nga adunay halalom nga pagtahod niadtong nagadumala sa kongregasyon ug magalikay sa pagkadaotan, nga angay usab natong buhaton.
Ang unang sulat ni Pablo ngadto sa mga taga Tesalonica angayng mag-agda kanato sa paghatag komendasyon ug pagdasig ngadto sa isigkamagtutuo. Kini usab motukmod kanato nga mahimong panig-ingnan sa paggawi ug tinamdan. Ug sa pagkamatuod ang tambag niini motabang kanato nga magmaandam alang sa adlaw ni Jehova.
[Kahon/Hulagway sa panid 22]
Ang Kotamaya ug ang Salokot: Giagda nga managtukaw sa espirituwal, si Pablo misulat: “Kita magmaigmat ug batonan ang kotamaya sa pagtuo ug gugma ug ingong usa ka salokot ang paglaom sa kaluwasan.” (1 Tesalonica 5:8) Ang usa ka kotamaya maoy usa ka panagang sa dughan sa usa ka manggugubat, nga hinimo sa mga himbis, kadena, o solidong puthaw. Sa susama, ang kotamaya sa pagtuo nanalipod kanato sa espirituwal. Ug komosta ang karaang salokot? Kasagarang hinimo sa puthaw, kini maoy usa ka kalo sa militar nga gidesinyo sa pagpanalipod sa usa ka manggugubat sa panahon sa gubat. Sama sa salokot nga nanalipod sa ulo sa usa ka manggugubat, sa ingon ang paglaom sa kaluwasan nanalipod sa mga gahom sa hunahuna, busa magpaarang sa usa ka Kristohanon nga mahuptan ang pagkamaunongon. Pagkahinungdanon nga ang katawhan ni Jehova magsul-ob nianang maong espirituwal nga hinagiban!—Efeso 6:11-17.