Hupti ang Pagtuo ug Usa ka Maayong Tanlag
Mga Pangunang Punto sa Unang Timoteo
SA MGA tuig 56 K.P., si apostol Pablo nagpasidaan sa mga ansiano sa kongregasyon sa Efeso nga ang “malupigong mga lubo” motungha taliwala kanila ug “magasultig tinuis nga mga butang sa pagkuhag mga tinun-an sa ilang kaugalingon.” (Buhat 20:29, 30) Sa pipila lang ka tuig, ang apostatang pagtulon-an nahimong grabe na kaayo nga si Pablo nag-agda kang Timoteo nga makigbisog sa espirituwal nga pakig-away sulod sa kongregasyon aron mahuptan ang kaputli niini ug tabangan ang isigkamagtutuo nga magpabilin diha sa pagtuo. Kana maoy pangunang hinungdan kon nganong gisulat ni Pablo ang iyang unang sulat ngadto kang Timoteo gikan sa Macedonia sa mga 61-64 K.P.
Si Timoteo gitudloan mahitungod sa mga katungdanan sa mga ansiano, ang tinudlo sa Diyos nga dapit sa mga babaye, kuwalipikasyon sa mga ansiano ug ministeryal nga mga alagad, ug uban pa nga mga butang. Ang maong instruksiyon bililhon usab karong adlawa.
Tambag sa Pagtuo
Si Pablo nagbukas uban sa tambag nga huptan ang pagtuo ug usa ka maayong tanlag. (1:1-20) Iyang gidasig si Timoteo nga magpabilin sa Efeso ug “tambagan ang matag usa nga dili magtudlo ug laing doktrina.” Si Pablo mapasalamaton alang sa ministeryo nga gitugyan nganha kaniya, miangkon nga siya milihok nga walay hibangkaagan ug uban sa kakulang ug pagtuo nga iyang gilutos ang mga sumusunod ni Jesus. Ang apostol nagdasig kang Timoteo nga magpadayon sa pakigbisog sa espirituwal nga pakig-away, “huptan ang pagtuo ug usa ka maayong tanlag” ug dili mahisama niadtong kinsa “nakasinatig pagkalunod sa ilang pagtuo.”
Tambag sa Pagsimba
Sunod, si Pablo naghatag ug tambag ingong “usa ka magtutudlo sa mga nasod maylabot sa pagtuo ug kamatuoran.” (2:1-15) Ang mga pag-ampo pagahimoon alang niadtong anaa sa hataas nga katungdanan sa kagamhanan aron nga ang mga Kristohanon magapuyong malinawon. Kini maoy kabubut-on sa Diyos nga ang tanang matang sa mga tawo mamaluwas, ug ang usa ka hinungdanong pagtulon-an mao nga si Kristo “nagtugyan sa iyang kaugalingon nga usa ka katumbas nga lukat alang sa tanan.” Gipakita ni Pablo nga ang usa ka babaye magpatahom sa iyang kaugalingon uban ang kaugdang ug kinahanglang dili magamando ibabaw sa usa ka lalaki.
Ang kongregasyon kinahanglang maayong pagkaorganisar. (3:1-16) Busa gipahimutang ni Pablo ang mga kuwalipikasyon alang sa mga magtatan-aw ug sa ministeryal nga mga alagad. Gikan sa mga butang nga gisulat sa apostol, angay nga mahibalo si Timoteo kon unsaon sa paggawi sa iyang kaugalingon sulod sa kongregasyon, “usa ka haligi ug panalipod sa kamatuoran.”
Si Pablo naghatag kang Timoteo ug personal nga tambag sa pagtabang kaniya nga magbantay batok sa bakak nga pagtulon-an. (4:1-16) Sa ulahing kapanahonan ang pipila mangahulog gikan sa pagtuo. Pinaagi sa pagtagad kanunay sa iyang kaugalingon ug sa iyang pagpanudlo, si Timoteo ‘magaluwas sa iyang kaugalingon ug niadtong nagapatalinghog kaniya.’
Si Timoteo usab nakadawat ug tambag sa pagpakiglabot uban sa mga indibiduwal, batan-on ug edaran. (5:1-25) Pananglitan, ang nahiangay nga mga tagana pagahimoon alang sa mga balo nga may maayo Kristohanong reputasyon. Inay nga manabi, ang batan-ong mga balo kinahanglang magminyo ug manganak. Ang mga ansiano nga nagadumala sa maayong paagi pagaisipon nga takos sa dobleng kadungganan.
Diyosnong Debosyon Uban ang Pagbati sa Katagbaw
Ang tambag sa diyosnong debosyon nagtapos sa sulat ni Pablo. (6:1-21) Ang “diyosnong debosyon uban ang pagbati sa katagbaw” maoy usa ka paagi sa dakong ganansiya, apan ang maikagon nga mahimong dato motultol ngadto sa kalaglagan ug kagun-oban. Giagda ni Pablo si Timoteo nga makigbugno sa maayong pakigbugno sa pagtuo ug ‘hugot nga mangupot sa kinabuhing walay kataposan.’ Aron mahuptan ang maong tinuod nga kinabuhi, ang adunahan angayng “magasandig sa ilang paglaom, dili sa walay kasegurohang mga bahandi, kondili sa Diyos.”
[Kahon/Hulagway on page 30]
Maluwas Pinaagi sa Pagpanganak: Si Pablo wala maghisgot sa kaluwasan ngadto sa kinabuhing dayon apan sa hustong papel sa usa ka diyosnong babaye sa dihang siya misulat: “Siya unya maluwas pinaagi sa pagpanganak, basta sila magpadayon diha sa pagtuo ug gugma ug pagkabalaan duyog sa maayong panghunahuna.” (1 Timoteo 2:11-15) Pinaagi sa pagpanganak, pag-atiman sa iyang mga anak, ug sa pagdumala sa panimalay, ang usa ka babaye “mamaluwas” gikan sa pagkahimong tabian ug mahilabtanon sa mga kalihokan sa uban. (1 Timoteo 5:11-15) Ang iyang mga buluhaton sa balay moabag sa iyang pag-alagad ngadto kang Jehova. Siyempre, ang tanang mga Kristohanon kinahanglang magbantay sa ilang paggawi ug sa maalamon magagamit sa ilang panahon.—Efeso 5:15, 16.