Mga Pangutana Gikan sa mga Magbabasa

◼ Ang Job 33:24 naghisgot sa “usa ka lukat” nga nakaplagan alang kang Job, nga maglikay kaniya sa kamatayon. Kinsa man unta ang maong lukat alang kang Job?

Walay halad nga lukat sa tawo ang gitanyag alang kang Job balik niadto, apan ang Diyos nagtabon, o nagpasaylo, sa kasaypanan ni Job.

Si Satanas ang nagpahinabo sa daghang mga kaguol ni Job, lakip na ang “sanla gikan sa lapalapa sa iyang mga tiil ngadto sa alipudhan sa iyang ulo.” Ang kahimtang ni Job grabe kaayo nga ang iyang asawa nag-agda kaniya sa “pagpasipala sa Diyos ug magpakamatay.” Bisan si Job namalandong kon kaha ang kamatayon mas maayo pa kay sa maong pag-antos.​—Job 2:7-9; 3:11.

Sa dihang mopatim-aw nga si Job tingali mamatay, gitimbang ni Elihu ang malisorong kahimtang ni Job ug nagpahimutang sa pasikaranan alang sa paglaom, sa pag-ingon: “Ang iyang unod naut-ot na nga dili makita . . . Ug ang iyang kalag nagpaduol na ngadto sa gahong, ug ang iyang kinabuhi ngadto sa mga manlalaglag. Kon kaniya adunay motungha nga mensahero, usa ka tigpamaba, usa gikan sa usa ka libo, sa pagpadayag kaniya sa iyang pagkamatarong, nan siya mapuangoron kaniya ug magaingon, ‘Luwasa siya gikan sa gahong! Nakakaplag ako ug usa ka lukat! Himoa nga ang iyang unod mabag-o sama sa unod sa bata.’”​—Job 33:21-25.

Kita nasayod nga gitugyan ni Jesu-Kristo ang iyang hingpit tawhanong kinabuhi nga usa ka katumbas nga lukat alang sa dili hingpit nga katawhan. Ang iyang halad katumbas sa giwala ni Adan, nagbayad sa gikinahanglang bili aron mahigawas gikan sa sala. (Roma 5:12-19; 1 Timoteo 2:5, 6) Apan, kini dili mao lamang ang bugtong paggamit sa “lukat” sa Bibliya. Ang Hebreohanong pulong nga makita sa Job 33:24 sa paninugdan nagkahulogang “pagtabon.” (Exodo 25:17) Sa dihang ang Diyos nakiglabot sa karaang Israel, siya may kahikayan sa pagtabon, o paglukat alang, sa mga sala​—mga halad nga magtabon sa sala, sa pagtul-id sa mga butang tali sa tawo ug sa Diyos.​—Exodo 29:36; Levitico 16:11, 15, 16; 17:11.

Sa mas sayo pa, hinunoa, ang Diyos andam sa pagdawat sa mga halad ingong kapahayagan sa mga pagpasalamat o mga pangamuyo alang sa kapasayloan ug pag-uyon. (Genesis 4:3, 4; 8:20, 21; 12:7; 31:54) Nasabtan ni Job ang bili sa maong mga halad. Atong mabasa: “Siya mimata ug sayo ug nagtanyag ug mga halad nga sinunog sumala sa gidaghanon sa tanan [niyang mga anak]; tungod kay, matud ni Job, ‘tingali ang akong mga anak nakasala ug nagpasipala sa Diyos diha sa ilang mga kasingkasing.’ Mao kana ang gibuhat kanunay ni Job.” (Job 1:5) Sanglit siya naningkamot sa pagpahimuot sa Diyos ug dayag adunay usa ka mahinulsolong espiritu, ang iyang mga halad bililhon sa mga mata sa Diyos.​—Salmo 32:1, 2; 51:17.

Apan si Job sa ulahi nag-antos sa sakit nga maorag naghulga sa iyang kinabuhi. Siya usab may sayop nga panglantaw sa iyang pagkamatarong, busa iyang gikinahanglan ang pagtul-id, nga gitagana niadto ni Elihu. (Job 32:6; 33:8-12; 35:2-4) Si Elihu miingon nga si Job dili na angayng magguol pa hangtod sa iyang kamatayon ug sa gahong (Sheol, o ang kumon nga lubnganan). Kon si Job maghinulsol, ang “usa ka lukat” makaplagan.​—Job 33:24-28.

Dili nato angayng hunahunaon nga ang “lukat” nga gipasabot ni Elihu maoy usa ka tawo nga niadto mamatay alang kang Job. Tungod sa mga halad nga naandang gitanyag sa matuod nga mga magsisimba, ang matang sa lukat nga gipasabot ni Elihu diha sa kaso ni Job hayan maoy usa ka halad nga hayop. Makaiikag, sa ulahi giingnan sa Diyos ang tulo ka hinawayong mga kauban ni Job: “Kamo kinahanglang magtanyag ug usa ka halad nga sinunog alang kaninyo; ug si Job nga akong alagad mag-ampo alang kaninyo.” (Job 42:8) Bisan unsang matanga pa sa lukat, ang pangunang tumong ni Elihu mao nga matabonan ang kasaypanan ni Job ug makasinatig maayong mga sangpotanan.

Kana mao ang nahitabo. Si Job ‘naghinulsol sa abog ug abo.’ Nan komosta man? “Gipasig-uli ni Jehova mismo ang kanhing kahimtang ni Job . . . Alang kang Jehova, iyang gipanalanginan ang ulahing mga adlaw ni Job nga mas labaw pa kay sa sinugdan . . . Ug si Job nabuhing padayon human niini sa usa ka gatos ug kuwarenta ka tuig ug nakakita sa iyang mga anak nga lalaki ug sa iyang mga apo nga lalaki​—sa upat ka kaliwatan.” Tugotan nato, ang lukat wala magpahigawas kang Job gikan sa sala, busa sa ngadto-ngadto siya namatay. Apan, ang paglugway sa iyang kinabuhi nagpamatuod nga, sa epektibo nga paagi, ‘ang iyang unod nabag-o kay sa unod sa bata, ug siya nahibalik sa mga adlaw sa iyang kabataan.’​—Job 33:25; 42:6, 10-17.

Kadto nga mga panalangin nga mitungha gikan sa pagpadapat sa usa ka limitadong lukat alang kang Job nagsilbing usa ka pasiuna sa dagayang mga panalangin nga moabot sa nagatuong katawhan sa bag-ong kalibotan. Unya, ang bug-os nga kaayohan gikan sa halad lukat ni Jesus mabatonan, magkuha sa walay kataposan sa malaglagong mga epekto sa kasal-anan ug pagkadili-hingpit. Pagkadako sa katarongan unya nga kita “managsinggit sa kalipay,” ingon sa ginahisgotan ni Elihu!—Job 33:26.