Pagpangita sa Katawhan sa Diyos

NGANONG kita, ingong mga Saksi ni Jehova, gihatagan man ug “putling pinulongan”? Sa pagkamatuod, dili aron tipigan kini sa atong kaugalingon. Ug dili aron mapahimuslan nato ang hamugawayng pagkinabuhi nga susama sa masayon, mokompromisong paggawi sa Kakristiyanohan. Hinunoa, kini maoy aron ‘ang tanan makatawag sa ngalan ni Jehova, aron sa pag-alagad kaniya abaga sa abaga.’ (Sofonias 3:9) Oo, ang putling pinulongan naglangkit sa buluhaton nga duyog sa atong minilyong Kristohanong mga igsoong lalaki ug mga babaye—gikan sa tanang rasa, mga nasod, ug mga pinulongan—​nga matinumanong nagawali sa maayong balita una pa moabot ang kataposan.​—Marcos 13:10; Roma 13:11; Pinadayag 14:6, 7.

Ang atong pagwali karong adlawa usahay mopresentar ug talagsaong mga hagit. Ngano man kana? Panahon niining ika-20ng siglo, may mga pagbalhin sa panon sa mga tawo ingong resulta sa mga gubat, pagpanglupig, kalisdanan sa pangabuhi, ug tungod sa ubang hinungdan. Ingong usa ka sangpotanan, ang mga tawo sa daghang pinulongan ug mga relihiyon namalhin ngadto sa mga kultura nga lahi sa ilaha. Busa, ang dagkong mga pundok sa mga Hindu, mga Buddhista, ug mga Muslim namalhin ngadto sa Kasadpanhong kalibotan. Samtang kita makig-ambit sa putling pinulongan sa balay-balay, atong mahibalag kining mga tawhana. Usahay kita malibog tungod kay diyutay kaayo ang atong nasayran bahin sa ilang relihiyosong kagikan. Unsay mahimo nato niana?​—Itandi ang Buhat 2:5-11.

Sa unsang paagi ikapaambit nato ang kamatuoran sa usa ka Muslim o usa ka Hudiyo? Sa unsang paagi sila lahi ang usa gikan sa usa? Unsa gayoy gituohan sa usa ka Hindu? Nganong nagsul-ob ug mga turbante ang mga Sikh? Unsa ang ilang balaang basahon? Sa unsang paagi ang usa ka Buddhista lahi gikan sa usa ka Hindu? Unsay gituohan sa Hapones nga mga Shintoista? Ang Insek nga mga Taoista o Confucianista nagtuo bag Diyos?a Sa unsang paagi ang Ortodoksong Hudiyo lahi sa usa ka Repormadong Hudiyo o Konserbatibong Hudiyo? Aron maabot kining nagkadaiyang mga tawo, una sa tanan kinahanglang sabton nato ang ilang punto de vista ug dayon sayron kon unsaon sa pagtultol kanila sa maluluton ug mataktikanhong paagi ngadto sa matuod nga Diyos, si Jehova.—Buhat 17:22, 23; 1 Corinto 9:19-23; Colosas 4:6.

Aron tabangan kita nga makabaton ug mas tin-awng pagsabot sa ubang mga relihiyon, ilang mga pagtulon-an, ug ilang kasaysayan, giluwatan sa Watch Tower Society sa tibuok kalibotan panahon sa 1990 “Putling Pinulongan” nga mga Kombensiyon ang usa ka bag-ong basahon nga nag-ulohang Pagpangita sa Katawhan sa Diyos. Kay nasangkapan niining instrumentoha, kita mas makawali ngadto sa mga tawo sa dili-Kristohanong kalibotan ingon man ngadto sa mga tawo sa Kakristiyanohan.

Usa ka Praktikal nga Instrumento

Kining 384-panid nga basahon may 16 ka kapitulo nga nagaasoy sa pagpangita sa katawhan sa Diyos latas sa miaging unom ka libo ka tuig. Kini nagtubag sa ginatos ka pangutana mahitungod sa mga relihiyon sa kalibotan. Aniay pananglitan sa pipila kanila: Unsang mga butang ang kasagaran magtino sa relihiyon sa usa ka tawo? Nganong dili sayop ang pagsusi sa ubang mga pagtuo? Unsay mga kaamgiran tali sa Romano Katolisismo ug Buddhismo? Unsay bahin sa mga kasugiran diha sa daghang relihiyon? Nganong daghang tawo motuo sa salamangka, espiritismo, ug astrolohiya? Nganong ang mga Hindu daghan kaayog mga diyos ug mga diyosa? Sa unsang paagi ang mga Sikh lahi sa mga Hindu? Kinsa si Buddha, ug unsay iyang gitudlo? Nganong ang Shinto maoy sa panguna usa ka Hapones nga relihiyon? Nganong ang mga Hudiyo dunay binaba ingon man sinulat nga kasugoan? Sa unsang paagi nahibalo kita nga si Kristo dili usa ka kasugiran? Sa unsang paagi ang Koran lahi sa Bibliya? Nganong ang mga Katoliko nag-ingon nga si Pedro mao ang unang papa? Nganong ang Katolikong pari si Luther mibulag sa Iglesya Romana Katolika?

Ang mga pangutana maoy halos dili matapos, ug kining basahona nasudlan sa mga pangutana aron kita mas epektibong makawali ngadto sa mga tawong nagbaton niining lainlaing relihiyosong kagikan. Giila sa basahon nga daghang tawo nagbaton sa ilang kaugalingong relihiyon ug ang relihiyon maoy personal kaayong butang. Bisan pa niana, sa panid 8, kini nag-ingon: “Halos sukad sa pagkatawo ang relihiyoso o etikal nga mga ideya gitanom diha sa atong kaisipan pinaagi sa atong mga ginikanan ug mga paryente. Ingong sangpotanan, kasagarang gisunod nato ang relihiyosong mga mithi sa atong mga ginikanan ug mga apohan.” Kana nagkahulogan nga “sa daghang kaso ang uban maoy nagpili sa atong relihiyon. Kini sa yano maoy usa ka butang maylabot sa kon diin kita matawo ug kon kanus-a.”​—Itandi sa Filipos 3:4-6.

Unya gipatungha sa basahon ang makataronganong pangutana. “Makataronganon ba ang pagtuo nga ang relihiyong gipahamtang sa pagkatawo sa usa mao gayod ang bug-os nga kamatuoran?” Busa, ang matag tawo gidasig sa pagsusi sa ubang mga relihiyon uban ang bukas nga kaisipan. Sumala sa gipahayag sa panid 10: “Ang pagsabot sa punto de vista sa usag usa mahimong motultol sa mas makahuloganong komunikasyon ug kabildohay tali sa katawhan sa lainlaing mga pagtuo.” Nagpadayon kini: “Tinuod, ang mga tawo tingali kusganong dili magkauyon bahin sa ilang relihiyosong mga pagtuo, apan walay pasikaranan sa pagdumot sa usa ka tawo tungod lang kay siya nagbaton ug laing punto de vista.”​—Mateo 5:43, 44.

Usa ka paninugdang pangutana nga motungha sa tibuok basahon mao, Ang tawo duna bay dili-mamatay nga kalag nga magpadayong buhi inigkamatay niya ug magpadayon sa sunod nga kinabuhi? Sa usa o laing matang, halos ang tanang relihiyon nagatudlo sa maong ideya. Sumala sa ginaingon sa Pagpangita sa Katawhan sa Diyos (panid 52): “Sa iyang pagpangita sa Diyos, ang tawo nanghawid sa dili lig-ong suportar, kay nalimbongan sa gihanduraw nga imortalidad. . . . Ang pagtuo sa imortal nga kalag o sa lainlaing mga porma niini maoy kabilin nga nahipasa kanato latas sa mga milenyo.” Ang ubang pangutana mao: May usa ba ka dapit sama sa impiyerno diin ang mga kalag pagasakiton? Unsa ang matuod nga paglaom alang sa mga patay? Aduna bay usa ka Diyos, o aduna bay daghang diyos?​—Genesis 2:7; Ezekiel 18:4.

Pasikaranan Alang sa mga Pagtuon sa Bibliya

Sa kapin kun kulang kronolohikanhong han-ay sa pagtungha niini nila sa talan-awon sa kalibotan, gihisgotan sa basahon ang pagkaugmad sa dagkong mga relihiyon sa katawhan​—Hinduismo, Buddhismo, Taoismo, Confucianismo, Shinto, Judaismo, Kristiyanidad, Kakristiyanohan, ug Islam. Sa matag kapitulo ang balaang mga basahon niining mga relihiyona gikutlo aron ang sinserong magtutuo makasusi sa mga kinutlo sa iyang kaugalingon. Alang sa kapitulo bahin sa Islam, tulo ka lainlaing Iningles nga mga hubad sa Koran ang gigamit. Ang kinabag-ohang hubad sa Jewish Publication Society sa Tanakh​—A New Translation of the Holy Scriptures gikutlo diha sa kapitulo bahin sa Judaismo.​—Itandi ang Buhat 17:28; Tito 1:12.

Unsay anaa alang sa ateyista ug agnostiko? Ang Kapitulo 14 naghisgot sa modernong dili-pagtuo sa Diyos ug kon nganong ang mga Saksi ni Jehova nahibalo nga nagalungtad ang Diyos. Sa matag kapitulo, ang magbabasa gipunting ngadto sa Bibliya. Busa, pinaagi sa paggamit niining basahona, Pagpangita sa Katawhan sa Diyos, kita mas masangkapan sa pagsugod ug mga pagtuon sa Bibliya uban sa mga tawo sa tanang pagtuo o niadtong nag-angkong walay pagtuo. Gihisgotan ang matag relihiyon sa matinahoron ug mataktikanhong paagi, apan nagpatungha kini sa mga pangutana nga mahimong motultol sa usa ka tawo ngadto kang Jehova ug sa kamatuoran. Alang niadtong maikagong nangita sa Diyos, kining basahona mahimong usa ka dakong panalangin.​—Salmo 83:18; Juan 8:31, 32; 2 Timoteo 3:16, 17.

Ang makatudlo nga mga kahon giapil diha sa matag kapitulo. Pananglitan, sa mga panid 226 ug 227, adunay usa ka kahon bahin sa “Judaismo​—Relihiyon sa Daghang Tingog” nga nagapatin-aw sa dagkong mga dibisyon nga hikaplagan sa Judaismong pagtuo. Ubos sa “Hinduismo​—Pagpangita sa Kagawasan,” adunay usa ka kahon sa mga panid 116 ug 117, “Hinduismo​—Pipila ka Diyos ug mga Diyosa.” Kini naghatag sa usa ka talaan sa pipila ra sa kapin sa 330 milyong mga diyos nga gisimba sa mga Hindu. Nagtuo ba ang mga Buddhista sa Diyos sumala sa pagsabot sa Kasadpanhong kalibotan nianang terminoha? Ang kahong “Buddhismo ug ang Diyos” sa panid 145 nagatubag nianang pangutana. Ang basahon usab may usa ka praktikal nga indice alang sa madaling reperensiya sa dagkong mga tema. Ang bibliograpiya sa pangunang mga tinubdan nga gigamit sa pagdukiduki usa usab ka pasikaranan sa dugang pagbasa kon ang usa gusto ug dugang detalye.

Ang basahon dunay kapin sa 200 ka letrato ug ilustrasyon, apan sila wala lang diha ingong adorno. Ang matag ilustrasyon dunay usa ka puntong pagtulon-an nga himoon nga dugang makapatin-aw sa relihiyong gihisgotan. Pananglitan, sa panid 238 adunay serye sa mga letrato nga nagailustrar sa pipila sa mga sambingay nga gitudlo ni Jesus. Sa laing dapit, adunay serye sa lima ka hulagway nga nagailustrar usab sa lainlaing mga bahin sa ministeryo ni Kristo​—iyang mga milagro, iyang transpigurasyon, iyang haladnong kamatayon, ug pagsugo niya sa iyang mga disipulo nga magwali sa tibuok nga kalibotan.

Sa panid 289 adunay sunodsunod nga letrato nga makapaikag sa mga Muslim. Magdala kini sa tumatan-aw ngadto sa Mecca, ngadto sa dakong moske diin anaa ang Kaaba ug dayon ngadto sa aktuwal itom nga bato nga gibalaan sa mga Muslim. Ang nagkadaiyang pagsimba sa Buddhismo giilustrar sa panid 157. Ang mga Hindu maikag sa pagtan-aw sa mga letrato sa ilang popular nga mga diyos nga si Ganesa ug Krishna sa mga panid 96 ug 117.

Ang kuwalipikadong Kristohanong mga ministro sa tibuok kalibotan gikonsulta aron makab-ot ang espesyalisadong paghisgot sa matag pangunang relihiyon. Pananglitan, ang bililhong materyal miabot gikan sa Israel alang sa mga kapitulo bahin sa Judaismo ug sa pagtuo nga Baha’i. Ang mga Saksi diha sa Muslim nga mga nasod mainampingong nagsusi sa mga unod sa kapitulo bahin sa Islam. Ang mapuslanong pagpasinati naggikan sa India bahin sa mga Hindu, mga Sikh, ug Jain. Ang mga ministro sa Oriente nagtino nga ang kapitulo bahin sa Shinto maoy husto, ug mihatag usab silag tambag bahin sa Buddhismo, Taoismo, ug Confucianismo.

Tungod sa mainampingong pagkobre sa basahon sa matag relihiyon, kadtong nagbaton niini diha sa ilang pinulongan makasugod ug mga pagtuon sa Bibliya diha sa kapitulong nahiangay sa relihiyosong kagikan sa matag tawo. Dayon basin buot nilang mobalhin ngadto sa kapitulong naghisgot sa pagtungha sa sayong Kristiyanidad ug sa mga katarongan sa pagtuo nga si Kristo mao ang matuod nga Hawas sa Diyos, ang usang gigamit sa pagdani sa katawhan ngadto sa Diyos. Adunay mga kapitulo nga magapatin-aw sa unsang paagi mitungha ang apostasiya, nga misangpot sa daghang dibisyon ug mga sekta sa Kakristiyanohan. Ang kataposang duha ka kapitulo nagapakita sa unsang paagi ang matuod nga pagsimba napasig-uli niining kataposang mga adlaw ug kon unsay anaa sa duol nga umaabot alang sa Dakong Babilonya, ang kang Satanas nga imperyo sa kalibotan sa bakak nga relihiyon. Human niana, gipasiugda ang bag-ong kalibotan ug ang paglaom sa pagkabanhaw sa Bibliya.​—Juan 5:28, 29; 12:44-46; 14:6; Pinadayag 21:1-4.

Kini sa pagkamatuod usa ka basahon nga magatabang sa daghan sa tibuok kalibotan nga masuod sa Diyos, sumala sa gipahayag ni Santiago diha sa kapitulo 4 sa iyang sulat, bersikulo 8: “Dumuol kamo sa Diyos, ug siya moduol kaninyo. Panghugas sa inyong mga kamot, kamong mga makasasala, ug putlia ang inyong mga kasingkasing, kamong mga maduhaduhaon.” Oo, sumala sa gipahayag ni Isaias: “Pangitaa ninyo si Jehova, kamong katawhan, samtang siya hikaplagan pa. Sangpita ninyo siya samtang siya haduol pa.”​—Isaias 55:6; Juan 6:44, 65.

Kitang tanan magpadayon nga moliso sa hustong direksiyon, ngadto sa Soberanong Ginoo sa uniberso, si Jehova nga Diyos. Ug sa tabang niining basahona, ang Pagpangita sa Katawhan sa Diyos, tabangan nato ang libolibo pa sa pagsimba kang Jehova “uban sa espiritu ug kamatuoran.” (Juan 4:23, 24) Hinaot kita molahutay sa pagpangita sa mga nangita sa kamatuoran ug sultihan sila bahin sa Diyos sa kamatuoran, kay, sa pagkamatuod, siya hikaplagan pa!

[Footnote]

[Mga hulagway sa panid 17]

Gipangita sa tawo ang Diyos sa daghang paagi

[Hulagway]

Ang sinserong mga Katoliko nagadangop kang Maria

[Hulagway]

Ang mga Hindu nagbalaan sa subang Ganges

[Credit Line]

Harry Burdich, Transglobe Agency, Hamburg

[Hulagway]

Ang pila ka debotadong Hudiyo nagsul-ob ug pilakteria

[Credit Line]

GPO, Jerusalem

[Hulagway]

Ang mga lalaking Muslim naghimo sa balaang pagduaw sa Mecca

[Credit Line]

Camerapix

[Hulagway]

Daghan ang nagsimba kang Buddha

[Mga hulagway sa panid 18]

Gigamit ni Jesus ang mga sambingay sa pagtabang sa mga tawo sa pagkaplag sa matuod nga Diyos

[Credit Line]

Pictorial Archive (Near Eastern History) Est.

[Credit Line]

Pictorial Archive (Near Eastern History) Est.

[Credit Line]

Pictorial Archive (Near Eastern History) Est.