Pagsugod mga Pagtuon Ginamit ang Pagpangita sa Katawhan sa Diyos
1 Si Jesus miingon, “Sa tanang kanasoran ang maayong balita kinahanglang mawali una.” (Mar. 13:10) Kini nagkahulogan nga ang iyang mga tinun-an makahibalag ug daghan lainlaing mga linguwahe ug mga relihiyon.
2 Ang atong bag-ong librong Pagpangita sa Katawhan sa Diyos moabag kanato sa pag-abot sa lainlaing mga matang sa katawhan uban sa kamatuoran. (Juan 4:21-24) Sa unsang paagi masugdan ta ang mga pagtuon ginamit kining basahona?
KON UNSAON MASUGDAN ANG PAGTUON
3 Sa imong unang duaw, sa mapahimutang ang libro, lagmit gipunting mo ang tagbalay ngadto sa tinong kapitulo o parapo. Ang maong samang punto magamit man ingong tikanganan ngadto sa panaghisgot nga mohatod sa pagtuon. Sa paggamit sa mga pangutana nga anaa sa ubos sa panid, ikaw may pasukaranan para sa makapadasig nga panaghisgot. Masugdan man nato sa pagtuon sa sinugdanan sa maong libro o sa bisan haing kapitulo, ang tumong ta mao nga sa kapulihay ang tawo matultolan ngadto sa mga kapitulo 10, 15, ug 16. Ngano man kana?
4 Ang pagpangita sa Diyos kinahanglang pinaagi ni Kristo. Si Jesus miingon, “Ako ang dalan ug ang kamatuoran ug ang kinabuhi. Walay makaadto sa Amahan gawas nga pinaagi kanako.” (Juan 14:6) Ang kapitulo 10 nagapamatuod nga si Jesus maoy tinuod nga persona, nagabutyag kon sa unsang paagi siya gitagna diha sa tagna, ug kon sa unsang paagi nasayran ta nga siya may pag-uyon sa Diyos. (Juan 6:44, 65) Ang mga kapitulo 15 ug 16 may kalabotan sa “Usa ka Pagbalik sa Matuod nga Diyos” ug “Ang Matuod nga Diyos ug ang Imong Kaugmaon.”
ILHA ANG INDIBIDUWAL NGA MGA PANGINAHANGLAN
5 Human sa pipila ka pagtuon hayan maalamon nga mosaylo ngadto sa mas pasukaranang libro sama sa basahong Mabuhing Walay Kataposan. Sanglit kay ang Pagpangita sa Diyos nga libro gituyo man sa pagkabig sa mga tawo gikan sa lainlaing mga relihiyon ngadto sa Diyos, dili ang kada kapitulo makabutad sa kada tawo. Gikinahanglan tang mopahiangay sa atong presentasyon ug kahikayan sa pagtuon sumala sa indibiduwal nga mga panginahanglan.—1 Cor. 9:19-22.
6 Pananglitan, tingali napahimutang ta ang libro sa tawo nga nagaangkong usa ka Kristohanon. Karon ang pangutana alang sa balikduaw mahimong, “Nganong aduna may daghan kaayong relihiyon nga nagaangkong Kristohanon?” Busa, ang kapitulo 11 bahin sa apostasya ug kapitulo 13 bahin sa Repormasyon mahimong basihanan sa pagsugod ug pagtuon. Atong mabuligan ang maong tawo sa pagpangatarongan sa mga pagtulon-an sa Bibliya ingong supak sa apostatang mga doktrina sa Kakristiyanohan. Nagalaom kita nga ang kamatuoran magpahigawas unta sa iyang hunahuna aron iyang maugmad ang usa ka relasyon uban kang Jehova. (Juan 8:31, 32) Dayon ang pagtuon mapadayon sa mga kapitulo 15 ug 16 o diha sa librong Mabuhing Walay Kataposan.
PAG-ABOT SA MGA TAWONG IYA SA DI-KRISTOHANONG MGA RELIHIYON
7 Sa pagtuon sa mga tawong iya sa ubang mga relihiyon, ang Kristohanong gugma ug taktika kinahanglang ipakita kanunay. (Col. 4:6) Para sa mga Hindu mahimong masugdan ta ang pagtuon sa panid 372 ubos sa sub-ulohang “Gisaad Bag-ong Kalibotan.” Dayon mopadayon sa kapitulo 5 bahin sa Hinduismo.
8 Ang taktika ilabinang gikinahanglan sa dihang makiglabot sa mga Muslim. (1 Ped. 3:15) Lagmit sila madani ngadto sa kapitulo 12 bahin sa Islam. Sa maong kapitulo, ang mga teksto sa Bibliya alang sa pagtandi gibutyag diha sa mga pangutana, ilabina gikan sa parapo 23 paunahan diin ang mga doktrina gitagad.
9 Hinumdomi nga samtang kita magtanom ug magbisibis, ang Diyos mao ang nagapatubo sa binhi sa dihang ang yuta maoy hustong matang.—1 Cor. 3:6, 7; Mat. 13:18-23.