Pagpakitag Hataas-nga-Pailob Alang sa Tanan
“Tambagan namo kamo, mga igsoon, nga inyong maymayan ang mga badlonganon, dasigon ang mga nangasubo, tabangi ang mga mahuyang, pagpakitag hataas-nga-pailob alang sa tanan.”—1 TESALONICA 5:14.
1. Diin ug ilalom sa unsang mga kahimtang nga nagapakita ang mga Saksi ni Jehova ug hataas-nga-pailob?
PAGKAMAAYONG sumbanan ang gihatag sa modernong-adlaw nga mga Saksi ni Jehova sa hataas-nga-pailob! Ilang giantos ang tumang kalisod ug paglutos sa kanhi Nazi ug Pasistang kanasoran ug sa mga nasod sama sa Malawi hangtod sa presenteng panahon. Hataas ug pailob, usab, kadtong nagpuyo sa panimalay nga nabahin sa relihiyon.
2. Unsang duha ka hinungdan sa espirituwal nga paraiso nga gitagamtam sa mga katawhan ni Jehova?
2 Bisan pa sa paglutos ug kalisdanan nga ilang naagoman, ang dedikadong katawhan ni Jehova nagatagamtam sa mga panalangin sa usa ka espirituwal nga paraiso. Sa pagkamatuod, ang mga kamatuoran nagpakita nga ang dinihogang mga Kristohanon nagsugod sa pagtagamtam niini sa tuig 1919. Unsay nakapahinabo niining espirituwal nga paraiso? Unsa sa tanan, kining samag-paraiso nga kahimtang naglungtad diha sa katawhan ni Jehova tungod kay gipasig-uli sa Diyos ang iyang dinihogang mga alagad ngadto sa ilang “yuta,” o kahimtang, sa putli nga pagsimba. (Isaias 66:7, 8) Ang espirituwal nga paraiso milambo usab kay ang tanang sakop niana nagapasundayag sa mga bunga sa espiritu sa Diyos. Ang hataas-nga-pailob maoy usa niini. (Galacia 5:22, 23) Ang bili niining hiyasa kon bahin sa atong espirituwal nga paraiso makita gikan niining pahayag ni eskolar William Barclay: “Wala kanang gitawag nga Kristohanong panag-ubanay kon walay makrothumia [hataas-nga-pailob]. . . . Ug ang katarongan alang niana mao lamang kini—nga ang makrothumia mao ang dakong hiyas sa Diyos (Roma 2.4; 9.22).” (A New Testament Wordbook, panid 84) Oo, ingon niana ka bililhon ang hataas-nga-pailob!
Ang Pagpakitag Hataas nga Pailob sa Atong mga Igsoon
3. Unsang pagtulon-an bahin sa hataas-nga-pailob ang gihatag ni Jesus kang Pedro?
3 Si apostol Pedro dayag nga naglisod sa pagpakitag hataas-nga-pailob, kay siya kausa nangutana kang Jesus: “Ginoo, hangtod ba makapila makasala ang akong igsoon batok kanako, ug pasayloon ko siya?” Makapito ba? Si Jesus mitambag kaniya: “Sultihan ko ikaw, dili kay pito ra ka higayon, kondili kapitoan ka pito ka higayon.” (Mateo 18:21, 22) Sa laing pagkasulti, walay kinutoban ang gidaghanon sa higayon nga atong antoson ug pasayloon ang usa nga nakasala kanato. Kon buot sabton, dili kita makahanduraw nga dunay magpadayon sa pag-ihap hangtod sa 77 ka higayon! Bisan pa, ang ingon niana ka mapasayloon tino nga nagkinahanglag hataas-nga-pailob.
4. Nganong ang mga ansiano ilabinang magpakitag hataas-nga-pailob?
4 Kon bahin na sa pagpakitag hataas-nga-pailob sa espirituwal nga mga igsoon, walay duhaduha nga ang mga ansiano sa kongregasyon kinahanglang mahimong sulondan. Ang ilang pasensiya lagmit masulayan tungod kay may nga isigkamagtutuo nga yam-angan o dili-magpakabana. Ang uban tingali langaylangayan sa pagtul-id sa dili maayong mga batasan. Ang mga ansiano kinahanglang mag-amping nga dili dayon masuko o masilo sa mga kahuyangan sa Kristohanong mga igsoong lalaki ug babaye. Hinunoa, ang maong espirituwal nga mga magbalantay kinahanglang mahinumdom sa tambag: “Kitang mga malig-on kinahanglan moantos sa mga kahuyangan sa mga dili-malig-on, ug dili kita magpahimuot sa atong kaugalingon.”—Roma 15:1.
5. Unsay atong maantos kon kita hataas ug pailob?
5 Unya usab, ang mga panagbangi sa personalidad tingali motungha tungod sa tawhanong mga kahuyangan ug mga kakulangan. Tungod sa mga kapakyasan o mga kinaiya, makapalagot kita sa atong mga igsoon, ug tingali ilang buhaton kini kanato. Busa, pagkatukma sa tambag: “Padayon nga mag-inantosay kamo sa usag usa ug dagayang magpinasayloay sa usag usa kon ang usa adunay hinungdan sa pagreklamo batok sa lain. Sama nga si Jehova dagayang nagapasaylo kaninyo, maingon man usab kamo.” (Colosas 3:13) Ang ‘pag-inantosay sa usag usa’ nagkahulogang pagbatog hataas-nga-pailob, bisan kon duna kitay makataronganong hinungdan sa pagreklamo batok sa usa ka tawo. Dili gayod kita manimalos o mosilot sa atong igsoon, dili bisan manghupaw batok kaniya.—Santiago 5:9.
6. Nganong ang hataas-nga-pailob maoy dalan sa kaalam?
6 Sa sama nga katuyoan ang tambag nga makita sa Roma 12:19: “Ayaw ninyo himoa ang panimalos, mga hinigugma, apan ipalabay ang kasuko; kay kini ang nahisulat: ‘Akoa ang panimalos, ako ang magabayad, nagaingon si Jehova.’” Ang ‘pagpalabay sa kasuko’ nagkahulogang mahinay sa kasuko, o hataas ug pailob. Ang pagpasundayag niining hiyasa maoy dalan sa kaalam, kay makahatag kini kanatog kaayohan ug sa uban. Kon may motunghang suliran, maayo ang atong panimati tungod kay nakapakita kitag hataas-nga-pailob, wala nato dugangi ang suliran. Ug ang usa nga atong gipakitaan ug hataas-nga-pailob maayo usab ug panimati tungod kay wala nato siya siloti ni panimasli sa usa ka paagi. Dili ikatingala nga gitambagan ni Pablo ang kaubang mga Kristohanon nga ‘dasigon ang mga nangasubo, tabangan ang mga mahuyang, magpakitag hataas-nga-pailob alang sa tanan’!—1 Tesalonica 5:14.
Sulod sa Panimalay
7. Nganong ang mga minyo kinahanglang magbaton ug hataas-nga-pailob?
7 Maayo ang pagkaingon nga ang malipayong kaminyoon maoy panaghiusa sa duha ka tawo nga maayong mopasaylo. Unsay kahulogan niini? Nga ang mga tawong malipayong naminyo hataas ug pailob sa ilang pakiglabot sa usag usa. Ang mga tawo sagad madani sa usag usa tungod sa ilang nagkalahing mga buot. Kini nga mga kalainan tingali madanihon, apan mahimo usab kining tuboran sa panagbingkil nga nagadugang sa kalisod ug mga kabalaka nga maoy hinungdan sa “kasakitan sa unod” sa minyong mga Kristohanon. (1 Corinto 7:28) Pananglitan, ingnon ta nga ang bana walay-tagad sa gagmayng mga butang o kaha may pagkadanghag o dili areglado. Alantuson gayod kini sa iyang asawa. Ug kon ang malulutong pagkasulting mga sugyot wala gihapoy epekto, nan antoson na lang niya ang iyang mga kahuyangan pinaagi sa pagpakitag hataas-nga-pailob.
8. Nganong kinahanglang magpakitag hataas-nga-pailob ang bana?
8 Sa laing bahin, ang usa ka asawa tingalig kutikutihan kaayo sa gagmayng mga butang ug kiling sa pagtagawtaw sa iyang bana. Kini makapahinumdom sa kasulatan: “Maayo pang magpuyo sa atop kay sa magpuyo sa balay uban sa usa ka asawa nga tagawtawan.” (Proverbio 25:14, Today’s English Version) Sa maong kaso, gikinahanglan ang hataas-nga-pailob aron masunod ang tambag ni Pablo: “Mga bana, higugmaa ninyo ang inyong mga asawa ug ayaw pagpasulabi sa pagkasuko kanila.” (Colosas 3:19) Nagkinahanglan ug hataas-nga-pailob usab ang bana sa pagpaminaw sa tambag ni apostol Pedro: “Kamong mga bana, padayon sa pagpuyo sa samang paagi uban [sa inyong mga asawa] sumala sa kahibalo, nga nagahatag ug pasidungog kanila ingon nga labaw pang mahuyang nga galamiton, ang usa nga babayen-on, sanglit kamo usab mga manununod man uban kanila sa dili-takos nga gasa sa kinabuhi, aron dili mabalda ang inyong mga pag-ampo.” (1 Pedro 3:7) Ang mga kahuyangan sa iyang asawa tingali masulayon alang sa bana, apan ang hataas-nga-pailob makatabang kaniya sa pag-antos niana.
9. Nganong gikinahanglan ang hataas-nga-pailob sa mga ginikanan?
9 Ang mga ginikanan kinahanglang hataas ug pailob kon buot silang molampos sa pagmatuto sa ilang mga anak. Ang mga bata makahimo sa mao gihapong sayop nga balikbalik. Tingali gahi kaayo sila ug ulo o dugayng makakat-on ug kaha kanunayng nagasulay sa ilang mga ginikanan. Ilalom sa maong mga kahimtang, ang Kristohanong mga ginikanan kinahanglang mahinay sa kasuko, nga dili mawad-an sa ilang pailob o panimbang apan magpabiling kalmado samtang malig-on alang sa matarong nga mga prinsipyo. Angay hinumdoman usab sa mga amahan nga sila niadto maoy mga batan-on ug nakahimo usab ug mga sayop. Kinahanglan ilang hinumdoman ang tambag ni Pablo: “Kamong mga amahan, ayaw ninyo pasuk-a ang inyong mga anak, aron dili sila mawad-an sa kadasig.”—Colosas 3:21.
Uban Niadtong Anaa sa Gawas
10. Unsa ang angay igawi diha sa atong trabahoan, sumala sa makita sa unsang eksperyensiya?
10 Tungod sa tawhanong pagkadili-hingpit ug kahakog, ang dili-maayong mga kahimtang tingali motungha diha sa trabahoan sa usa ka Kristohanon. Dalan sa kaalam ang magmataktikahon ug ang pag-antos sa mga kalapasan alang sa kalinaw. Nagapakita kon unsa kini ka maalamon mao ang eksperyensiya sa usa ka Kristohanon nga nahimong biktima sa dakong kasamok nga gipahinabo sa usa ka nasinang kaubang empliyado. Sanglit wala padakoa kini sa igsoon apan nagpakitag hataas-nga-pailob, sa ulahi nakasugod siyag pagtuon sa Bibliya uban sa empliyado nga samokan niadto.
11. Kanus-a kita ilabinang magpakitag hataas-nga-pailob, ug ngano?
11 Ilabinang ang katawhan ni Jehova kinahanglang magpakitag hataas-nga-pailob samtang magsangyaw niadtong anaa sa gawas sa Kristohanong kongregasyon. Matag karon ug unya, ang mga Kristohanon makatagbo ug binastos o binagis nga mga tubag. Angay o maalamon ba nga tubagon sila sa samang paagi? Dili, kay kana dili pagpakitag hataas-nga-pailob. Ang dalan sa kaalam mao ang paghinumdom ug pagsunod sa maalamong panultihon: “Ang tubag, kon malumo, makapahupay sa kasuko, apan ang pulong nga mahait makapapukaw sa kasuko.”—Proverbio 15:1.
Ang Pagtuo ug Paglaom Makatabang sa Pagpasundayag sa Hataas-nga-Pailob
12, 13. Unsang mga hiyas ang makatabang kanato nga makabaton ug hataas-nga-pailob?
12 Unsay makatabang kanato sa pagpasundayag sa hataas-nga-pailob, sa pag-antos sa malisod nga mga kahimtang? Ang usa niini mao ang pagtuo sa mga saad sa Diyos. Angay mosalig kita sa pulong sa Diyos. Ang Kasulatan nag-ingon: “Ang tanang pagsulay nga naagian ninyo naagian usab sa kadaghanan. Apan ang Diyos kasaligan, ug dili niya itugot nga kamo sulayon nga labaw sa inyong maarangan, apan uban sa pagsulay siya magatagana usab ug lutsanan sa paglikay aron kamo makaantos niini.” (1 Corinto 10:13) Sa laing pagkasulti, sama sa pagkasulti sa usa ka tawong tigulang: “Kon itugot kini sa Diyos, maantos ko kini.” Oo, atong maagwanta kini pinaagi sa pagbatog hataas-nga-pailob.
13 Suod nga nalangkit sa pagtuo mao ang paglaom sa Gingharian sa Diyos. Kon kini magmando na sa tibuok yuta, ang tanang daotang mga kahimtang nga nagapit-os kanato wagtangon. Labot niini, ang salmistang David miingon: “Biyaan mo ang kasuko ug ayran mo ang kaligotgot; ayaw ipakita ang imong kapungot nga makahimo lamang hinoon ug daotan. Kay ang mga mamumuhat sa daotan pagalaglagon, apan ang mga nagalaom kang Jehova mao ang magapanunod sa yuta.” (Salmo 37:8, 9) Ang seguradong paglaom nga ang Diyos sa dili madugay magahanaw niining tanang masulayong mga kahimtang motabang kanato sa pagpakitag hataas-nga-pailob.
14. Unsang eksperyensiya ang nagpakita nganong angay kitang magpakitag hataas-nga-pailob sa atong dili-magtutuong kapikas?
14 Unsay atong reaksiyon kon ang dili-magtutuong kapikas mohatag kanatog kapit-os? Padayon sa pagdangop sa Diyos alang sa tabang, ug padayon sa paglaom nga ang magsusupak mahimong magsisimba ni Jehova. Ang asawa sa usa ka Kristohanon usahay nagadumili sa pag-andam sa iyang pagkaon ug sa paglaba sa iyang mga besti. Nagapamalikas siya, dili siya tinggan sa daghang adlaw, ug misulay pa gani sa pagbarang kaniya pinaagi sa tambalan. “Apan,” siya miingon, “midangop ako sa matag higayon kang Jehova diha sa pag-ampo, ug misalig ako Kaniya nga motabang kanako sa pag-ugmad sa maayong hiyas sa hataas-nga-pailob aron dili mawala ang akong Kristohanong panimbang. Ako naglaom usab nga moabot ra ang adlaw nga magbag-o ang iyang tinamdan.” Human sa 20 ka tuig sa maong pagtratar, ang iyang asawa nagsugod sa pag-usab, siya miingon: “Pagkadako sa akong pasalamat kang Jehova nga iya akong gitabangan nga maugmad ko ang bunga sa espiritu, ang hataas-nga-pailob, kay akong nakita na karon ang resulta: Ang akong asawa nagsugod na sa paglakaw sa dalan sa kinabuhi!”
Pag-ampo, Pagpaubos, ug Gugma Makatabang
15. Nganong ang pag-ampo makatabang kanato nga magpakitag hataas-nga-pailob?
15 Ang pag-ampo maoy laing dakong tabang sa pagbatog hataas-nga-pailob. Si Pablo miawhag: “Ayaw kamo kabalaka mahitungod sa bisan unsang butang, hinunoa sa tanang butang ipahibalo ninyo sa Diyos ang inyong mga hangyo pinaagi sa pag-ampo ug pagpangamuyo uban sa pasalamat; ug ang kalinaw sa Diyos nga lapaw sa tanang pagpanabot magabantay sa inyong mga kasingkasing ug sa inyong mga hunahuna pinaagi ni Kristo Jesus.” (Filipos 4:6, 7) Hinumdomi usab ang pagpatalinghog sa tambag: “Itugyan mo kang Jehova ang imong palas-anon, ug siya mismo magasapnay kanimo. Dili gayod niya itugot nga matarog ang matarong.”—Salmo 55:22.
16. Sa pagpakitag hataas-nga-pailob, sa unsang paagi ang pagpaubos makatabang kanato?
16 Ang pagpaubos maoy laing dakong tabang sa pag-ugmad sa bunga sa espiritu nga hataas-nga-pailob. Ang tawong mapahitas-on dili pasensiyoso. Siya dali nga masilo, dali nga masuko, ug dili mopalabay sa bisan unsang dili-maayong pagtagad. Kining tanan maoy kaatbang sa pagkahataas ug pailob. Apan ang tawong mapaubsanon dili sobra ka seryoso sa iyang kaugalingon. Siya maghulat kang Jehova, sama kang David dihang gigukod ni Haring Saul ug giinsulto sa Benjamita nga Semei. (1 Samuel 24:4-6; 2 Samuel 16:5-13) Busa, tinguhaon nato nga molakaw “uban ang bug-os nga pagkamapainubsanon sa hunahuna ug malumo, uban sa hataas-nga-pailob, nga mag-inantosay sa usag usa diha sa gugma.” (Efeso 4:2) Dugang pa, kinahanglang ‘magpaubos kita diha sa mga mata ni Jehova.’—Santiago 4:10.
17. Nganong ang gugma makatabang kanato nga magpakitag hataas nga pailob?
17 Ilabinang makatabang kanato ang dili-hakog nga gugma sa pagpakitag hataas-nga-pailob. Sa pagkamatuod, “ang gugma hataas ug pailob,” kay mopahimo kini kanato sa paghunahuna sa labing maayo alang sa uban. (1 Corinto 13:4) Ang gugma mopahimo kanato sa pagpakitag empatiya, sa pagbutang sa atong kaugalingon diha sa kahimtang sa uban, ingnon ta. Dugang pa, ang gugma makatabang kanato sa pagpakitag hataas-nga-pailob tungod kay “kini mopailob sa tanang butang, motuo sa tanang butang, molaom sa tanang butang, moantos sa tanang butang. Ang gugma dili mapakyas.” (1 Corinto 13:7, 8) Oo, sama sa pagkapamulong niana diha sa awit sa Gingharian sa numero 200 sa librong Sing Praises to Jehovah:
“Ang gugma may mga mata nga makakita sa maayo.
Ang gugma nagalig-on sa panagsoon.
Ang gugma alang sa mga nakasala maluloton,
Naninguha nga maoy makita ang ilang maayong bahin.”
Magmahataas ug Pailob Dinuyogan sa Kalipay?
18. Sa unsang paagi posible ang pagpakitag hataas-nga-pailob dinuyogan sa kalipay?
18 Si Pablo nag-ampo nga ang iyang isigkamagtutuo sa Colosas mapuno unta sa tukmang kahibalo mahitungod sa kabubut-on sa Diyos aron sila makalakaw nga takos kang Jehova, magpahimuot kaniya, ug mamunga sa tanang maayong buhat. Busa sila “malinig-onan sa tanang kusog sumala sa iyang mahimayaong gahom aron bug-os makaantos ug makabatog hataas-nga-pailob dinuyogan sa kalipay.” (Colosas 1:9-11) Bisan pa, sa unsang paagi ang usa makabaton ug “hataas-nga-pailob dinuyogan sa kalipay”? Wala kini magkasumpaki, kay ang pagbaton sa kalipay nga gihisgotan sa Kasulatan dili kay usa lamang yanong pagmaya o pagsadya. Ang bunga sa espiritu nga kalipay nag-apil sa usa ka pagbati sa dulot nga katagbawan nga nakabuhat ug matarong atubangan sa Diyos. Kini maoy kapahayagan usab sa paglaom sa pagdawat sa gisaad nga ganti ingong sangpotanan sa pagpakitag hataas-nga-pailob. Maoy hinungdan nganong si Jesus miingon: “Malipayon kamo sa diha nga panamastamasan kamo sa mga tawo ug pagalutoson kamo ug pagabutangbutangan kamo sa tanang matang sa kadaotan batok kaninyo tungod kanako. Pagmaya ug lumukso sa kalipay, kay dako ang inyong balos didto sa langit; kay sa ingon niini gilutos sa mga tawo ang mga manalagna nga nahiuna kaninyo.”—Mateo 5:11, 12.
19. Unsang mga pananglitan ang nagpakita nga posible ang pagpakitag hataas-nga-pailob ug magmalipayon?
19 Si Jesus nakabaton sa maong kalipay. Sa pagkamatuod, “alang sa kalipay nga gibutang sa iyang atubangan nga iyang giantos ang kahoy sa pagsakit, nga wala igsapayan ang kaulawan.” (Hebreohanon 12:2) Ang maong kalipay nakahimo kang Jesus sa pagpakitag hataas-nga-pailob. Sa susama, palandonga kon unsa ang nahitabo dihang ang mga apostoles gipangbunalan ug gibaoran sa “paghunong sa pagsulti pinasikad sa ngalan ni Jesus.” Sila “namahawa gikan sa Sanhedrin, nga malipayon nga giisip sila nga angayan diayng pakaulawan tungod sa iyang ngalan. Ug sa tanang adlaw diha sa templo ug gikan sa balay ug balay sila wala mag-undang sa pagpanudlo ug sa pagwali sa maayong balita mahitungod kang Kristo, Jesus.” (Buhat 5:40-42) Pagkamaayong sumbanan nga nagapamatuod nga ang mga sumusunod ni Jesus mahimong makabaton ug hataas-nga-pailob dinuyogan sa kalipay!
20. Kon atong ipasundayag ang hataas-nga-pailob, sa unsang paagi makaapekto kini sa atong relasyon sa uban?
20 Ang Pulong sa Diyos tinong naghatag maalamong tambag dihang giawhag kita sa dili pagpanimalos, nga magmahinay sa kasuko samtang nagalaom sa labing maayo—oo, nga magmahataas ug pailob! Kinahanglan nato ang regular nga pag-ampo ug ang bunga sa espiritu sa Diyos aron magkasinabtanay sa atong mga igsoong lalaki ug babaye sa kongregasyon, sa sakop sa atong pamilya, sa mga tawo diha sa atong trabahoan, ug sa mga tawo nga atong mahinagbo sa Kristohanong ministeryo. Ug unsay makatabang kanato sa pagpasundayag sa hataas-nga-pailob? Pagtuo, paglaom, pagpaubos, kalipay, ug gugma. Sa pagkamatuod, uban sa maong mga hiyas kita makapakitag hataas-nga-pailob ngadto sa tanan.
Mahinumdom Ka Ba?
◻ Nganong ang hataas-nga-pailob gikinahanglan sa atong pagpakig-ambit sa espirituwal nga paraiso?
◻ Nganong ang mga ansiano ilabinang magpakitag hataas-nga-pailob?
◻ Nganong ang hataas-nga-pailob kinahanglang ugmaron sa mga bana ug sa mga asawa?
◻ Unsang ubang mga hiyas ang makatabang kanato sa pagpakitag hataas-nga-pailob?
[Hulagway sa panid 17]
Unsang tambag gikan kang Jesus ang nakatabang kang Pedro sa pagpakitag hataas-nga-pailob?