Kinabuhi ug Ministeryo ni Jesus
ANG artikulong “Gihuman ni Jesus ang Tanang Gipabuhat sa Diyos,” sa mosunod nga mga panid, mao ang among kataposang bahin sa dugay na namong serye nga “Kinabuhi ug Ministeryo ni Jesus.” Kining artikuloha mipatim-aw sa Ang Bantayanang Torre sa kapig unom ka tuig, sa 149 ka nagsunod nga mga isyu, sugod sa Abril 1, 1985, nga isyu.
Gilaoman namo nga kining seryeha diha sa Ang Bantayanang Torre nakatabang nimo sa pagsunod sa tambag ni apostol Pablo nga ‘tutoki pag-ayo si Jesus’ ug sa pagtuman sa sugo sa Diyos nga “magpatalinghog kaniya.” (Hebreohanon 12:2, 3; Mateo 17:5) Latas sa katuigan, daghan ang nanulat nga nag-ingong natabangan sila sa pagbuhat niana. “Kini nahisamag ako didto nga nagpatalinghog kaniya ug nagtan-aw sa iyang gibuhat,” misulat ang usa ka magbabasa. “Ako nahidangat sa paghigugma kaniya sa dugang pa tungod niining mga artikuloha.”
Ang laing magbabasa misulat: “Ang matag isyu daw may usa ka punto nga akong nasayloan sa nagbasa ako sa asoy sa Bibliya. Nagkalipay ako sa pagbutang sa kaisipan sa lainlaing mga hitabo sa kinabuhi ni Jesus sa mas maayong han-ay sumala sa petsa sa pagkahitabo pinaagi sa pagbasa sa matag artikulo.” Daghan nagpahayag ug susamang apresasyon sa pagkahibalo kon kanus-a ug kon diin si Jesus nagtudlo ug nagbuhat sa mga butang sa panahon sa iyang ministeryo.
Usa ka babaye sa Espanya miingon: “Akong gitagoan ang tanang artikulo sukad sa sinugdan. Kini matulon-anon kaayo alang sa mga dagko ug mga bata. Ako 44 anyos na, ug ako malipay sa dihang magbasa ako niining mga asoya. Kini nahisamag ako presente sa matag hitabo sa kasaysayan.”
Usa ka inahan sa Tinipong Bansa misulat: “Tungod sa pagkamugbo sa mga artikulo ug sa yanong mga ekspresyon niini, ang akong bana miduyog sa among pagtuon sa pamilya. Ang akong otso-anyos nga anak lalaki mihangyo kanako sa pagsulat sa pagpasalamat kaninyo nga ang iyang amahan karon nagtuon na sa Bibliya. Siya mihangyo nga sa adlaw nga makompleto na kining seryeha ang mga artikulo ipatik sa usa ka libro aron siya makapaambit niana nila sa iyang mga kauban sa eskuylahan.”
Tingalig ikaw may samang pagbati sa magbabasa nga karong bag-o nagmahay: “Ako naguol ug diyutay sa paghunahuna nga ang serye hapit nang matapos samtang ang kataposang mga adlaw sa kinabuhi ni Kristo gihisgotan. Mingawon gayod ako sa ilang dapit diha sa Ang Bantayanang Torre.” Naglaom kami nga inyong magustohan kining kataposang bahin sa among serye, “Kinabuhi ug Ministeryo ni Jesus.”