Pagtan-aw sa Luyo sa Ginamag-Tawong “Kalinaw ug Kasegurohan”
Ang matuod mao, ang mga tawo dili gayod makapatunghag tinuod, malungtarong kalinaw. Nganong dili? Kay ang mga tawo dili mao ang tinuod nga mga maglalapas sa kalinaw, bisan pag sila sa bahin sad-an sa ilang mantsado-sa-dugo nga kasaysayan. Ang tinuod nga maglalapas sa kalinaw maoy gamhanan pa kay sa tawo. Siya walay lain kondili mao si Satanas nga Yawa, kinsa gibatbat diha sa Bibliya ingong “nagalimbong sa tibuok gipuy-ang yuta.”—Pinadayag 12:9.
ANG Bibliya nagaingon: “Ang tibuok nga kalibotan nahiluna sa gahom sa usang daotan [Satanas].” (1 Juan 5:19) Busa, ang pagkab-ot sa tinuod nga kalinaw ug malungtarong kasegurohan kinahanglang mag-apil sa pagkuha ni Satanas gikan sa natad sa kalihokan uban sa sistema sa kalibotan nga iyang natukod ug dayag kaayo nga iyang gigamhan. (Itandi ang Isaias 48:22; Roma 16:20.) Dili kini mahimo sa mga tawo.
Nan, sa unsang paagi makab-ot ang kalinaw ug kasegurohan? Pinaagi sa gahom sa Usa nga waykinutobang mas kusgan kay kang Satanas. Ang Diyos nga Labing Gamhanan nagbutang ug kinutbanan sa kalihokan ni Satanas taliwala sa katawhan. Inig-abot sa maong kinutbanan, ang “kalit nga kalaglagan” modangat sa kalibotan nga nahiluna sa gahom ni Satanas. (1 Tesalonica 5:3-7) Ang tanang ebidensiya mosangpot sa konklusyon nga kini mahitabo sa dili madugay.
Kalinaw ug Kasegurohan Karon!
Hinuon, komosta man karon? Ang usa ka sukod sa tinuod nga kalinaw ug kasegurohan posible bisan karong adlawa. Sa unsang paagi? Dili sumala sa gisulayan sa daghang relihiyosong pangulo, pinaagi sa pakiglambigit sa politika niining kalibotan, apan, hinunoa, pinaagi sa pagsunod sa mga sugo ug tambag sa Diyos.
Tinuod bang mopatunghag kalinaw ang maong dalan? Oo, mopatungha kini. Pananglitan, ang mga Saksi ni Jehova nagsulay niini ug nakakaplag nga tinuod nga posible ang pagpahimulos sa tiunay nga kalinaw ingon man sa usa ka sukod sa kasegurohan. Ang pagsunod sa mga sugo sa Diyos sumala sa gipadayag diha sa Bibliya nakapaarang kanila sa pagkahugpong ingong usa ka internasyonal nga organisasyon diha sa tinuod nga kalinaw, bisan unsa ang ilang rasa, nasyonalidad, o pinulongan.—Salmo 133:1.
Sa pagsugot sa balaang balaod, sila simbolikong ‘nagsalsal sa mga espada ngadto sa mga punta sa daro ug sila dili na makakat-on sa gubat.’ (Isaias 2:2-4) Gibati nila ang kasegurohan diha sa gugma sa Diyos ug may pagsalig nga ang ilang espirituwal nga mga igsoon maikagon kanila. (Roma 8:28, 35-39; Filipos 4:7) Kon mangutana ka kon kini tinuod, gidapit ka namo sa pagduaw kanila diha sa usa sa ilang mga Kingdom Hall ug tan-awa sa imong kaugalingon.
Kalinaw ug Kasegurohan sa Tibuok Kalibotan
Hinuon, kini dili mao ang kataposang katumanan sa saad sa Bibliya sa tinuod nga kalinaw ug kasegurohan. Dili gayod! Kini yanong usa ka pasiunang talan-awon kon sama sa unsa unya kining kalibotana kon ang tanan mosunod sa mga balaod sa Diyos. Sa dili madugay ang maong pasiunang talan-awon mahimong kamatuoran.
Si apostol Pablo miingon: “Sa dihang sila magaingon: ‘Kalinaw ug kasegurohan!’ unya ang kalit nga kalaglagan modangat kanila.” (1 Tesalonica 5:3) Ang Diyos ang magatino nga si Satanas naglimbong sa katawhan sa igo nang panahon. Panahon na unya sa pagkuha kaniya gikan sa dapit sa kalihokan, uban sa daotang sistema sa kalibotan nga anaa sa iyang gahom. Unya mao na ang panahon sa katumanan sa tagna ni Daniel: “Sa mga adlaw nianang mga haria ang Diyos sa langit magatukod sa usa ka gingharian nga dili gayod malaglag. Ug ang gingharian mismo dili igahatag ngadto sa ubang katawhan. Kini magadugmok ug magalaglag sa tanan niining mga gingharian, ug kini mismo magabarog sa mga panahong walay tino.”—Daniel 2:44.
Kini ba unya usa ka dili-matarong nga buhat sa bahin sa Diyos? Bug-os dili. Ang kalit nga kalaglagan modangat lamang niadtong angay niini sumala sa paghukom sa Diyos, sa mga sukdanan sa Diyos. Nagasalig ka ba sa Maglalalang sa paghukom nga matarong niining bahina? Tinong makatugyan kita sa butang nga luwas diha sa iyang mga kamot! Ug unsa unya ang sangpotanan sa iyang buhat sa paghukom? Ang proverbio nagaingon: “Ang matarong mao ang magapuyo sa yuta, ug ang walay-ikasaway mao ang mahibilin ibabaw niini. Mahitungod sa mga daotan, sila pagaputlon gikan sa yuta mismo.” (Proverbio 2:21, 22) May magbangotan ba sa kamatayon sa mga daotan?
Kay gikuha na gikan sa yuta ang mga maglalapas sa kalinaw, ang tinuod nga kalinaw ug kasegurohan mao unya ang kahimtang sa katawhan sa tibuok yuta ubos sa maluluy-ong pagmando sa Gingharian sa Diyos. “Sila dili magadaot o magalaglag sa tibuok nakong balaang bukid; tungod kay ang yuta mapuno gayod sa kahibalo kang Jehova sama sa katubigan nga nagatabon sa dagat mismo.” (Isaias 11:9) Nagtuo ka ba sa maong saad sa Bibliya? Masaligon ka ba nga kining mga butanga mahitabo sa dili madugay? Kon ikaw may mga pagduhaduha, gidasig ka namo sa pagsusi sa dugang pa sa butang. Sa pagkamatuod, ang paagi sa Diyos mao ang bugtong paagi nga makab-ot gayod sa tawo ang gipangandoy nga tumong sa tinuod nga kalinaw ug lunsay nga kasegurohan.
[Hulagway sa panid 8]
Ang katawhan ni Jehova nagapahimulos sa tinuod nga kalinaw ug sa dakodakong sukod sa kasegurohan karong adlawa