Hangtod Kanus-a ang Pailob sa Diyos?
MGA 3,000 ka tuig kanhi, usa ka tawong makinaadmanon misulat: “Ang tawo nagmando sa tawo sa iyang kadaotan.” (Ecclesiastes 8:9) Sukad gayod sa iyang pagsulti niana, ang mga kahimtang wala maarang-arang. Sa tibuok nga kasaysayan, ang mga indibiduwal o mga pundok nangilog ug gahom, nga sunodsunod, nga gimandoan ug gipahimudsan ang ubang mga tawo. Giantos kining mapailobon ni Jehova nga Diyos.
Nagpailob si Jehova samtang gibalhog sa mga gobyerno ang minilyon ngadto sa ilang kamatayon diha sa gubat ug gitugotan ang grabeng mga inhustisya sa ekonomiya. Karong adlawa, nagpailob gihapon siya samtang gidaot sa mga tawo ang hut-ong sa ozone ug gihugawan ang atmospera ug ang dagat. Pagkalabihan sa iyang kagul-anan sa pagkakita nga gidaot ang maayo nga mabungahong yuta ug sa mapatuyangong pagpuril sa kalasangan ug sa kinabuhing lasangnon!
Nganong ang Diyos Mapailobon Kaayo?
Ang usa ka yano nga ilustrasyon tingali motabang nato sa pagtubag niining pangutanaha. Tagda ang epekto diha sa usa ka negosyo sa dihang ang usa ka empliyado kanunay nga maulahi sa pag-abot. Unsay pagabuhaton sa tag-iya? Ang paninugdang hustisya tingali mangayo nga taktakon dayon niya ang empliyado. Apan basin siya mahinumdom sa proverbio sa Bibliya: “Siya nga hinay sa kasuko dagaya sa salabotan, apan ang usa nga dili mapailobon nagabayaw sa pagkabuangbuang.” (Proverbio 14:29) Tungod sa salabotan siya magpaabot sa dili pa molihok. Basin mohukom siya nga palabyon ang panahon aron mabansay ang usa ka kapuli aron ang negosyo dili mabalda sa dugang.
Tungod sa pagkamabination basin siya magpaabot usab. Unsa man ang pagpasidaan sa mapasagdanong empliyado sa pagsusi kon siya magbag-o ba sa iyang batasan? Nganong dili makigsulti kaniya ug tinoon kon kaha ang iyang naandang pagkaulahi gipahinabo sa usa ka suliran nga masulbad o pinaagi sa daotang tinamdan nga dili na matul-id? Bisan tuod ang tag-iya sa negosyo tingali mohukom sa pagpailob, ang iyang pailob, hinuon, dili kay walay kinutoban. Ang empliyado kinahanglang magbag-o o sa kataposan moatubang sa pagkataktak. Kana makataronganon lamang alang sa negosyo mismo ug sa mga empliyado nga nagasunod sa mga lagda.
Sa susamang paagi, si Jehova nga Diyos nagmapailobon sa dihang makaatubang sa buhat nga daotan aron hatagag panahon ang pagpalampos sa usa ka makataronganong kasulbaran sa pila ka suliran. Dugang pa, ang iyang pailob maghatag sa mga mamumuhat ug daotan ug higayon sa pag-usob sa ilang mga paagi ug makabatog walay-kataposang mga kaayohan. Busa, ang Bibliya nagadasig kanato nga dili maguol sa pailob sa Diyos. Sa kapulihay, kini nagaingon: “Isipa ang pailob sa atong Ginoo nga kaluwasan.”—2 Pedro 3:15.
Usa ka Panig-ingnan sa Pailob sa Diyos
Si Jehova nga Diyos mapailobon sa wala pa ang dakong Lunop sa adlaw ni Noe. Ang kalibotan niadtong panahona napuno sa kapintasan ug maoy daotan kaayo. Atong mabasa: “Nakita ni Jehova nga ang pagkadaotan sa tawo dako sa yuta . . . Busa si Jehova miingon: ‘Akong pagalaglagon ang mga tawo nga akong gilalang gikan sa nawong sa yuta.’” (Genesis 6:5, 7) Oo, diha sa hunahuna ni Jehova ang kinalabwang kasulbaran sa suliran sa pagkadaotan niadto: ang pagwagtang sa daotang katawhan. Apan wala siya molihok dayon. Nganong wala man?
Tungod kay dili ang tanan daotan. Si Noe ug ang iyang pamilya matarong sa panan-aw sa Diyos. Busa sa ilang kaayohan, nagpaabot nga mapailobon si Jehova aron ang pila ka tawong matarong makapangandam alang sa kaluwasan. Dugang pa, kadtong nadugay nga pagpaabot mihatag kang Noe ug higayon nga mahimong “usa ka magwawali sa pagkamatarong,” nga naghatag niadtong daotang katawhan ug higayon sa pag-usob sa ilang mga paagi. Ang Bibliya nagaingon: “Ang pailob sa Diyos nagpaabot sa mga adlaw ni Noe, samtang ang arka gitukod, diin ang pipila ka tawo, nga mao, walo ka kalag, ang naluwas latas sa tubig.”—2 Pedro 2:5; 1 Pedro 3:20.
Kon Nganong ang Diyos Mapailobon Karon
Karong adlawa, ang kahimtang maoy susama. Ang kalibotan puno na usab sa kapintasan. Sama sa adlaw ni Noe, gihukman na sa Diyos kining kalibotana, nga, nagaingon ang Bibliya, “gitagana alang sa adlaw sa paghukom ug sa kalaglagan sa mga tawong dili diyosnon.” (2 Pedro 3:7) Sa diha nga kana mahitabo, wala na unyay pagdaot sa silinganan, pagdaogdaog sa mga mahuyang, o hinakog nga pag-abusar sa gahom.
Nan, nganong wala man laglaga sa Diyos kanhi pa ang mga tawong dili diyosnon? Tungod kay may mga isyu nga pagahusayon ug importanteng mga butang nga hikayon. Sa pagkatinuod, si Jehova nagalihok na alang sa permanenteng kasulbaran sa suliran sa pagkadaotan nga naglangkit sa daghang butang, apil ang pagluwas sa mga tawong matarong ug kasingkasing gikan sa kaulipnan sa sakit ug kamatayon.
Uban nianang katuyoana sa hunahuna, maoy katuyoan ni Jehova nga itagana ang usa ka Manluluwas nga makatanyag sa usa ka lukat alang sa atong mga sala. Mahitungod kaniya, ang Bibliya nag-ingon: “Gihigugma pag-ayo sa Diyos ang kalibotan nga iyang gihatag ang iyang bugtong nga Anak, aron nga ang matag usa nga magatuo kaniya dili unta malaglag kondili makabaton ug kinabuhing walay kataposan.” (Juan 3:16) Gidangtag kaliboan ka katuigan aron maandam ang dalan sa pag-abot ni Jesus ug paghalad sa iyang kinabuhi alang sa katawhan. Sa tanan nianang katuigana, ang Diyos sa kamahigugmaon nagpailob. Apan dili ba ang maong tagana takos nga paaboton?
Gitagana ni Jesus ang lukat alang sa katawhan duolan sa duha ka libo ka tuig kanhi. Nan, nganong ang Diyos nagpailob gihapon? Sa usa ka butang, ang pagkamatay ni Jesus nagpasidaan sa sinugdanan sa usa ka edukasyonal nga kampanya. Ang katawhan kinahanglang mahibalo niining mahigugmaong tagana ug hatagag higayon sa pagdawat o pagsalikway niini. Kinahanglan kanag panahon, apan kana mao unyay panahon nga maayong pagkagamit. Ang Bibliya nag-ingon: “Si Jehova dili hinay mahitungod sa iyang saad, sumala sa pag-isip sa pila ka tawo sa pagkahinay, apan siya mapailobon kaninyo tungod kay dili niya buot nga may malaglag kondili buot niyang ang tanan makadangat sa paghinulsol.”—2 Pedro 3:9.
Ang Isyu Bahin sa Kagamhanan
Ang laing hinungdanong butang nagkinahanglan usab ug panahon. Gikinahanglan ang pagsulbad sa suliran bahin sa kagamhanan sa katawhan. Sa sinugdanan, ang tawo nailalom sa balaang kagamhanan. Apan sa tanaman sa Eden, gitalikdan kana sa atong unang mga ginikanan. Gipalabi nila nga maindependente sa Diyos, nga buot magmando sa ilang kaugalingon. (Genesis 3:1-5) Hinuon, sa tinuoray, ang tawo wala lalanga sa pagmando sa iyang kaugalingon. Ang propeta nga si Jeremias misulat: “Ako nahibalo, Oh Jehova, nga wala sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.”—Jeremias 10:23; Proverbio 20:24.
Bisan pa niana, sukad ipatungha ang isyu bahin sa kagamhanan, si Jehova mapailobong mitugot ug panahon sa pagsulbad niana. Sa pagkamatuod, sa kamahinatagon gitugot niya ang kaliboan ka katuigan aron masulayan sa tawo ang tanang mahunahunaang matang sa kagamhanan. Unsay sangpotanan? Nadayag nga walay tawhanong kagamhanan ang makawagtang sa pagdaogdaog, pagkawalay-panag-angay, o ubang hinungdan sa kagul-anan.
Sa pagkamatuod, tungod sa tawhanong kasaysayan, may makasulti ba gayod nga ang Diyos dili matarong sa dihang iyang gipahibalo ang iyang tuyo nga wagtangon ang tanang kagamhanan ug pulihan kana sa iyang kaugalingon? Tinong wala! Ato gayong kahinangpan ang pagkatuman niining tagna sa Bibliya: “Sa mga adlaw nianang mga haria ang Diyos sa langit magatukod sa usa ka gingharian nga dili gayod malaglag. Ug ang gingharian mismo dili igapasa ngadto sa ubang katawhan. Kini magadugmok ug magaut-ot niining tanan nga gingharian, ug kini mismo mobarog sa mga panahong walay tino.”—Daniel 2:44.
Ang langitnong Hari sa maong Gingharian mao ang binanhaw nga si Jesus. Ang pag-andam kaniya alang nianang katungdanana—ingon man ang pagpilig mga tawo aron mahimong kauban niyang mga magmamando—nagkinahanglag panahon. Sa maong tanang panahon, ang Diyos nagpailob.
Kaayohan Karon Gikan sa Pailob sa Diyos
Karong adlawa, minilyon nga tawo diha sa labing menos 212 ka kayutaan nakabatog kaayohan sa pailob sa Diyos. Sila nagkahiusa sa ilang tinguha sa pagsunod sa Diyos ug pag-alagad sa iyang langitnong kagamhanan. Sa dihang magkatigom sila diha sa ilang mga Kingdom Hall, ilang masayran kon unsa ka labing maayo ang pagpadapat sa mga prinsipyo sa Bibliya diha sa ilang mga kinabuhi. Dili sila mag-apil-apil sa makapabahin nga politika niining kalibotana, bisan tuod nagpasakop sila sa tawhanong mga kagamhanan samtang gitugotan kini sila sa Diyos sa paglihok.—Mateo 22:21; Roma 13:1-5.
Ang maong kooperasyon taliwala sa daghan kaayong tawo nagbayaw kang Jehova ingong ang Usa nga makapatunghag harmoniya taliwala sa katawhan nga may kagawasan sa pagpili nga nakakat-on sa paghigugma kaniya ug buot moalagad kaniya. Pihong inyong nahibalag kining mga tawhana samtang nagapadayon sila sa samang buluhaton nga gisugdan mismo ni Jesus, nga mao ang pagwali sa maayong balita sa Gingharian sa Diyos. Gitagna ni Jesus ang kinatayuktokan niining buluhatona sa miingon siya: “Kining maayong balita sa gingharian igawali sa tibuok gipuy-ang yuta ingon nga pamatuod sa tanang nasod; ug dayon moabot ang kataposan.”—Mateo 24:14.
Dili na Madugay!
Ang makita nga ebidensiya nagpamatuod nga ang kahikayan sa pagpuli sa matarong nga kagamhanan sa Diyos sa adlaw-adlaw nga pagmando sa yuta duol nang makompleto. Human sa pagbatbat sa makalilisang nga sangpotanan sa kapakyasan sa tawhanong kagamhanan nga atong nakita sulod niining sigloha, si Jesus miingon: “Inigkakita ninyo nga nagakahitabo kining mga butanga, hibaloi nga haduol na ang gingharian sa Diyos.”—Lucas 21:10, 11, 31.
Sa dili madugay, pagawagtangon sa Diyos ang mga daotan gikan sa yuta. Ang mga pulong sa salmista makabatog literal nga kapadapatan: “Ang mga mamumuhat ug daotan pagaputlon . . . Sa dili na madugay, ug ang daotan mawala na; ug imong pagasusihon ang iyang dapit, ug siya mawala na.” (Salmo 37:9, 10) Mahanduraw mo ba ang usa ka kalibotan nga walay pagkadaotan? Kinsa unya ang magdumala sa kahikayan sa katawhan? Ang Bibliya nagaingon: “Ang usa ka hari [si Kristo Jesus nga naentrono sa mga langit] magahari sa pagkamatarong mismo; ug mahitungod sa mga prinsipe [iyang maunongong mga tinudlo sa yuta], sila magamando ingong mga prinsipe alang sa hustisya. Ug ang buhat sa matuod nga pagkamatarong mahimong pakigdait; ug ang pag-alagad sa matuod nga pagkamatarong, pagkamalinawon ug kasegurohan sa panahong walay tino. Ug ang akong katawhan magapuyo sa malinawong puluy-anang dapit ug sa mga puluy-anan nga may bug-os nga pagsalig ug sa wala-matugaw nga mga dapit-pahulayanan.”—Isaias 32:1, 17, 18.
Sa maong paagi, ang langitnong kagamhanan sa Diyos maghanaw sa daotang mga epekto sa buhat nga daotan sa tawo ug mag-organisar niadtong nagalaom diha Kaniya ngadto sa usa ka may-panag-uyon tawhanong katilingban. Sa pagbatbat sa maong panag-uyon, ang Bibliya nagaingon: “Ang lobo magapuyo sa makadiyut ipon sa laking nating karnero, ug ang leopardo mohigda uban sa nating kanding, ug ang nating baka ug ang balhiboong nating leyon ug ang pinatambok nga hayop manag-ipon; ug ang usa lamang ka gamay nga bata ang mangulo kanila . . . Dili sila magadaot o magalaglag sa tibuok ko nga bukid nga balaan; tungod kay ang yuta mapuno sa kahibalo kang Jehova sama nga ang katubigan nagatabon sa dagat mismo.”—Isaias 11:6-9.
Pagkanindot nga sangpotanan sa pagpailob sa Diyos! Busa, inay moreklamo nga dugay kaayong nagpaabot ang Diyos, nganong dili pahimuslan ang iyang pailob aron magpasakop sa iyang Gingharian? Kat-oni gikan sa Bibliya kon unsa ang iyang mga sukdanan ug magpahiuyon kanila. Makig-uban sa uban pa nga nagapasakop nga may panag-uyon kaniya. Unya, ang pailob sa Diyos mosangpot sa walay-kataposang mga panalangin alang kanimo.