Ang Kapapahan—Gitukod ba ni Kristo?

“TALI kang Pedro, ang unang Obispo sa Roma, ug ang atong papa karon, si Juan Paulo II, nagpadayon ang hataas nga linya sa supremong mga papa​—sa pagkatinuod, kapin sa 260.” Matud pa sa Katolikong pari si Anthony Foy diha sa The Southern Cross, usa ka senemanang basahon sa habagatang Aprika. Siya nagpadayon: “Ngadto niining wala mabugtong linya sa mga papa nga kita masaligong makatudlo, kon kita suknaon sa pagpamatuod nga ang Iglesia Katolika tinukod ni Jesu-Kristo.”

Malig-on bang ikaingon nga kining hataas nga linya sa mga papa nagsugod kang apostol Pedro? Sumala sa teolohiyang Katoliko, upat ka papa, sila Linus, Anacletus, Clement I, ug Evaristus, ginaingong mipuli kang Pedro hangtod sa tuig 100 K.P. Ang Bibliya tinuod nga naghisgot bahin sa usa ka Kristohanon nga ginganlag Linus nga nagpuyo sa Roma. (2 Timoteo 4:21) Apan, walay gisugyot nga si Linus, o si bisan kinsa, maoy usa ka manununod ni Pedro ingong papa. Si apostol Juan, nga misulat ug lima ka basahon sa Bibliya sa kataposang dekada sa unang siglo, wala maghisgot sa bisan hain sa itaas nga gitawag-konohay nga mga manununod ni Pedro. Sa pagkamatuod, kon dunay manununod si Pedro, dili ba ang makataronganong pilion mao si Juan mismo?

Mahitungod sa pangangkon nga si Pedro mao ang unang obispo sa Roma, walay pamatuod gani nga siya nakaduaw sa maong siyudad. Sa pagkamatuod, si Pedro mismo miingon nga iyang gisulat ang iyang unang sulat gikan sa Babilonya. (1 Pedro 5:13) Walay basehanan ang argumento sa Katoliko nga gigamit ni Pedro ang “Babilonya” ingong tagong pagpunting sa Roma. Ang tinuod nga Babilonya naglungtad na man sa panahon ni Pedro. Dugang pa, ang Babilonya may igong gidak-on sa Hudiyong komunidad. Sanglit gitudlo ni Jesus si Pedro sa pagpunting sa iyang pagsangyaw diha sa sirkunsadong mga Hudiyo, makataronganon ang pagtuo nga si Pedro miduaw sa Babilonya alang niini nga katuyoan.​—Galacia 2:9.

Matikdi, usab, nga si Pedro wala gayod maghisgot ug bisan unsa bahin sa iyang kaugalingon gawas lamang nga siya usa ka apostol ni Kristo. (2 Pedro 1:1) Dili makita sa Bibliya nga siya gitawag “Balaang Amahan,” “Supremong Papa,” o “Papa” (Latin, papa, usa ka mabinationg termino alang sa “Amahan”). Hinunoa, iyang mapaubsanong gituman ang mga pulong ni Jesus sa Mateo 23:9, 10: “Dugang pa, walay bisan kinsang tawo dinhi sa yuta nga inyong pagatawgong inyong amahan, kay kamo adunay usa lamang ka Amahan, ang Usa nga langitnon. Ayaw usab kamo pagpatawag ug ‘mga pangulo,’ kay usa lang ang inyong Pangulo, ang Kristo.” Si Pedro wala magpasimba. Sa dihang ang Romanong senturyon nga si Cornelio “mihapa sa iyang tiilan ug misimba kaniya . . . , gipatindog siya ni Pedro, nga miingon: ‘Tindog; kay tawo usab ako.’”​—Buhat 10:25, 26.

Kon mahitungod sa 260 ka ginaingong mga papa, ang paring si Foy miadmiter: “Daghan ang di-takos sa ilang hataas nga katungdanan.” Sa pagsulay sa pagpakamatarong niini, ang New Catholic Encyclopedia nag-ingon: “Ang hinungdanon alang sa mga katuyoan sa kagamhanan mao ang katungdanan, ug dili ang personal nga kinaiya sa indibiduwal nga papa. Tingali siya sa personal usa ka santo, ordinaryo lang, o kaha salbahis.” Apan makatuo ka ba nga gamiton ni Kristo kining mga tawhana sa paghawas kaniya?

Busa, ang pangangkon nga ang kapapahan gitukod ni Jesus sa yano wala suportahi sa Bibliya. Sumala sa Encyclopedia of Religion, bisan ang modernong Katolikong mga eskolar midawat nga “walay direktang biblikanhong pamatuod nga gitukod ni Jesus ang kapapahan ingong usa ka permanenteng katungdanan sulod sa iglesya.”