Ang Buotang Romanong Senturyon
ANG Romanong mga senturyon wala makabatog dungog sa pagkabuotan. Gitudlo nga maoy mangulo sa panon sa usa ka gatos ka sundalong anad-sa-gubat, ang senturyon kinahanglang maoy usa ka banggiitang sarhentong-tigbansay, tigdisiplina, ug, usahay, usa ka berdugo. Bisan pa niana, ang Bibliya nag-asoy kanato bahin sa usa ka Romanong senturyon sa panon ni Augusto nga nagpakitag tinuod nga pagkamanggihatagon ug kaluoy kang apostol Pablo. Ang iyang ngalan? Si Julio.
Ang Bibliya nagpailaila kanato niining tawhana diha sa Buhat kapitulo 27. Si apostol Pablo mihangyo nga pamation ni Cesar ang iyang pag-apelar didto sa Roma. Busa, si Pablo, uban sa daghang mga binilanggo, gitugyan ngadto sa pagbantay sa “usa ka opisyal sa kasundalohan nga ginganlag Julio sa panon ni Augusto.” Sila milawig gikan sa Cesaria, usa ka dunggoanang siyudad sa amihanan-kasadpan sa Jerusalem nga nagsilbing hedkuwarter sa Romanong mga sundalo. Ang historyador nga si Lucas miingon: “Ug sa pagkasunod nga adlaw nahidunggo kami sa Sidon, ug si Julio nagmaluluton sa pag-atiman kang Pablo ug iyang gitugotan siya sa pag-adto sa iyang mga higala aron ilang tagdon.”—Buhat 27:1-3.
Kon unsay nagpalihok kang Julio sa pagpakitag kalulot wala kini hisgoti sa Bibliya. Tingali siya gisugo ni Gobernador Festo sa paghatag kang Pablo ug linaing pagtagad. O kaha kay nahibalo sa mga kahimtang sa pagkadakop kang Pablo, si Julio tingalig nakadayeg lang sa kaisog ug integridad ni Pablo. Bisag unsa pa man, si Julio daw nakasabot nga si Pablo dili usa ka ordinaryong binilanggo.
Apan, mipili si Julio sa dili pagpamati sa pasidaan ni Pablo sa dili paglawig gikan sa Maayong mga Dunggoanan. Sa ulahi ang sakayan naabtag unos nga nameligrong masangyad sa kamabwan sa amihanang Aprika. (Buhat 27:8-17) Samtang gikusokuso sa hangin, mibarog si Pablo ug gipasaligan ang nangahadlok nga mga pasahero nga ‘walay usa ka kalag kaninyo ang mapildihag kinabuhi, gawas sa sakayan.’ Sa gihapon, ang pipila ka sakayanon sa ulahi misulay sa pag-eskapo. Unya giingnan ni Pablo si Julio: “Gawas kon magpabilin kining mga tawhana sa sakayan, dili ka gayod maluwas.”—Buhat 27:21, 22, 30, 31.
Niining panahona, mipili si Julio sa pagpamati kang Pablo, ug napakyas ang mga sakayanon sa pag-eskapo. Matuod sa panagna ni Pablo, ang sakayan nasangyad sa kamabwan ug naguba. Nahadlok nga makaeskapo ang mga binilanggo, gustong patyon sa mga sundalo silang tanan. Apan, sa makausa pa, mibabag si Julio ug gipugngan ang iyang mga tawo, busa naluwas ang kinabuhi ni Pablo.—Buhat 27:32, 41-44.
Ang Bibliya wala mag-asoy kanato kon unsay gidangatan niining buotang senturyon o kon siya ba midawat sa Kristohanong pagtuo. Bisan unsa pay kalulot nga iyang gipakita kini maoy usa ka pasundayag sa paglihok sa hinatag sa Diyos nga konsensiya. (Roma 2:14, 15) Ang mga Kristohanon, hinunoa, mohimo ug labaw pa kay sa tawhanong kabuotan ug nagapakitag diyosnong kalulot nga resulta sa pagbaton sa espiritu sa Diyos. (Galacia 5:22) Dayag, kon ang paganong sundalo nga wala makaila sa Diyos nakahimo sa pagpasundayag ug kabuotan, unsa pa kaha ang katawhan sa Diyos nga matukmod sa pagpakita niana!