Pagpabiling Suod sa Organisasyon sa Diyos

SUMALA SA ASOY NI ROY A. RYAN

Sandhill, Missouri, bagay nga pagkangalan, sanglit kini labaw lang ug diyutay sa usa ka dakong bungtod sa balas diha sa bakanteng bungtoron nga banikanhan. Kining sangang-dalan nga baryo nahimutag mga 5 kilometros sa kasadpang dapit sa Rutledge ug may walo o siyam ka mga balay, usa ka simbahan sa Methodist, ug usa ka gamay nga salsalan ug puthaw. Dinha ako natawo niadtong Oktubre 25, 1900.

ANG akong amahan mao ang mananalsal sa baryo. Bisan tuod ang akong mga ginikanan tagsa rang mosimba, ako gipapatungha sa akong Inahan sa Dominggong tunghaan sa Methodist Church. Ako wala makauyon sa ngalang Methodist, kay ako nagtuo nga ang usa ka tawo dapat pagatawgon nga Kristohanon; apan hinoon nakaugmad ra kog kauhaw alang sa kamatuoran sa Bibliya ug kaikag sa kinabuhing dayon.

Sa nagpanuigon na kog 16 anyos, ako mitrabaho alang sa riles sa tren sa Santa Fe. Usa sa Internasyonal nga mga Estudyante sa Bibliya (ingong tawag sa mga Saksi ni Jehova kaniadto) nga ginganlag Jim miabot sa pagtrabaho duyog sa among grupo, ug sa makadaghan nagkauban mi sa pagtrabaho. Si Jim mosulti, ug ako maminaw sa kon unsay iyang ikasulti labot sa Bibliya. Kadto maayong pamation alang kanako, busa ako mihangyo kon ako ba makahulam sa usa sa iyang mga libro.

Si Jim nagpahulam kanako sa unang tomo sa Studies in the Scriptures, nga giluwatan ni C. T. Russell sa International Bible Students Association. Sa giuli ko na kadto, nagpakuha ako kaniya ug dugang pang mga tomo. Sa wala madugay human niana, si Jim mibiya sa trabaho sa riles, ug ang sunod panahon nga hikit-an ko siya didto na sa dalan sa Rutledge, nga nagdawat ug mga order alang sa ilustradong libro Scenario of the Photo-Drama of Creation. Sa ulahi siya nag-imbita kanako sa mga panagkatigom sa grupo nga gihimo sa iyang balay. Matag Dominggo, ako mobaktas ug 5 kilometros ngadto sa Rutledge alang sa panagkatigom.

Sa dihang ang Golden Age nga magasin (karon Pagmata!) gipasugod niadtong 1919, buot kong mosugod sa pagsangyaw sa kanataran. Ang laing bag-ong Estudyante sa Bibliya ug ako determinado sa pag-apod-apod ning bag-ong magasin gikan sa pultahan ngadto sa pultahan. Kami daw nakabatig kahadlok labot sa pagbisita sa katawhan diha sa among lungsod, busa kami misakay sa tren ug miadto sa kasikbit nga lungsod. Sa among pag-abot sa buntag, ang matag-usa kanamo nag-iyahay sa paglakaw ug nanuktok sa mga ganghaan hangtod sa hapon, bisan tuod kami wala mabansay ning buluhatona. Ako midawat ug mga order alang sa duha ka suskrisyon, ang usa gikan sa tawo nga nakauban nako sa trabaho sa riles.

Sa Oktubre 10, 1920, ako gibawtismohan sa usa ka lanaw duol sa Rutledge. Ang akong mga ginikanan supak sa akong pagkalangkit uban sa Internasyonal nga mga Estudyante sa Bibliya. Kini tungod sa inspirado-sa-klerigo nga pagsupak nga nasinatian sa mga Estudyante sa Bibliya sa mga katuigan sa gubat sa 1914-18. Sa ulahi, hinuon, ang akong amahan nagsugod pagtambong sa pipila ka mga tigom sa mga Estudyante sa Bibliya, ug siya nagbasa na sab sa The Golden Age. Sa wala pa mamatay, ang akong inahan nahimong labing mauyonon sa atong pagsabot sa kamatuoran sa Bibliya. Apan walay mausa sa akong pamilya ang nakadawat sa maong kamatuoran.

Usa ka Panahon sa Pagsulay

Niadtong sayong mga adlaw, dihay mga tutulo lamang gawas kanako nga regular nagatambong sa mga tigom sa pagtuon sa Bibliya sa Rutledge. Kining tulo sa kadugayan mingbiya ra sa organisasyon. Ang usa maayong mamumulong, kinsa naghatag ug mga pakigpulong sa Bibliya diha sa dapit. Ugaling, siya nahimong garboso sa iyang mga katakos ug mibati nga ubos sa iyang dignidad ang pagpakig-ambit sa pagwali diha sa balay-ug-balay sama sa gibuhat sa sayong mga Kristohanon.​—Buhat 5:42; 20:20.

Sa dihang mihunong na kining tulo sa pagpakig-uban sa Internasyonal nga mga Estudyante sa Bibliya, ako nahinumdom nga mibati sama sa kang apostol Pedro sa panahon nga si Jesus nagsulti sa katawhan bahin sa ‘pagkaon sa unod ni Jesus ug pag-inom sa iyang dugo.’ Kay nangapandol sa iyang pagtulon-an, daghan ang mingbiya kaniya sa maong okasyon. Mao nga, si Jesus misukna sa mga apostoles: “Kamo dili ba buot mobiya usab, dili ba?” Si Pedro mitubag: “Ginoo, kang kinsa man kami moadto? Ikaw ang may mga pulong sa kinabuhing dayon.”​—Juan 6:67, 68.

Bisan tuod si Pedro wala makasabot sa bug-os kon unsa ang buot ipasabot ni Jesus sa ‘pagkaon sa unod ni Jesus ug pag-inom sa iyang dugo,’ siya nakaila nga si Jesus may mga pulong sa kinabuhi. Kana mao ang akong pagbati bahin sa organisasyon. Naa niini ang kamatuoran bisan tuod dili sa tanang higayon nga nasabtan nako sa bug-os ang tanan nga akong nabasa diha sa mga publikasyon. Hinunoa, kon naa may butang nga gikasulti nga wala nako hisabti, wala gayod ako makiglalis batok niana. Sa kaulahian, ang butang mapatin-aw ra, o ang mga panlantaw ipasibo usahay. Ako malipayon kanunay nga sa mapailobon nakahulat alang sa katin-awan.​—Proverbio 4:18.

Mga Pagpasibo sa Pagpayunir

Sa Hulyo 1924, mitambong ako sa internasyonal nga kombensiyon sa Columbus, Ohio. Ang The Golden Age nagbatbat niini ingong “ang labing dakong kombensiyon sa mga Estudyante sa Bibliya nga gihimo sulod sa kapanahonan.” Didto ang maukayon nga resolusyong “Indictment” gisagop. Ang nadawat nga impormasyon ug ang napadayag nga espiritu niadtong kombensiyona nakapadasig kanako nga mahimong bug-os-panahong ministro, o payunir.

Sa akong pagpauli gikan sa kombensiyon, miundang ako sa akong trabaho sa riles, ug kuyog sa usa ka Estudyante sa Bibliya kami nagsugod pag-alagad ingong mga payunir. Ugaling, tapos sa mga usa ka tuig, ang panglawas sa akong mga ginikanan nagkadaot hangtod sa punto nga sila nanginahanglan sa akong tabang. Ako mihunong sa pagpayunir ug mitrabaho sa kompaniya sa linya-sa-tubo, apan sanglit ang mga tawo nga nakauban sa trabaho didto dili maayong impluwensiya, gibiyaan nako ang maong trabaho ug misugod sa negosyong pagbuhi ug mga putyukan ug sa pagbaligya ug dugos.

Sa tinglarag sa 1933, ang akong mga ginikanan nangamatay na, nga nakapahigawas kanako sa mga obligasyon. Busa sa tingpamulak sa 1934, akong gipaatiman ang akong mga putyukan sa laing tawo, nagbuhat ug gamay nga treyler nga kapuy-an, ug misugod na usab sa bug-os panahong pagministeryo ingong usa ka payunir. Sa sinugdanan ako nagpayunir kauban ang usa ka edarang Saksi diha sa kanaitan sa Quincy, Illinois. Sa kaulahian ako mibalik sa Missouri, diin ako mikuyog sa usa ka grupo sa mga payunir.

Sa 1935 dihay grabeng hulaw sa Tungang-kasadpan, ug sanglit kami nagbuhat diha sa bug-os agrikultural nga dapit, kadto maoy lisod kaayo. Walay mausa ang may salapi, busa ang mapasalamatong mga tawo subsob mohatag kanamo ug mga kalan-on o ubang mga butang baylo sa among literatura.

Pagpayunir sa Habagatan

Niadtong tingpamulaka kami mipailawod sa Arkansas sa paglikay sa tugnawng panahon. Nakahimo mi pag-apod-apod ug daghang literatura sa maong dapit ug kami nakadawat sa tanang mga de-latang pagkaon nga among maggamit. Sagad kami modawat ug laing mga butang nga masapian, lakip ang karaang galamiton sa kusina nga aluminum, karaang bronsi o tumbaga, karaang mga radyetor ug mga baterya sa kotse. Kini ang mihatag namo ug salapi panggasolina alang sa akong Model A Ford, nga among gigamit sa ministeryo.

Kami nag-alagad sa mga lungsod sa Newton, Searcy, ug Carroll diha sa bukirong Ozark Plateau. Ang mga kasinatian sa among pagwali sa mga katawhan didto sa bukid sa Arkansas makapuno ug usa ka libro. Sanglit mga kinaraan pa o wala ganiy mga karsada niadtong mga adlawa, kami kasagaran nga nagbaktas sa kadaghanan sa among pagsangyaw. Ang pipila ka mga payunir sa among grupo mosakay ug kabayo sa pag-adto sa mga tawo sa taas-taas nga dapit sa mga bukid.

Kas-a kami nakadungog bahin sa usa ka interesadong tawo nga ginganlag Sam, kinsa amo ra gayod nakaplagan nga nagpuyo sa tumoy sa bukid. Siya maikagong miabiabi kanamo ug malipayon sa pagpakatulog kanamo sa usa ka gabii. Bisan pag ang asawa ni Sam walay kaikag sa among mensahe, ang iyang 16 anyos nga anak lalaki, si Rex, interesado. Sa pagbiya namo, si Sam nag-imbita kanamo sa pagbalik. Busa duha ka semana sa ulahi, kami miestar na usab sa ila.

Sa pagbiya sa ikaduhang higayon, ang asawa na ni Sam ang nag-imbita kanamo nga mobalik. Matud niya nga kami maayong impluwensiya kang Rex. “Siya himalikas kaayo,” siya mipahayag, “ug ako makasulti nga siya dili na ingon ka himalikas sukad nga mianhi mo.” Mga katuigan sa ulahi nahibalag nako si Rex pag-usab sa dihang siya nagtambong sa misyonerong tunghaan sa Gilead sa Habagatang Lansing, Nueva York. Ang mga kasinatian nga sama niini nakahatag kanako ug dakong katagbawan latas sa mga katuigan.

Pag-alagad sa Bethel

Sa akong pag-aplay sa pagpayunir, ako usab miaplay sa pag-alagad sa pangunang-buhatan sa mga Saksi ni Jehova sa Nueva York, gitawag nga Bethel. Sa tingpamulak sa 1935, ako gipahibalo nga ang akong aplikasyon gidawat ug nga ako moadto sa Umahan sa Gingharian sa Sosyedad sa Watchtower sa Habagatang Lansing, Nueva York, aron pagsugod sa akong pag-alagad sa Bethel. Dihadiha gihikay nako nga ang usa ka kaubang Saksi maoy mobanos sa akong payunir treyler.

Sakay sa akong kotseng Model A Ford ako mipadulong sa Nueva York, ug ako miabot sa mga alas diyesimedia sa buntag sa Mayo 3, 1935. Sa mga ala-una sa hapon, ako gipabugha ug kahoy. Sa sunod adlaw ako gisultihan sa pag-adto sa kuwadra sa gatasan aron pagtabang sa paggatas sa mga baka. Ako nagtrabaho sa gatasan sa pipila ka mga tuig, usahay maggatas sa buntag ug gabii ug motrabaho kuyog sa mga magtitikad sa umahan sa maadlaw. Giatiman sab nako ang mga putyukan ug giani ang dugos alang sa pamilyang Bethel. Sa 1953, ako gibalhin ngadto sa departamento nga nagagama ug keso.

Usa sa mga nakatandog sa akong kinabuhi tungod sa iyang maayo kaayong panig-ingnan sa kamapainubsanon, kamatinud-anon, ug kamasinundanon kang Jehova mao si Walter John “Pappy” Thorn. Siya usa sa mga 21 ka Estudyante sa Bibliya nga gitudlo niadtong 1894 nga mahimong unang mga pilgrim​—mga lalaki kansang buluhaton sama sa karong magtatan-aw sa sirkito—​nga magbisita ug ubay-ubayng mga kongregasyon sa pagdasig kanila. Pagkatapos sa daghang tuig sa nagapanaw nga buluhaton, si Brader Thorn miabot sa Umahan sa Gingharian ug nagtrabaho sa kulongan sa manok. Sa daghang higayon nadungog ko siyang moingon: “Sa matag panahon nga maghunahuna akog labaw sa akong kaugalingon, akong dalhon ang akong kaugalingon sa suok, ingnon ta, ug sultihan: ‘Ikaw diyutayng lugas sa abog. Unsa may naa nimo nga imong ikapasigarbo?’”

Laing makasaranganong tawo nga nahimong sulundan alang kanako mao si John Booth, karon usa ka membro sa Nagamandong Lawas sa mga Saksi ni Jehova. Siya kanunay nang kutloon latas sa katuigan sa iyang panultihon: “Dili hinungdanon kon haing dapita ka nagaalagad apan kon kinsa ang imong gialagaran mao ang tinuod nga hinungdanon.” Usa ka yanong pahayag apan dakong tinuod! Ang pag-alagad kang Jehova mao ang labing dakong pribilehiyo!

Usa sa mga halandomong yugto sa akong pag-alagad sa Bethel mao ang pagbukas sa misyonerong tunghaan sa Gilead diha sa Umahan sa Gingharian sa 1943. Ang pakigsandurotay sa mga payunir gikan sa daghang dapit sa kalibotan sa tinuoray makapatandog. Niadtong mga adlawa dunay usa ka gatos ka mga estudyante matag saring, busa matag unom ka bulan laing bag-ong usa ka gatos moabot sa Umahan sa Gingharian. Ang mga panahon sa graduwasyon makapadugok ug kaliboan ka mga tawo nganhi sa edukasyonal nga pasilidad sa rural nga kaumahan sa ilaya sa Nueva York.

Kausaban sa Trabaho

Sa dihang ang tunghaan sa Gilead gibalhin sa Brooklyn ug ang pangunang dormitoryo ug saring-lawak nga tinukod sa Habagatang Lansing gibaligya, ang gatasan gibalhin sa Umahan sa Watchtower sa Wallkill, Nueva York. Busa sa tinglarag sa 1969, ako gibalhin ngadto sa umahan sa Wallkill ug nagpadayon sa paghimo ug keso hangtod 1983. Unya ako gihatagag laing trabaho, ug ako misugod pagtrabaho sa landscaping.

Samtang giinterbyo sa miagi, gipangutana ako kon unsay akong panghunahuna labot sa kausaban sa trabaho human sa 30 ka tuig nga paghimo ug keso. “Kana wala makasamok kanako,” prangka nakong tubag, “sanglit wala bitaw ko makaangay pagbuhat ug keso.” Ang punto mao nga kita mahimong malipayon sa pag-alagad kang Jehova sa bisan unsang buluhaton kon huptan nato ang hustong panlantaw ug sa kamapaubsanon mopasakop sa teokratikanhong pagtultol. Busa bisan tuod wala gayod ako makaangay pagbuhat ug keso, ako nalipay sa maong buluhaton sanglit kana nakatabang sa pamilyang Bethel. Kon alagaran nato ang atong dako uyamot nga Diyos, si Jehova, sa kamatinumanon ug walay pagbagotbot, kita mahimong malipayon bisag unsa ang atong buluhaton.

Sa mga katuigan nga ako luya na, ako wala maghunahuna nga may mas maayong kahimtang pa kay sa pag-alagad sa Bethel. Maayo ang pagkaatiman kanako ug nakapadayon ako sa pagtuman sa akong mga buluhaton bisan tuod ako 90 anyos na. Sa daghang katuigan na karon, ako nakapribilehiyo nga makatuka sa pagpanguna sa programa sa buntag nga pagsimba sa pamilyang Bethel dinhi sa Umahan sa Watchtower. Kutob sa naay higayon, akong dasigon ang mga bag-ohan sa Bethel sa pagpahimulos sa tanang pribilehiyo sa pag-alagad nga ikahatag kanila ug sa pagkat-on nga makontento ug magkalipay niana.

Latas sa mga katuigan, ako nakahimo sa pagbisitag makadaghan sa mga langyaw nga dapit​—India, Nepal, ang Halayong Silangan, ug Uropa. Ang mosunod nga pahimangno tingali makatabang sa mga katawhan ni Jehova dinha sa ilang kaugalingong mga kongregasyon libot sa kalibotan: Magmalipayon ug magmakontento sa inyong presenteng kahimtang ug magmalamboon sa espirituwal nga paagi diha sa yuta diin kamo gikatanom.

Gipili nako nga magpabilin nga nag-inusara, sanglit kana nakapaarang kanako sa pagpadayon nga dili mabalda sa akong pag-alagad sa Diyos. Ingong ganti sa pagkamatinumanon, ang atong dakong Diyos naghatag ug kalaoman sa kinabuhing dayon. Alang sa daghan, kana nagkahulogan sa walay kataposang kinabuhi sa usa ka paraisong puy-anan dinhi sa yuta. Kami nga uban pa nagalantaw sa unahan ngadto sa walay kataposang kinabuhi sa mga langit, nga mag-atiman kon unsay buluhaton nga ihatag kanamo.

Ang pipila maghunahuna nga ang akong 90 anyos usa ka hataas, dagaya nga kinabuhi. Ang akong kinabuhi dagaya apan dili ra kaayo taas. Pinaagi sa pagpabiling suod sa organisasyon sa Diyos ug sa iyang mga pulong sa kamatuoran, kita makalugway sa atong mga kinabuhi sa walay kataposan.a

[Footnote]

[Hulagway sa panid 26]

Si Brader Ryan sa dihang batabata pa tapad sa usa ka Model T Ford