Unsa ang Kahulogan sa Pagpasakop Diha sa Kaminyoon?
DIHANG maminyo ang usa ka Kristohanong babaye, daghang kausaban ang kinahanglan niyang himoon. Tingali ang labing dako niini makaapektar sa iyang kagawasan. Ingong usa ka nag-inusarang hamtong, tingali siya libre sa paghimog kaugalingong mga desisyon nga walay pagkonsulta sa uban. Apan karon nga siya aduna nay bana, siya obligado nga mokonsulta kaniya ug mangayog iyang permiso nga buhaton ang kadaghanang butang nga iyang ginahimo kaniato nga walay pagkonsulta. Nganong ingon niana?
Tungod kay sa dihang gikasal sa Maglalalang sa katawhan ang unang babaye sa lalaki, Iyang gitudlo ang lalaki nga mahimong ulo sa iyang asawa ug sa ilang umaabot nga mga anak. Kini makataronganon lamang. Diha sa bisan unsang organisadong grupo sa katawhan, kinahanglang dunay usa nga manguna ug mohimog pangataposang mga desisyon. Bahin sa kaminyoon, gisugo sa Maglalalang nga “ang bana maoy ulo sa iyang asawa.”—Efeso 5:23.
Sa pagpaluyo niini, ang balaang instruksiyon miingon: “Ang mga asawa kinahanglang magpasakop sa ilang masigkabana.” (Efeso 5:22) Kon sa unsang paagi maapektohan ang asawa niining kahikayana nagaagad sa duha ka butang: Una, unsa siya kaandam nga mopasakop sa kahikayan? ug ikaduha, sa unsang paagi gamiton sa iyang bana ang iyang awtoridad? Sa tinuod, kon lantawon sa hustong paagi sa mga magtiayon ang kahikayan, sila makakaplag nga kini usa ka pananglangin sa asawa, sa bana, ug sa ilang mga anak.
Dili Usa ka Mahariharion
Sa unsang paagi gamiton sa bana ang iyang awtoridad? Pinaagi sa pagsundog sa maayong panig-ingnan sa Anak sa Diyos. Ang Bibliya nagaingon: “Ang bana mao ang ulo sa iyang asawa sama nga si Kristo mao ang ulo sa kongregasyon, ug siya mao ang manluluwas niini. Kamong mga bana, padayong higugmaa ninyo ang inyong masigkaasawa, maingon nga si Kristo nahigugma sa kongregasyon ug mitugyan sa iyang kaugalingon alang niana.” (Efeso 5:23, 25) Ang pagdumala ni Jesu-Kristo sa iyang pagkaulo maoy usa ka panalangin alang sa kongregasyon. Siya dili mahariharion. Wala niya himoa nga mobati ang iyang mga tinun-an nga pinig-otan o dinaogdaog. Hinunoa, nakuha niya ang pagtahod sa tanan pinaagi sa iyang mahigugmaon ug mabinationg pagtagad kanila. Pagkamaayong panig-ingnan alang sa mga bana nga sundogon ang maong pagtagad ngadto sa ilang masigkaasawa!
Adunay mga bana, hinunoa, nga dili mosundog niining maayong panig-ingnan. Ilang gamiton ang ilang hinatag-Diyos nga pagkaulo sa hinakog nga paagi, inay kay sa kaayohan sa ilang masigkaasawa. Ilang dominahon ang ilang mga asawa sa mahariharion nga paagi, mangayog bug-os nga pagpasakop ug sagad dili magtugot kanila nga mohimog ilang kaugalingong mga desisyon. Hisabtan, ang mga asawa sa maong mga bana sagad nagkinabuhi nga di-malipayon. Ug ang maong bana usab mag-antos tungod niana kay siya dili makabaton ug mahigugmaong pagtahod sa iyang asawa.
Tinuod, ang Diyos nag-awhag sa usa ka asawa nga tahoron ang posisyon nga gihuptan sa iyang bana ingong ulo sa pamilya. Apan kon tinguhaon sa bana nga matagamtam ang iyang kinasingkasing nga pagtahod alang kaniya ingong tawo, kinahanglang iyang kugihan kini, ug ang labing maayong paagi sa pagbuhat niana maoy pinaagi sa paglihok nga responsable ug ugmaron ang maayo, diyosnong mga hiyas ingong ulo sa pamilya.
Ang Pagpasakop Dili Bugos
Ang awtoridad sa bana sa iyang asawa dili bug-os. Sa pila ka paagi ang pagpasakop sa asawa ikatandi sa pagpasakop sa usa ka Kristohanon diha sa usa ka kalibotanong magmamando. Ang Diyos nagsugo nga ang usa ka Kristohanon kinahanglang “magpasakop sa labawng mga pagbulot-an.” (Roma 13:1) Apan kini nga pagpasakop kinahanglang sa kanunay timbangan sa atong nautang sa Diyos. Si Jesus miingon: “Bayri ninyo si Cesar sa mga butang nga iya ni Cesar, ug ang Diyos sa mga butang nga iya sa Diyos.” (Marcos 12:17) Kon pangayoon ni Cesar (ang sekular nga kagamhanan) ang mga butang nga iya sa Diyos, atong hinumdoman ang giingon ni apostol Pedro: “Kinahanglan maoy among unahon pagsugot ang Diyos inay ang mga tawo.”—Buhat 5:22.
Diha sa daw susama nga paagi, kon ang usa ka Kristohanong babaye naminyo sa usa ka lalaki nga wala makasabot o walay pagtahod sa Kristohanong mga prinsipyo, siya, bisan pa, obligado nga magpasakop kaniya. Imbes supakon kining tinudlo-sa-Diyos nga kahikayan, maayong iyang pakitaan siya ug gugma ug konsiderasyon ug sa ingon naningkamot nga maangkon ang iyang pagsalig. Tingali ang maong maayong paggawi makapausab sa iyang bana; basig makapadani pa kini kaniya sa kamatuoran. (1 Pedro 3:1, 2) Kon siya sugoon sa iyang bana sa pagbuhat ug butang nga gidili sa Diyos, angay niyang hinumdoman nga ang Diyos maoy iyang pangunang Magmamando. Pananglitan, kon sugoon siya sa iyang bana sa pagpakigbahin sa mangil-ad nga buhat sa sekso, sama sa pagbayloay ug asawa, siya kinahanglang dili mouyon. (1 Corinto 6:9, 10) Ang pagpasakop sa iyang bana gimandoan pinaagi sa iyang konsensiya ug pinaagi sa iyang pangunang pagpasakop sa Diyos.
Sa panahon ni Haring David, si Abigail naminyo kang Nabal, usa ka tawo nga walay pagtahod sa mga prinsipyo sa Diyos ug kinsa mapintason ug dili-mahigugmaon kang David ug sa iyang mga tawo. Sila ang nanalipod sa libolibong mga karnero ug mga kanding ni Nabal, apan dihang nangayo si David ug amot nga pagkaon, wala mohatag si Nabal ug bisan unsa.
Sa pagkasayod nga ang kadalo sa iyang bana modalag kadaot sa iyang panimalay, si Abigail mihukom sa kaugalingon sa pagdalag pagkaon ngadto kang David. “Unya si Abigail midali ug mikuha ug duruha ka gatos ka buok tinapay ug duruha ka tadyaw nga bino ug lima ka karnero nga linuto na ug lima ka takos nga sinanglag nga trigo ug usa ka gatos ka torta nga may pasas ug duruha ka gatos ka torta nga higuera ug gitangkil kini diha sa mga asno. Unya siya miingon ngadto sa iyang batan-ong mga lalaki: ‘Lakaw kamo una kanako. Ania karon! Ako magasunod kaninyo.’ Apan wala niya suginli ang iyang bana nga si Nabal.”—1 Samuel 25:18, 19.
Sayop ba si Abigail sa paglihok nga supak sa kabubut-on sa iyang bana? Dili niining bahina. Ang pagpasakop ni Abigail wala magkinahanglang siya dili magmahigugmaon sama sa iyang bana, ilabina kay ang dili maalamong paglihok ni Nabal nagbutang sa iyang tibuok pamilya sa kapeligrohan. Busa, si David miingon kaniya: “Bulahan si Jehova ang Diyos sa Israel, nga nagpaanhi kanimo niining adlawa sa pagsugat kanako! Ug bulahan ang imong kamabuot.” (1 Samuel 25:32, 33) Sa susama, ang Kristohanong mga asawa karong adlawa dili angay mohimog kasamok ug morebelde sa pagkaulo sa ilang masigkabana, apan kon himoon nila ang di-kristohanong dalan, ang mga asawa dili mosunod kanila niining paagiha.
Tinuod, si Pablo sa iyang sulat ngadto sa mga taga Efeso miingon: “Ingon nga ang kongregasyon nagpasakop kang Kristo, busa kinahanglang ang mga asawa magpasakop sa ilang masigkabana sa tanang butang.” (Efeso 5:24) Ang paggamit sa apostol ug pulong dinhi nga “tanang butang” wala magpasabot nga walay limite ang pagpasakop sa mga asawa. Ang ekspresyon ni Pablo, “ingon nga ang kongregasyon nagpasakop kang Kristo,” nagpaila kon unsa ang anaa sa iyang hunahuna. Ang tanang gikinahanglan ni Kristo sa iyang kongregasyon maoy matarong, nga uyon sa kabubut-on sa Diyos. Busa, ang kongregasyon dali ug malipayong magapasakop kaniya sa tanang butang. Sa susama, ang asawa sa Kristohanong bana nga tim-os naningkamot sa pagsundog sa panig-ingnan ni Jesus malipayong magpasakop kaniya sa tanang butang. Siya nasayod nga siya nabalaka kaayo sa iyang mga kaayohan, ug siya nga may kahibalo dili gayod mohangyo kaniya sa pagbuhat sa bisan unsang butang nga supak sa kabubut-on sa Diyos.
Mahuptan sa bana ang gugma ug pagtahod sa iyang asawa sa dihang iyang ipabanaag ang diyosnong mga hiyas sa iyang ulo, si Jesu-Kristo, kinsa nagsugo sa iyang mga sumusunod nga maghigugmaay sa usa ug usa. (Juan 13:34) Bisan tuod ang bana masayop ug dili-hingpit, kon iyang dumalahon ang iyang awtoridad nga nahiuyon sa labaw nga pagkaulo ni Kristo, siya nagpasayon sa iyang asawa nga malipayong mobaton kaniya ingong iyang ulo. (1 Corinto 11:3) Kon palamboon sa usa ka asawa ang Kristohanong mga hiyas sa pagkamakataronganon ug mahigugmaong-kalulot, dili siya maglisod sa pagpasakop sa iyang bana.
Mapainubsanon ug Makataronganon
Ang mga bana ug mga asawa diha sa kongregasyon maoy espirituwal nga mga igsoong lalaki ug babaye nga may managsamag baroganan atubangan kang Jehova. (Itandi ang Galacia 3:28.) Apan, ang mga lalaki ang gitudlo sa Diyos nga mahimong magtatan-aw sa kongregasyon. Kini malipayong giila sa maayog kasingkasing nga mga babaye sa bug-os nga pagkamapinasakopon. Ug ang mabug-at nga obligasyon nga gipatong diha sa mga lalaki nga dili magharihari ibabaw sa panon sa mapainubsanon giila sa hamtong nga mga lalaki diha sa kongregasyon.—1 Pedro 5:2, 3.
Kon mao kana ang relasyon sa mga lalaki ug mga babaye diha sa kongregasyon, sa unsang paagi ipakamatarong sa Kristohanong bana ang iyang pagharihari sa iyang asawa, ang iyang espirituwal nga igsoong babaye? Ug sa unsang paagi ipakamatarong sa asawa ang pagpakig-indig uban sa iyang bana sa pagkaulo? Hinunoa, angay nilang tagdon ang usa ug usa ingon sa gitambag ni apostol Pedro sa tanang mga membro sa kongregasyon: “Kamong tanan angay magbaton ug samag hunahuna, magbinatiay, magbaton ug inigsoong gugma, may malumong kahangawa, ug mapaubsanon sa hunahuna.” (1 Pedro 3:8) Si Pablo usab mitambag: “Isul-ob ninyo ang malumong pagbati sa kahangawa, kalulot, mapaubsanon ug hunahuna, maaghop, ug hataas-ug-pailob. Padayon nga mag-inantosay kamo sa usa ug usa kaninyo ug kon aduna may pagmahay ang usa batok sa usa, magpinasayloay ang usa sa usa. Ingon nga si Jehova dagayang nagapasaylo kaninyo, nan kamo usab magapasaylo.”—Colosas 3:12, 13.
Ang maong mga tinamdan angayng palamboon diha sa kongregasyon. Ug kini ilabinang palamboon sa bana ug asawa diha sa Kristohanong panimalay. Ang bana makapakita sa iyang malumong kahangawa ug kaaghop pinaagi sa pagpamati sa mga sugyot sa iyang asawa. Angay niyang tagdon ang punto de bista sa iyang asawa sa dili pa mohimog desisyon nga makaapektar sa pamilya. Ang Kristohanong mga asawa dunay panghunahuna. Sila sagad makahatag sa ilang mga bana ug bililhong mga sugyot, ingon sa gibuhat ni Sarah sa iyang bana, nga si Abraham. (Genesis 21:12) Sa laing bahin, ang Kristohanong asawa sa pagkadili-makataronganon dili mamugos sa iyang bana. Iyang ipakita ang iyang kalulot ug kamapaubsanon sa hunahuna pinaagi sa pagsunod sa iyang pagtultol ug sa pagpaluyo sa iyang mga desisyon, bisag kini usahay dili iyang kagustohan.
Ang makataronganong bana, sama sa usa ka makataronganong ansiano, dali nga maduol ug maluloton. Ang mahigugmaong asawa mosanong pinaagi sa pagkamabination ug kamainantoson, nagaila sa paningkamot nga iyang ginahimo sa pagtuman sa iyang mga kaakohan bisan pa sa pagkadili-hingpit ug sa mga kalisod sa kinabuhi. Sa dihang ugmaron ang maong mga tinamdan sa bana ug asawa, ang pagpasakop diha sa kaminyoon dili mahimong usa ka suliran. Hinunoa, kini maoy tuboran sa kalipay, kasegurohan, ug malungtarong katagbawan.